Category: ساہیوال

ساہیوال:گورنر پنجا ب چوہدری محمد سرور نے کہا ہے کہ تاریخ محلات میں رہنے والوں کو نہیں انسانی خدمت کرنے والوں کو یاد رکھتی ہے،صاحب حیثیت افراد کو چاہیے کہ وہ انسانیت کی بھلائی کے لئے زیادہ سے زیادہ خرچ کریں تا کہ لینے والے ہاتھ کم ہو سکیں -سرور فاؤنڈیشن پاکستان صوبہ بھر میں 50ہزار طلبا و طالبات کو سردی سے بچاؤ کے لئے سویٹر،جیکٹس اور جرسیاں تقسیم کر رہی ہے جس میں سے 4ہزار ضلع ساہیوال میں تقسیم کی جا رہی ہیں -انہو ں نے یہ بات چیچہ وطنی،ہڑپہ اور کمیر کے ہائی سکولوں میں ہونے والی خصوصی تقریبات سے خطاب کرتے ہوئے کہا جس میں سرکاری سکولوں کے بچوں کو جرسیاں تقسیم کی گئیں -تحریک انصاف کے رہنما رائے حسن نواز خاں،ممبر قومی اسمبلی رائے مرتضی اقبال خاں،سابق ایم پی اے وحید اصغر ڈوگر، تحریک انصاف کے ضلعی صدر رانا آفتاب احمد خاں،مہر ارشاد احمد کاٹھیا،شیخ محمد چوہان کے علاوہ کمشنر ساہیوال نادر چٹھہ، اور مقامی زعما بھی ان تقریبات میں موجود تھے -انہو ں نے کہا کہ بچو ں کو سردی سے بچاؤ کے لئے سرور فاؤنڈیشن کی خصوصی مہم ”ونٹر اپیل“ کے تحت صوبے بھر میں گرم کپڑے تقسیم کئے جا رہے ہیں تا کہ سرکاری سکولو ں میں پڑھنے والے کم وسائل کے حامل والدین کو ریلیف دیا جا سکے -سرور فاؤنڈیشن صوبہ بھر میں پینے کے صاف پانی کی فراہمی پر بھی خصوصی توجہ دے رہی ہے او راب تک لگائے گئے 200واٹر فلٹریشن پلانٹس سے 20لاکھ افراد روزانہ مستفید ہو رہے ہیں -گورنر پنجاب چوہدر ی محمد سرور نے کہاکہ زراعت ملکی معیشت میں بنیاد ی اہمیت کی حامل ہے لیکن بد قسمتی سے اسے سب سے زیادہ نظر انداز کیا گیا تاہم موجودہ حکومت زراعت کی ترقی اور زرعی خود کفالت کے لئے دوررس اقدامات اٹھا رہی ہے -وزیر اعظم پاکستان عمران خان نے زرعی شعبے کی مربوط ترقی کے لئے ایک خصوصی کمیٹی تشکیل دیدی ہے جو کسانوں کو در پیش مسائل خصوصا ناقص بیج کی فراہمی کا مسئلہ ترجیحی بنیادوں پر حل کرے گی -انہو ں نے بتایا کہ کورونا وائرس کے پہلے فیز کے دوران سرور فاؤنڈیشن نے پورے صوبے میں 10ارب روپے کا راشن ضرورت مندوں میں تقسیم کیا جن میں سے 2ہزار خاندانوں کا تعلق ضلع ساہیوال سے تھا-تحریک انصاف کے رہنما رائے حسن نواز نے اپنے خطبہ استقبالیہ میں گورنر پنجاب کی طرف سے ساہیوال کی تعمیر و ترقی میں ذاتی دلچسپی لینے پر ان کاشکریہ ادا کیا اور انہیں مقامی مسائل سے آگاہ کرتے ہوئے درخواست کی کہ انہیں ترجیحی بنیادوں پر حل کیا جائے -بعد ازاں گورنر پنجاب چوہدری محمد سرور نے ہڑپہ میوزیم کا بھی دورہ کیا جہاں ڈپٹی ڈائریکٹر آرکیالوجی محمد حسن نے انہیں وادی سندھ کی تہذیب اور ہڑپہ کی تاریخی اہمیت سے آگا ہ کیا اور یہاں سے ملنے والے نوادارت کے بارے میں تفصیلی بریفنگ دی -گورنر نے ہڑپہ کو یونیسکو کی ورلڈ ہیرٹیج لسٹ میں شامل کرنے کی یقین دہانی کرائی او رکہا کہ حکومت ہڑپہ کو ایک بڑا سیاحتی مقام بنانے کے لئے تمام ضروری اقدامات اٹھائے گئی –

ساہیوال:آفیسر اینڈ سٹاف کالونی بھوت بنگلے اور شمشان گھاٹ کا منظر پیش کرنے لگی
بوسیدہ اور خستہ حال مکانات اور عمارتیں،ٹوٹی اور کچی سڑکیں،گندگی کے ڈھیر،تعفن زدہ ماحول کے مکین ذہنی مریض بننے لگے
اعلی سرکاری افسران کا رہائشی بلاک ہر سہولت سے آراستہ نچلے درجے کے ملازمین کا حصہ کھنڈرات میں تبدیل
تفصیلات کے مطابق ساہیوال میں سمال انڈسٹریل اسٹیٹ اولڈ ہڑپہ روڈ پر واقع آفیسر اینڈ سٹاف کالونی کا سٹاف بلاک کھنڈرات میں تبدیل ہوچکا ہے،جابجا گندگی کے ڈھیر لگے ہوئے ہیں،سڑکیں ٹوٹ پھوٹ کا شکار ہیں سٹریٹ لائٹس کا نام و نشان تک نہیں،پارک خود رو گھاس سے جنگل کا منظر پیش کر رہا ہے،جبکہ سیوریج کے لیے کھدائی کرکے عرصہ دراز سے یوں ہی چھوڑ رکھا ہے تاکہ نچلے درجے کے اچھوت ملازمین گردوغبار پھانک کر لطف اندوز ہوسکیں،

علاوہ ازیں لاکھوں روپے لاگت سے لگایا جانے والا اکلوتا واٹر فلٹریشن خراب ہونے کے باعث کئی ماہ سے بند پڑا ہے،پانی بھرنے والی جگہ پر نلوں کا نام و نشان نہیں البتہ کائی اور بدبو کے بھبھوکے آنے والوں کا استقبال ضرور کرتے ہیں،ایک طرف ملازمین کے بلاک کا یہ حال ہے تو دوسری طرف اسی کالونی کے آفیسر بلاک میں ہر طرح کی سہولیات مہیا ہیں اور شاہانہ طرز زندگی نظر آتا ہے،نچلے درجے کے ملازمین کی یہ پسماندگی طبقاتی نظام کی واضح مثال ہے،
یہاں کے مکینوں کی طرف سے وزیراعلی سمیت دیگر متعلقہ حکام سے رحم کی التجا کرتے ہوئے مسائل کے حل کا مطالبہ کیا جارہا ہے،دیکھنا یہ ہے کہ ان کے اس جائز مطالبہ کو حکام کب تک تسلیم کرتے ہیں

ساہیوال:ایڈیشنل ڈپٹی کمشنر ریونیو اویس مشتاق کے سہولت بازاروں اور عام مارکیٹ میں اشیاء ضروریہ کے معیار و دستیابی کا جائزہ لینے کے لئے مختلف مقامات کے اچانک دورے،انہوں نے سہولت بازار کمیر میں آٹا، چینی سمیت دیگر اشیاء کی دستیابی و معیار کا جائزہ لیاجبکہ عام مارکیٹ میں آٹا و چینی کے سیل پوائنٹس کا بھی سرپرا ئز وزٹ کیا،انہوں نے حکومت کی جانب سے سبسڈائزڈ آٹا و چینی کی دستیابی و ریکارڈ کا معائنہ کیا،ایڈیشنل ڈپٹی کمشنر ریونیونے اندرون شہر سمیت گردو نواح میں بھی آٹا، چینی ودیگر اشیاء کی دستیابی چیک کی،انہوں نے کہا کہ مصنوعی مہنگائی اور ذخیرہ اندوزی کے خاتمہ کیلئے تمام حکومتی مشینری متحرک ہے،اشیاء ضروریہ کی مصنوعی قلت اور مہنگے داموں فروخت کرنیوالوں کا محاسبہ جاری ہے،عوام کو ریلیف کی فراہمی کیلئے حکومت کی جانب سے درآمد کی جانے والی چینی ضلع بھر میں مقرر کردہ سیلز پوائنٹس پر شہریوں کوحکومتی ریٹ پر فروخت کی جا رہی ہے،انہوں نے دکانداروں کو چینی و آٹا کی سیل کا مکمل ریکارڈ رکھنے اور اشیاء کے نرخ نامے نمایاں جگہوں پر آویزاں کرنے کی ہدایت کی،انہوں نے کہا کہ انتظامیہ آٹا،چینی کی ترسیل سے فروخت تک تمام مراحل کی مانیٹرنگ کر رہی ہے اور اشیاء ضروریہ کی مصنوعی قلت یا مہنگے داموں فروخت کرنے کی اجازت نہیں دی جائے گی،شہری میں خریداری کرتے وقت سر کاری نرخ ناموں کا جائزہ ضرور لیں اور گرانفروشی کے مرتکب دکانداروں کے خلاف شکایت حکومت پنجاب کی ”قیمت ایپ“ پر درج کرائیں۔

ساہیوال:ڈپٹی کمشنر بابر بشیر نے 30نومبر سے شروع ہونے والی پولیو مہم کے دوران پانچ سال سے کم عمر ہر بچے کو ویکسین یقینی بنانے کے لئے بھر پور آگہی مہم چلانے کی ہدایت کی ہے اور کہا ہے کہ سول سوسائٹی اور والدین اپنی ذمہ داری محسوس کریں اور بچو ں کو پولیو ویکسین پلا کر عمر بھر کی معذور ی سے بچائیں -ضلع ساہیوال میں ایک بچے کا پولیو مرض کا شکار ہونا انتہائی تشویشناک بات ہے جس کے تدارک کے لئے پولیو ٹیم کا ہر ممبر مشنری جذبے سے مہم میں حصہ لے -انہو ں نے یہ بات اپنے دفتر میں پولیو مہم کے انتظامات کا جائزہ لینے کے لئے ہونے والے اجلاس میں کہی جس میں اے ڈی سی جنرل شیر افگن اور اے ڈی سی ہیڈ کوارٹر طاہر امین،سی ای او ہیلتھ ڈاکٹر اظہر نقوی،ڈسٹرکٹ آفیسر ہیلتھ ڈاکٹر عبدالمجید نیازی،ڈپٹی ڈائریکٹر سوشل ویلفیئر سید عملدار حسین ،ڈپٹی ڈائریکٹر لوکل گورنمنٹ اظہر دیوان اور سول سوسائٹی کے ممبران سید عملدار حسین شاہ اور شیخ طارق سجاد اور متعلقہ محکموں کے افسران نے شرکت کی۔ ڈپٹی کمشنر نے آگہی کے لئے دستیاب تمام وسائل بروئے کار لانے کے ساتھ ساتھ غیر سرکاری تنظیموں اور سوشل میڈیا کی خدمات حاصل کرنے پر بھی زور دیا۔ سی ای او ہیلتھ ڈاکٹر اظہر نقوی نے بتایا کہ مہم کے دوران ضلع بھر میں 5سال سے کم عمر کے 4لاکھ92ہزار سے زائد بچوں کو گھر گھر جا کر ویکسین پلائی جائے گی جس کے لئے 1273ٹیمیں تشکیل دیدی گئی ہیں جن میں 1070موبائل ٹیمیں بھی شامل ہیں -ڈپٹی کمشنربابر بشیر نے فیلڈ ٹیموں کو مناسب تربیت فراہم کرنے کی بھی ہدایت کی اور محکمہ صحت کو ہدایت کی کہ وہ مہم کی کامیابی کے لئے مقامی سطح پر بھی علماء کرام، اساتذہ، سیاسی عمائدین اور ٹائیگر فورس کے رضا کاروں کی خدمات حاصل کریں۔انہوں نے سی ای او ہیلتھ کو ہدایت کی کہ تمام فیلڈ ٹیموں کی کارکردگی کو سختی سے مانیٹر کیا جائے اور اس سلسلے میں کوئی کوتاہی برداشت نہ کی جائے –

ساہیوال:کمشنر ساہیوال ڈویژن نادر چٹھہ کی سلالہ چیک پوسٹ حملے میں جام شہادت نوش کرنے والے کیپٹن محمد عثمان علی شہید کے گھر آمد،دعائیہ تقریب میں شرکت اور شہداء کے بلندئ درجات کی دعا۔تفصیلات کے مطابق کمشنر ساہیوال نادر چٹھہ افغانستان کی سرحد پر واقع سلالہ چیک پوسٹ پر حملے میں منصب شہادت پر فائز ہونے والے کیپٹن محمد عثمان علی شہید کے گھر گئے اور نویں برسی کی دعائیہ تقریب میں شرکت کی۔انھوں نے شہداء کی بلندی درجات کی دعا کی اور شہید کے والد محمد بشیر احمد سے تعزیت کی،برسی کی تقریب میں شہریوں کی کثیر تعداد بھی شریک ہوئی۔کمشنر ساہیوال نادر چٹھہ نے ملک و قوم کے تحفظ کے لئے شہداء کی قربانیوں پر انہیں خراج عقیدت بھی پیش کیا اور کہا کہ قوم ان کی اس عظیم قربانی کو ہمیشہ یاد رکھے گی۔
یاد رہے کہ ساہیوال کے قابلِ فخر سپوت کیپٹن عثمان علی شہید 26 نومبر 2011 کو پاک افغان سرحد پر قائم پاکستانی چیک پوسٹ سلالہ پر افغانستان میں قابض غیرملکی نیٹو افواج کے حملے کو ناکام بناتے ہوئے دفاع وطن پر اپنی جان نچھاور کرگئے تھے،
اس حملے کے بعد پاکستانی عوام اور فوج میں نیٹو افواج کے خلاف شدید غم وغصہ پھیل گیا تھا،جبکہ اس حملے کے خلاف پاکستان کے سب سے بڑے غیرسیاسی اتحاد دفاع پاکستان کونسل نے ملک گیر احتجاج شروع کردیا تھا اور پاکستان کو نیٹو افواج کی سپلائی روکنی پڑی تھی،
ساہیوال کی ضلعی انتظامیہ نے عثمان شہید کی قربانی کے اعتراف میں مزدور پلی چوک کا نام تبدیل کرکے کیپٹن عثمان شہید چوک رکھ دیا تھا