علی ظفر نے کینیڈا کے شہر مسی ساگا میں منعقد ہونے والے ایک لائیو کنسرٹ میں 45 ہزار سے زائد شائقین کی شرکت کے ساتھ ایک تاریخی ریکارڈ قائم کر دیا ہے، جو کہ کسی بھی پاکستانی گلوکار کا بیرونِ ملک سب سے بڑا اوپن ایئر کنسرٹ مانا جا رہا ہے۔
کینیڈا کے شہر مسی ساگا کے مشہور مقام سیلبریشن اسکوائر میں ہونے والے اوپن ائیر کانسرٹ میں تقریباً 45 ہزار افراد نے شرکت کی جسے منتظمین نے اس مقام کی تاریخ کا سب سے بڑا میوزیکل اجتماع قرار دیا ہے منتظمین کے مطابق شائقین کی بڑی تعداد کی وجہ سے مجمع صرف سیلیبریشن اسکوائر تک محدود نہیں رہا بلکہ اطراف کی سڑکوں اور قریبی سینٹر کے احاطے تک پھیل گیا۔
یہ کانسرٹ علی ظفر کے روشنی ٹور 2026 کے شمالی امریکا مرحلے کا اختتامی شو تھا، مفت اوپن ائیر پروگرام میں پاکستان، بھارت، بنگلا دیش اور جنوبی ایشیائی کمیونٹی سے تعلق رکھنے والے ہزاروں افراد نے شرکت کی، بچوں، نوجوانوں، خاندانوں اور بزرگوں پر مشتمل متنوع مجمع نے پورے کانسرٹ کے دوران بھرپور جوش و خروش کا مظاہرہ کیا۔
علی ظفر نے اپنے مشہور اور سدا بہار گیت پیش کرکے شائقین کو جھومنے پر مجبور کر دیا کانسرٹ کا یادگار ترین لمحہ اس وقت آیا جب علی ظفر نے اپنا مقبول گانا جھوم پیش کیا اور ہزاروں مداحوں نے اپنے موبائل فونز کی لائٹس روشن کردیں جس سے پورا مقام روشنیوں کے سمندر میں تبدیل ہو گیا اس کنسرٹ میں شریک ہجوم کا جوش و خروش سوشل میڈیا پر بھی موضوعِ بحث بنا، اور اسے پاکستانی میوزک انڈسٹری کی تاریخ کا ایک بڑا سنگِ میل قرار دیا گیا ہے کانسرٹ کے اختتام پر ہزاروں مداح علی ظفر کے ساتھ گاتے رہے اور منتظمین سمیت متعدد شرکاء نے اس شام کو مسی ساگا کی ثقافتی تاریخ کے یادگار ترین پروگراموں میں سے ایک قرار دیا۔