Category: کوئٹہ


لاہور کے بعد کوئٹہ میں بھی رنگوں اور خوشیوں کے تہوار بسنت کا باقاعدہ آغاز ہو گیا ہے، جہاں تقریبات آج سے شروع ہو کر 15 فروری تک جاری رہیں گی۔
انتظامیہ کے مطابق بسنت کے موقع پر شہر بھر میں پتنگ بازی کے ساتھ مختلف ثقافتی سرگرمیوں اور روایتی پروگرامز کا اہتمام کیا گیا ہے۔ تہوار کے دوران موسیقی، فنکاروں کی پرفارمنسز، روایتی کھانوں کے اسٹالز اور تفریحی سرگرمیوں کے خصوصی انتظامات کیے گئے ہیں۔
‎تین روزہ میلے کے اعلان کے بعد شہریوں میں خاصا جوش و خروش دیکھنے میں آ رہا ہے۔ بازاروں میں رنگ برنگی پتنگوں، مضبوط ڈور، پیلے لباس اور دیگر بسنت سے متعلق اشیاء کی خریداری عروج پر ہے، جبکہ لوگ نئی ڈیزائن کی پتنگوں میں دلچسپی لے رہے ہیں۔
‎پولیس اور ضلعی انتظامیہ نے شہریوں کو ہدایت کی ہے کہ بسنت کے دوران ہوائی فائرنگ سے مکمل اجتناب کیا جائے اور حفاظتی ہدایات پر عمل یقینی بنایا جائے۔
‎انتظامیہ کا کہنا ہے کہ کوئٹہ میں بسنت کے انعقاد سے شہر کی ثقافتی سرگرمیوں کو فروغ ملے گا اور یہ تقریب سماجی اور سیاحتی حوالے سے بھی مثبت اثرات مرتب کرے گی۔

ایف سی بلوچستان (ساؤتھ) کے زیر اہتمام تربت میں نوجوانوں کے روزگار سے متعلق کیچ سیمینار سوئم کا انعقاد کیا گیا

سیمینار کا مقصد جنوبی بلوچستان میں روزگار کی کمی کے تاثر کو دور کرنا اور کاروباری مواقع اجاگر کرنا تھا،سیمینار میں مقامی سیاسی و سماجی شخصیات، سول و سیکیورٹی حکام، اساتذہ، ڈاکٹرز، میڈیا نمائندگان اور طلباء کی بڑی تعداد نے شرکت کی،سیمینار میں مقررین نے اظہارِ خیال کیا کہ خطے میں کاروباری مواقع موجود ہیں، نوجوان ہنر سیکھ کر خوداعتمادی کے ساتھ آگے بڑھیں،جنوبی بلوچستان میں کاروبار کے وسیع مواقع موجود ہیں ضرورت صرف مؤثر رہنمائی اور خوداعتمادی کی ہے

روایتی اور ڈیجیٹل شعبوں میں دستیاب مواقعوں پر تفصیلی روشنی ڈالی گئی،کامیاب مقامی کاروباری شخصیات کی جدوجہد نوجوانوں کے لیے حوصلہ افزا مثال بنی،آئی جی ایف سی بلوچستان (ساؤتھ) نے تعلیم، ہنر، محنت اور مستقل مزاجی پر زور دیا،اختتامی سیشن میں سوال و جواب کے دوران نوجوانوں کی پُراعتماد شرکت کو سراہا گیا

کوئٹہ: حکومت بلوچستان نے صوبے میں دہشت گردی اور بدامنی کے واقعات میں ملوث 39 انتہائی مطلوب دہشت گردوں کی فہرست جاری کر دی ہے۔

صوبائی محکمہ داخلہ کی جانب سے جاری اعلامیے میں شہریوں سے اپیل کی گئی ہے کہ وہ امن و امان کے قیام کے لیے قانون نافذ کرنے والے اداروں کے ساتھ تعاون کریں۔جاری کی گئی فہرست میں کالعدم تنظیموں سے تعلق رکھنے والے اہم اور سرکردہ افراد کے نام شامل ہیں جن میں حیر بیار مری، براہمداغ بگٹی، بشیر زیب، رحمٰن گل سمیت دیگر مطلوب ملزمان شامل ہیں۔ حکام کے مطابق یہ افراد صوبے میں دہشت گردی، تخریب کاری، سیکیورٹی فورسز پر حملوں، سرکاری و نجی املاک کو نقصان پہنچانے اور بے گناہ شہریوں کی جانوں کے ضیاع جیسے سنگین جرائم میں ملوث رہے ہیں۔

اعلامیے کے مطابق حکومت بلوچستان نے مطلوب دہشت گردوں سے متعلق مصدقہ معلومات فراہم کرنے والے افراد کے لیے 5 لاکھ روپے سے لے کر 25 کروڑ روپے تک انعام مقرر کیا ہے۔ انعامی رقم کا تعین مطلوب شخص کی نوعیت اور اس کے خلاف مقدمات کی سنگینی کو مدنظر رکھتے ہوئے کیا گیا ہے۔صوبائی حکومت نے واضح کیا ہے کہ اطلاع دینے والے شہری کی شناخت ہر صورت خفیہ رکھی جائے گی اور اس کی سیکیورٹی کو یقینی بنایا جائے گا۔ حکام کا کہنا ہے کہ عوام کے تعاون کے بغیر دہشت گردی کے ناسور کا مکمل خاتمہ ممکن نہیں، اس لیے شہری ذمہ داری کا مظاہرہ کرتے ہوئے مشکوک سرگرمیوں کی فوری اطلاع دیں۔

دوسری جانب سیکیورٹی ذرائع کا کہنا ہے کہ حالیہ مہینوں میں دہشت گردی کے خلاف کارروائیوں میں تیزی لائی گئی ہے اور متعدد اہم دہشت گردوں کو ہلاک یا گرفتار کیا جا چکا ہے۔ حکام کا مؤقف ہے کہ ریاست دشمن عناصر کے خلاف بلاامتیاز کارروائی جاری رہے گی اور بلوچستان میں پائیدار امن کے قیام تک آپریشنز کا سلسلہ جاری رکھا جائے گا۔

اینٹی نارکوٹکس فورس کی گوادر میں بین الاقوامی منشیات اسمگلنگ نیٹ ورک کیخلاف ایک اور بڑی کارروائی سامنے آئی ہے

اینٹی نارکوٹکس فورس نے کامیاب کارروائی کرتے ہوئے 1.2ٹن منشیات برآمد کرلی،2اسمگلرز بھی گرفتار کر لئے، انٹیلی جنس بیسڈ کارروائی میں برآمد شدہ1.2ٹن چرس کی عالمی منڈی میں مالیت 66.15 ملین امریکی ڈالر ہے ، اینٹی نارکوٹکس فورس بدنام زمانہ اسمگلرکی زیر سرپرستی اسمگلنگ منشیات نیٹ ورک کی نگرانی کر رہی تھی ، انٹیلی جنس بیسڈ کارروائی میں اے این ایف نے پنجگور اورتربت قومی شاہراہ پر ٹرک کو روک کر خفیہ خانوں سے منشیات برآمد کی گئی ، تفتیش کے دوران گرفتار ملزمان نے یہ بھی انکشاف کیا کہ برآمد شدہ منشیات افغانستان سے اسمگل کی گئی تھی ،بین الاقوامی منشیات اسمگلنگ کا نیٹ ورک پنجگور سے تربت کے راستے گوادر اور پسنی تک منشیات منتقل کرنے میں ملوث ہے ،یہ گروہ گوادر سے ماہی گیر کشتیوں کے ذریعے خلیجی ممالک، یمن اور تنزانیہ منشیات اسمگل کرتا تھا ، گرفتار ملزمان کیخلاف مقدمہ درج کر کے گروہ کے سرغنہ اور دیگر ارکان کی گرفتاری کیلئے قانونی کارروائی کا آغاز کر دیا گیا ، اینٹی نارکوٹکس فورس ملک سے منشیات کی لعنت کے مکمل خاتمہ کیلئے پرعزم ہے

‎وزیر اعلیٰ پنجاب مریم نواز نے بلوچستان میں سکیورٹی فورسز کے لیے 10 ارب روپے کی معاونت کا اعلان کیا ہے۔ مریم نواز نے بلوچستان کا دورہ کیا اور کوئٹہ میں ایف سی ہیڈکوارٹر میں منعقدہ تقریب میں شرکت کی، جہاں انہوں نے سکیورٹی فورسز کے لیے مالی معاونت کی منظوری دی۔
‎اس موقع پر وزیر اعلیٰ پنجاب نے کہا کہ بلوچستان کے عوام کا حب الوطنی اور پاکستان سے وابستگی قابل ستائش ہے، اور حکومت پنجاب بلوچستان کو درپیش چیلنجز میں ہر ممکن تعاون کرے گی۔ انہوں نے کہا کہ بلوچستان میں امن، استحکام اور خوشحالی دیکھنا چاہتے ہیں اور دہشت گردی کا خاتمہ قومی یکجہتی سے ممکن ہے۔
‎مریم نواز نے مزید کہا کہ بلوچستان کو فتنہ نہیں بلکہ فتنہ الخوارج کا سامنا ہے اور اس کے خلاف آپریشن میں ہر ممکن تعاون فراہم کیا جائے گا۔ انہوں نے کہا کہ پنجاب کے وسائل اور خدمات بلوچستان کے لیے حاضر ہیں اور دعا ہے کہ علاقے سے دہشت گردی کا جلد خاتمہ ہو۔
‎وزیر اعلیٰ بلوچستان سرفراز بگٹی نے بھی مریم نواز کے دورے کا خیرمقدم کرتے ہوئے کہا کہ سکیورٹی فورسز کے لیے 10 ارب روپے کی معاونت مثبت اور قابل تحسین اقدام ہے۔ انہوں نے کہا کہ بلوچستان میں حکومت اور اپوزیشن عوامی فلاح کے لیے متحد ہیں۔

بلوچستان کے سرحدی ضلع چمن میں انسدادِ پولیو مہم کے دوران سیکیورٹی پر مامور پولیس ٹیم پر نامعلوم مسلح افراد کی فائرنگ کے نتیجے میں ایک پولیس اہلکار شہید جبکہ دوسرا شدید زخمی ہو گیا۔

واقعہ چمن کے علاقے روغانی میں پیش آیا جہاں پولیو ٹیم اپنے فرائض انجام دے رہی تھی۔پولیس کے مطابق حملہ اس وقت کیا گیا جب انسدادِ پولیو ٹیم علاقے میں بچوں کو قطرے پلانے کے لیے موجود تھی اور ان کی سیکیورٹی پر پولیس اہلکار تعینات تھے۔ نامعلوم موٹر سائیکل سوار حملہ آوروں نے اچانک پولیس اہلکاروں کو نشانہ بنایا اور موقع سے فرار ہو گئے۔فائرنگ کے نتیجے میں ایک پولیس اہلکار موقع پر ہی شہید ہو گیا جبکہ دوسرا اہلکار زخمی ہو گیا جسے فوری طور پر قریبی اسپتال منتقل کیا گیا، جہاں اس کی حالت تشویشناک بتائی جا رہی ہے۔ خوش قسمتی سے واقعے میں پولیو ورکرز محفوظ رہے۔

واقعے کے فوراً بعد پولیس اور قانون نافذ کرنے والے ادارے جائے وقوعہ پر پہنچ گئے اور علاقے کو گھیرے میں لے کر سرچ آپریشن شروع کر دیا گیا ہے۔ پولیس کا کہنا ہے کہ حملہ آوروں کی گرفتاری کے لیے ناکہ بندی کر دی گئی ہے جبکہ شواہد بھی اکٹھے کیے جا رہے ہیں۔