Category: شوبز

نئی دہلی: معروف گلوکارہ جیسمین سینڈلاس کا حالیہ کنسرٹ اس وقت تنازع کی زد میں آ گیا جب سوشل میڈیا پر وائرل ہونے والی ایک ویڈیو نے مداحوں کو مایوس کر دیا۔

جیسمین سینڈلاس، جو اپنے مقبول گانوں ’دھورندھر‘ اور ’دھورندھر دا ریوینج‘ کے باعث خاصی شہرت حاصل کر چکی ہیں، ان دنوں اپنے لائیو کنسرٹ کی وجہ سے خبروں میں ہیں۔ ان کے کنسرٹ کی ایک ویڈیو تیزی سے سوشل میڈیا پر وائرل ہو رہی ہے جس میں انہیں اسٹیج پر گانے کے بجائے بیک گراؤنڈ میوزک پر لپ سنک کرتے ہوئے دیکھا جا سکتا ہے۔ویڈیو کے منظر عام پر آنے کے بعد مداحوں کی بڑی تعداد نے شدید ناراضی کا اظہار کیا ہے۔ شائقین کا کہنا ہے کہ انہوں نے مہنگے ٹکٹ خرید کر لائیو پرفارمنس کی توقع کی تھی، لیکن انہیں مایوسی کا سامنا کرنا پڑا۔

کنسرٹ کے دوران ایک موقع پر جیسمین سینڈلاس کو اسٹیج پر پانی کی بوتل اپنے اوپر انڈیلتے اور پھر ڈانس مووز کرتے بھی دیکھا گیا، جس پر بعض افراد نے ان کے اندازِ پرفارمنس کو تنقید کا نشانہ بنایا۔سوشل میڈیا پر صارفین نے مختلف ردعمل دیتے ہوئے سوال اٹھایا کہ جب پرفارمنس لپ سنک پر مشتمل ہو تو پھر اتنے مہنگے ٹکٹ کیوں فروخت کیے جاتے ہیں۔ کچھ صارفین نے واضح طور پر ٹکٹ کی رقوم واپس کرنے کا بھی مطالبہ کیا ہے۔

ایک صارف نے لکھا کہ “کنسرٹس میں لائیو گانے کے بجائے لپ سنک کا رجحان بڑھتا جا رہا ہے جو مداحوں کے ساتھ ناانصافی ہے۔” جبکہ ایک اور صارف نے کہا کہ “دو ہٹ گانوں کے بعد توقعات بڑھ گئیں مگر پرفارمنس مایوس کن رہی۔”

واضح رہے کہ جیسمین سینڈلاس کو ابتدائی شہرت فلم ’کِک‘ کے مشہور گانے ’مینو یار نہ ملا‘ سے ملی تھی، جس کے بعد ان کا کیریئر تیزی سے آگے بڑھا۔ تاہم حالیہ کنسرٹ کے تنازع نے سوشل میڈیا پر ان کے مداحوں کے درمیان ایک نئی بحث چھیڑ دی ہے۔

لاہور: پاکستانی شوبز انڈسٹری کی معروف اداکارہ ریما خان نے انکشاف کیا ہے کہ انہوں نے ایک بھارتی ایوارڈ شو میں شرکت کے دوران بولڈ لباس پہننے سے صاف انکار کر دیا تھا، کیونکہ وہ خود کو اس موقع پر پاکستان کی نمائندہ سمجھ رہی تھیں۔

ریما خان نے حال ہی میں ایک پوڈکاسٹ میں شرکت کی، جہاں انہوں نے اپنے کیریئر، ذاتی اصولوں اور شوبز انڈسٹری کے بدلتے رجحانات پر کھل کر گفتگو کی۔ گفتگو کے دوران انہوں نے بتایا کہ وہ ہمیشہ اپنے لباس، اندازِ گفتگو اور مجموعی شخصیت کے حوالے سے بہت محتاط رہتی ہیں۔انہوں نے کہا کہ بھارتی ایوارڈ شو میں شرکت کے موقع پر اُن پر دباؤ تھا کہ وہ جدید اور بولڈ لباس کا انتخاب کریں، تاہم انہوں نے اس تجویز کو مسترد کر دیا۔ ریما خان کے مطابق اس فیصلے کی بنیادی وجہ یہ تھی کہ وہ خود کو ایک پاکستانی فنکار کے طور پر پیش کر رہی تھیں اور اپنے ملک کی ثقافت اور اقدار کا خیال رکھنا ان کی اولین ترجیح تھی۔

اداکارہ نے اس بات پر زور دیا کہ شوبز سے وابستہ افراد کو اپنے کردار، زبان اور رویے پر خصوصی توجہ دینی چاہیے کیونکہ عوام خاص طور پر نوجوان نسل انہیں فالو کرتی ہے۔ ان کا کہنا تھا کہ فنکار صرف اداکار نہیں بلکہ معاشرے کے لیے ایک مثال بھی ہوتے ہیں۔میڈیا کے موجودہ رجحانات پر تبصرہ کرتے ہوئے ریما خان نے افسوس کا اظہار کیا کہ آج کل منفی خبروں اور تنازعات کو زیادہ نمایاں کیا جاتا ہے، جبکہ مثبت اور تعمیری پہلو اکثر نظر انداز کر دیے جاتے ہیں۔ انہوں نے کہا کہ میڈیا کو چاہیے کہ وہ معاشرے میں امید، مثبت سوچ اور اخلاقی اقدار کو فروغ دے۔

اپنی گفتگو کے دوران ریما خان نے روحانیت اور زندگی کے فلسفے پر بھی روشنی ڈالی۔ انہوں نے کہا کہ اگرچہ ہر شخص جنت کا خواہاں ہوتا ہے، لیکن بہت کم لوگ اپنی زندگی کو اس مقصد کے مطابق ڈھالتے ہیں۔ ان کے مطابق حقیقی کامیابی اس بات میں ہے کہ انسان دوسروں کے لیے آسانیاں پیدا کرے اور اپنے اعمال کے ذریعے مثبت اثر چھوڑے۔اداکارہ نے اللہ تعالیٰ کی عطا کردہ نعمتوں پر شکر ادا کرتے ہوئے کہا کہ عاجزی اور شکر گزاری ہی کامیاب زندگی کا اصل راز ہیں۔ انہوں نے مزید کہا کہ زندگی بہت مختصر ہے اور ہر انسان کے پاس دنیا میں مثبت اور بامعنی کردار ادا کرنے کے لیے محدود وقت ہوتا ہے، اس لیے اسے ضائع کرنے کے بجائے بہتر استعمال کرنا چاہیے۔

پاکستان فلم انڈسٹری کی معروف اداکارہ میرا نے انکشاف کیا ہے کہ وہ فلم ’سائیکو‘ کی شوٹنگ کے دوران شدید ذہنی دباؤ اور ڈپریشن کا شکار ہو گئی تھیں۔

حال ہی میں ایک انٹرویو کے دوران میزبان نے ان سے ان کے فلمی کیریئر اور ذاتی زندگی سے متعلق مختلف سوالات کیے۔ اسی دوران ان سے ایک پرانی خبر کے بارے میں پوچھا گیا جس میں دعویٰ کیا گیا تھا کہ انہیں امریکا کے کسی نفسیاتی ادارے میں داخل کروایا گیا تھا۔اس سوال کے جواب میں اداکارہ میرا نے وضاحت کرتے ہوئے کہا کہ یہ بات درست نہیں ہے کہ انہیں کسی “پاگل خانے” میں داخل کروایا گیا تھا۔ انہوں نے بتایا کہ اصل صورتحال یہ تھی کہ ہدایتکار شان شاہد کی فلم ’سائیکو‘ میں ان کا کردار بہت زیادہ شدید اور جذباتی تھا، جس کے باعث شوٹنگ کے ابتدائی مرحلے میں وہ ذہنی دباؤ کا شکار ہو گئیں اور ان کی طبیعت متاثر ہوئی۔
میرا کے مطابق اس کیفیت کے بعد وہ علاج کے لیے نیویارک گئیں جہاں انہوں نے ایک ماہرِ نفسیات سے مشاورت کی جنہوں نے ان کی رہنمائی کی اور ان کی ذہنی صحت بحال کرنے میں مدد کی۔

اداکارہ نے مزید کہا کہ اس کردار سے باہر نکلنا ان کے لیے ایک مشکل مرحلہ تھا، تاہم اس تجربے نے انہیں اداکاری کے نئے پہلو سکھائے۔ ان کے مطابق یہ پہلا موقع تھا جب انہیں احساس ہوا کہ کسی کردار میں مکمل طور پر کیسے ڈھلا جاتا ہے۔ انہوں نے ہدایتکار شان شاہد کو ایک اچھا ڈائریکٹر قرار دیتے ہوئے کہا کہ انہوں نے انہیں کردار کو بہتر انداز میں سمجھنے میں مدد دی۔

بالی وڈ کی ابھرتی ہوئی اداکارہ اور اجے دیوگن کی فلم “سن آف سردار 2” میں کام کرنے والی روشنی والیا ایک حالیہ انٹرویو میں اپنی ذاتی زندگی اور والدہ کی کھلی سوچ کے باعث خبروں کی زینت بن گئی ہیں۔

انٹرویو کے دوران روشنی والیا نے بتایا کہ ان کی والدہ نہ صرف انہیں زندگی سے بھرپور لطف اٹھانے اور دوستوں کے ساتھ گھلنے ملنے کی ترغیب دیتی ہیں بلکہ وہ انہیں ہر معاملے میں کھل کر رہنمائی بھی فراہم کرتی ہیں۔اداکارہ کے مطابق ان کی والدہ کا انداز روایتی نہیں بلکہ کافی جدید ہے، جو انہیں آزادی کے ساتھ زندگی گزارنے کی حوصلہ افزائی کرتی ہیں۔روشنی والیا نے ایک حیران کن انکشاف کرتے ہوئے بتایا کہ ان کی والدہ ان سے گفتگو کھل کر کرتی ہیں اور انہیں ذمہ داری کے ساتھ زندگی گزارنے کا مشورہ دیتی ہیں، جس میں ذاتی حفاظت اور احتیاط سے متعلق باتیں بھی شامل ہوتی ہیں،میری والدہ مجھ سے پہلے میری بہن کو بھی یہی سمجھاتی تھیں اور اب وہ مجھے بتاتی ہیں،جب ان کی ماں اسے گھر میں بیکار بیٹھی دیکھتی ہیں تو وہ اکثر اسے روکتی ہیں،وہ اکثر اس سے کہتی ہیں، آج تم گھر پر کیوں بیٹھی ہو، باہر جاؤ، اپنے دوستوں کے ساتھ پارٹی کرو، اور زندگی کا لطف اٹھاؤ، کبھی کبھی، وہ مذاق میں پوچھتی ہے، کیا آج تم نے شراب نہیں پی؟

اداکارہ نے بتایا کہ چھوٹی عمر میں بالغوں کے درمیان کام کرنے سے وہ اپنے وقت سے پہلے بالغ ہو گئی تھیں، انھوں نے نہ صرف کام کی پیچیدگیوں کو سیکھا بلکہ فلمی صنعت کے پیچھے کی سیاست کو بھی سمجھا،انہوں نے مختلف ڈراموں اور پروجیکٹس میں کام کیا جبکہ بالی وڈ میں بھی اپنی موجودگی کا آغاز کیا۔روشنی کے مطابق ان کی کامیابی کے پیچھے سب سے بڑی وجہ ان کی والدہ کی قربانی اور سپورٹ ہے، جنہوں نے اپنا آبائی شہر چھوڑ کر ممبئی میں ان کے خوابوں کو حقیقت بنانے کے لیے ساتھ دیا۔

پاکستان کی معروف فلم اسٹار، ہدایت کارہ اور پروڈیوسر ریما خان نے ایک حالیہ پوڈکاسٹ میں انکشاف کیا ہے کہ انہوں نے ماضی میں ایک مشہور اداکارہ کو تھپڑ مارا تھا، تاہم آج بھی وہ اس واقعے پر نادم ہیں۔

ریما خان نے اپنے فلمی کیریئر کا آغاز فلم بلندی سے کیا اور بعد ازاں کوئی تجھ سا کہاں، زمین آسمان، جو ڈر گیا وہ مر گیا، چور مچائے شور، ہاتھی میرے ساتھی اور نکاح جیسی کامیاب فلموں سے شہرت حاصل کی۔ وہ شان شاہد، سعود اور بابر علی کے ساتھ اپنی مقبول جوڑیوں کے لیے بھی جانی جاتی ہیں۔انہوں نے مبشر ہاشمی کے ساتھ ایک پوڈکاسٹ میں گفتگو کرتے ہوئے بتایا کہ یہ واقعہ فلم مس استنبول کی شوٹنگ کے دوران پیش آیا۔

ریما خان کے مطابق وہ ایک انٹروورٹ شخصیت کی مالک تھیں اور ہمیشہ اپنے کام پر توجہ دیتی تھیں، لیکن نوجوانی میں جذبات پر قابو رکھنا آسان نہیں ہوتا۔ انہوں نے کہا کہ ایک ساتھی اداکارہ نے ان کے ساتھ بدتمیزی کی اور دو مرتبہ نازیبا زبان استعمال کی، جس پر وہ خود پر قابو نہ رکھ سکیں اور سب کے سامنے اسے تھپڑ مار دیا۔اداکارہ نے اس واقعے پر افسوس کا اظہار کرتے ہوئے کہا کہ انہیں صبر سے کام لینا چاہیے تھا اور بعض اوقات بدلہ خدا پر چھوڑ دینا چاہیے۔ریما خان نے یہ بھی واضح کیا کہ فلم انڈسٹری میں نمبر ون یا نمبر ٹو اداکارہ کی بحث اداکاراؤں نے نہیں بلکہ صحافیوں نے شروع کی تھی۔

بالی ووڈ کی متنازع بیانات کے باعث اکثر خبروں میں رہنے والی اداکارہ اور سیاستدان کنگنا رناوت نے انکشاف کیا ہے کہ ان کے سابق بوائے فرینڈ نے ان پر کالا جادو کرنے کا الزام لگایا تھا۔

بھارتی میڈیا کو دیے گئے ایک حالیہ انٹرویو میں کنگنا رناوت نے اپنی زندگی کے مشکل دور کے بارے میں گفتگو کرتے ہوئے کہا کہ ان کے سابق ساتھی نے ان کے خلاف مقدمہ دائر کیا اور عجیب و غریب الزامات لگائے۔
اداکارہ کے مطابق ان پر یہ کہا گیا کہ وہ “چڑیل ہے، خون پیتی ہے، کالے کمرے میں کالے پردے لگا کر کالا جادو کرتی ہے۔” انہوں نے بتایا کہ جب یہ الزامات لگائے گئے اس وقت ان کی عمر تقریباً 26 یا 27 برس تھی۔کنگنا رناوت نے کہا کہ جب ان کے ساتھ ایسا رویہ اختیار کیا گیا تو ان کے پاس اس شخص کو اچھا ظاہر کرنے کی کوئی وجہ نہیں تھی۔انہوں نے مزید کہا کہ آج جب وہ ماضی کی طرف دیکھتی ہیں تو محسوس کرتی ہیں کہ اس وقت کے حالات میں وہ جتنا بہتر کر سکتی تھیں، انہوں نے کیا۔

پاکستانی اداکارہ، میزبان اور گلوکارہ فضا علی نے اپنی متنازع ویڈیو سوشل میڈیا پر وائرل ہونے کے بعد عوام سے معافی مانگ لی ہے۔

حال ہی میں سوشل میڈیا کے مختلف پلیٹ فارمز پر فضا علی کے پروگرام کا ایک مختصر کلپ تیزی سے وائرل ہوا تھا، جس میں ان کے نئے شوہر اعجاز خان نے دورانِ لائیو شو اداکارہ کو کندھے پر اٹھا لیا تھا۔ویڈیو سامنے آنے کے بعد مختلف حلقوں کی جانب سے شدید ردِعمل دیکھنے میں آیا، جبکہ سوشل میڈیا صارفین نے بھی اس عمل پر تنقید کرتے ہوئے پیمرا سے شو پر پابندی لگانے کا مطالبہ کیا۔بعد ازاں فضا علی نے اس تنازع پر وضاحت دیتے ہوئے کہا کہ ویڈیو کو سیاق و سباق سے ہٹ کر پیش کیا گیا، تاہم پیمرا کی جانب سے نوٹس موصول ہونے کے بعد انہوں نے عوام سے باقاعدہ معافی مانگ لی۔

فیس بک پر جاری اپنے ویڈیو پیغام میں فضا علی نے کہا کہ یہ ایک ہلکا پھلکا اور اچانک پیش آنے والا فیملی مومنٹ تھا، جس کا کوئی غلط مقصد نہیں تھا، لیکن اگر اس سے کسی کی دل آزاری ہوئی ہے تو وہ معذرت خواہ ہیں۔انہوں نے مزید کہا کہ وہ اپنے ناظرین کی عزت کرتی ہیں، آئندہ بھی کرتی رہیں گی اور اپنے کام کو مزید بہتر بنانے کی کوشش جاری رکھیں گی۔