Tag: شوبز

پاکستان کے معروف ٹی وی میزبان اور اداکار توثیق حیدر اور سینئر اداکارہ و میزبان فرح سعدیہ کی مبینہ شادی کی خبریں اور تصاویر گزشتہ روز سوشل میڈیا پر تیزی سے وائرل ہوئیں، تاہم دونوں فنکاروں نے ان خبروں کو بے بنیاد قرار دیا۔

گزشتہ کچھ دنوں سے سوشل میڈیا اور خاص طور پر یوٹیوب پر یہ دعویٰ کیا جا رہا تھا کہ دونوں فنکاروں نے آپس میں شادی کر لی ہے مختلف یوٹیوب چینلز نے ان کی تصاویر استعمال کر کے یہ خبریں چلائیں، جس کے بعد یہ معاملہ تیزی سے انٹرنیٹ پر پھیل گیا ، ان افواہوں کے بڑھنے پر توثیق حیدر اور فرح سعدیہ نے خود ایک ویڈیو جاری کی، جس میں انہوں نے اصل حقیقت سے آگاہ کیا، دونوں نے واضح کیا کہ ان کی شادی سے متعلق خبریں صرف ویوز اور پیسے کمانے کے لیے پھیلائی گئی تھیں۔

ویڈیو میں فنکاروں نے طنزیہ انداز میں کہا کہ ہم خوشی خوشی شادی کے بندھن میں بندھ چکے ہیں اور ہم خود یہ خبر آپ کو دینا چاہتے تھے، لیکن افسوس کہ ہمارے یوٹیوبرز نے پہلے ہی یہ خبر بریک کر دی،توثیق حیدرنے کہا کہ جب میں صبح اٹھا تو مجھے پتا چلا کہ میری فرح سے شادی ہو چکی ہے اور اس شادی کا مجھے خود بھی نہیں پتہ، انٹرنیٹ پر ہماری ایک شاندار شادی کی تصویر بھی بنا دی گئی تھی، اتنی اچھی اے آئی تصویر بنائی ہوئی تھی، جس میں میں بہت اچھا دولہا لگ رہا تھا، انہوں نے ہمیں بہت خوبصورت دولہا اور دلہن بنا دیا۔

توثیق حیدر نے یوٹیوبرز کو مخاطب کرتے ہوئے کہا کہ اگر آپ نے ہماری اس جھوٹی خبر سے دو لاکھ روپے کما لیے ہیں تو مہربانی کر کے ہمیں پچاس ہزار روپے سلامی کے بھیج دیں، یہ ایک اچھا کاروباری سودا ہو سکتا ہے۔

اس کے بعد فرح سعدیہ نے سنجیدہ انداز میں بات کرتے ہوئے کہا کہ ایسی افواہیں ان کے خاندانوں کے لیے پریشانی کا باعث بنتی ہیں، ہماری اپنی فیملیز ہیں، بچے اور والدین ہیں، جب ایسی خبریں پھیلتی ہیں تو لوگ ہم سے سوال کرتے ہیں، یہ مناسب نہیں ہے، وہ اس طرح کی باتوں سے خوش نہیں ہیں اور لوگ دوسروں کی زندگیوں کے بجائے اپنی زندگیوں پر توجہ دیں-

فرح سعدیہ نے یہ بھی واضح کیا کہ وہ دونوں اکیلے یعنی سنگل ہیں اور خوش ہیں، ہم دونوں صرف اچھے دوست ہیں اور ہمیشہ دوست ہی رہیں گے، ہم ایک دوسرے کے ساتھ کام کرتے ہیں اور یہی ہماری حقیقت ہے، اور اے آئی کے ذریعے ایسی جعلی تصاویر بنانے والوں کو چاہیے کہ وہ اپنا وقت کسی زیادہ مثبت اور تعمیری کام میں صرف کریں، توثیق حیدر نے کہا کہ انہوں نے سنگل رہ کر اور فرح نے شادی کر کے بہت کچھ سیکھ لیا ہے۔

واضح رہے کہ یہ دونوں فنکار پاکستان ٹیلی ویژن (پی ٹی وی) سے طویل عرصے سے وابستہ ہیں اور اسلام آباد سینٹر میں اپنے مارننگ شوز اور معلوماتی پروگرامز کے باعث پہچانے جاتے ہیں، دونوں نے ڈراموں میں بھی مختلف کردار ادا کیے ہیں اور آج کل مختلف ٹی وی سیریلز میں نظر آ رہے ہیں توثیق حیدر پاکستان کے معروف ٹی وی اور ریڈیو براڈکاسٹرز میں شمار ہوتے ہیں انہوں نے 1987 میں ریڈیو پاکستان سے بطور نیوز کاسٹر اپنے پیشہ ورانہ سفر کا آغاز کیا اور ملک کے پہلے ایف ایم ریڈیو کی ابتدائی آواز بننے کا اعزاز بھی حاصل کیا۔ بعد ازاں انہوں نے ٹی وی میزبانی اور اداکاری کے میدان میں بھی نمایاں کامیابیاں حاصل کیں۔

اداکارہ مومنہ اقبال نےعندیہ دیا ہے کہ اگر حالات نے مجبور کیا تو میں حالیہ واقعات کی مکمل حقیقت اور شواہد عوام کے سامنے لے آؤں گی۔

اداکارہ نے سوشل میڈیا پر ایک بیان شئیر کیا اداکارہ نے اپنے بیان میں کسی فرد یا واقعے کا نام نہیں لیا، تاہم یہ ضرور اشارہ دیا کہ اگر ضرورت پڑی تو وہ تمام حقائق سامنے لے آئیں گی، اپنی بہن رمشا اقبال کے بیان کو شیئر کرتے ہوئے لکھا کہ گزشتہ چند برسوں میں میں اور میرا خاندان بے شمار مشکلات سے گزرا ہے میں نے کئی ناانصافیوں کے باوجود خاموشی اختیار کیے رکھی کیونکہ میں اپنی ذاتی زندگی کو عوامی تماشہ نہیں بنانا چاہتی تھی۔

انہوں نے اپنے والد کے 2 سال قبل انتقال کا ذکر کرتے ہوئے لکھا کہ ان کے جانے کے بعد سے خاندان مسلسل آزمائشوں اور مشکل حالات کا سامنا کر رہا ہے، اداکارہ نے بعض نامعلوم افراد کو مخاطب کرتے ہوئے سوال اٹھایا کہ آخر وہ کتنے لوگوں کو اپنے اثر و رسوخ میں لا سکتے ہیں،وقت آنے پر حقیقت خود سامنے آ جائے گی اور مجھے اُمید ہے کہ تمام شواہد عوام کے سامنے پیش کرنے کی نوبت نہیں آئے گی، ایک ایک کا بتاؤں گی پھر، ان شاء اللہ، میرا گواہ اللہ ہے۔

پاکستانی اداکارہ مومنہ اقبال کی بہن رمشا اقبال نے مومنہ اقبال کی شہرت سے جڑے ایک نہایت تکلیف دہ واقعے سے پردہ اٹھایا ہے-

پاکستانی اداکارہ مومنہ اقبال کی بہن رمشا اقبال نے ایک پوڈکاسٹ میں شرکت کے دوران مومنہ اقبال کی شہرت سے جڑے ایک نہایت تکلیف دہ واقعے کا انکشاف کیا ہے۔

رمشا اقبال کے مطابق مومنہ اقبال کے والد کا انتقال اچانک دل کا دورہ پڑنے کے باعث ہوا تھا، جس کا صدمہ آج بھی پورا خاندان نہیں بھلا سکا انہوں نے دعویٰ کیا کہ جب مومنہ اقبال اپنے والد کو اسپتال لے کر پہنچیں تو طبی عملے کی توجہ مریض کو فوری طبی امداد فراہم کرنے کے بجائے اس بات پر مرکوز ہو گئی کہ آیا آنے والی خاتون واقعی مومنہ اقبال ہیں یا نہیں۔

رمشا نے کہا کہ متعدد ڈاکٹر اور عملے کے افراد مومنہ اقبال کو پہچاننے اور ان سے متعلق سوالات کرنے میں مصروف رہے، جبکہ ان کے والد کو بر وقت اور مناسب طبی توجہ نہ مل سکی، اس واقعے میں طبی غفلت بھی شامل تھی کیونکہ مریض کے بجائے ایک معروف شخصیت کی موجودگی مرکزِ توجہ بن گئی تھی-

اس انکشاف کے بعد مومنہ اقبال نے بھی سوشل میڈیا پر ایک جذباتی پیغام شیئر کیا ہے انہوں نے لکھا کہ شہرت کی وجہ سے مجھے زندگی میں بہت سی مشکلات کا سامنا کرنا پڑا اور میرا پیشہ اپنے عزیزوں کے لیے بھی ایک سزا بن گیا، میں اللّٰہ تعالیٰ پر کامل بھروسہ رکھتی ہوں اور یقین رکھتی ہوں کہ وہی ہر معاملے میں انصاف فراہم کرے گا۔

پاکستانی اداکار ہمایوں اشرف نے کہا ہے کہ مجھے بدتمیز یا غیر شائستہ رویہ بالکل پسند نہیں، خوبصورتی سے زیادہ اہم اچھی تربیت اور خوش اخلاقی ہے۔

ہمایوں اشرف نے حال ہی میں ایک یوٹیوب شو میں شرکت کی، جہاں انہوں نے اپنی ذاتی زندگی سے متعلق مختلف سوالات کے جواب دیے، شادی نا کرنے کے سوال پر ادا کار نے کہا کہ میرے نزدیک غیر شادی شدہ زندگی کا سب سے بڑا فائدہ آزادی ہے، سنگل افراد کو اپنی روزمرہ زندگی کے بارے میں کسی کو جواب دہ نہیں ہونا پڑتا، وہ اپنی مرضی سے سوتے، جاگتے اور جب چاہیں کہیں بھی گھومنے جا سکتے ہیں سنگل شخص صرف اپنی ذمے داری اٹھاتا ہے، کسی پر انحصار نہیں کرتا اور گھریلو مسائل یا روزمرہ کے حساب کتاب کی فکر بھی نہیں ہوتی۔

ہمایوں اشرف نے گفتگو کے دوران ان عادات کا بھی ذکر کیا جو انہیں لڑکیوں میں ناپسند ہیں، اداکار نے کہا کہ مجھے بدتمیز یا غیر شائستہ رویہ بالکل پسند نہیں، بعض لوگ بلند آواز یا سخت لہجے کو پرکشش یا مزاحیہ سمجھتے ہیں، جبکہ میرے نزدیک ایسا رویہ کشش کے بجائے ناگواری کا باعث بنتا ہے، خوبصورتی سے زیادہ اہم اچھی تربیت اور خوش اخلاقی ہے،ہمارے ڈراموں اور فلموں میں بھی یہ دکھایا جاتا ہے کہ اونچا بولنے والی لڑکیاں بہت معصوم اور پیاری ہوتی ہیں اور لڑکا انہیں بہت پسند کرتا ہے مجھے یہ چیز بالکل ناپسندیدہ ہے۔

انہوں نے کہا کہ اس کے علاوہ، بدتمیز یا اونچا بولنے والے لوگ اس بات کی پرواہ نہیں کرتے کہ وہ دوسروں کے ساتھ کیسا سلوک کر رہے ہیں، وہ اپنے رویے کا جواز پیش کرتے ہیں اور اس پر شرمندہ نہیں ہوتے، بہت سے لوگ تو اپنی غلطی تسلیم ہی نہیں کرتے مجھے ایسے افراد بھی پسند نہیں جو اپنی غلطی تسلیم کرنے کے بجائے اس کا جواز پیش کریں یا دوسروں کی غلطی کا انتظار کریں تاکہ بعد میں طعنہ دے سکیں، اگر کسی سے غلطی ہو جائے تو اسے سادہ انداز میں تسلیم کر لینا چاہیے –

اداکار نے کہا کہ میں نے اکثر اونچا بولنے والی لڑکیوں میں نوٹ کی ہے وہ یہ کہ وہ انتظار کرتی ہیں، اگر ان سے کوئی غلطی ہو جائے جیسے کہ شیشہ ٹوٹ جائے، تو وہ یہ کہہ کر اپنی غلطی نہیں مانیں گی کہ ‘یار، مجھ سے ایسے لگا اور یہ ٹوٹ گیا، میری غلطی تھی’۔ نہیں، بلکہ وہ انتظار کریں گی کہ آپ بھی ویسا ہی کچھ کریں تاکہ وہ آپ کو اسی انداز میں طعنہ دے سکیں سا تھ ہی انہوں نے واضح کیا کہ یہ میرے ذاتی مشاہدات اور تجربات ہیں اور ضروری نہیں کہ ہر شخص یا ہر خاتون کا رویہ ایسا ہی ہو، مردوں میں بھی ایسی عادات ہو سکتی ہیں، تاہم میں صرف اپنی ذاتی زندگی کے تجربات بیان کر رہا ہوں۔

انہوں نے کہا کہ میرے خیال میں اب معیارات بلند ہو چکے ہیں، اور جو لوگ زیادہ عرصے تک سنگل رہتے ہیں، ان کے لیے شادی کے بعد ایڈجسٹ کرنا مشکل ہو سکتا ہے آپ دوسرے لوگوں کے تجربات سے سیکھتے ہیں، اور آج کل ایسے ساتھی کے ساتھ رہنا مشکل ہے جو سمجھوتہ کرنے کو تیار نہ ہو،شادی ایک خوبصورت رشتہ ہے جس میں کچھ پروٹوکول کی ضرورت ہوتی ہے، اور جب وہ شادی کریں گے تو یہ ایک کھلا معاملہ ہوگا،میں چھپ کر شادی کیوں کروں گا؟ جب میں شادی کروں گا، تو یہ سب کے سامنے ہوگا۔

ہمایوں اشرف نے اس بات پر بھی زور دیا کہ بعض اوقات جیون ساتھیوں سے توقعات بہت زیادہ ہو سکتی ہیں اور وہ آپ کے بدلے ہوئے رویے پر شکایت کر سکتے ہیں شادی سے پہلے آپ جس شخص کی تعریف کرتے تھے، شادی کے بعد آپ کا رویہ بدل سکتا ہے، اور یہ تبدیل شدہ رویہ آپ کے ساتھی کی جانب سے خوش کرنے کی حکمت عملی کے طور پر سامنے آ سکتا ہے، لیکن اکثر ایسا ہوتا ہے کہ یہ حکمت عملی رشتہ کی حقیقت کو تبدیل نہیں کر پاتی۔

یاد رہے کہ ہمایوں اشرف نے بہت کم عمر میں پہلی شادی کی تھی جو بدقسمتی سے طلاق پر ختم ہوگئی اور اب وہ سنگل ہیں-

ہمایوں اشرف ایک خوبصورت اور ورسٹائل پاکستانی ٹیلی ویژن اور فلمی اداکار ہیں جنہوں نے پچھلے کئی سالوں میں اپنے بیک ٹو بیک ہٹ ڈراموں کے بعد بہت زیادہ شہرت حاصل کی ہے جن میں خدا اور محبت، رنگ محل، میرے داماد، انتظار، سلطانات، احسان فراموش، اب دیکھ خدا کیا کرتا ہے اور مشکل ہے شامل ہیں،ہمایوں اشرف کو نقاب اور الزم عشق میں اپنی اداکاری کے لیے بہت زیادہ عوامی اور تنقیدی پذیرائی مل رہی ہے، اور اب وہ نجی ٹی وی کے ڈرامہ سیریل ’ماہ نور‘ میں مرکزی کردار نبھا رہے ہیں،جبکہ انہوں نے 2019 کی رومانوی میوزیکل فلم ‘سچ’ سے اپنے فلمی سفر کا آغاز کیا-

یاسر نواز اور دانش نواز نے حال ہی میں اداکارہ فضا علی اور ان کے شوہر اعجاز خان کی ایک وائرل ویڈیو کو مزاحیہ انداز میں ری کریئیٹ کر کے مداحوں کے ساتھ شئیر کیا جس سے مداح خوب محفوظ ہوئے-

فضا علی ان دنوں اپنے شوہر اعجاز خان کے ساتھ بنائی گئی رومانوی ویڈیوز کی وجہ سے تقریباً ہر ہفتے سوشل میڈیا پر وائرل رہتی ہیں دونوں اکثر باغات میں رومانوی گانوں پر لپ سنگ کرتے مختلف انداز میں ویڈیوز بناتے دکھائی دیتے ہیں، حال ہی میں انہوں نے ایک اور ایسی ہی ویڈیو پوسٹ کی جس نے صارفین کی توجہ اپنی جانب مبذول کر لی،جس میں وہ پارک میں اپنے شوہر کے ساتھ وقت گزارتی نظر آئیں۔اس نئی ویڈیو میں فضا علی اور اعجاز خان پارک میں خوشگوار وقت گزارتے دکھائی دیتے ہیں جہاں فضا اعجاز کے کندھے پر سر رکھتی ہیں اور اعجاز انہیں اپنی پیٹھ پر اٹھا لیتے ہیں-

اس وائرل ویڈیو سے متاثر ہو کر یاسر نواز اور دانش نواز نے اسی منظر کو مزاحیہ انداز میں فلمایا، دونوں بھائیوں نے نہ صرف ویڈیو کی مکمل نقل اتاری بلکہ اپنی شاندار اداکاری اور مزاح سے اسے مزید دلچسپ بنا دیا جسے دیکھ کر سوشل میڈیا صارفین ہنسنے پر مجبور ہوگئے جبکہ ویڈیو پر اداکار جنید خان نے تبصرہ کیا کہ اب ہمیں پتا چل گیا کہ آخر میں کیا ہوا تھا۔

بالی وڈ اداکار شریاس تلپڑے نے انکشاف کیا ہے کہ شاہ رخ خان اور فلمساز فرح خان نے ممبئی میں گھر خریدنے میں ان کی مدد کی۔

بھارتی میڈیا کے مطابق بالی وڈ فلمساز اور کوریوگرافر فرح خان نے حال ہی میں اپنے ایک کوکنگ وی لاگ کے لیے شریاس تلپڑے کے گھر کا دورہ کیا، اس موقع پر انہوں نے ماضی کی یادیں تازہ کیں،اس دوران 50 سالہ اداکار شریاس نے انکشاف کیا کہ فلم ‘اوم شانتی اوم’ کی وجہ سے ہی وہ اپنا پہلا گھر خرید سکے تھے،یہ سن کر فرح خان حیران رہ گئیں اور کہا کہ انہیں یہ جان کر بے حد خوشی ہوئی

شریاس تلپڑے نے کہا کہ گھر کیلئے قرض لینے بینک گیا اور لون کی بات کی، لیکن میں ہوم لون کی رقم کے لیے کوالیفائی نہیں کر رہا تھا، بینک میں موجود خاتون نے مجھ سے سوال کیا کہ کون سی فلم کر رہے ہیں ؟جس پر میں نے کہا ‘اوم شانتی اوم’ اور پوچھا کون اداکار ہیں اور کس کی فلم ہے؟جس پر میں نے جواب دیا کہ فلم میں مرکزی کردار شاہ رخ خان کا ہے اور فرح خان اس فلم کی ڈائریکٹر ہیں بینک خاتون نے مجھے ایک تصدیقی خط لانے کا کہا، پھر میں نے فرح کو فون کیا اور اس نے مجھے 2 دن میں شاہ رخ خان سے خط لا کر دیا اور اسی شام بینک نے مجھے قرض کی منظوری دے دی-

اس واقعے پر ردِعمل دیتے ہوئے فرح نے کہا مجھے بہت خوشی ہے، کیونکہ اوم شانتی اوم کے لیے ہم نے تمہیں ویسے بھی شاید بہت کم پیسے دیے تھے۔

واضح رہے کہ فلم اوم شانتی اوم 2007 میں ریلیز ہوئی تھی جسے سال کی بہترین فلموں میں شمار کیا گیا تھا جبکہ اس فلم میں شاہ رخ خان کے ساتھ اداکارہ دیپیکا پڈوکون اور کئی اہم اداکار بھی شامل تھے اور اب شریاس 26 جون کو ریلیز ہدایت کار احمد خان کی فلم ویلکم ٹو دی جنگل میں نظر آ رہے ہیں، فلم میں اکشے کمار، روینہ ٹنڈن، دیشا پٹانی، سنیل شیٹی، پریش راول اور دیگر بھی شامل ہیں فلم نے باکس آفس پر شاندار آغاز کیا ہے۔

بالی وڈ اداکار سیف علی خان نے انکشاف کیا ہے کہ میں اپنے بیٹوں تیمور علی خان اور جہانگیر علی خان کو وہی سکھاتا ہوں جو مجھے میری ماں نے سکھایا تھا۔

بھارتی میڈیا کے مطابق لندن میں ایک تقریب کے دوران گفتگو کرتے ہوئے سیف علی خان نے بتایا کہ میں زیادہ مذہبی نہیں ہوں لیکن میری ماں نے جو مجھے سکھایا میں نے اپنے بچوں کو بھی وہی سکھایا ہے کہ خدا ایک ہے، میں نے ایسے تعلیمی اداروں میں تعلیم حاصل کی جہاں مختلف مذاہب کی تعلیمات اور تہواروں کا احترام کیا جاتا تھا، میں ایسے اسکولوں میں پڑھا جہاں دن کا آغاز چرچ میں عبادت سے ہوتا تھامیں نے ایک بار یہ کہہ کر بچنے کی کوشش کی کہ میرا مذہب مختلف ہے، لیکن پھر ہمارے لیے ایک مولوی صا حب کو بلا لیا گیا، اس لیے وہ بہانہ بھی کام نہ آیا،میرے بچے نماز پڑھیں گے، اسی طرح دوسرے مذاہب کی عبادات میں بھی شریک ہوں گے اور دیوالی کی طرح کرسمس بھی منائیں گے۔

واضح رہے کہ سیف علی خان نے دو شادیاں کیں، سیف اور کرینہ کپور کی شادی 2012 میں ہوئی تھی، اداکار سیف علی خان کی عمر 53 برس جب کہ کرینہ 44 برس کی ہیں، جوڑے کے ہاں دو بچے تیمور علی خان اور جہانگیر علی خان ہیں اس سے قبل سیف نے 1991 میں اداکارہ امریتا سنگھ سے شادی کی تھی، امریتا سیف سے 13 سال بڑی تھیں، ان کے دو بچے اداکارہ سارہ علی خان اور ابراہیم علی خان ہیں تاہم سیف اور امریتا سنگھ کے درمیان 2004 میں طلاق ہوگئی تھی۔

سنیتا نے گووندا کو گولی لگنے کے واقعے کو زندگی میں کسی ’تیسری شخصیت‘ کی آمد سے جوڑتے ہوئے کہا کہ ’میرا نشانہ کبھی خطا نہیں ہوتا۔‘

بالی ووڈ اسٹار گوندا کی اہلیہ سنیتا آہوجا نے رئیلٹی شو ’لاک اپ: سچ یا سزا‘ کے پریمیئر کے دوران بیان نے ہلچل مچا دی،شو کے میزبانوں فرح خان اور رتیش دیش مکھ نے جب سنیتا کے ایک پرانے اخباری بیان ’مجھے گوندا جیسا بیٹا چاہیے، شوہر نہیں‘، پر سوال کیا، تو سنیتا نے جواب دیا، ’محبت میں انسان کو ہر چیز برداشت کرنی پڑتی ہے،چی چی (گووندا) نے زندگی میں اتنے معاشقے کیے، چلو ہیرو ہیروئنوں میں تو یہ سب ہوتا ہی ہے لیکن اتنے سال جو میں نے چی چی کا ساتھ نبھایا ہے، اس کے بعد مجھے لگتا ہے کہ میرا بیٹا ان جیسا ہونا چاہیے۔

گولی لگنے کے واقعے پر تبصرہ کرتے ہوئے سنیتا نے کہا کہ چی چی اگر سن رہے ہو تو سن لو بھیا، گھٹنوں پر گولی تبھی لگتی ہے جب زندگی میں کوئی (دوسری عورت) آ جاتی ہے میں جھوٹ نہیں بول رہی، میں سچ کہہ رہی ہوں جب یہ ہوا تو میں ممبئی میں نہیں تھی، ورنہ بہت سے لوگوں نے کہا کہ گولی میں نے ماری ہے، ویسے میرا نشانہ کبھی چوکتا نہیں۔

قبل ازیں سنیتا آہوجا نے اپنی 40 سالہ شادی کے بارے میں کُھل کر بات کرتے ہوئے کہا تھا کہ گووندا ایک اچھے بیٹے اور والد تو ہیں مگر بطور شوہر وہ میری توقعات پر پورا نہیں اتر سکےمیں زندگی میں گھومنا پھرنا، تقریبات اور چھٹیوں پر جانا پسند کرتی تھی مگر گووندا ہمیشہ خاندان کی ذمے داریوں میں مصروف رہےاور میں اپنی زندگی سے لطف اندوز نہیں ہو سکی۔

اُنہوں نے افسوس کا اظہار کرتے ہوئے کہا کہ اتنے بڑے اداکار ہونے کے باوجود گووندا نے بھی زندگی کو بھرپور انداز میں نہیں جیا،میں ہمیشہ کہتی ہوں کہ مجھے گووندا جیسا بیٹا چاہیے تھا، شوہر نہیں، اب 40 سال گزر چکے ہیں، اس رشتے کو چھوڑنے کا سوچنا بھی ممکن نہیں۔

واضح رہے کہ گزشتہ ایک سال سے گووندا اور سنیتا کی ازدواجی زندگی خبروں میں ہےیہ معاملہ اس وقت زیادہ سنگین ہو گیا تھا جب سنیتا نے گووندا پر دھوکا دینے اور کسی اور کے ساتھ رومانوی تعلق میں ہونے کا الزام لگایا تھا اس پر ردِعمل دیتے ہوئے گووندا نے ان الزامات کو ایک سازش قرار دیتے ہوئے مسترد کر دیا تھا۔

خیال رہے کہ گووندا اور سنیتا کی شادی 1987 میں ہوئی تھی، جسے انہوں نے دو سال تک خفیہ رکھا تھا ان کے دو بچے ٹینا آہوجا اور یش وردھن آہوجا ہیں،جو جلد فلمی دنیا میں قدم رکھنے کی تیاری کر رہے ہیں۔

بالی ووڈ سُپر اسٹار سلمان خان کی ممبئی کی مصروف سڑک پر سائیکل چلانے کی تصاویر انٹر نیٹ پر وائرل ہو رہی ہیں-

وائرل تصاویر میں اداکار کو سیاہ رنگ کی ہوڈی کے ساتھ سرمئی رنگ کے شارٹس، سر پر ٹوپی اور پیروں میں جوگرز پہنے ہوئے دیکھا جا سکتا ہے،بھارتی میڈیا کے مطابق جب وہ شہر کی مصروف سڑکوں سے گزر رہے تھے تو اداکار کی سیکیورٹی ٹیم بھی ان کے ساتھ ہی موجود تھی۔

سلمان خان کی سوشل میڈیا پر وائرل ہونے والی تصاویر کو سوشل میڈیا صارفین کی جانب سے بہت پسند کیا جا رہا ہے اور 60 سال کی عمر میں ممبئی کی مصروف سڑکوں پر انہیں پر سکون اور پر اعتماد انداز میں سائیکل چلاتے دیکھ کر ان کی فٹنس کی خوب تعریفیں بھی کی جا رہی ہیں۔

واضح رہے کہ کچھ روز قبل میڈیا پر سلمان خان کی خرابی صحت کے بارے میں کچھ افواہیں گردش کر رہی تھیں لیکن اب حالیہ تصاویر نے ان افواہوں کو رد کر دیا ہے۔

دوسری جانب سلمان خان اپنے خاندان کے ساتھ ممبئی کے مشہور گیلیکسی اپارٹمنٹس کو چھوڑ کر جلد ایک نئے اور شاندار گھر میں منتقل ہونے جارہے ہیں ہندوستان ٹائمز کی رپورٹ کے مطابق، مہاراشٹر کوسٹل زون مینجمنٹ اتھارٹی (ایم سی زیڈ ایم اے) نے 16 جون کو خان خاندان کو ممبئی کے علاقے باندرہ کے چمبئی میں گلیکسی اپارٹمنٹس کے قریب ایک رہائشی عمارت کی تعمیر کی منظوری دے دی ہے۔ بتایا جا رہا ہے کہ یہ جگہ گلیکسی اپارٹمنٹس سے زیادہ فاصلے پر نہیں ہے۔

رپورٹ میں بتایا گیا ہے کہ اس منصوبے کے لیے زمین سلمان خان کی والدہ سلمیٰ خان، جنہیں سشیلا چرک کے نام سے بھی جانا جاتا ہے، نے 2011 میں خریدی تھی اس زمین پر پہلے دو منزلہ ایک پرانا بنگلہ موجود تھا، لیکن وقت گزرنے کے ساتھ اس کی حالت خراب ہو گئی تھی، جس کے بعد اسے گرا کر نئی عمارت بنانے کا فیصلہ کیا گیا۔

سلمان خان کا خاندان 1974 سے گلیکسی اپارٹمنٹس میں رہ رہا ہے۔ اسی سال معروف فلمی مصنف سلیم خان اپنی اہلیہ سلمیٰ خان اور پانچ بچوں کے ساتھ یہاں منتقل ہوئے تھے وقت کے ساتھ خاندان کے بیشتر افراد الگ گھروں میں منتقل ہو گئے، لیکن سلمان خان اپنے والدین کی خاطر اسی عمارت کے گراؤنڈ فلور پر ایک چھوٹے سے فلیٹ میں رہ رہے تھے۔ اب خبر آئی ہے کہ یہ خاندان جلد ہی ایک نئے اور بڑے گھر میں منتقل ہو جائے گا۔

رپورٹس میں یہ بھی دعویٰ کیا گیا ہے کہ نئے گھر میں منتقل ہونے کا ایک اہم سبب سلمان خان کو ملنے والی سیکیورٹی دھمکیاں ہیں۔ بتایا جاتا ہے کہ لارنس بشنوئی گینگ کی جانب سے مسلسل دھمکیوں کے بعد خاندان نے زیادہ محفوظ رہائش اختیار کرنے کا فیصلہ کیا۔

2024 میں گلیکسی اپارٹمنٹس پر فائرنگ کا واقعہ بھی پیش آیا تھا، جس میں عمارت پر چار گولیاں چلائی گئی تھیں۔ اس واقعے کے بعد وہ مشہور بالکونی، جہاں سلمان خان اکثر اپنے مداحوں کو نظر آتے تھے، حفاظتی وجوہات کی بنا پر بند کر دی گئی تھی نئے بنگلے میں جدید اور مضبوط سیکیورٹی انتظامات کیے جائیں گے تاکہ خاندان کی حفاظت کو مزید یقینی بنایا جا سکے۔

سلمان خان یا ان کے خاندان کی جانب سے اس تمام معاملے پر ابھی تک کوئی بیان جاری نہیں کیا گیا، اس لیے ان خبروں کی باضابطہ تصدیق ہونا باقی ہے۔

پاکستان کے معروف گلوکار بلال سعید نے لندن میں ساتھی گلوکارہ آئمہ بیگ کے ساتھ وائرل ہونے والی ویڈیو پر خاموشی توڑ دی-

گلوکار بلال سعید اور آئمہ بیگ ان دنوں لندن میں اپنے نئے پروجیکٹ کی شوٹنگ میں مصروف ہیں حال ہی میں سوشل میڈیا پر وائرل ہونے والی ویڈیوز میں بلال سعید اور آئمہ بیگ کو لندن کے مشہور علاقے سوہو میں مداحوں سے ملاقات، سیلفیاں بنواتے اور وقت گزارتے ہوئے دیکھا گیا تھا ۔ویڈیوز منظرِ عام پر آنے کے بعد بعض سوشل میڈیا صارفین نے دعویٰ کیا کہ دونوں فنکار شراب نوشی کر رہے تھے، جس کے باعث یہ معاملہ تیزی سے زیرِ بحث آ گیا۔

ویڈیو پر سوشل میڈیا صارفین کی جانب سے آئمہ بیگ کے مختصر لباس پہننے اور گلوکاروں کے مبینہ طور پر نشے کی حالت میں ہونے پر تنقید کی جا رہی ہے،جس پر گلوکار بلال سعید نے تنقید کرنے والوں کو آڑے ہاتھوں لے لیا، اور سوشل میڈیا پر اپنا ایک ویڈیو بیان شیئر کیا۔

گلوکار نے اپنی ویڈیو میں کہا کہ کل ہم لندن میں شوٹنگ کررہے تھے، اس کی ایک ویڈیو وائرل ہوگئی کہ ہم نشے کی حالت میں تھے،ان دعووں میں دعوؤں میں کوئی صداقت نہیں ،گلوکار نے واضح کیا کہ ہمارے ہاتھوں میں موجود کپوں میں شراب نہیں بلکہ کافی تھی۔

انہوں نے لوگوں پر زور دیا کہ کسی بھی نتیجے پر پہنچنے سے پہلے ویڈیوز کو غور سے دیکھیں اور بغیر تصدیق کے افواہوں پر یقین نہ کریں پاکستان کی نمائندگی سے متعلق ہونے والی تنقید کا جواب دیتے ہوئے بلال سعید نے کہا کہ مجھے کسی سے یہ سیکھنے کی ضرورت نہیں کہ اپنے ملک کی نمائندگی کیسے کی جاتی ہے میں کئی برسوں سے اپنی موسیقی اور صلاحیت کے ذریعے پاکستان کا نام روشن کرتا آ رہا ہوں اور آئندہ بھی ایسا کرتا رہوں گا۔

بلال سعید نے افسوس کا اظہار کرتے ہوئے کہا کہ میری ویڈیو بغیر اجازت خفیہ طور پر بنائی گئی اور بعد ازاں سوشل میڈیا پر شیئر کر دی گئی اگر میرے ارد گرد موجود کچھ افراد شراب نوشی کر رہے تھے تو اس کا ہرگز یہ مطلب نہیں کہ میں یا آئمہ بیگ بھی ایسا کر رہے تھے،آخر میں انہوں نے سوشل میڈیا صارفین سے اپیل کی ہے کہ وہ اللہ کا خوف کریں، غیر مصدقہ اطلاعات پھیلانے سے گریز کریں اور کسی بھی دعوے پر یقین کرنے سے پہلے حقائق کی تصدیق ضرور کریں۔