Category: کوئٹہ

پشین کے علاقے سرخاب کیمپ میں سی ٹی ڈی نے کارروائی کرتے ہوئے چار دہشت گرد جہنم واصل کردیئے ۔

ترجمان سی ٹی ڈی کے مطابق کاروائی کے دوران مبینہ دہشت گردوں اور سکیورٹی اہلکاروں کے مابین فائرنگ کا تبادلہ ہوا، فائرنگ کے تبادلے میں چار مبینہ دہشت گرد ہلاک کردیے گئے ۔،ترجمان کا کہنا ہے کہ دہشت گردوں کے قبضے سے اسلحہ و گولہ بارود برآمد ہوا، برآمد شدہ اسلحے میں دستی بم، دیسی ساختہ بم، بندوقیں اور گولیاں شامل ہیں، ہلاک ہونے والے مبینہ دہشت گردوں کی لاشیں سول ہسپتال کوئٹہ منتقل کردی گئیں، مبینہ دہشت گردوں کا تعلق کالعدم تنظیم سے ہے۔

وفاقی وزیرداخلہ محسن نقوی نے پشین کے علاقے سرخاب کیمپ میں فتنہ الخوارج کے 4 دہشتگردوں کو جہنم واصل کرنے پر سی ٹی ڈی بلوچستان کی ستائش کی۔ محسن نقوی نے سی ٹی ڈی بلوچستان کی پیشہ وارانہ صلاحیتوں کو سراہا ،محسن نقوی نے کہا کہ سی ٹی ڈی بلوچستان نے موثر کارروائی کرکے خوارجیوں کے ناپاک عزائم کو ناکام بنایا۔ دہشت گردوں کو عبرتناک انجام تک پہنچانے پر سی ٹی ڈی کی پوری ٹیم کو خراج تحسین پیش کرتا ہوں۔ انہوں نے کہا کہ سی ٹی ڈی بلوچستان کے بہادر سپوتوں پر ناز ہے۔

کوئٹہ میں قومی سلامتی اور اسٹریٹجک قیادت ورکشاپ 2026 کا انعقاد کیا گیا، جس میں بلوچستان کی مختلف جامعات سے تعلق رکھنے والی اہم علمی و انتظامی شخصیات نے شرکت کی۔ ورکشاپ کا مقصد قومی سلامتی، داخلی و خارجی چیلنجز اور بلوچستان کے اہم مسائل سے متعلق آگاہی فراہم کرنا تھا۔

ورکشاپ کی اختتامی تقریب میں آئی جی ایف سی بلوچستان (نارتھ) میجر جنرل محمد عاطف مجتبیٰ نے بطور مہمانِ خصوصی شرکت کی۔ تقریب میں بلوچستان کی 12 جامعات کے وائس چانسلرز، پرو وائس چانسلرز، ڈینز، پرو ڈینز، ریکٹرز، پرو ریکٹرز اور دیگر اہم شخصیات سمیت مجموعی طور پر 55 شرکاء شریک ہوئے۔ورکشاپ کے دوران شرکاء کو پاکستان کے اندرونی و بین الاقوامی روابط، قومی سلامتی کی صورتحال، بلوچستان کے قدرتی وسائل، تاریخی پس منظر، صوبے کو درپیش مختلف مسائل، دہشتگردی کے خطرات اور ان سے نمٹنے کے لیے اختیار کی جانے والی حکمت عملی کے حوالے سے تفصیلی بریفنگ دی گئی۔شرکاء نے موجودہ ملکی و علاقائی صورتحال کے تناظر میں اس نوعیت کی ورکشاپ کو نہایت اہم قرار دیتے ہوئے اس اقدام کو سراہا۔ ان کا کہنا تھا کہ تعلیمی اداروں اور قومی سلامتی کے اداروں کے درمیان روابط کے فروغ سے باہمی ہم آہنگی اور شعور میں اضافہ ہوگا۔

اختتامی تقریب کے دوران آئی جی ایف سی بلوچستان (نارتھ) نے شرکاء میں اسناد بھی تقسیم کیں اور قومی سلامتی کے فروغ میں تعلیمی اداروں کے کردار کو اہم قرار دیا۔

‎وزیراعظم پاکستان شہباز شریف نے کمانڈ اینڈ اسٹاف کالج کوئٹہ کا دورہ کیا جہاں انہوں نے فیکلٹی اور زیر تربیت افسران سے خطاب کیا۔
‎وزیراعظم نے پاکستان کی مسلح افواج کی پیشہ ورانہ صلاحیت، آپریشنل تیاریوں اور ملکی سلامتی کیلئے دی جانے والی قربانیوں کو خراج تحسین پیش کیا۔ انہوں نے شہداء کی قربانیوں اور مادر وطن کے دفاع کیلئے افواج پاکستان کے عزم کو سراہا۔
‎اپنے خطاب میں وزیراعظم نے “معرکۂ حق” کا ذکر کرتے ہوئے فیلڈ مارشل سید عاصم منیر کی قیادت میں پاکستان کی تاریخی کامیابی کو خراج تحسین پیش کیا۔
‎انہوں نے کہا کہ بھارت کی بلااشتعال جارحیت کے باوجود پاکستان نے ذمہ دارانہ رویہ اور تحمل کا مظاہرہ کیا جسے عالمی برادری نے بھی تسلیم کیا۔
‎شہباز شریف نے واضح کیا کہ پاکستان اپنی خودمختاری اور علاقائی سالمیت کے دفاع کیلئے ہر ممکن اقدام کرے گا۔
‎وزیراعظم کا کہنا تھا کہ “آپریشن غضبُ للحق” پوری قوت کے ساتھ جاری ہے تاکہ افغان طالبان سے منسلک دہشتگرد عناصر اور ان کے سہولت کاروں کے خلاف کارروائیاں کی جا سکیں اور معصوم شہریوں کے جان و مال کا تحفظ یقینی بنایا جا سکے۔
‎انہوں نے کشمیری اور فلسطینی عوام کیلئے پاکستان کی غیر متزلزل حمایت کا اعادہ بھی کیا۔
‎وزیراعظم نے دوست ممالک سے آئے ہوئے افسران کی موجودگی کو سراہتے ہوئے عسکری سفارتکاری اور دفاعی تعاون کی اہمیت پر زور دیا۔
‎انہوں نے کہا کہ پاکستان خطے میں امن، استحکام اور ترقی کیلئے “نیٹ ریجنل اسٹیبلائزر” کے طور پر اپنا کردار ادا کر رہا ہے۔
‎اس موقع پر وفاقی وزرائے دفاع، داخلہ، اطلاعات اور وزیراعلیٰ بلوچستان بھی وزیراعظم کے ہمراہ موجود تھے۔
‎قبل ازیں کمانڈ اینڈ اسٹاف کالج پہنچنے پر وزیراعظم کا استقبال فیلڈ مارشل سید عاصم منیر نے کیا۔

بلوچستان میں مون سون کنٹنجینسی پلان 2026 اور ہنگامی صورتحال سے نمٹنے کیلئے 7 ہزار 500 ملین روپے کی منظوری دے دی گئی ۔

وزیراعلیٰ بلوچستان میر سرفراز بگٹی کی صدارت میں ڈیزاسٹر مینجمنٹ کمیشن کا اجلاس کوئٹہ میں ہوا ۔ اجلاس میں ہیٹ ویو ، مون سون ، غیر معمولی موسمی صورتحال اور ممکنہ قدرتی آفات سے نمٹنے کیلئے جامع حکمت عملی تیار کی گئی ۔ اجلاس میں صوبے کے تمام اضلاع میں ریسکیو 1122 سینٹرز فعال کرنے کا فیصلہ بھی کیا گیا ۔ کمیشن نے تحصیل لیول پر بھی ریسکیو مراکز قائم کرنے کا فیصلہ کیا ۔ ہیٹ اسٹروک ایمرجنسی انتظامات ، ایمبولینس ، ہیلتھ کئیر اسٹاف اور دواوں کی دستیابی کو یقینی بنانے کی ہدایت کرتے ہوئے وزیراعلیٰ میرسرفراز بگٹی کا کہنا تھا موسمیاتی چیلنجز سے نمٹنے کیلئے موثر ڈیزاسٹر مینجمنٹ اور بروقت ریسپانس لازمی ہے ۔ ممکنہ ہیٹ برسٹ کے پیش نظر عوامی آگاہی مہم ، ٹھنڈے پانی اور شیڈز لگانے اور ممکنہ ہنگامی صورتحال میں ریسکیو مشینریز ، ریلیف اور بحالی کیلئے فوری وسائل فراہمی کے معاملات کی بھی منظوری دی گئی ۔

حکام نے اجلاس کو رواں سال درجہ حرارت کے 53 ڈگری سینٹی گریڈ تک جانے اور ہیٹ ویو پیشگی انتظامات سے متعلق بریف کیا ۔

ڈیرہ بگٹی: آئی جی ایف سی بلوچستان (نارتھ) میجر جنرل محمد عاطف مجتبیٰ نے ڈیرہ بگٹی بازار کا دورہ کیا جہاں انہوں نے مقامی شہریوں اور دکانداروں سے غیر رسمی ملاقاتیں کیں۔

دورے کے دوران آئی جی ایف سی بلوچستان (نارتھ) نے شہریوں کے مسائل، شکایات اور تجاویز تفصیل سے سُنیں اور ان کے فوری حل کے لیے متعلقہ حکام کو ضروری احکامات جاری کیے۔اس موقع پر شہریوں اور تاجروں نے علاقے میں امن و امان کی بہتر صورتحال پر اطمینان کا اظہار کرتے ہوئے سیکیورٹی فورسز کی قیامِ امن کے لیے خدمات اور کاوشوں کو بھرپور انداز میں سراہا۔میجر جنرل محمد عاطف مجتبیٰ نے کہا کہ عوام کے جان و مال کا تحفظ اور علاقے میں پائیدار امن کا قیام سیکیورٹی فورسز کی اولین ترجیح ہے، جبکہ عوامی مسائل کے حل کے لیے تمام ممکنہ اقدامات جاری رکھے جائیں گے۔

بلوچستان کے ضلع پنجگور میں نامعلوم مسلح افراد کی جانب سے گاڑی پر فائرنگ کے نتیجے میں 3 افراد جاں بحق جبکہ 5 زخمی ہوگئے۔

پولیس کے مطابق واقعہ پنجگور کے علاقے کاٹاگری میں پیش آیا، جہاں نامعلوم حملہ آوروں نے ایک گاڑی کو نشانہ بنا کر اندھا دھند فائرنگ کی۔ فائرنگ کے نتیجے میں گاڑی میں سوار 3 افراد موقع پر جاں بحق ہوگئے جبکہ 5 افراد زخمی ہوئے۔واقعے کی اطلاع ملتے ہی پولیس اور امدادی ٹیمیں جائے وقوعہ پر پہنچ گئیں اور جاں بحق افراد کی لاشوں اور زخمیوں کو ٹیچنگ اسپتال منتقل کردیا گیا۔پولیس حکام کا کہنا ہے کہ حملہ آور واردات کے بعد فرار ہونے میں کامیاب ہوگئے، جبکہ ملزمان کی تلاش کے لیے علاقے میں سرچ آپریشن شروع کردیا گیا ہے۔ واقعے کی وجوہات جاننے کے لیے مزید تحقیقات جاری ہیں۔

بلوچستان کے تعلیمی اداروں میں نوجوانوں کی کردار سازی اور معیاری تعلیم کے فروغ کے لیے اہم پیش رفت سامنے آئی ہے۔ ایف سی بلوچستان نارتھ کے آئی جی میجر جنرل عاطف مجتبیٰ نے میر چاکر خان رند یونیورسٹی سبی کا دورہ کیا، جہاں انہوں نے یونیورسٹی کے مختلف شعبہ جات، تعلیمی ماحول، سہولیات اور طلبہ کے لیے کیے گئے اقدامات کا تفصیلی جائزہ لیا۔

دورے کے دوران آئی جی ایف سی بلوچستان (نارتھ) نے طلبہ سے خطاب کرتے ہوئے کہا کہ نوجوان نسل کا عملی اور مثبت کردار محفوظ بلوچستان اور خوشحال پاکستان کے لیے نہایت اہم سنگِ میل ہے۔ انہوں نے اس بات پر زور دیا کہ تعلیم، شعور اور مثبت سوچ ہی ملک کی ترقی اور استحکام کی بنیاد ہیں۔میجر جنرل عاطف مجتبیٰ نے یونیورسٹی انتظامیہ کی کارکردگی کو سراہتے ہوئے وائس چانسلر، فیکلٹی ممبران اور انتظامی عملے کی جانب سے معیاری تعلیم کے فروغ اور نوجوانوں کی بہتر تربیت کے لیے کی جانے والی کاوشوں کو قابلِ تحسین قرار دیا۔

اس موقع پر طلبہ نے بھی تعلیمی سرگرمیوں، سہولیات اور اپنے مستقبل کے اہداف سے متعلق اظہارِ خیال کیا، جبکہ یونیورسٹی انتظامیہ نے مہمان خصوصی کو ادارے کی تعلیمی و تحقیقی سرگرمیوں سے آگاہ کیا۔