Category: ساہیوال

چیچہ وطنی۔ 27 ستمبر (اے پی پی)ڈسٹرکٹ پولیس آفیسرساہیوال کیپٹن (ر)محمد علی ضیا کی ہدایت پر ضلع کے تمام تھانوں کے ایس ایچ اوزنے عوام الناس کیساتھ ساتھ طلبہ اور طالبات میں بھی چائلڈ پروٹیکشن آگاہی مہم کا آغازکردیا ہے،اس مہم کے تحت تمام ایس ایچ اوز صاحبان مقامی سرکاری ونجی سکولوں میں کم سن بچوں، طلبہ و طالبات میں چائلڈ پروٹیکشن کے حوالے سے خصوصی آگاہی لیکچرز دئیے جا رہے ہیں۔اور آگاہی پمفلیٹس بھی تقسیم کیے جا رہے ہیں۔جبکہ اساتذہ کے ساتھ اس سلسلہ میں خصوصی میٹنگز کرکے ان کو بھی آگاہی دی جا رہی ہے۔ ڈسٹرکٹ پولیس آفیسر نے اس حوالے سے میڈیا کے اراکین سے بات چیت کرتے ہوئے کہا کہ بچے ہمارے ملک کا سرمایہ ہیں اور انہوں نے ہی مستقبل میں ہمارے ملک کی باگ ڈور سنبھالنی ہے۔ان کی حفاظت ان کے والدین کے ساتھ ساتھ معاشرے کی اجتماعی ذمہ داری ہے۔آگاہی کے ذریعہ بچوں کے تحفظ کو یقینی بنایا جا سکتا ہے۔ کم سن بچوں کے ساتھ جنسی جرائم ایک ناقابل معافی جرم ہے۔ایسے درندہ صفت اور شر پسند عناصر سے اپنے پھول جیسے معصوم بچوں کو جنسی درندگی اور جسمانی تشدد سے محفوظ رکھنے کے لیے ساہیوال پولیس ہر دم کوشاں ہے۔اس مہم کے تحت بچوں،والدین اور اساتذہ میں آگاہی پیدا کی جا رہی ہے بچوں کے ساتھ کسی مشکوک شخص کی جانب سے ایسی حرکت اگر نوٹس میں تو فوری پولیس کو ایمرجنسی نمبر 15پر اطلاع دی جا ئے۔

ساہیوال۔ (اے پی پی)دیوار گرانے سے منع کرنے پر اینٹ کا روڑہ مار کر ایک شخص کو قتل کردیا گیا‘مقدمہ درج۔ قتل کی واردات نواحی گاؤں 98/9-Lمیں ہوئی یہاں ظہور وغیرہ نے رمضان کی ڈھاری کے قریب اپنی ڈھاری کی پرانی دیوار گراکر نئی دیوار کی بنیاد رمضان کے رقبہ میں رکھنے لگے تو رمضان اور اس کے والد سید محمد ودیگر نے انہیں ایسا کرنے سے منع کیا تو ظہور وغیرہ غصے میں آگئے اور ظہور کلہاڑی اور سرداراں بی بی سوٹا سے مسلح ہوکر سید محمد للکارنے لگے اس دوران عدنان نے پختہ اینٹ کا روڑہ سید محمد کو مارا اور وہ بائیں آنکھ پر لگنے سے زخمی ہوکر گر پڑا جو موقع پر ہی دم توڑ گیا۔ پولیس تھانہ ڈیرہ رحیم نے ظہور وغیرہ3ملزمان کے خلاف مقدمہ قتل درج کرلیاہے۔

ساہیوال۔ (اے پی پی) ایم پی اے کے ڈیرہ کے قریب 2ملزمان نے خواتین سے 50ہزارروپے اور موبائل فون والا پرس چھین لیا‘2موٹرسائیکلیں چوری‘مقدمات درج۔ تفصیلات کے مطابق ایک خاتون سونیا شازم اپنی خالہ کے ہمراہ شاپنگ کرکے ماڈل ٹاؤن گھرواپس جارہی تھیں کہ ممبر صوبائی اسمبلی محمد ارشد ملک کے ڈیرہ کے قریب2موٹرسائیکل سوار ملزمان انور وغیرہ آئے اور ان سے پرس جس میں نقدی 50ہزا رروپے اور موبائل فون تھا چھین کرفرارہوگئے۔چوری کی وارداتوں شاداب ٹاؤن میں نامعلوم ملزمان نے محمد طیب کی موٹرسائیکل نمبری111/SLMمالیتی95ہزار روپے ہوٹل کے باہر سے‘ محلہ بلاٹ گنج میں نامعلوم ملزم نے محمدذیشان کے گھرکے باہر سے موٹرسائیکل نمبری479/SLNمالیتی60ہزار روپے اور مسلم بن عقیل کالونی میں محمد ندیم وغیرہ 5ملزمان نے شگفتہ پروین کے گھر داخل ہوکر نقدی‘طلائی زیورات اور ضروری کاغذات کل مالیتی2لاکھ65ہزار روپے چرالئے۔ پولیس نے الگ الگ مقدمات درج کرلئے ہیں۔

ساہیوال۔ 26 (اے پی پی)آرا مشین کا بلیڈ ٹوٹ کو نوجوان کو لگنے سے34سالہ 3بچوں کا باپ جاں بحق‘ ریسکیو1122کی گاڑی بروقت طبی امداد کیلئے پہنچ نہ سکی‘ صرف5گاڑیاں ہیں جو ایمر جنسی میں مصروف تھیں‘ ریسکیو ترجمان۔ تفصیلات کے مطابق کوٹ خادم علی شاہ میں ایک آرا مشین پر مشین کا بلیڈ ٹوٹ کر قریب کھڑے 34سالہ اسلم عرف بگی مزدور جو3بچوں کا باپ تھا کو دائیں کندھے پر لگا جس کے نتیجہ میں وہ شدید زخمی ہوگیا۔ ریسکیو1122 کو اطلاع ملنے کے باوجود ریسکیو کی گاڑی کافی دیر تک نہ پہنچی۔ موٹرسائیکل ریسکیو اہلکار پہنچے ان کی کال کے باوجود ریسکیو گاڑی نہ پہنچ سکی جس کے بعد زخمی کو لوڈ رکشہ پر ہسپتال منتقل کیاگیا لیکن خون زیادہ بہنے کی وجہ سے وہ دم توڑ گیا۔

پاکپتن۔ (اے پی پی) پاکپتن شہر او رگردونواح میں جعلی دودھ کی فروخت کھلے عام جاری ہیں،طرح طرح کے کیمیکلز سے تیارکردہ دودھ کے استعمال سے شہریوں میں طرح طرح کی بیماریاں جنم لے رہی ہیں۔پنجاب فوڈ اتھارٹی کی پابندیوں کے باوجود جعلی دود ھ کی کھلے عام فروخت کو سخت تنقید کا نشانہ بناتے ہوئے پاکستان سوشل ایسوسی ایشن کے سیکرٹری جنرل حکیم لطف اللہ نے کہا ہے کہ مقامی سطح پر بنے والے دودھ میں کوکنگ آئل، گلوکوز، چینی، گنے کا رس، یوریا کھاد، فارمالین، بورک ایسڈ، پنسلین، قلمی شورہ، رنگ کاٹ،ASTو بالصفاء پاؤڈر،امونیا اور دیگر کیمیائی مادوں کی آمیزش سے تیار ہوکر مارکیٹ میں آجاتا ہے،دودھ کی پیداوار کوبڑھانے والون کی حوصلہ افزائی کی جائے دودھ کے نام پر بکنے والے ڈبوں پر صاف اور جلی حروف میں لکھا جائے کہ یہ دودھ نہیں ہے۔ انہوں نے کہا کہ نظام انہضام، جگر، گردے، دل کی بیماریوں اور کینسر میں مبتلا ہورہے ہیں۔انہوں نے ارباب اختیار سے نوٹس لینے کا مطالبہ کیا ہے۔

ساہیوال۔ (اے پی پی) کمشنر ساہیوال ڈویژن ندیم الرحمٰن نے کہا ہے کہ نیا بلدیاتی نظام عوام کے بنیادی مسائل فوری حل کرنے میں بے حد معاون ثابت ہوگا۔ موجودہ حکومت نے بلدیاتی نظام سے نچلی سطح پر اختیارات کی منتقلی کو یقینی بنانے کا عزم کر رکھا ہے،تینوں اضلاع کی ضلعی انتظامیہ نے انتہائی جانفشانی اور محنت سے حلقہ بندیوں کا کام مکمل کیا ہے جسے26ستمبر سے عوام کیلئے ڈسپلے کر دیا جائے گا۔انہوں نے یہ بات اپنے دفتر میں حلقہ بندیوں کا جائزہ اجلاس سے خطاب کرتے ہوئے کہی جس میں ایڈیشنل سیکرٹری لوکل گورنمنٹ مسعود انور،ڈپٹی کمشنر ساہیوال محمد زمان وٹو،ڈپٹی کمشنر پاکپتن احمد کمال مان،اے ڈی سی ریونیو اوکاڑہ خرم شہزاداورڈائریکٹر لوکل گورنمنٹ قاری خالد نذیر کے علاوہ متعلقہ افسران نے شرکت کی۔اجلاس میں بتایا گیا کہ نئی حلقہ بندیوں کے بعد ساہیوال میونسپل کارپوریشن میٹرو پولیٹن کارپوریشن اور اوکاڑہ میونسپل کمیٹی میونسپل کارپوریشن بن جائیں گی جبکہ ضلع ساہیوال میں ہڑپہ شہر اور ضلع پاکپتن میں ملکہ ہانس اور قبولہ کو ٹاؤن کمیٹیوں کا درجہ دیدیا جائیگا۔ڈپٹی کمشنر محمد زمان وٹو نے بتایا کہ حلقہ بندیوں کیلئے انہوں نے ذاتی طور پر تمام علاقوں کا تفصیلی دورہ کیا ہے تا کہ اگلے 10سال کی ضروریات کو مد نظر رکھتے ہوئے موجودہ شہری اداروں کی حدود میں اضافہ کیا جا سکے۔کمشنر نے تینوں اضلاع کی انتظامیہ کو ہدایت کی کہ وہ نئی حلقہ بندیوں کو نمایاں جگہ پر عوام کے ملاحظے کیلئے ڈسپلے کریں۔

ساہیوال۔ (اے پی پی)13رو ز قبل اغواء ہونے والے 27سالہ نوجوان کی نعش برآمد‘مقدمہ درج۔ تفصیلات کے مطابق نواحی گاؤں 123/9-Lکارہائشی 27سالہ شاہد اقبال 7ستمبر کی رات کو گھر سے رمضا ن ٹی سٹال پر چائے پینے گیا جو گھر واپس نہ آیا جو نامعلوم ملزمان نے اغواء کرلیا۔ مذکورہ نوجوان کے کپڑے‘جوتی اورجسم کے اعضاء ڈھانچہ ہڈیاں‘کھوپڑی وغیرہ چری کے کھیت سے برآمد ہوئی ہیں۔ جسے نامعلوم ملزمان نے نامعلوم وجوہات کی بناء پر قتل کیاہے۔ پولیس تھانہ کمیر نے مقتول کے چچا محمدعلی کی رپورٹ پر نامعلوم ملزمان کے خلاف مقدمہ قتل درج کرلیاہے۔

ساہیوال۔ (اے پی پی)ساہیوال چیمبر آف کامرس کے انتخابات میں ڈیموکریٹک اینڈ اپنا گروپ نے میدان مارلیا‘کارپوریٹ اور ایسوسی کلاس کی تمام سیٹیں جیت لیں۔ تفصیلات کے مطابق گزشتہ روز ساہیوال چیمبر آف کامرس اینڈ انڈسٹریز کے انتخابات میں ڈیمو کریٹک اینڈ اپنا گروپ کے تمام امیدواروں نے اتحاد گروپ کے امیدواروں کو شکست دیکر تمام سیٹیں جیت لیں۔ انتخابی نتائج کے مطابق کارپوریٹ کلاس کے شیخ عظمت سلیم 142‘ساجد علی چوہان 136‘رانا صدیق 135اور شاہد اقبال بھٹی 135ووٹ لیکر کامیاب ہوئے ہیں جبکہ شیخ ہارون شاہد 105ووٹ لیکر ہار گئے۔ ایسوسی ایٹ کلاس میں نوید انجم 533‘ حاجی محمدایوب 523‘محمدوسیم حفیظ 478اورغلام مصطفی قاسم 476ووٹ لیکر کامیاب ہوئے جبکہ رانا عبدالقیوم 383‘میاں عبدالوحید 321‘حاجی ذوالقرنین 290اور حاجی محمدوسیم 190ووٹ لیکر ہا ر گئے ہیں۔ اس طر ح ڈیموکریٹک اینڈ اپنا گروپ نے تمام سیٹیں جیت لی ہیں اور اب صدارتی اوردیگر عہدوں پر ہونے والے انتخابات میں بھی ان کی 100فیصد کامیابی یقینی ہے۔

ساہیوال۔ (اے پی پی)کمشنر ساہیوال ڈویژن ندیم الرحمن نے ڈویژن میں لگائی جانیوالی تمام مویشی منڈیوں میں خریدوفروخت کے لئے آنے والے افراد کو بنیادی سہولیات یقینی بنانے کی سختی سے ہدایت کی ہے اور کہا کہ ماڈ ل مویشی منڈیاں بنانے کا واحد مقصد عام کسان کو لوٹ گھسوٹ سے بچانا ہے۔وہ یہا ں اپنے دفتر میں کمپنی کے بورڈ اجلاس سے خطاب کر رہے تھے جس میں ایم ڈی احمد علی کے علاوہ متعلقہ افسران اور بورڈ ممبران نے شرکت کی۔ انہوں نے کہا کہ کسانوں اور آڑہتیوں کو چارے اور پانی کی وافر مقدار میں دستیابی کو یقینی بنایا جائے اور اس سلسلے میں تمام ٹھیکے مکمل شفافیت سے دیئے جائیں۔انہوں نے کمپنی کی کارکردگی کو سراہتے ہوئے عارف والا کی منڈی مویشیاں کو کمیر سے واپس عارف والا منتقل کرنے کا جائزہ لینے کی بھی ہدایت کی جو تعمیراتی کام کی وجہ سے عارضی طور پر کمیر منتقل کی گئی ہے۔