Category: اوکاڑہ

اوکاڑہ (نامہ نگار ملک ظفر) اوکاڑہ میں پیٹرولنگ پولیس نے اوور لوڈ گاڑیوں کے خلاف بھرپور کریک ڈاؤن کرتے ہوئے 30 گاڑیوں کو مختلف تھانوں میں بند کرا دیا جبکہ ڈرائیوروں کے خلاف مقدمات بھی درج کر لیے گئے ہیں۔

پیٹرولنگ پولیس کے ترجمان کے مطابق ایس پی پیٹرولنگ لاہور ریجن فتح احمد کی خصوصی ہدایت پر شاہراہوں پر ٹریفک حادثات کی روک تھام کے لیے اوور لوڈڈ گاڑیوں کے خلاف سخت کارروائیاں شروع کر دی گئی ہیں۔ اس مہم کے دوران پیٹرولنگ پولیس نے مختلف شاہراہوں پر گشت کے دوران اوور لوڈنگ کی مرتکب 30 گاڑیوں کو موقع پر ہی تحویل میں لے کر مختلف تھانوں میں بند کرایا، اور مروجہ قوانین کے تحت ڈرائیوروں کے خلاف مقدمات درج کرائے گئے۔

ترجمان نے مزید کہا کہ اوور لوڈنگ نہ صرف ٹریفک قوانین کی سنگین خلاف ورزی ہے بلکہ یہ سڑکوں پر خطرناک حادثات کا بھی بڑا سبب بنتی ہے، جس کے نتیجے میں متعدد قیمتی جانیں ضائع ہو چکی ہیں۔ عوام، خصوصاً گاڑی مالکان اور ڈرائیورز کو خبردار کیا گیا ہے کہ وہ اوور لوڈنگ سے اجتناب کریں، بصورتِ دیگر ان کے خلاف قانون کے تحت سخت کارروائی کی جائے گی۔

پیٹرولنگ پولیس کا کہنا ہے کہ یہ مہم جاری رہے گی اور کسی بھی قسم کی خلاف ورزی پر بلاامتیاز کارروائی عمل میں لائی جائے گی تاکہ عوام کی جان و مال کے تحفظ کو یقینی بنایا جا سکے۔

اوکاڑہ(باغی ٹی وی،نامہ نگارملک ظفر) چوہدری ریاض الحق جج کے ویژن "تعلیم سب کے لیے” کے تحت گورنمنٹ پرائمری سکول 20 فور۔ایل کے طلبہ میں کاپیوں کا تحفہ تقسیم کیا گیا۔ اس موقع پر معروف سماجی کارکن ملک خالد یعقوب نے بچوں میں کاپیاں تقسیم کیں اور کہا کہ ہم اپنے قائد چوہدری ریاض الحق جج کے تعلیمی وژن کو عملی جامہ پہنا رہے ہیں تاکہ علاقے میں تعلیمی شعور کو فروغ دیا جا سکے۔

ملک خالد یعقوب کا کہنا تھا کہ تعلیم ہر بچے کا بنیادی حق ہے اور ہم چاہتے ہیں کہ کوئی بچہ تعلیم سے محروم نہ رہے۔ انہوں نے کہا کہ یہ صرف کاپیوں کی تقسیم نہیں بلکہ ایک بڑے مشن کی شروعات ہے جو علم کو عام کرنے اور نوجوان نسل کو بااختیار بنانے کا ذریعہ بنے گا۔

والدین اور اساتذہ نے اس اقدام کو سراہتے ہوئے کہا کہ ایسے اقدامات سے بچوں میں پڑھائی کا شوق بڑھتا ہے اور تعلیمی ماحول میں بہتری آتی ہے۔ اس موقع پر اسکول کے بچوں کے چہروں پر خوشی دیدنی تھی۔

اوکاڑہ (نامہ نگار ملک ظفر) ایڈیشنل ڈپٹی کمشنر فنانس و پلاننگ چوہدری عبدالجبار گجر کی زیر صدارت محکمہ صحت و آبادی پر مشتمل رابطہ کمیٹی کا اہم اجلاس منعقد ہوا جس میں ضلع بھر کے متعلقہ محکموں اور اداروں کے نمائندگان نے شرکت کی۔ اجلاس میں محکمہ صحت و آبادی کے تمام ضلعی افسران، کوآرڈینیشن کمیٹی کے اسٹیک ہولڈرز، پولیس، سپیشل برانچ اور محکمہ اوقاف کے نمائندے بھی شریک ہوئے۔

اجلاس کے دوران ڈسٹرکٹ پاپولیشن ویلفیئر آفیسر چوہدری عاصم ہدایت نے اجلاس کے صدر و شرکاء کو محکمہ کی ماہانہ کارکردگی، جاری پروگراموں اور آئندہ منصوبوں پر تفصیلی بریفنگ دی۔ انہوں نے جولائی 2025 سے شروع ہونے والی اے ڈی پی اسکیم "خاندانی منصوبہ بندی کو پروان چڑھانے کے لیے معاشرتی رائے عامہ کا فروغ” پر روشنی ڈالی۔ اس منصوبے کے تحت رجسٹرڈ علمائے کرام، آئمہ مساجد، خطباء اور بااثر سماجی شخصیات کو شامل کرکے خاندانی منصوبہ بندی کی اہمیت اجاگر کی جائے گی، اور تولیدی صحت کے متعلق مثبت رائے عامہ ہموار کرنے کی کوشش کی جائے گی۔

اجلاس سے خطاب کرتے ہوئے ایڈیشنل ڈپٹی کمشنر چوہدری عبدالجبار گجر نے کہا کہ اس منصوبے کی شفافیت اور مؤثر نتائج کے لیے تمام مکاتب فکر سے تعلق رکھنے والے علما اور خطبا کا انتخاب نہایت اہم ہے۔ انہوں نے کہا کہ سماجی یا مذہبی رہنما کسی بھی معاشرے میں مثبت رویوں اور قابلِ قبول اقدامات کے فروغ میں کلیدی کردار ادا کرتے ہیں۔

ان کا کہنا تھا کہ علمائے کرام، آئمہ، خطباء اور بااثر افراد اپنی سماجی حیثیت، رسوخ اور فکری قیادت کو بروئے کار لاکر معاشرے میں خاندانی منصوبہ بندی کے بارے میں شعور اجاگر کریں تاکہ صحت مند معاشرہ، معیاری تعلیم اور معاشی استحکام کی راہ ہموار ہو۔ انہوں نے تمام محکموں کو باہمی تعاون اور مربوط حکمتِ عملی کے ساتھ منصوبے کی کامیابی کو یقینی بنانے کی ہدایت بھی دی۔

اجلاس میں تمام شرکاء نے تجاویز و آراء پیش کیں اور پائیدار سماجی ترقی کیلئے کمیونٹی کی شمولیت کو ناگزیر قرار دیا۔ اجلاس کے اختتام پر آئندہ کی عملی حکمتِ عملی مرتب کرنے کیلئے ذیلی کمیٹیاں تشکیل دینے کا فیصلہ کیا گیا۔

اوکاڑہ (نامہ نگار ملک ظفر) مشن بنیان مرصوص کی کامیابی اور بھارتی جنگی عزائم کو ناکام بنانے پر قوم کی جانب سے اظہار تشکر کے طور پر ڈسٹرکٹ کمپلیکس میں پرچم کشائی کی پر وقار تقریب اور اظہارِ یکجہتی ریلی کا انعقاد کیا گیا۔ تقریب میں صوبائی وزیر زراعت سید عاشق حسین کرمانی، ایم پی اے غلام رضا ربیرہ، ڈپٹی کمشنر احمد عثمان جاوید، ڈی پی او راشد ہدایت سمیت مختلف شعبوں سے تعلق رکھنے والے افراد نے شرکت کی۔

پولیس کے چاک و چوبند دستے نے سلامی دی، قومی ترانہ بجایا گیا، اور ریلی میں پاک فوج زندہ باد کے نعرے لگائے گئے۔ تقریب سے خطاب میں صوبائی وزیر عاشق کرمانی نے کہا کہ جنرل عاصم منیر کی قیادت میں افواج پاکستان نے بھارت کو منہ توڑ جواب دے کر قوم کا سر فخر سے بلند کر دیا۔ ایم پی اے غلام رضا ربیرہ نے کہا کہ مشن بنیان مرصوص نے بھارتی ایر ڈیفنس سسٹم کو ناکارہ بنا کر دشمن کا غرور خاک میں ملا دیا۔ ڈپٹی کمشنر احمد عثمان جاوید نے کہا کہ سرکاری سطح پر یوم تشکر منایا جا رہا ہے اور تعلیمی و مذہبی اداروں میں خصوصی دعائیں ہوں گی۔

اوکاڑہ (نامہ نگار ملک ظفر) پاکستان عام آدمی پارٹی (س) کی جانب سے بھارتی جارحیت کے منہ توڑ جواب اور دشمن کو اس کے گھر میں گھس کر شکست دینے والے پاک فوج کے شاہینوں سے اظہارِ تشکر کے لیے ایک شاندار ریلی نکالی گئی۔ ریلی کی قیادت پارٹی کے ساہیوال ڈویژن کے سینئر صدر راجہ سلیم عابد نے کی، جبکہ پارٹی چیئرمین سید سجاد حسین شاہ گیلانی اور سندھ کے سینئر صدر شیخ ثمر احمد بھی شریک تھے۔

ریلی پارٹی کے مرکزی دفتر 1/4 ایل سفاری ولاز اوکاڑہ سے بینڈ باجوں اور جوشیلے نعروں کے ساتھ روانہ ہوئی اور اوکاڑہ کینٹ پہنچی، جہاں پاک فوج کے جوانوں نے بھی نعروں کا جواب دے کر ریلی کے شرکاء کا والہانہ انداز میں خیرمقدم کیا۔

اس موقع پر پارٹی عہدے داران مخدوم فقیر حسین، مخدوم وزیر علی، رائے زاہد قبال، رائے جاوید اقبال، چوہدری آصف علی جٹ، چوہدری خوشی محمد جٹ، ریاض احمد غفاری، علی ظہور پپو، رانا مقبول احمد، رانا رضوان، رانا رمضان اور یوتھ ونگ کے صدر راجہ سمیع اللہ کیانی نے بھرپور شرکت کی۔

ریلی کے دوران بھارت مخالف شدید نعرے بازی کی گئی اور شرکاء ایک دوسرے کو مبارکباد دے کر مٹھائیاں تقسیم کرتے رہے۔ شرکاء کا کہنا تھا کہ پاک فوج نے ایک بار پھر ثابت کر دیا ہے کہ وطن کے دفاع کے لیے ہمہ وقت تیار ہے اور دشمن کو کسی صورت معاف نہیں کیا جائے گا۔

اوکاڑہ (نامہ نگار ملک ظفر) حلقہ این اے 136 کے معروف سماجی کارکن ملک خالد یعقوب نے کہا ہے کہ قوموں کی ترقی تعلیم کے فروغ سے مشروط ہے اور ہر بچے کو تعلیمی مواقع فراہم کرنا وقت کی سب سے بڑی ضرورت ہے۔

ان خیالات کا اظہار انہوں نے ایک مقامی اسکول میں منعقدہ تقریب سے خطاب کرتے ہوئے کیا، جہاں انہوں نے طلبہ میں مفت کتابیں اور کاپیاں تقسیم کیں۔ اس موقع پر اساتذہ، والدین اور مقامی معززین بھی موجود تھے۔

ملک خالد یعقوب نے کہا کہ وہ اپنے قائد چوہدری ریاض الحق جج کے تعلیمی ویژن "تعلیم سب کے لیے” کو عملی جامہ پہنا رہے ہیں اور پسماندہ علاقوں میں تعلیم کا فروغ ان کی اولین ترجیح ہے۔

انہوں نے کہا کہ غربت، جہالت اور معاشرتی ناہمواریوں کا خاتمہ صرف تعلیم کے ذریعے ممکن ہے۔ ان کا کہنا تھا کہ وہ آئندہ بھی اپنی تمام تر توانائیاں بچوں کے روشن مستقبل کے لیے وقف کرتے رہیں گے تاکہ کوئی بچہ صرف مالی مشکلات کی وجہ سے تعلیم سے محروم نہ رہے۔

اس موقع پر بچوں میں کتابیں تقسیم کی گئیں اور طلبہ کی خوشی نے اس تعلیمی خدمت کو ایک روشن مثال بنا دیا۔

اوکاڑہ (باغی ٹی وی نامہ نگار ملک ظفر) حلقہ پی پی 190 میں ملگدا چوک سے بونگہ حیات روڈ خشک بیاس تک سڑک کی خستہ حالی نے عوام کی زندگی کو خطرات سے دوچار کر دیا ہے۔ آئے روز حادثات اور ڈکیتیوں کے باعث یہ سڑک علاقہ مکینوں کے لیے عذاب بن چکی ہے، جبکہ متعلقہ حکام اور منتخب نمائندے مسلسل بے حسی کا مظاہرہ کر رہے ہیں۔

تفصیلات کے مطابق بونگہ حیات روڈ براستہ ملگدا چوک ساہیوال، جو دھلی روڈ کے نام سے بھی جانی جاتی ہے، تقریباً 100 کلومیٹر طویل ہے اور تین اضلاع ساہیوال، پاکپتن اور اوکاڑہ سے گزرتی ہے۔ اگرچہ ساہیوال اور پاکپتن اضلاع میں سڑک کی تعمیر و مرمت کی گئی ہے، لیکن اوکاڑہ کی حدود میں سڑک مکمل طور پر تباہ حال ہے۔

شہریوں کا کہنا ہے کہ جگہ جگہ گڑھوں اور ٹوٹ پھوٹ کی وجہ سے نہ صرف گاڑیاں تباہ ہو رہی ہیں بلکہ قیمتی جانوں کا ضیاع بھی روز کا معمول بن چکا ہے۔ عوامی سطح پر کئی بار شکایات درج کرائی گئیں، مگر ضلعی حکومت اور منتخب نمائندے ٹس سے مس نہیں ہوئے۔

علاقہ مکینوں نے ایک بار پھر حلقہ پی پی 190 کے منتخب نمائندوں سے اپیل کی ہے کہ خدارا عوامی مسائل کو سنجیدگی سے لیتے ہوئے فوری طور پر سڑک کی مرمت و تعمیر کا آغاز کیا جائے، تاکہ شہری محفوظ، باعزت اور پرسکون سفر کر سکیں۔

اوکاڑہ (باغی ٹی وی، نامہ نگار ملک ظفر) حکومت پنجاب کی ہدایات پر ڈپٹی کمشنر و کنٹرولر سول ڈیفنس احمد عثمان جاوید کی زیر نگرانی سول ڈیفنس اور ریسکیو 1122 کے اشتراک سے بابا فرید شوگر مل، فیصل آباد روڈ اوکاڑہ میں شہری دفاع کی تربیتی مشقوں کا انعقاد کیا گیا۔ مل انتظامیہ اور ورکرز کو جنگی حالات میں بچاؤ، رسپانس اور ابتدائی امداد سے متعلق عملی تربیت فراہم کی گئی۔

سول ڈیفنس انسٹرکشنل اسٹاف نے شرکاء کو دشمن کے ہوائی حملے کی صورت میں سائرن کی شناخت و استعمال، پناہ گاہوں کی اہمیت، نقل و حرکت پر قابو پانے، تنصیبات کی مکر و تلبیس، سول ڈیفنس وارڈن سروس، خندقوں کی اقسام، بم ڈسپوزل، اور ہنگامی رابطہ کاری کے حوالے سے جامع آگاہی دی۔ اس موقع پر ریسکیو 1122 کی جانب سے فرسٹ ایڈ اور فائر فائٹنگ کی عملی تربیت بھی فراہم کی گئی۔

تربیت میں شرکاء نے ان مہارتوں کی عملی مشقوں میں بھرپور حصہ لیا۔ سول ڈیفنس آفیسر وقار اکبر نے اس موقع پر کہا کہ پاکستان کے عسکری اور سول ادارے ہر قسم کی جارحیت کا منہ توڑ جواب دینے کیلئے ہمہ وقت تیار ہیں۔ انہوں نے کہا کہ قومی دفاع ہماری اولین ترجیح ہے اور اس مقصد کے لیے ہر ممکن اقدام یقینی بنایا جا رہا ہے۔