وزیر اعلیٰ پنجاب مریم نواز نے کہا ہے کہ الیکشن کی کامیابی کے بعد اصل امتحان اب شروع ہوا ہے اور نومنتخب قیادت کو عوامی خدمت کے لیے دن رات ایک کرنا ہوگا،آزاد کشمیر کے غیور عوام نے دھنگا فساد، ہڑتالوں اور شر پسند عناصر کو ووٹ کی طاقت سے شکست دے کر ترقی اور استحکام کے حق میں فیصلہ دے دیا ہے۔
مسلم لیگ ن کی آزاد کشمیر پارلیمانی پارٹی کے اجلاس سے خطاب کرتے ہوئے انہوں نے کامیاب امیدواروں کو مبارکباد دیتے ہوئے واضح کیا کہ الیکشن کی کامیابی کے بعد اصل امتحان اب شروع ہوا ہے اور نومنتخب قیادت کو عوامی خدمت کے لیے دن رات ایک کرنا ہوگاجو عناصر عوام کو پاکستان سے لڑوانا چاہتے تھے وہ مکمل طور پر ناکام ہو چکے ہیں اور ن لیگ کے تمام جلسوں میں ‘پاکستان زندہ باد’ کے نعرے گونجتے رہے۔
انہوں نے انتخابی مہم کو کامیاب بنانے پر امیر مقام، رانا ثنا اللہ، سعد رفیق اور طارق فضل چوہدری اور دیگر ن لیگی رہنماؤں کی حکمت عملی کو سراہاان کا کہنا تھا کہ ن لیگ کو ملنے والی عزت اور عوامی اعتماد کے پیچھے قربانیوں کی ایک طویل داستان ہے اور تمام تر سازشوں اور مشکلات کے باوجود عوام نے ہمیشہ ن لیگ کی قیادت پر ہی اعتماد کیا ہے۔
وزیر اعلیٰ پنجاب نے منتخب ارکان کو ہدایت کی کہ فتح کے بعد اب کسی قسم کی شاہانہ تقاریب، ڈنر یا لنچز نہیں ہوں گے بلکہ تمام تر صلاحیتیں عوام کی فلاح و بہبود کے لیے وقف کی جائیں گی، ‘اللہ تعالیٰ جس کو فتح عطا فرماتا ہے، اسے عاجزی اختیار کرنی چاہیے’آزاد کشمیر کے دستیاب بجٹ کو انتہائی شفافیت کے ساتھ استعمال کرتے ہوئے لوگوں کو ان کا حق ان کی دہلیز پر پہنچایا جائے گا تاکہ آزاد کشمیر اپنے وسائل پر پاؤں پر کھڑا ہو سکے۔