Tag: شوبز

اداکار رعید محمد عالم نے انکشاف کیا ہے کہ اپنے کیریئر کے ابتدائی دنوں میں ایک ڈرامے کی شوٹنگ کے دوران سینئر اداکار نعمان اعجاز نے انہیں حقیقی تھپڑ مارا تھا تاکہ میں منظر کے مطابق جذبات کا اظہار کر سکوں۔

رعید محمد عالم نے ایک پوڈکاسٹ میں بتایا کہ جب میں نے اداکاری کا آغاز کیا تو مجھے رونے والے مناظر کرنے میں مشکل پیش آتی تھی، ایک ڈرامے میں میری نعمان اعجاز کے ساتھ شوٹنگ تھی، جس میں میرے چند مکالمے تھے اور مجھے رونا بھی تھا، لیکن کئی ٹیک دینے کے باوجود میں رو نہیں پا رہا تھا میں ان لوگوں میں سے ہوں جنہیں گلیسرین استعما ل کرنے سے آنکھوں میں شدید خارش ہوتی ہے، اس لیے میں اس کا استعمال بھی نہیں کر سکتا تھا۔

رعید کے مطابق نعمان بھائی نے مجھ سے پوچھا، کیا تمہیں رونے میں مشکل ہو رہی ہے؟ میں نے ہاں میں جواب دیا، جس پر انہوں نے اچانک مجھے زور سے تھپڑ مار دیا اور کہا اب بچہ اچھا روئے گا، میں نے ان سے کہا، نعمان بھائی، یہ تو بہت زور کا تھا،اس واقعے کے باوجود میں اپنے سینئر فنکاروں کا بے حد احترام کرتا ہوں ہمارے سینئرز احترام کے مستحق ہیں، انہوں نے ہمیں بہت کچھ سکھایا اور نعمان بھائی نے بھی مجھے اداکاری کے حوالے سے بے شمار چیزیں سکھائیں۔

پاکستان کے ٹک ٹاکر اور سوشل میڈیا کانٹینٹ کری ایٹر علی حیدرآبادی نے اپنی اہلیہ کو طلاق دےدی۔

علی حیدرآبادی گزشتہ چند برسوں سے سوشل میڈیا پر مقبول ہیں، جبکہ ان کی شادی بھی خاصی توجہ کا مرکز بنی تھی ان کی اور اہلیہ زینب علی کے نکاح کی تصاویر اور شادی کی ویڈیوز سوشل میڈیا پر بڑے پیمانے پر وائرل ہوئی تھیں دونوں میاں بیوی مشترکہ طور پر مختلف ویڈیوز اور کانٹینٹ بھی شیئر کرتے رہے-

رپورٹس کے مطابق علی حیدرآبادی اور زینب علی کی ازدواجی زندگی بظاہر سوشل میڈیا پر نظر آنے والی خوشگوار تصویر سے مختلف تھی حال ہی میں سامنے آنے والی ایک ویڈیو میں علی حیدرآبادی کو اپنی اہلیہ کو طلاق دیتے ہوئے دیکھا گیا، جس کے بعد یہ معاملہ سوشل میڈیا پر موضوعِ بحث بن گیا ،بعدازاں زینب علی نے بھی سوشل میڈیا پر ایک ویڈیو شیئر کی اور اپنے مؤقف کا اظہار کرتے ہوئے ٹک ٹاکر پر سنگین الزامات عائد کیے۔

سوشل میڈیا پر شیئر کردہ ویڈیو میں زینب علی کے ہاتھ پٹیوں میں بندھے دکھائی دیے،انہوں نے وزیراعلیٰ پنجاب مریم نواز سے تحفظ کی اپیل کرتے ہوئے کہا کہ گزشتہ تین برسوں کے دوران مجھے جسمانی اور ذہنی تشدد کا سامنا کرنا پڑا، علی حیدرآبادی مبینہ طور پر مجھے تشدد کا نشانہ بناتے رہے اور بارہا طلاق اور جان سے مارنے کی دھمکیاں بھی دیتے رہے۔

زینب علی کی مذکورہ ویڈیو وائرل ہوئی تو مریم نواز کی ٹیم سے حنا پرویز بٹ نے ان سے رابطہ کر کے انصاف فراہم کرنے کی یقین دہانی کروائی، اس حوالے سے زینب علی نے ایک اور ویڈیو شیئر کر کے اپ ڈیٹ شیئر کی ہے۔

بعد ازاں علی حیدرآبادی نے بھی ویڈیو پیغام جاری کرتے ہوئے زینب علی کے تمام الزامات کی سختی سے تردید کی انہوں نے قرآن پاک ہاتھ میں اٹھا کر کہا کہ میں نے کبھی اپنی سابق اہلیہ پر جسمانی تشدد نہیں کیا اور نہ ہی ان کی انگلی توڑی،طلاق کی ویڈیو میں نے اپنی حفاظت کے لیے ریکارڈ کی تھی کیونکہ مجھے خدشہ تھا کہ مستقبل میں میرے خلاف ویڈیوز یا دیگر مواد استعمال کر کے مجھے بلیک میل کیا جا سکتا ہے۔

انہوں نے کہا کہ ویڈیو میں واضح ہے کہ میں کسی قسم کا تشدد نہیں کر رہا تھا، جبکہ ویڈیو کے آخر میں زینب اہلیہ اور دیگر افراد میرا موبائل فون لینے کی کوشش کر رہے تھے ویڈیو ریکارڈ ہونے سے پہلے ہی میرا سامان پیک کر دیا گیا تھا اور مجھے گھر چھوڑنے کے لیے کہا گیا تھا اگرچہ میں اپنی سابق اہلیہ کے گھر میں رہ رہا تھا، لیکن یہ ہماری باہمی رضامندی سے تھا۔

علی حیدرآبادی نے کہا کہ میں نے مختلف مقامات پر گھر اور فلیٹ بھی کرائے پر لیے، تاہم زینب وہاں منتقل ہونے پر آمادہ نہیں ہوئی تین سالہ ازدواجی زندگی کے دوران ہم دونوں کے درمیان کئی بار اختلافات ہوئے، تاہم میں نے کبھی دھمکیاں نہیں دیں اور نہ ہی ان پر تشدد کیامیں تمام ریاستی اداروں کا احترام کرتا ہوں اور اگر کسی متعلقہ ادارے نے مجھے طلب کیا تو میں اپنے مؤقف کے حق میں تمام شواہد پیش کرنے کے لیے تیار ہوں۔

بھارتی گلوکار دلجیت دوسانجھ نے انکشاف کیا ہےکہ وہ سالگرہ و شادی کی تقریبات میں تھوڑی رقم پر پرفارم کرکے پیسے کماتے تھے،لائیو پرفارمنسز میں بہت زیادہ پیسہ ہے لیکن پنجابی موسیقی کی صنعت کے کچھ سینئر فنکار شادیوں میں پرفارمنس دینے کو اچھی نظر سے نہیں دیکھتے تھے۔

بھارتی میڈیا سے گفتگو میں 42 سالہ اداکار و گلوکار دلجیت دوسانجھ نے بتایاکہ ایک وقت تھا جب میں سالگرہ کی تقریبات اور شادیو ں میں پرفارم کرتا تھا، تھوڑی سی رقم پر تیار ہوجاتا اور میں نے کبھی کسی کو انکار نہیں کیا، دلجیت نے بتایا کہ ان کے خاندان کی مالی مشکلات نے انہیں انتھک محنت کرنے کی ترغیب دی ان کا تعلق ایک اوسط سے بھی کم آمد نی رکھنے والے خاندان سے تھا ، کیفیت یہ تھی کہ بیمار ہو جاتے تو ڈاکٹر کے پاس جانے کے لیے بھی پیسے نہیں ہوتے تھے،وہ ہمیشہ امیر اور مشہور بننے کا خواب دیکھتے تھے-

دلجیت کا کہنا تھا کہ ان کا پہلا البم عشق دا اڈا اڈا 2002 میں ریلیز ہوا جس کے بعد چند لوگ ان کی کمپنی میں آئے اور کہنے لگے کہ ہم آپ کو سالگرہ کی تقریب کے لیے بک کرنا چاہتے ہیں جب انہوں نے مجھے پیسے دیے تو میں نے سوچا کہ یہی میرا راستہ ہے، میں نے کسی کو بھی انکار نہیں کیا، اگر کسی نے 5 ہزار، 10 ہزار یا 15 ہزار روپے کی پیشکش کی تو فوراً ہاں کر دی، کبھی کسی کو منع نہیں کیا، دن رات ہر جگہ پرفارم کرنے جاتا رہالائیو پرفارمنسز جلد ہی اُن کی آمدنی کا سب سے بڑا ذریعہ بن گئی کیونکہ اس میں بہت زیادہ پیسہ ہے لیکن پنجابی موسیقی کی صنعت کے کچھ سینئر فنکار شادیوں میں پرفارمنس دینے کو اچھی نظر سے نہیں دیکھتے تھے۔

پاکستانی اداکارہ کنزہ ہاشمی نے شکوہ کیا ہےکہ انہیں ان کی اصل قدر و قیمت کے مطابق نہیں سراہا گیا۔

حال ہی میں ایک انٹرویو میں گفتگو کرتے ہوئے کنزہ ہاشمی نے کہا کہ میں نے اپنے کیریئر میں ہمیشہ مختلف اور منفرد کردار ادا کرنے کی کوشش کی مجھے لگتا ہے میری اصل قدر و قیمت کے مطابق نہیں سراہا گیا، میں مختلف کردار ادا کرنے کا انتخاب کرتی ہوں،انہوں نے مثال دیتے ہوئے بتایا کہ ڈرامہ دل آویز میں، میں نے دو بالکل مختلف کردار نبھائے، جبکہ دیگر ڈراموں میں بھی میرے کردار منفرد تھے-

انہوں نے کہا کہ میں جانتی ہوں کہ مجھے انڈر ریٹڈ سمجھا جاتا ہے، لیکن اس بات پر مجھے افسوس نہیں لوگ میری صلاحیتوں سے واقف ہیں، اس لیے میں اطمینان کے ساتھ اپنے سفر پر توجہ دے رہی ہوں اور مسلسل محنت کر رہی ہوں میں نے بہت کام کیا ہے لیکن اب میں یہ سمجھتی ہوں کہ اگر کسی کا ایک ڈرامہ ہٹ ہوجائے تو دوسرا ڈرامہ بھی ہٹ ہونا ضروری ہے تبھی وہ اسٹار کہلائے گا، ورنہ لوگ پہلے والے کا بھی کریڈٹ چھین لیتے ہیں،ہر فنکار کا سفر مختلف ہوتا ہے اور وہ مستقبل میں بھی ایسے کرداروں کا انتخاب کرتی رہیں گی جو ان کی اداکاری کی صلاحیتوں کو مزید نکھار سکیں-

پاکستان کے سابق پروڈیوسر کاظم پاشا نے پروڈکشن چھوڑنے کیوجہ سینئر اداکار عدنان صدیقی کو قرار دیا-

اپنے ایک حالیہ انٹرویو میں انہوں نے بتایا کہ ماضی میں، میں نے اداکار عدنان صدیقی کے ساتھ ایک پروجیکٹ پر کام کیا تھا، تاہم اس دوران مجھے مشکلات کا سامنا کرنا پڑا کہ میں سیٹ چھوڑ کر چلا گیا تھا،عدنان صدیقی کی بعض درخواستوں اور مطالبات کی وجہ سے میں اس تجربے سے نالاں رہا اور بالآخر میں نے اس پروجیکٹ سے علیحدگی اختیار کر لی۔

کاظم پاشا سے میزبان کی جانب سے اداکار عدنان صدیقی سے متعلق سوال کیا گیا جس کے جواب میں کاظم پاشا نے کہا کہ عدنان صدیقی نے ایک سیریل میں مجھے تنگ کیا اور اس کے بعد میں نے پروڈکشن چھوڑ دی تھی اس کی وجہ یہ ہی تھی کہ عدنان نے مجھے کہا کہ شوٹنگ پر میرے ساتھ میرا منیجر، 3 بیٹیاں اور ان کی نینی ( بچوں کی دیکھ بھال کرنے والی خاتون) بھی جائیں گی، اس طرح یہ 5 ٹکٹ کا خرچہ ہوگیا، مجھے ٹیم نے کہا کہ کیا ہمیں یہ لاش بناکر بھیجے گا جس پر میں نے کہا کہ آرٹسٹ ہے اور اسے ہیرو کے طور پر کاسٹ کیا گیا ہے۔

کاظم پاشا نے بتایا کہ اسی طرح اعجاز اسلم کے بنگلے میں شوٹنگ تھی وہاں بھی عدنان نے مجھے تنگ کیا جس پر میں سیٹ چھوڑ کر چلا گیا، وہ کہتے تھے مجھے بھوک لگ رہی ہے جب تک فلاں جگہ سے کھانا نہیں آئے گا میں کام نہیں کروں گا، فلاں چیز چاہیے اگر نہیں آئی تو میں آج شوٹنگ نہیں کراؤں گا، کل ہوگی شوٹنگ،لیکن اس سب کے باوجود عدنان کو میری بیٹیوں سے بہت لگاؤ ہے اور میرے ساتھ بھی بدتمیزی کبھی نہیں کی۔

کاظم پاشا کا انٹرویو وائرل ہونے کے بعد اس پر عدنان صدیقی نے کہا کہ کاظم صاحب وہ تنگ کرنا نہیں تھا وہ میری شرارتیں تھیں، خیر پھر بھی میں بہت شرمندہ ہوں اپنی حرکتوں پر، آپ سے معافی کی درخواست ہے، مجھے معاف کردیجئے آئندہ کبھی ایسے نہیں ہوگا۔

بھارتی اداکارہ نیہا دھوپیا نے پاپارازی کی جانب سے نامناسب انداز میں تصاویر اور ویڈیوز بنانے پر سخت ناراضگی کا اظہار کیا ہے-

ممبئی میں ایک ایوارڈ تقریب کے دوران نیہا دھوپیا براہِ راست فوٹوگرافروں کے پاس گئیں اور کہا کہ بدتمیزی سے بیک شاٹ کون لیتا ہے؟ یہ مت کیا کریں، نہ میرے ساتھ اور نہ ہی کسی اور کے ساتھ، ہم یہ بات بار بار کہہ کر تھک گئے ہیں، ہم باہر آتے ہیں اور آپ لوگ اس طرح کی ویڈیوز بناتے ہیں،اداکارہ سوناکشی سنہا نے بھی نیہا کی حمایت کرتے ہوئے وائرل ویڈیو کے کمنٹس میں لکھا ویل ڈن نیہا۔

نیہا کا یہ ردِعمل ان کی حالیہ ایک وائرل ویڈیو کے بعد سامنے آیا، جس میں انہیں ٹریک پر دوڑتے ہوئے فلمایا گیا تھا-

چند روز قبل سوناکشی سنہا بھی ممبئی کے ایک ریسٹورنٹ کے باہر پاپارازی کے رویے سے نالاں دکھائی دی تھیں، وہ اپنے شوہر ظہیر اقبال اور والد کے ہمراہ موجود تھیں، جہاں انہوں نے ہاتھ جوڑ کر کہا تھا کہ بس، گائز شکریہ، گڈ نائٹ! تاہم اس کے باوجود کیمرے ان کا تعاقب کرتے رہے۔

یہ پہلا موقع نہیں کہ کسی بھارتی اداکار نے پاپارازی کی جانب سے نجی زندگی میں مداخلت یا نامناسب زاویوں سے تصاویر لینے پر اعتراض کیا ہو، اس سے قبل سلمان خان، جھانوی کپور، پلک تیواری اور زرین خان بھی اس معاملے پر اپنی ناراضگی کا اظہار کر چکے ہیں۔

بالی ووڈ اداکار اجے دیوگن کی آنے والی فلم چوہان کا ٹیزر جاری ہونے کے بعد شدید تنازع کھڑا ہوگیا ہے۔

ٹیزر میں ایک نوجوان کو احتجاج کے دوران آنکھوں میں پیلٹ لگتے ہوئے دکھایا گیا ہے، جبکہ پس منظر میں اجے دیوگن کی آواز سنائی دیتی ہے، جس میں ان چوٹوں کو محدود نقصان (Limited Damage) قرار دیا جاتا ہے،یہ مکالمہ سامنے آتے ہی سوشل میڈیا پر شدید ردعمل دیکھنے میں آیا۔

سوشل میڈیا صارفین انسانی حقوق کے حامیوں اور کشمیر کی بعض سیاسی جماعتوں نے ٹیزر کو مقبوضہ کشمیر میں پیلٹ گن متاثرین کے زخموں کو معمولی ظاہر کرنے پر سخت تنقید کا نشانہ بنایا ہے،ناقدین کا کہنا ہے کہ پیلٹ گن سے متاثر ہونے والے ہزاروں کشمیریوں کی تکالیف اور مستقل معذوری کو اس انداز میں پیش کرنا ناصرف حقائق کے منافی بلکہ متاثرین کی توہین کے مترادف ہے۔

سوشل میڈیا پر کئی صارفین نے فلم کے بائیکاٹ کا مطالبہ بھی کیا ایک صارف نے لکھا پیلٹ گن کو محدود نقصان کہنا ان ہزاروں نوجوانوں کی تکلیف کا مذاق اڑانے کے مترادف ہے جنہوں نے اپنی بینائی کھو دی کئی صارفین نے کہا کہ پیلٹ گن کے اثرات کو معمولی قرار دینا حقیقت کے برعکس ہےبعض صارفین نے فلم کو پروپیگنڈا فلم قرار دیتے ہوئے اس کے مقصد اور وقت پر بھی سوالات اٹھائے-

رپورٹس کے مطابق 2010ء سے 2016ء کے درمیان مقبوضہ کشمیر میں 10 ہزار سے زائد افراد پیلٹ گن سے زخمی ہوئے، جبکہ صرف جولائی سے اکتوبر 2016 کے دوران ہونے والے احتجاج میں تقریباً 6 ہزار افراد متاثر ہوئے۔ ان میں سے 782 افراد کی آنکھوں پر پیلٹ لگے اور متعدد افراد ایک یا دونوں آنکھوں کی بینائی سے محروم ہوگئے۔

جگن کاظم سیاحتی مقامات پر گندگی پھیلانے والوں پر برس پڑیں-

جگن کاظم اپنے اہلِ خانہ کے ہمراہ نتھیا گلی کی سیر پر ہیں سفر کے دوران انہوں نے ایک ویڈیو شیئر کی، جس میں جگن کاظم نے کہا کہ یہ کیا ہو رہا ہے؟ لوگ ہر جگہ کچرا پھیلا رہے ہیں میں جب سے نتھیا گلی آئی ہوں، ہر طرف گندگی ہی نظر آ رہی ہے آپ خود بھی یہ صورتحال دیکھ سکتے ہیں آخر لوگ اپنے ساتھ ایک تھیلا کیوں نہیں رکھتے تاکہ اپنا کچرا اس میں جمع کریں اور مناسب جگہ پر جا کر تلف کریں؟-

انہوں نے کہا کہ مجھے معلوم ہے کہ میں عام طور پر اس انداز میں بات نہیں کرتی لیکن یہ واقعی ناقابلِ برداشت ہے پھر ہم اپنے ہی ملک کو برا بھلا کہتے ہیں آخر ہم اپنے شہروں اور سیاحتی مقامات کو صاف کیوں نہیں رکھ سکتے؟ ہم ہمیشہ نظام، موسم اور قدرتی حالات پر تنقید کرتے ہیں لیکن اپنی ذمہ داری ادا کرنے کے لیے تیار نہیں ہوتے،ماحولیاتی تبدیلیو ں کی ایک بڑی وجہ بھی یہی ہے کہ ہم ماحول اور اللہ تعالیٰ کی عطا کردہ ان خوبصورت نعمتوں کی حفاظت نہیں کر رہے۔

سوشل میڈیا پر متعدد صارفین نے ماحول کے تحفظ سے متعلق عوامی شعور اجاگر کرنے پر جگن کاظم کی تعریف کی جبکہ بعض صارفین کا کہنا تھا کہ حکومت کو بھی دیگر ممالک کی طرح عوامی مقامات پر مناسب تعداد میں ڈسٹ بنز نصب کرنے چاہئیں تاکہ صفائی برقرار رکھنے میں شہریوں کو سہولت میسر آ سکے۔