سابق بھارتی انڈر 19 کرکٹر اور پنجاب سے تعلق رکھنے والے میڈیم فاسٹ بولر امنپریت سنگھ گِل 36 برس کی عمر میں اچانک چل بس
بھارتی میڈیا رپورٹس کے مطابق امنپریت سنگھ گِل ماضی میں بھارتی اسٹار بیٹر ویرات کوہلی کی انڈر 19 ٹیم کے ساتھی رہ چکے تھے اور نوجوان کرکٹرز میں باصلاحیت بولر کے طور پر پہچانے جاتے تھے۔امنپریت گِل نے پنجاب کی نمائندگی کرتے ہوئے 6 فرسٹ کلاس میچز میں شرکت کی اور مجموعی طور پر 11 وکٹیں حاصل کیں۔ وہ انڈین پریمیئر لیگ کے ابتدائی سیزن میں پنجاب فرنچائز کا بھی حصہ رہے، جبکہ بعد ازاں پنجاب کی سینئر سلیکشن کمیٹی میں بھی ذمہ داریاں انجام دیتے رہے۔
سابق بھارتی آل راؤنڈر یوراج سنگھ نے امنپریت گِل کے انتقال پر گہرے دکھ اور افسوس کا اظہار کیا۔ اپنے پیغام میں یوراج سنگھ کا کہنا تھا کہ وہ اپنے ابتدائی کرکٹ دنوں میں امنپریت کے ساتھ ڈریسنگ روم شیئر کر چکے ہیں۔یوراج سنگھ کے مطابق امنپریت گِل نہایت خاموش طبع، محنتی اور کھیل سے غیر معمولی وابستگی رکھنے والے کرکٹر تھے، ان کی اچانک وفات کرکٹ حلقوں کے لیے صدمے کا باعث بنی ہے۔