Category: کھیل

قومی کرکٹ ٹیم کے مایہ ناز کھلاڑی احمد شہزاد نے حالیہ سیلاب سے متاثرہ علاقوں کا دورہ کرتے ہوئے کمالیہ میں متاثرین میں امدادی سامان تقسیم کیا۔ انہوں نے متاثرہ خاندانوں سے ملاقات کی، اُن کے مسائل سنے اور ان کے ساتھ بھرپور اظہارِ یکجہتی کیا۔

احمد شہزاد نے اس موقع پر میڈیا سے گفتگو کرتے ہوئے کہا کہ حالیہ بارشوں اور سیلاب نے علاقے میں شدید تباہی مچائی ہے، لوگوں کے گھر، فصلیں اور روزگار سب کچھ متاثر ہوا ہے۔ انہوں نے کہا کہ ایسے حالات میں صرف حکومتی ادارے ہی نہیں بلکہ تمام طبقاتِ زندگی کو مل کر کردار ادا کرنا ہوگا۔احمد شہزاد کا کہنا تھا کہ وہ ذاتی حیثیت میں متاثرین کی مدد کے لیے میدان میں آئے ہیں اور دیگر مخیر حضرات اور عوام سے بھی اپیل کرتے ہیں کہ وہ آگے بڑھ کر ان لوگوں کی بحالی میں اپنا حصہ ڈالیں۔

متاثرینِ سیلاب نے احمد شہزاد کی آمد اور ان کے جذبۂ ہمدردی کو سراہتے ہوئے اُن کا شکریہ ادا کیا۔

ایشیا کپ کرکٹ ٹورنامنٹ آج سے متحدہ عرب امارات میں شروع ہورہا ہے۔

متحدہ عرب امارات میں آج سے شروع ہونے والے ٹی20 ایشیا کپ کی ٹرافی کی رونمائی کر دی گئی ہے۔
ٹرافی کی رونمائی منگل کے روز دبئی انٹرنیشنل کرکٹ سٹیڈیم میں کی گئی جس میں تمام ٹیموں کے کپتان شریک ہوئے، ایشین کرکٹ کونسل (اے سی سی ) کے صدر اور پاکستان کرکٹ بورڈ کے چیئرمین محسن نقوی نے ٹرافی کی رونمائی کی، اس موقع پر میڈیا سینٹر پر بھی خوب گہما گہمی نظر آئی جبکہ پاکستان اور بھارتی کپتانوں کی نظروں کا ملاپ اور مصافحہ مرکز نگاہ رہا ،اس موقع پر تمام ٹیموں کے کپتانوں نے پریس کانفرنس کے دوران صحافیوں کے سوالوں کے جواب بھی دیئے، ایشیا کپ پریس کانفرنس میں کپتانوں کی باڈی لینگویج اور مسکراہٹیں میڈیا کی توجہ کا مرکز بن گئیں ۔

ایونٹ کی انعامی رقم سے متعلق ابھی باضابطہ طور پر کوئی اعلان نہیں ہوا ہے تاہم بھارتی میڈیا کے مطابق فاتح ٹیم کو تقریباً 3 لاکھ امریکی ڈالر ملیں گے،رنرز اپ کو تقریباً ڈیڑھ لاکھ امریکی ڈالر دیے جائیں گے۔

واضح رہے کہ ٹی ٹوئنٹی فارمیٹ میں کھیلے جانے والے ایشیاکپ 2025 میں آٹھ ٹیموں کو دو گروپس میں تقسیم کیا گیا ہے.گروپ اے میں پاکستان، بھارت، عمان اور یو اے ای شامل ہیں جبکہ گروپ بی میں سری لنکا، بنگلادیش، افغانستان اور ہانگ کانگ کی ٹیمیں شامل ہیں۔

پاکستان کرکٹ ٹیم کے لیفٹ آرم فاسٹ بولر عثمان شنواری نے انٹرنیشنل کرکٹ کو خیرباد کہہ دیا۔ پاکستان کرکٹ بورڈ (پی سی بی) کے مطابق 32 سالہ عثمان شنواری نے باضابطہ طور پر ریٹائرمنٹ کا اعلان کردیا ہے۔

عثمان شنواری نے اپنے کیریئر کے دوران ایک ٹیسٹ، 17 ون ڈے اور 16 ٹی ٹوئنٹی انٹرنیشنل میچز میں قومی ٹیم کی نمائندگی کی۔ وہ اپنی تیز رفتار اور جارحانہ باؤلنگ کے باعث جانے جاتے تھے اور کئی مواقع پر پاکستان کو فتح دلانے میں اہم کردار ادا کیا۔اعداد و شمار کے مطابق عثمان شنواری نے ون ڈے فارمیٹ میں مجموعی طور پر 34 وکٹیں حاصل کیں جبکہ ٹی ٹوئنٹی میچز میں 13 کھلاڑیوں کو آؤٹ کیا۔ انہیں 2018 کے ایشیا کپ اسکواڈ میں بھی شامل کیا گیا تھا جہاں انہوں نے اپنی باؤلنگ کے ذریعے ٹیم کو سہارا دیا۔

ذرائع کے مطابق شنواری اب ڈومیسٹک اور لیگز کرکٹ میں اپنی فٹنس کے مطابق حصہ لیتے رہیں گے۔

وزیر اعظم شہباز شریف نے پاکستان کرکٹ بورڈ (پی سی بی) کے پیٹرن کی حیثیت سے ایک اہم فیصلہ کرتے ہوئے منصور قادر کو پی سی بی کا الیکشن کمشنر مقرر کر دیا ہے۔

وزیر اعظم ہاؤس سے جاری اعلامیے کے مطابق منصور قادر اپنی پیشہ ورانہ صلاحیتوں اور بیوروکریسی میں وسیع تجربے کے باعث اس عہدے کے لیے بہترین انتخاب قرار پائے ہیں۔ ان کی تعیناتی کا مقصد پی سی بی کے آئندہ انتخابات کو شفاف، غیر جانبدار اور پیشہ ورانہ انداز میں منعقد کرانا ہے۔عہدہ سنبھالنے کے بعد منصور قادر نے چیئرمین پی سی بی سید محسن نقوی سے ملاقات کی، جس میں پی سی بی کے آئینی و انتخابی معاملات پر تبادلہ خیال کیا گیا۔ ملاقات کے دوران منصور قادر نے چیئرمین کو اپنی ذمہ داریوں کے حوالے سے آگاہ کیا اور یقین دہانی کرائی کہ وہ اپنی تمام تر صلاحیتوں کو بروئے کار لاتے ہوئے انتخابات کو شفاف بنانے کے لیے ہر ممکن اقدام کریں گے۔

چیئرمین پی سی بی محسن نقوی نے منصور قادر کو نئی ذمہ داری سنبھالنے پر مبارکباد دی اور اس اُمید کا اظہار کیا کہ وہ اپنے فرائض ایمانداری، لگن اور غیر جانبداری کے ساتھ ادا کریں گے۔ انہوں نے کہا کہ پی سی بی کی ترقی اور شفاف نظام کے لیے ایک مضبوط اور منصفانہ الیکشن کمشنر کا کردار نہایت اہم ہے۔