Category: راولپنڈی

اٹک (باغی ٹی وی، ملک امان شجاع)وزیر اعلیٰ پنجاب مریم نواز شریف کے وژن کے تحت شروع کیے گئے "ستھرا پنجاب پروگرام” کے تحت اٹک میں صفائی مہم کا باقاعدہ آغاز کر دیا گیا۔ اس موقع پر کمشنر راولپنڈی انجینئر عامر خٹک نے کہا کہ اس پروگرام کا مقصد عوام کو صاف ستھرا اور صحت مند ماحول فراہم کرنا ہے جو نہ صرف شہریوں کی زندگیوں میں بہتری لائے گا بلکہ اٹک جیسے شہروں میں عالمی معیار کی صفائی سہولیات متعارف کرائے گا۔

یہ بات انہوں نے اٹک میں راولپنڈی ویسٹ مینجمنٹ کمپنی کی صفائی خدمات کی افتتاحی تقریب سے خطاب کرتے ہوئے کہی۔ تقریب میں کمشنر راولپنڈی عامر خٹک مہمان خصوصی تھے جبکہ ڈپٹی کمشنر اٹک راؤ عاطف، سی ای او راولپنڈی ویسٹ مینجمنٹ کمپنی رانا ساجد صفدر، ایم این اے شیخ آفتاب، ایم پی اے چوہدری شیر علی، حمید اکبر، جہانگیر خانزادہ، اور دیگر معززین نے شرکت کی۔

تقریب کے دوران سی ای او راولپنڈی ویسٹ مینجمنٹ کمپنی رانا ساجد صفدر نے پروگرام کی تفصیلات پیش کیں۔ انہوں نے کہا کہ یہ منصوبہ اٹک میں جدید صفائی سہولیات فراہم کرنے کے لیے ترتیب دیا گیا ہے، جس میں تربیت یافتہ عملہ اور جدید مشینری شامل ہیں۔ یہ مہم عوام کو صاف ستھرا ماحول فراہم کرنے میں اہم کردار ادا کرے گی۔

کمشنر راولپنڈی عامر خٹک نے تقریب سے خطاب کرتے ہوئے کہا کہ صفائی حکومت کی ذمہ داری ہے، لیکن عوام کو بھی اس مہم میں شریک ہونا ہوگا۔ "ہم سب کو مل کر یہ عہد کرنا ہوگا کہ اپنے شہروں کو گندگی سے پاک رکھیں گے اور اس پروگرام کو کامیاب بنانے میں اپنا کردار ادا کریں گے،” انہوں نے کہا۔

ڈپٹی کمشنر اٹک راؤ عاطف نے اس موقع پر کہا، "آج کا دن اٹک کے لیے تاریخی دن ہے کیونکہ وزیر اعلیٰ پنجاب کے وژن کے تحت صفائی کے اس منصوبے کا آغاز کیا جا رہا ہے۔ ہم اٹک کے عوام سے درخواست کرتے ہیں کہ صفائی کے عملے کے ساتھ تعاون کریں اور کوڑا کرکٹ مقررہ جگہوں پر ڈالیں۔”

ایم این اے شیخ آفتاب نے کہا کہ ستھرا پنجاب پروگرام وزیر اعلیٰ پنجاب کا ایک شاندار اقدام ہے، جس سے عوام کو صحت مند ماحول فراہم ہوگا اور صفائی کے معیار میں اضافہ ہوگا۔ ایم پی اے چوہدری شیر علی نے کہا کہ صفائی ایک قومی فریضہ ہے اور ہمیں اپنی ذمہ داری کو سمجھنا ہوگا۔

تقریب کے اختتام پر سی ای او رانا ساجد صفدر نے معزز مہمانوں کو شیلڈز پیش کیں اور صفائی کے اس اہم منصوبے کو کامیاب بنانے میں ان کے تعاون پر شکریہ ادا کیا۔

یہ پروگرام اٹک میں صفائی کے شعبے میں انقلاب برپا کرنے کی جانب ایک اہم قدم ہے، جس سے شہریوں کو بہتر ماحول میسر آئے گا اور صحت عامہ میں نمایاں بہتری آئے گی۔

اٹک،باغی ٹی وی( ملک امان شجاع) ایڈیشنل ڈائریکٹر لائیو سٹاک ڈاکٹر اویس اکرم نے دو مختلف تقریبات سے خطاب کرتے ہوئے کہا کہ حکومت پنجاب لائیو سٹاک کارڈ کے ذریعے مویشی پال حضرات کو سہولت فراہم کر رہی ہے، تاکہ وہ اس سکیم سے بھرپور استفادہ کریں۔ انہوں نے کہا کہ محکمہ لائیو سٹاک وزیر لائیو سٹاک و ایگریکلچر پنجاب اور سیکرٹری لائیو سٹاک کی زیر نگرانی حکومت کے اقدامات کو عملی جامہ پہنانے کے لیے کوشاں ہے۔

ڈاکٹر اویس اکرم نے مزید کہا کہ لائیو سٹاک کارڈ کے ذریعے حکومت پنجاب اور بنک آف پنجاب کے مشترکہ منصوبے کے تحت مویشی پال حضرات کو بلاسود قرضے فراہم کیے جائیں گے، جس سے جانوروں کی خوراک کو بہتر بنا کر گوشت اور دودھ کی پیداوار بڑھائی جا سکے گی۔ اس کارڈ کے ذریعے نہ صرف مویشی پال حضرات کی معیشت میں بہتری آئے گی بلکہ صوبائی و قومی سطح پر گوشت کی ضروریات بھی پوری ہوں گی۔

اس موقع پر، ایڈیشنل ڈائریکٹر نے تحصیل اٹک کے موضع دکھنیر غنی چوک کے رہائشی خالد محمود کو لائیو سٹاک کارڈ جاری کیا اور انہیں مبارکباد دی۔ انہوں نے اٹک کے مختلف علاقوں میں مویشی پال حضرات سے خصوصی میٹنگز بھی کیں، جن میں لائیو سٹاک کارڈ کی اہمیت اور فوائد پر روشنی ڈالی۔ اس موقع پر لائیو سٹاک اسسٹنٹس کی بڑی تعداد بھی موجود تھی۔

اٹک،باغی ٹی وی (ملک امان شجاع) رکن قومی اسمبلی شیخ آفتاب احمد نے کہا ہے کہ ڈاکٹر ارشد محمود ناشاد کی کتاب "روشنی کی ایک صدی” کی طباعت ایک عظیم اور تاریخی لمحہ ہے۔ انہوں نے ان خیالات کا اظہار کتاب کی تقریبِ رونمائی سے بطور مہمانِ خصوصی خطاب کرتے ہوئے کیا۔ تقریب کی صدارت سابق ڈائریکٹر جنرل تعلقاتِ عامہ پنجاب خواجہ طاہر جمیل نے کی۔

تقریب میں کتاب کے مصنف ڈاکٹر ارشد محمود ناشاد، پرنسپل گورنمنٹ گریجویٹ کالج پروفیسر خالد جاوید صدیقی، سابق پرنسپل گورنمنٹ گریجویٹ کالج اٹک پروفیسر ماجد وحید، ڈپٹی ڈائریکٹر کالجز پروفیسر ارشد خان، پروفیسر ہمایوں شکیل، پروفیسر طارق نعمانی، پروفیسر ابرار حسین، پروفیسر شریف زاہد، پروفیسر ڈاکٹر زوار حسین، پروفیسر ناصر علی شاہ، پروفیسر راحت علی خان، پروفیسر وسیم حیدر، پروفیسر عثمان صدیقی، پروفیسر اظہر محمود، مشتاق عاجز، شیخ احسن الدین ایڈووکیٹ، شیخ وقار عظیم ایڈووکیٹ، سردار ساجد خان، چیئرمین بلدیہ اٹک شیخ ناصر محمود، سید شوکت بخاری، شیخ وقاص، اعجاز مہر، محمد سلیم، پروفیسر نصرت بخاری، مونس رضا، محمد طاہر، طاہر اسیر، اقبال زر کاش، ارشاد احمد، سیکرٹری اطلاعات پاکستان مسلم لیگ (ن) ڈاکٹر میاں راشد مشتاق، ضلعی صدر پاکستان مسلم لیگ (ن) سلیم شہزاد، گورنمنٹ پائلٹ اسکول کے اکرم ضیاء، پرنسپل گورنمنٹ بوائز اسکول کامرہ ملک عامر اقبال، معروف تاریخ دان و محقق راجہ نور محمد نظامی، امجد حسین، سابق سی ای او ایجوکیشن راجہ مختار احمد، میڈیکل اسپیشلسٹ ڈاکٹر ریاض احمد، معروف مصنف ڈاکٹر خاور چوہدری اور دیگر معزز مہمان شریک تھے۔

اس موقع پر خطاب کرتے ہوئے رکن قومی اسمبلی شیخ آفتاب احمد نے کہا کہ ڈاکٹر ارشد محمود ناشاد کی کتاب "روشنی کی ایک صدی” کا شائع ہونا ان کی محنتِ شاقہ اور ایک صبر آزما کام کا نتیجہ ہے۔ انہوں نے کہا کہ ایک وقت تھا جب پورے صوبہ خیبر پختونخوا میں صرف اسلامیہ کالج پشاور کے نام سے ایک کالج موجود تھا، اور اس کے بعد گورنمنٹ کالج اٹک کا نام آتا تھا۔ اس عظیم درسگاہ نے ایسی شخصیات پیدا کیں جنہوں نے قومی اور بین الاقوامی سطح پر مختلف شعبہ ہائے زندگی میں نمایاں مقام حاصل کر کے پاکستان کا نام روشن کیا، اور یہ سب اس تاریخی درسگاہ کے اساتذہ کی محنت اور لگن کا نتیجہ ہے۔ انہوں نے کہا کہ وہ خود بھی اس کالج کے سابق طالب علم رہے ہیں، اور ان کی کامیابی میں ان کے اساتذہ کا کردار انتہائی اہم ہے۔

تقریب سے خطاب کرتے ہوئے سابق ڈائریکٹر جنرل تعلقاتِ عامہ پنجاب خواجہ طاہر جمیل نے ڈاکٹر ارشد محمود ناشاد کو شاندار الفاظ میں خراجِ تحسین پیش کیا اور ان کی تاریخی کاوش کو آنے والی نسلوں کے لیے مشعلِ راہ قرار دیا۔ انہوں نے کہا کہ ڈاکٹر ناشاد ایک اعلی درجے کے شاعر، ادیب، محقق، اور ماہرِ تعلیم کے طور پر ادبی اور علمی حلقوں میں نمایاں مقام کے حامل ہیں۔ شعر و ادب کے مختلف موضوعات پر ان کی تین درجن سے زائد شائع شدہ تصانیف کسی تعارف کی محتاج نہیں ہیں۔ خواجہ طاہر جمیل نے کہا کہ "روشنی کی ایک صدی” لکھنے کی سعادت اللہ تعالیٰ نے ڈاکٹر ناشاد کے لیے مخصوص کر رکھی تھی۔ انہوں نے اپنی کتاب میں گورنمنٹ کالج اٹک کی 100 سالہ تعلیمی ترقی کا ایک سچا اور قابل رشک مرقع پیش کیا۔ ڈاکٹر ارشد محمود ناشاد نے اسلوبِ تحریر کی سادگی، شگفتگی، اور بے ساختگی کو آخر تک برقرار رکھا۔

تقریب سے خطاب کرتے ہوئے کتاب کے مصنف ڈاکٹر ارشد محمود ناشاد نے کہا کہ وہ اس اہم تاریخی دستاویز کو کامیابی سے مکمل کرنے پر اللہ تعالیٰ کا شکر ادا کرتے ہیں۔ انہوں نے کہا کہ انہوں نے اپنی پوری کوشش کی کہ کالج کی 100 سال کی تاریخ کو بخوبی اور جامع انداز میں مرتب کر سکیں، مگر ان کے خیال میں شاید کہیں کوئی تشنگی رہ گئی ہو۔ انہوں نے کالج کے کتب دار نذر محمد صابری کو شاندار الفاظ میں خراجِ تحسین پیش کیا۔ ڈاکٹر ارشد محمود ناشاد نے کہا کہ جب وہ گورنمنٹ کالج اٹک سے منسلک مشہور شخصیات کے بارے میں لکھ رہے تھے تو انہیں محسوس ہوا جیسے وہ تمام شخصیات ان کے سامنے موجود ہیں اور ان سے ہم کلام ہیں۔

آخر میں مہمانوں کو تحائف پیش کیے گئے۔