Category: کوئٹہ

کوئٹہ سے ملک کے دیگر شہروں کے لیے ریلوے آپریشن عارضی طور پر معطل کر دیا گیا ہے جس کے باعث آج پشاور جانے والی جعفر ایکسپریس اپنی روانگی نہیں کر سکے گی۔

ریلوے حکام کے مطابق کوئٹہ سے اندرون ملک ٹرین سروس کی معطلی ناگزیر وجوہات کی بنا پر کی گئی ہے۔ حکام نے بتایا کہ اس صورتحال کے باعث کوئٹہ آنے والی جعفر ایکسپریس کو جیکب آباد ہی سے واپس بھیج دیا جائے گا۔اسی طرح کوئٹہ سے کراچی چلنے والی بولان میل کی سروس پہلے ہی معطل ہے، جبکہ کوئٹہ سے چمن کے درمیان چلنے والی ٹرین سروس بھی بند ہے۔ٹرین سروس کی بندش کے باعث مسافروں کو شدید مشکلات کا سامنا ہے۔ ریلوے حکام کا کہنا ہے کہ صورتحال معمول پر آنے کے بعد ٹرین آپریشن بحال کر دیا جائے گا۔

آئی جی ایف سی بلوچستان (نارتھ)محمد عاطف مجتبیٰ نے کوئٹہ شہر کے مختلف علاقوں کا دورہ کرتے ہوئے سیکیورٹی صورتحال اور حفاظتی انتظامات کا تفصیلی جائزہ لیا۔ دورے کے دوران انہوں نے سپنی روڈ، ویسٹرن بائی پاس، جبل نور، ہزارہ ٹاؤن، اختر آباد، شاہوانی ایونیو، کچی بیگ، سریاب روڈ، جناح روڈ، شاہراہ اقبال، میزان چوک، مشن روڈ اور سرکلر روڈ کا معائنہ کیا۔

آئی جی ایف سی بلوچستان (نارتھ) نے مختلف مقامات پر تعینات سیکیورٹی اہلکاروں سے ملاقاتیں بھی کیں اور شہر میں امن و امان کی صورتحال پر بریفنگ حاصل کی۔ انہوں نے عوام کے جان و مال کے تحفظ کے لیے کیے گئے اقدامات کو مزید مؤثر بنانے کی ہدایت کی۔دورے کے دوران میجر جنرل محمد عاطف مجتبیٰ نے شہید افسر انور کاکڑ کے اہل خانہ سے بھی ملاقات کی۔ انہوں نے شہید کے اہل خانہ کو وطن کے لیے عظیم قربانی پیش کرنے پر خراج عقیدت پیش کیا اور میجر انور کاکڑ شہید کے بیٹے سے خصوصی شفقت اور محبت کا اظہار کیا۔اس موقع پر آئی جی ایف سی بلوچستان (نارتھ) کا کہنا تھا کہ پاکستان کے عظیم شہداء قوم کا فخر اور ماتھے کا جھومر ہیں، جن کی لازوال قربانیوں کی بدولت ملک میں امن قائم ہے اور وطن محفوظ ہاتھوں میں ہے۔

بلوچستان کے ضلع نوشکی میں ہائی اسکول کی لائبریری میں نامعلوم افراد کی فائرنگ کے نتیجے میں ایک ٹیچر سمیت 2 افراد جاں بحق ہو گئے۔

پولیس کے مطابق فائرنگ کا افسوسناک واقعہ ہائی اسکول کلی جمالدینی میں پیش آیا، جہاں مسلح نامعلوم افراد نے اچانک لائبریری میں گھس کر فائرنگ کر دی۔ واقعے کے نتیجے میں دو افراد شدید زخمی ہوئے جنہیں فوری طور پر اسپتال منتقل کیا گیا۔اسپتال ذرائع کے مطابق زخمی ہونے والے ٹیچر زخموں کی تاب نہ لاتے ہوئے دم توڑ گئے، جبکہ دوسرے شخص کی ہلاکت بھی تصدیق کر دی گئی ہے۔ واقعے کے بعد علاقے میں خوف و ہراس پھیل گیا جبکہ سیکیورٹی اداروں نے جائے وقوعہ کو گھیرے میں لے کر شواہد اکٹھے کرنا شروع کر دیے ہیں۔

پولیس حکام کا کہنا ہے کہ حملہ آوروں کی شناخت اور واقعے کے محرکات جاننے کے لیے تحقیقات جاری ہیں، جبکہ ملزمان کی تلاش کے لیے مختلف علاقوں میں سرچ آپریشن بھی کیا جا رہا ہے۔

کوئٹہ میں انسدادِ دہشت گردی کی عدالت نے بلوچستان نیشنل پارٹی (بی این پی) کے سربراہ اختر مینگل کی ضمانت کی درخواست منظور کر لی ہے۔

عدالت نے سردار اختر مینگل کو 50 ہزار روپے کے مچلکوں کے عوض ضمانت فراہم کی۔ سماعت کے دوران عدالت نے دلائل سننے کے بعد فیصلہ سنایا، جس کے تحت انہیں مقدمے میں عبوری ریلیف مل گیا ہے۔یاد رہے کہ اختر مینگل کے خلاف گزشتہ سال کوئٹہ کے شاہوانی اسٹیڈیم میں ہونے والے ایک جلسے کے سلسلے میں مقدمہ درج کیا گیا تھا۔ ایف آئی آر میں جلسے کے دوران مبینہ خلاف ورزیوں کا الزام عائد کیا گیا تھا، جس کے بعد یہ معاملہ عدالت میں زیرِ سماعت رہا۔

کیڈٹ کالج پشین میں تقسیمِ انعامات کی ایک باوقار اور یادگار تقریب کا انعقاد کیا گیا، جس میں تعلیم، نظم و ضبط اور ہمہ جہت تربیت کے شاندار مظاہر دیکھنے کو ملے۔ تقریب کے مہمانِ خصوصی میجر جنرل عاطف مجتبیٰ (آئی جی ایف سی بلوچستان نارتھ) تھے، جنہوں نے تقریب میں بطور خاص شرکت کی۔

اس موقع پر کیڈٹس کے والدین، ارکانِ قومی و صوبائی اسمبلی، پشین کے ڈپٹی کمشنر، مقامی عمائدین اور سول و ملٹری افسران کی بڑی تعداد بھی شریک ہوئی، جس سے تقریب کی اہمیت اور وقار میں مزید اضافہ ہوا۔تقریب کا آغاز کیڈٹس کی جانب سے مہمانِ خصوصی کو شاندار گارڈ آف آنر پیش کرنے سے ہوا، جس نے حاضرین کے دل جیت لیے۔ اس کے بعد کیڈٹس نے مختلف عملی سرگرمیوں، جسمانی تربیت، پریڈ اور تعلیمی صلاحیتوں کا مظاہرہ کیا، جسے شرکاء نے بے حد سراہا۔اپنے خطاب میں مہمانِ خصوصی میجر جنرل عاطف مجتبیٰ نے کیڈٹ کالج پشین کے اعلیٰ تعلیمی و تربیتی معیار کو قابلِ تحسین قرار دیتے ہوئے کہا کہ یہ ادارہ بلوچستان کے نوجوانوں کو معیاری تعلیم کے ساتھ ساتھ نظم و ضبط، قیادت اور حب الوطنی جیسے اوصاف سے آراستہ کر رہا ہے۔ انہوں نے اس عزم کا اظہار کیا کہ ایسے اداروں کی سرپرستی جاری رکھی جائے گی تاکہ نوجوان نسل کو مثبت اور تعمیری راستہ فراہم کیا جا سکے۔

تقریب کے دوران نمایاں کارکردگی کا مظاہرہ کرنے والے کیڈٹس میں انعامات اور اسناد تقسیم کی گئیں، جبکہ والدین اور دیگر شرکاء نے کیڈٹس کی محنت، خود اعتمادی اور اعلیٰ تربیتی معیار کو سراہتے ہوئے اساتذہ کی کاوشوں کو بھی خراجِ تحسین پیش کیا۔آخر میں اس امر پر زور دیا گیا کہ کیڈٹ کالج پشین جیسے تعلیمی ادارے بلوچستان کی نوجوان نسل کی کردار سازی، ذہنی و جسمانی نشوونما اور قومی جذبے کی آبیاری میں کلیدی کردار ادا کر رہے ہیں، جو مستقبل میں ملک و قوم کی ترقی کے لیے ایک مضبوط بنیاد ثابت ہوں گے۔

کوئٹہ: صوبائی دارالحکومت کوئٹہ میں فائرنگ کے ایک افسوسناک واقعے میں ایک شخص جاں بحق جبکہ دو افراد زخمی ہو گئے۔

ڈی آئی جی کوئٹہ کے مطابق واقعہ ائیرپورٹ روڈ پر پیش آیا، جہاں ویمن پولیس اسٹیشن کے ایس ایچ او کے بیٹے نے فائرنگ کر دی۔ فائرنگ کے نتیجے میں ایک شہری موقع پر ہی دم توڑ گیا جبکہ دو دیگر افراد زخمی ہو گئے جنہیں فوری طور پر قریبی اسپتال منتقل کر دیا گیا۔پولیس حکام کا کہنا ہے کہ واقعے کے بعد ایس ایچ او ویمن پولیس اسٹیشن کو عہدے سے ہٹا دیا گیا ہے، جبکہ ملزم ایان احمد کی گرفتاری کے لیے پولیس ٹیمیں مختلف مقامات پر چھاپے مار رہی ہیں۔

حکام کے مطابق ملزم کو جلد گرفتار کر کے قانون کے مطابق کارروائی عمل میں لائی جائے گی، جبکہ واقعے کی مزید تحقیقات جاری ہیں۔

کوئٹہ: صوبہ بلوچستان کے خوبصورت دارالحکومت کوئٹہ میں واقع چلتن نیشنل پارک میں موسمِ بہار کی آمد کے ساتھ ہی قدرتی حسن اپنے عروج پر پہنچ گیا ہے، جس کے باعث سیاحوں کی بڑی تعداد پارک کا رخ کر رہی ہے۔

چلتن نیشنل پارک میں رنگ برنگے پھول کھل اٹھے ہیں، سرسبز و شاداب میدان اور خوشگوار موسم نے علاقے کی خوبصورتی میں کئی گنا اضافہ کر دیا ہے۔ پارک میں ہر طرف پھیلی بہار کی دلکش فضا، ہلکی ٹھنڈی ہوا اور قدرتی مناظر سیاحوں کو اپنی جانب متوجہ کر رہے ہیں۔ فیملیز، طلبہ اور نوجوانوں کی بڑی تعداد یہاں پکنک منانے اور فطرت کے حسین نظاروں سے لطف اندوز ہونے کے لیے پہنچ رہی ہے۔سیاحوں کا کہنا ہے کہ چلتن پارک میں موجود سکون، صاف ستھرا ماحول اور دلکش پہاڑی مناظر کسی بھی ذہنی دباؤ کو کم کرنے میں مددگار ثابت ہوتے ہیں۔ خاص طور پر موسمِ بہار میں یہاں کی خوبصورتی دیدنی ہوتی ہے، جہاں مختلف اقسام کے جنگلی پھول اور سبزہ زار ایک دل فریب منظر پیش کرتے ہیں۔

مقامی انتظامیہ کے مطابق پارک میں سیکیورٹی کے مؤثر انتظامات کیے گئے ہیں تاکہ سیاح بلاخوف و خطر اپنی تفریح سے لطف اندوز ہو سکیں۔ حکام کا کہنا ہے کہ بلوچستان میں امن و امان کی صورتحال میں نمایاں بہتری آئی ہے، جس کا مثبت اثر سیاحت پر بھی پڑ رہا ہے۔ماہرین کے مطابق چلتن نیشنل پارک نہ صرف تفریح کا بہترین مقام ہے بلکہ یہ حیاتیاتی تنوع کے حوالے سے بھی اہمیت کا حامل ہے، جہاں نایاب جنگلی حیات اور پودوں کی مختلف اقسام پائی جاتی ہیں۔اگر قدرتی حسن، سکون اور خوشگوار موسم کے متلاشی ہیں تو چلتن نیشنل پارک ایک بہترین انتخاب ثابت ہو سکتا ہے، جہاں بہار کے حسین رنگ ایک یادگار تجربہ فراہم کریں گے۔

کوئٹہ میں کروڑوں روپے مالیت کی 400 کلوگرام چاندی اسمگلنگ کیس میں اہم پیشرفت سامنے آئی ہے، جہاں فیڈرل بورڈ آف ریونیو (ایف بی آر) نے غفلت، نااہلی اور مبینہ ملوث ہونے پر 6 افسران کو معطل کر دیا ہے۔

ذرائع کے مطابق معطل کیے جانے والے افسران میں گریڈ 20 کے تین سینئر افسران اور گریڈ 16 کے تین افسران شامل ہیں۔ گریڈ 20 کے افسران میں ایک کلیکٹر، ایک ڈپٹی کلیکٹر اور ایک اسسٹنٹ کلیکٹر شامل ہیں۔
ایف بی آر حکام کا کہنا ہے کہ چاندی اسمگلنگ کیس کی تحقیقات کے دوران بعض افسران کی ذمہ داری اور کارکردگی پر سنگین سوالات اٹھے، جس کے بعد ان کے خلاف فوری محکمانہ کارروائی عمل میں لائی گئی۔
اس کے ساتھ ہی کوئٹہ کسٹمز انفورسمنٹ کلیکٹوریٹ میں تین نئے افسران بھی تعینات کر دیے گئے ہیں تاکہ ادارے کے امور کو شفاف اور مؤثر انداز میں چلایا جا سکے۔حکام کے مطابق کیس میں مزید تحقیقات جاری ہیں اور امکان ظاہر کیا جا رہا ہے کہ آنے والے دنوں میں مزید اہم انکشافات اور کارروائیاں سامنے آ سکتی ہیں۔