Tag: شوبز

پاکستان کی معروف ادکارہ عائشہ عمر نے کہا کہ نجی تصاویر کو اجازت کے بغیر شیئر کرنا کسی کی پرائیویسی اور رضامندی کی خلاف ورزی ہے-

اداکارہ عائشہ عمر نے حال ہی میں بی بی سی کے ساتھ انٹرویو میں بتایا کہ میں اپنی قریبی دوست اداکارہ ماریہ واسطی کے ساتھ تھائی لینڈ میں چھٹیاں گزار رہی تھی جب میری نجی تصاویر لیک ہوگئیں،میں ایک تصویر میں سوئمنگ سوٹ پہنے ہوئے تھی جب کہ دیگر تصاویر میں موسمِ گرما کے لباس اور اسکرٹس میں ملبوس تھی، تصاویر کے منظرِ عام پر آنے کے بعد مجھے شدید تنقید کا سامنا کرنا پڑا اور اس کے منفی اثرات میرے پیشہ ورانہ کیرئیر پر بھی پڑے اس وقت کئی پروڈیوسرز خواتین کے لیے ایک مخصوص سماجی تاثر کو اہمیت دیتے تھے،جس کی وجہ سے مجھے بعض کاموں سے بھی محروم ہونا پڑا۔

عائشہ عمر نے کہا کہ نجی تصاویر کو اجازت کے بغیر شیئر کرنا کسی کی پرائیویسی اور رضامندی کی خلاف ورزی ہے، یہی وجہ ہے کہ میں اب ایک این جی او کے ساتھ مل کر لوگوں کے نجی ڈیٹا اور تصاویر کے غلط استعمال کے خلاف آگاہی مہم میں حصہ لے رہی ہوں ،اتنے برس بعد اس معاملے پر بات کرنے کا مقصد صرف اپنی تکلیف بیان کرنا نہیں بلکہ لوگوں میں یہ شعور اجاگر کرنا بھی ہے کہ کسی کی نجی زندگی میں مداخلت اور اس کی معلومات کو بغیر اجازت عام کرنا مستقبل میں سنگین نتائج کا باعث بن سکتا ہے۔

پاکستانی اداکارہ مامیا شاہ جعفر اور اداکار ارسلان بٹ کے درمیان جاری قانونی تنازع اختتام کو پہنچ گیا، دونوں فریقین نے عدالت سے باہر معاملہ طے کر لیا۔

اداکارہ مامیا شاہ جعفر، جنہوں نے ڈراموں کالج گیٹ اور میسنی کے ذریعے شوبز کی دنیا میں اپنی شناخت بنائی، وہ اپنی بے باک شخصیت اور کھل کر اظہارِ خیال کرنے کے انداز کے لیے بھی جانی جاتی ہیں کچھ عرصہ قبل ایک انٹرویو میں انکشاف کیا تھا کہ انہیں ایک ساتھی فنکار کی جانب سے نامناسب رویے اور ہراسانی کا سامنا کرنا پڑا اور یہ واقعہ ڈرامہ میسنی کی شوٹنگ کے دوران پیش آیا تھا۔

بعد ازاں اس معاملے میں اداکار ارسلان بٹ کا نام سامنے آیا، تاہم انہوں نے ابتدا ہی سے ان الزامات کو مسترد کرتے ہوئے انہیں بے بنیاد قرار دیا، معاملہ میڈیا کی سرخیوں میں آنے کے بعد دونوں فریقین کے درمیان قانونی جنگ شروع ہوئی اور ایک دوسرے کو قانونی نوٹسز بھی ارسال کیے گئے۔

اب ارسلان بٹ نے سوشل میڈیا پر ایک بیان جاری کرتے ہوئے تصدیق کی ہے کہ دونوں فریقین کے درمیان عدالت سے باہر تصفیہ ہو گیا ہے مامیا شاہ جعفر نے اپنے تمام الزامات واپس لے لیے ہیں، جبکہ انہوں نے بھی نیشنل سائبر کرائم انویسٹی گیشن ایجنسی (این سی سی آئی اے) میں درج شکایات اور ہتکِ عزت کے مقدمے سے دستبردار ی اختیار کر لی ہے۔

ارسلان بٹ نے سوشل میڈیا پر تصفیے کے معاہدے کی تفصیلات شیئر کرتے ہوئے عوام اور سوشل میڈیا صارفین سے درخواست کی ہے کہ اس معاملے کو مزید عوامی بحث کا موضوع نہ بنایا جائے۔

دوسری جانب اس پیش رفت پر سوشل میڈیا پر مختلف آراء سامنے آ رہی ہیں بعض صارفین کا کہنا ہے کہ قانونی اور مالی معاملات سامنے آنے کے بعد فریقین نے صلح کو ترجیح دی، جبکہ کچھ افراد نے رائے دی کہ ہراسانی سے متعلق مقدمات اکثر کسی حتمی عدالتی فیصلے تک نہیں پہنچ پاتے،کچھ سوشل میڈیا صارفین نے یہ قیاس آرائیاں بھی کیں کہ شاید یہ تنازع کسی آنے والے منصوبے یا پروجیکٹ کی تشہیر کا سبب بن رہا تھا، تاہم اس حوالے سے کسی بھی فریق کی جانب سے کوئی بیان سامنے نہیں آیا-

ہالی ووڈ کی معروف اداکارہ اور وائس آرٹسٹ ڈیوی چیس 35 برس کی عمر میں انتقال کر گئیں۔

امریکی رپورٹس کے مطابق ڈیوی چیس کے منیجر جان ریان جونیئر نے ان کے انتقال کی تصدیق کرتے ہوئے بتایا کہ اداکارہ میننجائٹس کے باعث پیدا ہونے والی پیچیدگیوں اور سیپسس کا شکار ہو گئی تھیں، جس کے بعد وہ لاس اینجلس کے ایک اسپتال میں دم توڑ گئیں، چیس کو انتقال سے قبل غذائی قلت کے باعث اسپتال میں داخل کیا گیا تھا انہوں نے بتایا کہ اداکارہ گزشتہ کئی برسوں سے شہرت کی چکاچوند سے دور سادہ زندگی گزار رہی تھیں اور جانوروں، خصوصاً بلیوں، سے بے حد محبت کرتی تھیں۔

ڈیوی چیس نے کم عمری میں ہی اداکاری کا آغاز کیا اور صرف 7 سال کی عمر میں ہالی ووڈ میں اپنا پہلا ٹی وی کردار حاصل کیا۔ انہیں 2001 میں فلم Donnie Darko سے شہرت ملی، تاہم 2002 میں ہارر فلم The Ring میں سمارا مورگن کے خوفناک کردار نے انہیں عالمی شناخت دلائی اس کردار پر انہیں 2003 میں MTV مووی ایوارڈ برائے بہترین ولن سے نوازا گیا اسی سال انہوں نے ڈزنی کی کامیاب اینیمیٹڈ فلم Lilo & Stitch میں مرکزی کردار لیلو کو آواز دی، جس پر انہیں اینی ایوارڈ بھی حاصل ہوا۔

ان کے دیگر نمایاں منصوبوں میں Charmed، ER، Touched by an Angel اور HBO کا ڈراما Big Love شامل ہیں ڈیوی چیس نے 2015 میں فل ٹائم اداکاری سے کنارہ کشی اختیار کر لی تھی۔

پاکستانی اداکار، گلوکار اور رائٹر محسن عباس حیدر نے شوبز انڈسٹری میں منشیات کے استعمال سے متعلق اہم انکشافات کئے ہیں-

محسن عباس حیدر نے حال ہی میں نجی چینل کے ایک پروگرام میں شرکت کی، جہاں انہوں نےمطالبہ کیا کہ ایسے فنکاروں کے خلاف کارروائی ہونی چاہیے جو نشے کی حالت میں شوٹنگ پر آتے ہیں انہوں نے دوران انٹرویو نشہ کر کے کام پرآنے والے اداکاروں اور ہدایت کاروں کے بارے میں کھل کر بات کرتے ہوئے بتایا کہ کس طرح اس بری عاد ت کی وجہ سے کام کا نقصان ہوتا ہے اور معاشرے پر برا اثر پڑتا ہے۔

محسن عباس حیدر نے شو کے دوران بتایا کہ میں نے سوشل میڈیا پر ایک پوسٹ کی تھی کہ جو اداکار، اداکارائیں اور ڈائریکٹرز نشے کی حالت میں شوٹنگ سیٹ پر آتے ہیں ان پر مکمل پابندی ہونی چاہیے چونکہ میں ایک وقت میں صرف ایک ہی ڈرامے میں کام کرتا ہوں، اس لیے میری پوسٹ پڑھتے ہی مجھے اس ڈرامے کی پروڈکشن کمپنی کی طرف سے فوراً فون آ گیا، انہوں نے مجھ سے پوچھا کہ محسن بھائی، آپ ابھی ہمارے ہی ڈرامے کی شوٹنگ پر ہیں نا؟ تو آپ نے یہ پیغام کس کے لیے لکھا ہے؟ جس پر میں نے انہیں جواب دیا کہ ہاں، میں آپ ہی کے سیٹ پر ہوں اور یہ بات اسی جگہ کے بارے میں ہے۔

انہوں نے کہا کہ اس کے بعد کمپنی والوں نے مجھ سے پوچھا کہ کیا آپ فلاں خاص اداکار یا اداکارہ کے بارے میں بات کر رہے ہیں؟ تو میں نے کہا کہ جی ہاں۔ انہوں نے مجھے تسلی دی کہ ٹھیک ہے، ہم اس معاملے کو دیکھیں گے آپ اندازہ لگائیں کہ ڈرامے کی ہیروئن کی آنکھیں میری آنکھوں سے مل ہی نہیں پا رہی تھیں، میں اس سے بات کر رہا تھا اور اس کی آنکھیں کسی دوسری طرف گھوم رہی تھیں ہمیں کسی بھی ایسی چیز کی حوصلہ افزائی نہیں کرنی چاہیے جو معاشرے کی بربادی کا سبب بنے۔

واضح رہے کہ محسن عباس حیدر نے جنوری 2025 میں بھی سوشل میڈیا پر ایک پوسٹ کے ذریعے نشے کی حالت میں کام کرنے والے فنکاروں پر تنقید کی تھی۔ تاہم محسن عباس حیدر نے پروگرام میں کسی اداکار یا اداکارہ کا نام نہیں لیا، اس لیے ان کے الزامات کی آزادانہ طور پر تصدیق نہیں ہو سکی۔

کولکتہ میں ایک نامعلوم شخص اچانک بولی ووڈ اداکار ارباز خان کی سیکیورٹی کو چکمہ دے کر ان کی گاڑی کے اندر جا بیٹھا واقعے کی ویڈیو سوشل میڈیا پر تیزی سے وائرل ہو رہی ہے۔

بھارتی میڈیا رپورٹس کے مطابق یہ واقعہ اس وقت پیش آیا جب ارباز خان ایک تقریب میں شرکت کے بعد اپنی گاڑی کی جانب جا رہے تھے ان کے ساتھ سکیورٹی اہلکار بھی موجود تھے جو انہیں ہجوم کے درمیان سے لے جا رہے تھےسوشل میڈیا میں گردش کر نے والی ویڈیو میں دیکھا جا سکتا ہے کہ ارباز خان گاڑی کی طرف جا رہے تھے، تاہم چند لمحوں بعد صورتحال اس وقت بدل گئی جب وہاں موجود لوگوں اور منتظمین کی آنکھوں میں دھول جھونک کر ایک نامعلوم شخص اچانک اداکار کی گاڑی کے اندر داخل ہو گیا۔

رپورٹس کے مطابق اس اچانک پیش آنے والے واقعے اور سیکیورٹی کی بڑی لاپرواہی نے وہاں موجود تمام لوگوں سمیت ارباز خان کے باڈی گارڈز کو بھی حیران کر دیاصورتحال کو بگڑتا دیکھ کر سیکیورٹی ٹیم نے فوراً کارروائی کی اور گاڑی کا دروازہ کھول کر اس شخص کو پکڑ کر باہر کھینچ لیا اس ہنگامے کے دوران وہاں موجود لوگ حیرت سے یہ سب دیکھتے رہے ویڈیو میں ارباز خان کے چہرے پر بھی حیرانی اور پریشانی صاف دیکھی جا سکتی تھی اور کچھ دیر کے لیے وہاں افرا تفری کا ماحول بن گیا، تاہم محافظوں نے جلد ہی صورتحال پر قابو پا لیا اور اداکار کو وہاں سے روانہ کیا۔

پاکستان شوبز انڈسٹری کی سینئر اداکارہ میرا نے ایک انٹرویو کے دوران خود کو “سائیکو” کہے جانے پر شدید برہمی کا اظہار کرتے ہوئے پاکستانی میڈیا اور عوام سے فنکاروں کو عزت دینے کا مطالبہ کر دیا ہے۔

سوشل میڈیا پر وائرل ہونے والی ایک ویڈیو میں دیکھا جا سکتا ہے کہ ایک میزبان نے انٹرویو کے دوران اداکارہ سے ان کی نئی فلم ‘سائیکو’ کے حوالے سے سوال کرتے ہوئے کہہ دیا کہ “آپ پہلے بھی سائیکو تھیں، فلم میں بھی آپ نے یہی کردار ادا کیا اور اب تک اس کردار سے باہر نہیں آ سکیں۔

اس سخت سوال پر اداکارہ میرا نے برہمی کا اظہار کرتے ہوئے میزبان کو ٹوکا اور کہا ک دیکھیں، میری بات سنیں، اگر آپ لوگ ہمیں عزت نہیں دیں گے تو کوئی بات نہیں، ہمیں ویسے بھی انڈیا میں بہت عزت ملتی ہے آپ نے مجھے سائیکو کہا اور یہ بھی کہا کہ میں اس سے پہلے بھی سائیکو تھی، ہمیں یہاں پاکستان میں عزت نہیں ملتی۔

اداکارہ نے کہا کہ یہ کہنا بالکل غلط ہے کہ میں پہلے بھی سائیکو تھی، میں نے اس فلم میں ایک انتہائی مشکل ترین کردار ادا کیا ہے اور مجھے امید تھی کہ اس شاندار پرفارمنس کے بعد لوگ مجھے اور فلم کے ہدایت کار شان شاہد کو خراجِ تحسین پیش کریں گے اور ہماری حوصلہ افزائی کی جائے گی کیونکہ ہم نے پاکستان میں رہ کر اتنی مشکل فلم بنائی ہے،یہ ایک شدید ڈپریشن کے موضوع پر مبنی فلم ہے جس کے ذریعے ہم نے معاشرے کو کچھ سکھا نے کی کوشش کی ہے، اس لیے لوگوں کو چاہیے کہ وہ میرے اس کردار سے کچھ سیکھیں۔

دوسری جانب سوشل میڈیا پر ویڈیو وائرل ہوتے ہی صارفین نے رپورٹر کے اس غیر پیشہ ورانہ رویے کو شدید تنقید کا نشانہ بنایا اور میرا کے موقف کی تائید کی۔

واضح رہے کہ جیو فلمز کے بینر تلے بننے والی فلم ‘سائیکو’ کو عیدالاضحیٰ کے موقع پر سینما گھروں میں ریلیز کیا گیا تھا، جس کی اسٹار کاسٹ میں سپر اسٹار شان شاہد، سونیا حسین، میرا، شبیر جان اور دیگر نامور اداکار شامل ہیں۔