Category: شوبز

ممبئی: بھارتی اداکارہ ردھی ڈوگرا نے طلاق کے کئی سال بعد ایک بار پھر محبت اور شادی سے متعلق اپنے خیالات کا اظہار کرتے ہوئے کہا ہے کہ وہ آج بھی محبت پر یقین رکھتی ہیں اور مستقبل میں شادی کے لیے تیار ہیں۔

اداکارہ نے حال ہی میں یوویکا چودھری کے پوڈکاسٹ میں شرکت کی جہاں انہوں نے اپنی ذاتی زندگی، محبت اور رشتوں پر کھل کر گفتگو کی۔ ان کا کہنا تھا کہ "میں بہت رومانٹک ہوں اور محبت کے لیے ہمیشہ اوپن ہوں۔”
یاد رہے کہ ردھی ڈوگرا نے 2011 میں اداکار راکیش بپت سے شادی کی تھی، تاہم 2019 میں دونوں کے درمیان طلاق ہو گئی۔ دلچسپ بات یہ ہے کہ علیحدگی کے باوجود دونوں کے درمیان دوستانہ تعلقات برقرار ہیں۔

اپنے خیالات کا اظہار کرتے ہوئے اداکارہ نے کہا کہ محبت ان کے لیے بہت اہم ہے اور وہ اسے زندگی کا بنیادی جزو سمجھتی ہیں۔ "محبت صرف رومانٹک نہیں ہوتی، یہ ہر جگہ موجود ہے، حتیٰ کہ نفرت میں بھی محبت کا عنصر ہوتا ہے،” انہوں نے کہا۔

شادی کے حوالے سے بات کرتے ہوئے ردھی ڈوگرا نے اسے ایک "کمٹمنٹ” قرار دیا اور کہا کہ شادی ایک طرح کا معاہدہ ہے جسے نبھانا ضروری ہوتا ہے، تاہم کمپینین شپ بغیر شادی کے بھی ممکن ہے۔اپنے ممکنہ جیون ساتھی سے متعلق سوال پر اداکارہ کا کہنا تھا کہ ان کے پاس کوئی مخصوص چیک لسٹ نہیں، لیکن وہ ایک خودمختار، بااعتماد اور دوسروں کی عزت کرنے والے شخص کو ترجیح دیں گی۔ "میں چاہتی ہوں کہ میرا پارٹنر سیلف میڈ ہو، اپنی شناخت رکھتا ہو اور میرے مضبوط ہونے کو قبول کرے،”

اداکارہ کے مطابق وہ اپنی زندگی میں مکمل طور پر خودمختار ہیں اور کسی ایسے شخص کو ترجیح نہیں دیں گی جو ان کی کامیابی سے عدم تحفظ کا شکار ہو۔ردھی ڈوگرا کے اس بیان کے بعد سوشل میڈیا پر ان کی ممکنہ دوسری شادی سے متعلق چہ مگوئیاں شروع ہو گئی ہیں، جبکہ مداح ان کے لیے نیک خواہشات کا اظہار کر رہے ہیں۔

پاکستان شوبز انڈسٹری کی معروف اداکارہ ہانیہ عامر اور گلوکار عاصم اظہر ایک بار پھر خبروں کی زینت بن گئے ہیں، جہاں حالیہ واقعے نے مداحوں کو حیران اور متجسس کر دیا ہے۔

رپورٹس کے مطابق ہانیہ عامر کو حال ہی میں عاصم اظہر کے امریکا میں ہونے والے کنسرٹس کے دوران دیکھا گیا، جہاں انہوں نے ایک بینڈانا کے ذریعے اپنا چہرہ چھپایا ہوا تھا۔ اس بینڈانا پر "عاصم علی” درج تھا، جو نہ صرف عاصم اظہر کا اصل نام ہے بلکہ ان کے نئے البم کا عنوان بھی بتایا جا رہا ہے۔

یاد رہے کہ ہانیہ عامر اور عاصم اظہر ماضی میں ایک دوسرے کے ساتھ تعلقات میں رہے ہیں اور اکثر ایک ساتھ تقریبات میں نظر آتے تھے، تاہم بعد ازاں دونوں کے درمیان علیحدگی ہو گئی تھی۔ بعد میں عاصم اظہر کی منگنی میرب علی سے ہوئی، جو اب ختم ہو چکی ہے۔حالیہ پیش رفت کے بعد سوشل میڈیا پر دونوں کے درمیان دوبارہ قربت کی قیاس آرائیاں زور پکڑ رہی ہیں۔ بعض مداحوں کا خیال ہے کہ یہ عمل دونوں کے تعلق کو باضابطہ بنانے کا اشارہ ہو سکتا ہے، جبکہ دیگر صارفین اس پر تنقید بھی کر رہے ہیں۔سوشل میڈیا پر ملے جلے ردِعمل کا اظہار سامنے آیا ہے، جہاں کچھ صارفین نے اس اقدام کو غیر سنجیدہ قرار دیا، وہیں کئی افراد نے اسے محبت کا کھلا اظہار بھی قرار دیا ہے۔

پاکستان کی معروف ماڈل و اداکارہ صحیفہ جبار خٹک نے حالیہ سوشل میڈیا تنقید کے بعد اپنے مخصوص اور منفرد انداز میں ناقدین کو جواب دیتے ہوئے منی اسکرٹ میں اپنی نئی تصاویر شیئر کر دی ہیں، جس پر ایک نئی بحث چھڑ گئی ہے۔

صحیفہ جبار خٹک، جو مختلف کامیاب ڈراموں میں اپنی جاندار اداکاری کے باعث شہرت رکھتی ہیں، سوشل میڈیا پر بھی کافی متحرک رہتی ہیں اور اکثر سماجی مسائل پر بے باک رائے دینے کے حوالے سے پہچانی جاتی ہیں۔
حال ہی میں ایک نجی ایونٹ میں بولڈ لباس پہننے پر انہیں سوشل میڈیا صارفین کی جانب سے شدید تنقید کا سامنا کرنا پڑا۔ تاہم اداکارہ نے روایتی خاموشی اختیار کرنے کے بجائے ناقدین کو اپنے انداز میں جواب دیتے ہوئے مختلف مواقع پر لی گئی منی اسکرٹ میں تصاویر شیئر کر دیں۔شیئر کی گئی تصاویر میں اداکارہ کو سیاہ اور سفید اسکرٹس کے ساتھ کیژول شرٹس پہنے دیکھا جا سکتا ہے، جبکہ ایک تصویر جم کے دوران لی گئی ہے، جو ان کی فٹنس روٹین کی عکاسی کرتی ہے۔

صحیفہ نے تصاویر کے ساتھ طنزیہ کیپشن بھی تحریر کیا "میرا لیگ ڈے برباد نہ کرو”،جس نے سوشل میڈیا صارفین کی خاصی توجہ حاصل کی اور تیزی سے وائرل ہو گیا۔اداکارہ کے مداحوں اور شوبز شخصیات نے ان کے اعتماد، فٹنس اور جرات مندانہ انداز کو سراہا، جبکہ کچھ صارفین نے بدستور تنقید جاری رکھی۔ ایک صارف نے تبصرہ کیا کہ صحیفہ جبار نے ٹرولنگ کو ضرورت سے زیادہ سنجیدہ لے لیا ہے۔

ممبئی: معروف بھارتی اداکار اکشے کمار کی 13 سالہ بیٹی کو آن لائن گیم کھیلنے کے دوران ہراساں کرنے کے کیس میں پولیس نے بڑی پیش رفت کرتے ہوئے ایک ملزم کو گرفتار کر لیا ہے۔

بھارتی میڈیا کے مطابق یہ واقعہ گزشتہ سال اکتوبر میں سامنے آیا تھا، جب اکشے کمار نے ایک تقریب کے دوران انکشاف کیا تھا کہ آن لائن گیم کھیلتے ہوئے ایک نامعلوم صارف نے ان کی بیٹی سے نازیبا تصاویر بھیجنے کا مطالبہ کیا۔ اداکار کے مطابق ان کی بیٹی نے فوری طور پر گیم بند کر کے اپنی والدہ کو اس واقعے سے آگاہ کیا۔
اکشے کمار نے اس موقع پر کہا تھا کہ اس طرح کے واقعات بچوں کو بلیک میلنگ اور سنگین جرائم کی طرف دھکیل سکتے ہیں، اس لیے والدین اور معاشرے کو ڈیجیٹل دنیا کے خطرات کے بارے میں زیادہ آگاہ ہونے کی ضرورت ہے۔واقعے کے بعد بھارتی سائبر سیل نے فوری طور پر تحقیقات کا آغاز کیا اور جدید تکنیکی ذرائع کی مدد سے ملزم کی شناخت کرتے ہوئے اسے گرفتار کر لیا۔

حکام کے مطابق گرفتار ملزم سے مزید تفتیش جاری ہے تاکہ یہ معلوم کیا جا سکے کہ آیا وہ دیگر بچوں کو بھی آن لائن ہراسانی کا نشانہ بناتا رہا ہے یا نہیں۔بھارتی میڈیا کا کہنا ہے کہ اکشے کمار کے اس انکشاف کے بعد یہ کیس تعلیمی اداروں میں سائبر سیکیورٹی اور آن لائن حفاظت سے متعلق آگاہی مہمات میں بھی شامل کیا جا رہا ہے، تاکہ طلبہ کو انٹرنیٹ کے محفوظ استعمال اور ممکنہ خطرات سے آگاہ کیا جا سکے۔

عالمی شہرت یافتہ پاکستانی گلوکار عاصم اظہر اور معروف اداکارہ ہانیہ عامر ایک بار پھر سوشل میڈیا اور شوبز حلقوں میں توجہ کا مرکز بن گئے ہیں۔

گزشتہ چند مہینوں سے دونوں فنکاروں کے درمیان تعلقات میں بہتری کی خبریں گردش کر رہی تھیں، جبکہ مختلف تقریبات میں بھی ان کی مشترکہ شرکت نے مداحوں کی دلچسپی میں اضافہ کیا۔ سوشل میڈیا پر ان کی ممکنہ شادی سے متعلق قیاس آرائیاں بھی زور پکڑتی جا رہی ہیں۔اس وقت دونوں فنکار امریکا میں موجود ہیں، جہاں عاصم اظہر اپنے میوزک کنسرٹس میں پرفارم کر رہے ہیں، جبکہ ہانیہ عامر بھی ان تقریبات میں شریک ہو رہی ہیں۔حال ہی میں نیویارک میں ہونے والے ایک کنسرٹ کے دوران ایک دلچسپ لمحہ دیکھنے میں آیا، جب عاصم اظہر نے پرفارمنس کے دوران مختصر طور پر ہانیہ عامر کا ہاتھ تھام لیا۔ اس منظر کو مداحوں نے فوری طور پر کیمرے میں محفوظ کر لیا، جس کے بعد ویڈیوز اور تصاویر سوشل میڈیا پر تیزی سے وائرل ہو گئیں۔

کنسرٹ کے دوران دونوں فنکار سفید لباس میں ہم آہنگ انداز میں دکھائی دیے، جبکہ ہانیہ عامر نے سرخ ماسک کے ذریعے اپنا چہرہ ڈھانپ رکھا تھا۔اس واقعے پر سوشل میڈیا صارفین کی جانب سے ملا جلا ردِعمل سامنے آیا ہے۔ کئی مداحوں نے اس جوڑی کو سراہتے ہوئے ان کے لیے نیک خواہشات کا اظہار کیا اور ممکنہ شادی کی امید بھی ظاہر کی، جبکہ کچھ صارفین نے اس لمحے کو غیر مناسب قرار دیا۔

بھارتی فلم انڈسٹری میں بعض کہانیاں ایسی ہوتی ہیں جو کسی فلمی اسکرپٹ سے کم نہیں ہوتیں۔ ایسی ہی ایک کہانی معروف اداکارہ شویتا باسو پرساد کی ہے، جنہوں نے کم عمری میں شہرت کی بلندیوں کو چھوا، ایک بڑے تنازع کا سامنا کیا اور پھر اپنی محنت سے دوبارہ مقام حاصل کیا۔

جمشیدپور میں پیدا ہونے والی شویتا باسو پرساد نے اپنے کیریئر کا آغاز بطور چائلڈ آرٹسٹ کیا اور فلم میں ڈبل رول ادا کرکے ناقدین کو حیران کر دیا۔ اسی فلم کے لیے انہوں نے نیشنل ایوارڈ بھی حاصل کیا۔ بعد ازاں ٹی وی ڈرامہ “کہانی گھر گھر کی” اور فلم اقبال میں اپنی اداکاری سے خوب داد سمیٹی۔اصل شہرت انہیں تیلگو فلم کوٹھا بنگارو لوکم سے ملی، جس نے انہیں راتوں رات نوجوانوں کی پسندیدہ اداکارہ بنا دیا۔ تاہم سال 2014 میں ان کی زندگی نے اچانک ڈرامائی موڑ لیا، جب حیدرآباد کے علاقے بنجارا ہلز میں ایک ہوٹل پر پولیس چھاپے کے دوران انہیں جسم فروشی کے الزام میں گرفتار کر لیا گیا۔ اس واقعے نے نہ صرف ان کی ساکھ کو شدید نقصان پہنچایا بلکہ ان کے کیریئر کو بھی بڑا دھچکا لگا۔

اداکارہ کو کچھ عرصے کے لیے ریسکیو ہوم بھی بھیجا گیا، تاہم بعد ازاں انہوں نے عدالت میں اپنی بے گناہی ثابت کی۔ دسمبر 2014 میں عدالت نے تمام الزامات کو مسترد کرتے ہوئے انہیں کلین چٹ دے دی۔ شویتا نے مؤقف اختیار کیا کہ انہیں غلط طور پر پھنسایا گیا تھا اور وہ دراصل ایک ایوارڈ تقریب میں شرکت کے لیے حیدرآباد گئی تھیں۔مشکل وقت کے باوجود انہوں نے ہمت نہیں ہاری اور دوبارہ انڈسٹری میں قدم جمایا۔اداکارہ کی ذاتی زندگی میں بھی اتار چڑھاؤ آئے۔ انہوں نے 2018 میں شادی کی، تاہم ایک سال بعد علیحدگی اختیار کر لی۔ اس کے باوجود شویتا باسو پرساد نے نہ صرف اداکاری بلکہ ہدایتکاری اور پروڈکشن میں بھی اپنی شناخت قائم کی۔

فلمی دنیا میں ان کا سفر اس بات کی مثال ہے کہ مشکلات چاہے کتنی ہی بڑی کیوں نہ ہوں، مستقل مزاجی اور حوصلے سے دوبارہ کامیابی حاصل کی جا سکتی ہے۔

پاکستانی شوبز انڈسٹری کی معروف اداکارہ بشریٰ انصاری نے دبئی کے گولڈن ویزا کی پیشکش قبول نہ کرنے کی وجہ واضح کرتے ہوئے اپنی رائے کا اظہار کیا ہے۔

حال ہی میں ایک ویب شو میں شرکت کے دوران انہوں نے دبئی کے گولڈن ویزا سے متعلق گفتگو کرتے ہوئے بتایا کہ انہیں یہ پیشکش کی گئی تھی، تاہم انہوں نے اسے قبول نہیں کیا۔اداکارہ کے مطابق متحدہ عرب امارات خصوصاً دبئی میں اگرچہ دولت اور سہولیات کی فراوانی ہے، لیکن ان کے خیال میں وہاں تعلیمی اور فکری ترقی کے لیے وہ ادارے موجود نہیں جو ایک مضبوط علمی معاشرے کی بنیاد رکھ سکیں، جیسے عالمی معیار کی بڑی جامعات۔بشریٰ انصاری نے کہا کہ اگر اس نوعیت کے ادارے قائم کیے جاتے تو وہاں کے لوگ مزید علمی اور فکری طور پر مضبوط ہوتے اور دنیا کو بہتر انداز میں مقابلہ دے سکتے۔انہوں نے دبئی کے بارے میں اپنے ذاتی مشاہدات بیان کرتے ہوئے کہا کہ وہاں ہر چیز برانڈڈ اور مہنگی نظر آتی ہے، لوگ مہنگے پرفیوم، بیگز اور دیگر لگژری اشیاء استعمال کرتے ہیں، جس سے انہیں وہاں کا ماحول کچھ حد تک مصنوعی محسوس ہوتا ہے۔

اداکارہ نے یہ بھی بتایا کہ انہیں گولڈن ویزا کی پیشکش ایک ٹریول ایجنٹ کی جانب سے مفت بھی کی گئی تھی، تاہم انہوں نے ذاتی دلچسپی نہ ہونے اور رشتے دار نہ ہونے کے باعث یہ پیشکش قبول نہیں کی۔

اکستانی اداکارہ میرا نے ایک حالیہ انٹرویو میں بھارتی فلم ساز مہیش بھٹ اور اداکارہ عالیہ بھٹ کے ساتھ اپنے تعلقات اور ماضی کی یادوں سے متعلق اہم انکشافات کیے ہیں۔

میرا نے گفتگو کے دوران بتایا کہ انہوں نے بھارتی فلم “نظر” میں مہیش بھٹ کے ساتھ کام کیا تھا، جس کے دوران ان کے بھٹ فیملی کے ساتھ قریبی اور دوستانہ تعلقات قائم ہو گئے تھے۔ ان کے مطابق بھارت میں قیام کے دوران وہ مہیش بھٹ کے گھر بھی مقیم رہیں اور ان کے اہل خانہ کے ساتھ وقت گزارنے کے مواقع ملے۔اداکارہ نے مزید کہا کہ ان کی آنے والی فلم “سائیکو” بھارت میں ریلیز نہیں ہو رہی، جس پر انہیں افسوس ہے۔ ان کا کہنا تھا کہ ان کے خیال میں اگر یہ فلم ریلیز ہوتی تو مہیش بھٹ اور ان کی اہلیہ اسے ضرور دیکھتے اور پسند کرتے۔

میرا نے انٹرویو میں یہ بھی بتایا کہ جب وہ بھارت میں کام کر رہی تھیں اس وقت عالیہ بھٹ بہت کم عمر تھیں۔ انہوں نے کہا کہ اس دور میں ان کے بھٹ فیملی کے ساتھ دوستانہ تعلقات تھے اور وہ عالیہ بھٹ کے بچپن کی یادوں سے بھی واقف ہیں۔

بھارت کی ریاست گوا سے تعلق رکھنے والی سادھوی ستیش سیل نے اوڈیشہ کے دارالحکومت بھونیشور میں منعقد ہونے والے مس انڈیا ورلڈ 2026 کے 61ویں ایڈیشن میں شاندار کارکردگی دکھاتے ہوئے ٹائٹل اپنے نام کر لیا ہے۔

سادھوی ستیش سیل کا تعلق ایک سادہ مگر تعلیم یافتہ پس منظر سے ہے۔ انہوں نے اکنامکس اور انٹرنیشنل ریلیشنز میں گریجویشن کیا ہے اور عالمی امور و معاشی تبدیلیوں میں گہری دلچسپی رکھتی ہیں۔ ان کی علمی قابلیت نے مقابلے کے دوران ججز کو بھی متاثر کیا۔مقابلے کے دوران ان سے پوچھا گیا کہ "فوری شہرت بہتر ہے یا دیرپا اثر؟” جس پر سادھوی نے نہایت پختگی اور اعتماد کے ساتھ جواب دیا کہ شہرت وقتی ہوتی ہے، مگر اصل اہمیت اثر کی ہے جو لوگوں کی زندگیوں میں مثبت تبدیلی لاتا ہے۔ یہی جواب ان کی جیت کا فیصلہ کن لمحہ ثابت ہوا۔سادھوی نے اپنی کامیابی کے بعد کہا کہ ان کے لیے یہ تاج صرف خوبصورتی کی علامت نہیں بلکہ ایک بڑی ذمہ داری ہے، جس کے ذریعے وہ بھارت کی نمائندگی عالمی سطح پر دیانت، اعتماد اور خدمت کے جذبے کے ساتھ کریں گی۔

اپنی جدوجہد کے بارے میں بات کرتے ہوئے انہوں نے بتایا کہ انہیں سب سے بڑا چیلنج خود پر اعتماد قائم رکھنا تھا۔ ابتدا میں وہ دوسروں کی کامیابیوں سے متاثر ہو کر خود پر شک کرتی تھیں، لیکن بعد میں انہوں نے اپنی سوچ بدلی اور خود کو بہتر بنانے پر توجہ دی۔تعلیم اور اعتماد کے امتزاج نے سادھوی کو نہ صرف ایک خوبصورت چہرہ بلکہ ایک مضبوط شخصیت بھی بنایا ہے۔ اب وہ عالمی مقابلہ مس ورلڈ میں بھارت کی نمائندگی کے لیے تیار ہیں۔ان کی جیت کو سوشل میڈیا پر بھی خوب سراہا جا رہا ہے اور انہیں نوجوان نسل کے لیے ایک متاثر کن مثال قرار دیا جا رہا ہے۔