Tag: تازہ ترین

دنیا کے سب سے بڑے تیرتے ہوئے شہر کی تعمیر کا منصوبہ ،جسے ایک مکمل شہر کی حیثیت بھی حاصل ہوگی –

’’فریڈم شپ‘‘ نامی یہ مجوزہ منصوبہ نہ صرف دنیا کا سب سے بڑا بحری جہاز ہوگا بلکہ اسے ایک مکمل شہر کی حیثیت بھی حاصل ہوگی جہاں بیک وقت 80 ہزار افراد رہ سکیں گے فریڈم شپ کی لمبائی تقریباً ایک میل، چوڑائی 800 فٹ اور اونچائی 30 منزلہ عمارت کے برابر ہوگی اس دیوہیکل بحری شہر کی تعمیر پر تقریباً 12 ارب پاؤنڈ لاگت آنے کا تخمینہ لگایا گیا ہے۔

جہاز میں 50 ہزار مستقل رہائشیوں کے لیے گھر موجود ہوں گے جبکہ 10 ہزار سیاحوں اور روزانہ آنے والے مہمانوں کے لیے بھی جگہ مختص ہوگی۔ اس کے علاوہ 20 ہزار افراد پر مشتمل عملہ اس شہر نما جہاز کے انتظامات سنبھالے گا،فریڈم شپ میں جدید طبی سہولیات سے آراستہ تحقیقی اسپتال، اسکول، کالج، شاپنگ مالز، ریستوران، بینک، تجارتی مراکز اور مالیاتی ادارے قائم کیے جائیں گے منصوبے میں ایک 15 ہزار نشستوں والا اسپورٹس اسٹیڈیم، واٹر پارک، دو عجائب گھر، سمفنی ہال، کانفرنس سینٹر اور متعدد بلند و بالا ہوٹل بھی شامل ہیں۔

رہائشیوں اور سیاحوں کی تفریح کے لیے ایک وسیع ایکویریم، جدید نائٹ کلب، دو منزلہ فوڈ ہال اور سرسبز پارکس بھی تعمیر کیے جائیں گے۔ جہاز کے اندر مختلف علاقوں کو آپس میں ملانے کے لیے ٹرام سسٹم متعارف کرایا جائے گا جبکہ پیدل چلنے والوں کے لیے 15 میل طویل واک ویز اور تین ایکڑ پر مشتمل سبزہ زار بنائے جائیں گے۔

فریڈم شپ کسی بندرگاہ پر مستقل طور پر نہیں رکے گا بلکہ بین الاقوامی سمندری حدود میں رہے گا اور تقریباً ہر دو سال بعد پوری دنیا کا چکر مکمل کرے گا چونکہ اس کا حجم موجودہ بندرگاہوں کی گنجائش سے کہیں زیادہ ہوگا، اس لیے مسافروں کو ساحل تک پہنچانے کے لیے خصوصی فیری سروس استعمال کی جائے گی۔

فریڈم شپ کا تصور پہلی مرتبہ 1990 کی دہائی میں امریکی انجینئر نارمن نکسن نے پیش کیا تھا، تاہم مختلف وجوہات کے باعث منصوبہ عملی شکل اختیار نہ کر سکا اب فریڈم کروز لائن انٹرنیشنل کے چیف ایگزیکٹو راجر گوچ نے اسے دوبارہ زندہ کرنے کا اعلان کیا ہے اس منصوبے میں دلچسپی اتنی زیادہ ہے کہ بیک وقت تین ایسے جہاز بھی بنائے جا سکتے ہیں۔

منصوبے کے مطابق جہاز کی تعمیر انڈونیشیا میں کی جائے گی اور اسے مختلف حصوں میں تیار کرکے سمندر میں جوڑا جائے گا، تعمیر مکمل ہونے میں 3 سے 4 سال لگ سکتے ہیں، تاہم انتظامیہ کا دعویٰ ہے کہ لوگ تعمیر کے دوران ہی اس پر رہائش اختیار کرنا شروع کر سکیں گے فریڈم شپ کو ماحول دوست منصو بہ بھی قرار دیا جا رہا ہے منتظمین کے مطابق اسے ممکنہ طور پر جوہری توانائی سے چلایا جائے گا جس سے کاربن اخراج میں نمایاں کمی آئے گی ساتھ ہی سمندر وں کی صفائی اور ماحول کے تحفظ کے لیے خصوصی اقدامات بھی کیے جائیں گے۔

اگر یہ منصوبہ حقیقت کا روپ دھار لیتا ہے تو فریڈم شپ نہ صرف دنیا کا سب سے بڑا بحری جہاز ہوگا بلکہ انسانی تاریخ کا پہلا مستقل تیرتا ہوا شہر بھی بن جائے گا جو رہائش، کاروبار، تعلیم اور تفریح کا ایک منفرد عالمی مرکز ثابت ہو سکتا ہے۔

امریکی صدر ڈونلڈ ٹرمپ کی تنبیہ کے باوجود اسرائیل کے لبنان پروحشیانہ زمینی اور فضائی حملے جاری ہیں، جس کے جواب میں ایران نے اسرائیل اور امریکا دونوں کو سخت ترین نتائج کی وارننگ دے دی ہے.
دئے اور طائر کے ایک اسپتال پر ہونے والے حملے میں جاں بحق افراد کی تعداد 4ہو گئی ہے جبکہ50 سے زائد افراد زخمی ہیں ان حملوں کے دوران دیر الزہرانی میں 2 لبنانی فوجی بھی زخمی ہوئے ہیں.

لبنان کی اس سنگین صورتحال پر شدید ردعمل دیتے ہوئے ایرانی پارلیمنٹ کی نیشنل سیکیورٹی کمیٹی کے سربراہ ابراہیم عزیزی نے کہا کہ اگر لبنان پر حملے بند نہ ہوئے تو اس کے بہت سنگین نتائج ہوں گے، اور ایرانی فوج کسی بھی جارحیت کا جواب دینے کے لیے مکمل طور پر تیار ہے، خطے میں موجود امریکی افواج کو بھی ان نتائج کو بھگتنا پڑے گا، اور یہ لوگ اچھی طرح جانتے ہیں کہ ہماری یہ دھمکی کھوکھلی نہیں ہے.

اسی طرح ایرانی اسپیکر باقر قالیباف نے بھی سوشل میڈیا پلیٹ فارم ’ایکس‘ پر امریکا کو تنقید کا نشانہ بناتے ہوئے کہا کہ امریکا جنگ بندی کی پاسداری نہیں کر رہا ہے، اور بحری ناکہ بندی سمیت لبنان میں اسرائیل کے جنگی جرائم اس بات کا واضح ثبوت ہیں، ہر فیصلے کی ایک قیمت ہوتی ہے اور وہ قیمت ادا کرنا پڑتی ہے، اب سب کچھ اپنے انجام تک پہنچ کر رہے گا.

عالمی دباؤ کے باوجود اسرائیل کے وزیر اعظم بنجمن نیتن یاہو نے ہٹ دھرمی کا مظاہرہ کرتے ہوئے حملے جاری رکھنے کا اعلان کیا ہے سوشل میڈیا پر اپنے ایک بیان میں واضح طور پر کہا کہ جنوبی لبنان میں اسرائیلی فوج اپنی حکمتِ عملی کے مطابق آپریشنز جاری رکھے گی، اور اسرائیل اپنے شہریوں کے تحفظ پر کسی قسم کا کوئی سمجھوتہ نہیں کرے گا.

دوسری طرف اسرائیل اور لبنان کے حکام ایک بار پھر واشنگٹن میں اکٹھے ہو رہے ہیں، جہاں دونوں ممالک کے درمیان مذاکرات کا پانچواں دور ہوگا جس میں امن عمل کو دوبارہ بحال کرنے پر تبادلہ خیال کیا جائے گا.

امریکی صدر ڈونلڈ ٹرمپ پر قاتلانہ حملے کے بعد منسوخ کر دیے گئے وائٹ ہاؤس پریس ڈنر کو دوبارہ منعقد کرنے کا اعلان کر دیا گیا ہے تقریب اب 24 جولائی کو منعقد ہوگی اور صدر ٹرمپ اس میں شرکت کریں گے۔

امریکی میڈیا رپورٹس کے مطابق صدر ڈونلڈ ٹرمپ نے تقریب میں شرکت کی دعوت قبول کر لی ہے یہ تقریب واشنگٹن میں صحافیوں اور میڈیا نمائندوں کے اعزاز میں منعقد کی جاتی ہے اور امریکی سیاسی و میڈیا حلقوں کی اہم تقریبات میں شمار ہوتی ہے۔

صدر ٹرمپ نے اس حوالے سے اپنے بیان میں کہا کہ وہ ’پاگل عناصر‘ کو اپنی طرزِ زندگی یا اپنے شیڈول میں تبدیلی لانے کی اجازت نہیں دے سکتےعوامی سرگرمیاں اور سرکاری تقریبات معمول کے مطابق جاری رہیں گی، فی الحال یہ کہنا مشکل ہے کہ آیا وہ تقریب میں پہلے کی طرح سخت اور دوٹوک انداز میں خطاب کریں گے یا نہیں، تاہم اس بارے میں جلد ہی صورتحال واضح ہو جائے گی، یہ تقریب پنسلوانیا ایونیو پر واقع والڈورف آسٹوریا کے بال روم میں منعقد ہوگی، اس مقام کی تعمیر میں ان کا بھی کردار رہا ہے۔

واضح رہے کہ رواں سال اپریل میں واشنگٹن میں وائٹ ہاؤس کے میڈیا نمائندوں کے اعزاز میں منعقدہ عشائیے کے دوران فائرنگ کا واقعہ پیش آیا تھا، اس واقعے میں صدر ٹرمپ محفوظ رہے جبکہ حملہ آور کو موقع پر گرفتار کر لیا گیا تھا،بعد ازاں امریکی حکام نے ملزم پر صدر ڈونلڈ ٹرمپ کو قتل کرنے کی کوشش کا باضابطہ الزام عائد کیا تھا، جس کے بعد سکیورٹی خدشات کے پیش نظر پریس ڈنر کو منسوخ کر دیا گیا تھا،اب تقریب کی دوبارہ میزبانی کے اعلان کو صدر ٹرمپ کی معمول کی سرگرمیوں کی بحالی اور سکیورٹی اداروں کے اعتماد کا اظہار قرار دیا جا رہا ہے۔