لاہور: پی ٹی آئی کی رہنما شیریں مزاری کے شوہر انتقال کرگئے۔
باغی ٹی وی : شیریں مزاری کےاہلخانہ کی جانب سے ان کے شوہر ڈاکٹر تابش حاضر کے انتقال کی تصدیق کی گئی ہے۔
اہلخانہ کے مطابق ڈاکٹر تابش حاضر کی نمازِ جنازہ شام 4 بجے 75 بی بلاک ماڈل ٹاؤن لاہور میں اداکی جائےگی۔
شیریں مزاری کے شوہر ڈاکٹر تاش حاضر ماہر امراض اطفال تھے۔
پشاور: پاکستان تحریک انصاف کی خواتین ایم پی ایز نے پی ڈی ایم کے صدر مولانا فضل الرحمان کےخلاف خیبرپختونخوا کمیشن برائے وقار نسواں کو خط لکھ دیا۔
باغی ٹی وی : خط پر چئیرپرسن پارلیمنٹری ویمن کاکس و ریجنل صدر برائے پی ٹی آئی خواتین ونگ ملاکنڈ ڈاکٹر سمیرا شمس، ایم پی اے مدیحہ نثار، عائشہ بانو، عائشہ نعیم، ساجدہ حنیف، آسیہ صالح خٹک و دیگر کے دستخط ہیں۔
خط میں خواتین ایم پی ایز نے موقف اپنایا ہے کہ صدر پی ڈی ایم نے پچھلے کئی مہینوں سے تحریک انصاف خواتین کیلئے نازیبا الفاظ کا استعمال کیا اور یہ کہ وقارنسواں کمیشن خواتین کیخلاف نازیبا الفاظ کے استعمال کے معاملے کا نوٹس لے اور وقار نسواں کمیشن یہ معاملہ الیکشن کمیشن کے ساتھ باقاعدہ طور پر اُٹھائے۔
خط میں کہا گیا ہے کہ پی ڈی ایم صدر نے پریس کانفرنسز اور ریلیوں کے دوران خواتین کو بدتمیزی کا نشانہ بنایا ، جے یو آئی کا خواتین ونگ فعال نہیں، اس لیے ان کو خواتین کی تمیز نہیں ہے۔
خط میں مزید کہا گیا ہےکہ اقتدار کی لالچ میں ایسے لیڈرز خواتین کی اسلامی و اخلاقی اقدار کو بھول جاتے ہیں، ایسے ماحول میں خواتین کے جمہوری عمل کا حصہ بننے میں دشواریاں پیدا ہورہی ہیں، خواتین کی کردار کشی اور ان پر کیچڑ اچھالنا ہرصورت قابل قبول نہیں ہے۔
خط میں مطالبہ کیا گیا ہےکہ وقارنسواں کمیشن خواتین کےخلاف نازیبا الفاظ کے استعمال کے معاملے کا نوٹس لیتے ہوئے معاملہ الیکشن کمیشن کے ساتھ اٹھائیں۔
اسلام آباد: پاکستان تحریک انصاف کے سینیٹرز نے کل ہونے والے پارلیمنٹ کے مشترکہ اجلاس کے بائیکاٹ کا فیصلہ کرلیا-
باغی ٹی وی : پی ٹی آئی ذرائع کے مطابق کل سہ پہر 3 بجے پارلیمنٹ کے مشترکہ اجلاس میں پی ٹی آئی کا کوئی بھی سینیٹر شریک نہیں ہوگا،پی ٹی آئی کی قیادت نے تمام سینیٹرز کو پارلیمنٹ کے مشترکہ اجلاس میں شرکت نہ کرنے کے حوالے سے آگاہ کردیا ہے۔
دوسری جانب پارلیمنٹ کے مشترکہ اجلاس کا 21 نکاتی ایجنڈا جاری کر دیا گیا ہے۔
مشترکہ اجلاس میں پاکستان نرسنگ کونسل ترمیمی بل منظوری کے لیئے پیش کیا جائے گا جو ڈاکٹر مہرین رزاق بھٹو پاکستان انسٹیوٹ آف میڈیکل سائنسز پیش کریں گی۔ جب کہ مرتضیٰ جاوید عباسی پیپرا ترمیمی بل 2022 پیش کریں گے اور پاکستان میڈیکل اینڈ ڈینٹل کونسل بل 2022 بھی منظوری کیلئے پیش کیا جائے گا۔
اجلاس کے دوران سینیٹر شیری رحمان گلوبل چینج ایمپکٹ سٹڈی سینٹر ترمیمی بل منظوری کے لیئے پیش کریں گی جبکہ وزیر قانون اعظم نذیر تارڑ والدین کے تحفظ کا بل پیش کریں گے۔
پارلیمنٹ کے مشترکہ اجلاس میں وزیر خزانہ اسحاق ڈار کی جانب سے اسٹیٹ اونڈ انٹرپرائزز (گورنینس اینڈ آپریشنز) منظوری کے لئے پیش کیا جائے گا اور وزیر تعلیم رانا تنویر پاکستان گلوبل انسٹیٹیوٹ بل 2022 منظوری کے لیے پیش کریں گے۔
پارلیمانی ذرائع کا کہنا ہے کہ اسلام آباد میں نجی قرضوں پر سود کی ممانعت کا بل منظوری کے لیے مشترکہ اجلاس میں پیش کیا جائے گا اور وفاقی دارالحکومت میں حفاظتی ٹیکہ جات لازمی قرار دینے اور ہیلتھ ورکرز کے تحفظ کا بل بھی پیش ہوگاجبکہ مہرین رزاق بھٹو فیڈرل میڈیکل ٹیچنگ انسٹیٹیوٹ ایکٹ 2021 کو ختم کرنے کا بل پیش کریں گی۔
واضح رہے کہ وفاقی حکومت نے پارلیمنٹ کا مشترکہ اجلاس 20 دسمبر کو بلانے کا فیصلہ کیا تھا حکومت نے فیصلہ کیا تھا کہ پارلیمنٹ کے مشترکہ اجلاس میں عمران خان کی اسمبلیاں تحلیل کے فیصلے کے بعد حکمت عملی بنائی جائے گی۔
وفاقی حکومت نے اس موقع طے کیا تھا کہ عمران خان کے فیصلے پر اجتماعی حکمت عملی بنائی جائے گی اور قوم کو پی ٹی آئی چیئرمین کے فیصلوں سے ملک پر پڑنے والے اثرات سے آگاہ کیا جائے گا۔
لاہور: پنجاب کابینہ اجلاس میں تلخی کے بعد پاکستان تحریک انصاف کے صوبائی وزیر سردار حسنین بہادر دریشک وزارت سے مستعفی ہوگئے،جس کی انہوں نے تصدیق بھی کی ہے-
باغی ٹی وی : ذرائع کے مطابق گزشتہ روز پنجاب کابینہ کے اجلاس میں صوبائی وزیر حسنین بہادر دریشک کی وزیراعلی پنجاب سے تلخ کلامی ہوئی صوبائی وزیر احتجاجا کابینہ اجلاس سے اٹھ کر چلے گئے-
ذرائع کے مطابق کابینہ اجلاس میں ایک ہی وقت میں متعدد وزراء بات کرنا چاہتے تھے وزیر اعلی کا کہنا تھا کہ میں ڈسپلن کیساتھ کابینہ اجلاس چلاؤں گا اور ایک وقت میں ایک ہی وزیر بات کرسکتا ہے۔
سردار حسنین بہادر دریشک نے اس کے باوجود بھی گفتگو جاری رکھی وزیر اعلی نے اجازت کے بغیر گفتگو سے روکا تو صوبائی وزیر غصے میں آگئے اور دھمکی دی کہ میں پھر استعفی دے دیتا ہوں اور اجلاس سے چلا جاتا ہوں یہ کہہ کر صوبائی وزیر کابینہ اجلاس سے باہر چلے گئے ۔
واقعہ کے بعد حسنین بہادر دریشک نے کابینہ سے مستعفی ہوتے ہوئے استعفی ارسال کر دیا سردار حسنین بہادر دریشک نے میڈیا کو تصدیق بھی کی ہے کہ استعفی بھجوا دیا ہے۔
پاکستان تحریک انصاف نے اسلام آباد کے بلدیاتی انتخابات کے لیے لوگو جاری کر دیا۔
باغی ٹی وی : 31 دسمبر کو وفاقی دارالحکومت میں ہونے والے بلدیاتی انتخابات کے لیے تحریک انصاف کے لوگو کا بنیادی تھیم ”بدلو اسلام آباد، کپتان کے سنگ” رکھا گیا ہے۔
اسلام آباد کے بلدیاتی انتخابات میں بھی انشا اللہ عوام اسی طرح حقیقی آزادی کا ساتھ دیں گے جس طرح آزاد کشمیر کے بلدیاتی انتخاب اور تمام ضمنی انتخابات میں دیا۔ #بدلو_اسلام_آباد_کپتان_کے_سنگ pic.twitter.com/6DZsYgiTTI
— PTI (@PTIofficial) December 14, 2022
پی ٹی آئی لوگو کو سبز اور سرخ رنگوں کے امتزاج سے بنایا گیا ہے اور لوگوں میں عمران خان کی تصویر کے ساتھ فیصل مسجد کو دکھایا گیا ہے۔
واضح رہے کہ الیکشن کمیشن آف پاکستان (ای سی پی) نے وفاقی دارالحکومت اسلام آباد میں بلدیاتی انتخابات کا شیڈول جاری کرتے ہوئے کہا تھا کہ اسلام آباد میں بلدیاتی انتخابات 24 دسمبر کو ہوں گے۔
لاہور: اسمبلیاں تحلیل ہوتے ہی پاکستان تحریک انصاف ( پی ٹی آئی) نے دوبارہ سے سڑکوں پر آنے کا فیصلہ کرلیا۔ذرائع کے مطابق اسمبلیوں کی تحلیل کے بعد کیا ہوگا ؟ تحریک انصاف نے سیاسی روڈ میپ طے کرلیا، عمران خان کے زیرصدارت سینئر لیڈرشپ کے اجلاس کی اندرونی کہانی بھی سامنے آگئی۔
اس حوالے سے ذرائع کی جانب سے بتایا گیا کہ اجلاس میں پارٹی رہنماؤں سے مشاورت کی گئی کہ اسمبلیوں کی تحلیل کے بعد ہم کیا سیاسی لائحہ عمل اختیار کریں گے۔عمران خان نے ہدایت کی کہ سب سے بڑا ایشو مہنگائی ہے ہمیں اس پر پہلے سے بھی زیادہ شدت کے ساتھ آواز بلند کرنا ہے۔
ذرائع کے مطابق اجلاس میں اتفاق کیا گیا کہ این آر او ٹو کو اسمبلیوں کی تحلیل کے بعد کی احتجاجی اور انتخابی مہم میں ہدف تنقید بنایا جائے گا، حکومتی رہنماؤں کے کرپشن کے کیسز پر ملنے والے ریلیف پر قانونی لائحہ عمل کا بھی جائزہ لیاجائے گا، نیب کے پی ڈی ایم کے رہنماؤں کے کیسز پر رویے کو بھی انتخابی اور احتجاجی مہم میں اٹھایا جائے گا، پی ڈی ایم کے خلاف بند ہونے والے تمام کیسز کو عوامی مہم میں دوبارہ سے اجاگر کیا جائے گا۔
اجلاس کی اندرونی کہانی کے بارے ذرائع کا کہنا تھا کہ جیتنے والے حلقوں کے بعد پی ٹی آئی کے ہارنے والے حلقوں میں بھی ریلیوں کی کال دینے کی تجویز دی گئی، بجلی، گیس کے یوٹیلٹی بلز، پٹرولیم مصنوعات کی قیمتوں کے معاملات بھی پی ٹی آئی قیادت اجاگر کرے گی، پی ڈی ایم قیادت کے خلاف کرپشن کے بیانیے کو دوبارہ شدت سے منظر عام پرلانے پر بھی اجلاس میں اتفاق کیا گیا۔
تحریک انصاف نے اسمبلیوں کی تحلیل کے بعد دوبارہ سے سڑکوں پر آنے کے لئے بھی حکمت عملی کو حتمی شکل دے دی۔
پشاور کے نواحی علاقے ’خزانہ‘ میں پی ٹی آئی کے کارکنوں نے اقدام قتل کے ملزم کو چھڑوانے کیلئے تھانے پر دھاوا بول دیا-
باغی ٹی وی : نجی خبررساں ادارے کے مطابق پولیس کا کہنا ہے کہ اقدام قتل کے ملزم کو گرفتار کیا تو ایم پی اے انہیں چھڑوانے تھانے پہنچ گئے، ملزم تھانہ فقیر آباد پولیس کو جون 2022 سے اقدام قتل کے مقدمے میں مطلوب تھا۔
پولیس کا کہنا ہے کہ ملزم کو رہا نہ کرنے پر ایم پی اے آصف خان کے ساتھ پولیس کی تکرار ہوئی، پی ٹی آئی کارکنان ملزم کو گرفتار کرنے والے ایس ایچ او کی معطلی کا مطالبہ لے کر تھانے کے سامنے جمع ہوگئے،علاقے میں صورتحال کشیدہ ہوگئی-
پولیس کا کہنا ہے کہ پی ٹی آئی کارکنوں نے ٹائر جلا کر چارسدہ روڈ بند کردی جس کی وجہ سے گاڑیوں کی لمبی قطاریں لگ گئیں۔
بعد ازاں ایم پی اے آصف خان اور ایس ایچ او خزانہ کے مابین تلخ کلامی کے معاملے کا نوٹس لیتے ہوئے ایس ایس پی آپشنز نے متعلقہ ایس ایچ او کو معطل کر دیا اور ایس پی رورل کو تین دن میں معاملے کی انکوائری کے احکامات جاری کردیئے۔
لاہور : چیئرمین پی ٹی آئی عمران خان کی زیرصدارت اجلاس میں پہلے مرحلے میں پنجاب اسمبلی تحلیل کرنے کا فیصلہ کرتے ہوئے کہا ہے کہ تمام ارکان قومی اسمبلی دوبارہ ایوان میں پیش ہو کر اپنے استعفے دیں گے۔
باغی ٹی وی : تفصیلات کے مطابق چیئرمین پی ٹی آئی عمران خان کی زیرصدارت راولپنڈی کے ارکان اسمبلی اجلاس کا احوال سامنے آگیا۔
اسمبلیوں کی تحلیل اور قومی اسمبلی سےاستعفوں سےمتعلق بڑافیصلہ کرلیا گیا، اجلاس میں فیصلہ کیا گیا کہ پہلے مرحلے میں پنجاب اسمبلی تحلیل کی جائے گی اور تمام ارکان قومی اسمبلی دوبارہ ایوان میں پیش ہو کر اپنے استعفے دیں گے۔
ذرائع نے بتایا ہے کہ پی ٹی آئی نے احتجاجی تحریک کو انتخابی مہم میں بھی تبدیل کرنے کا فیصلہ کیا ہے۔
اجلاس میں فیصلہ کیا گیا کہ دوسرے مرحلے میں خیبرپختونخوا اسمبلی تحلیل ہوگی جبکہ ارکان کی پنجاب اسمبلی کی تحلیل اور قومی اسمبلی سے دوبارہ استعفوں کے فیصلے کی توثیق کردی گئی۔
ارکان اسمبلی نے کہا کہ قومی و صوبائی اسمبلی کی نشستیں پی ٹی آئی کی امانت ہیں، باقاعدہ عمران خان کی زیر قیادت انتخابی مہم میں جائیں گے۔
اس موقع پر پی ٹی آئی چیئرمین کا کہنا تھا کہ پی ڈی ایم حکومت کی غیر مؤثر پالیسوں نے ملک ناقابل تلافی نقصان پہنچایا، پاکستان بدترین معاشی بحران سے دوچار ہے۔
عمران خان نے کہا کہ معاشی و سیاسی بحران سے نکلنے کا واحد راستہ جلد شفاف انتخابات ہیں۔
گلوکار علی ظفر جو کہ سوشل میڈیا پر کافی متحرک رہتے ہیں، انہوں نے حال ہی میںاپنی ٹویٹ کے زریعے حکومت اور سیاسی رہنمائوں سے چند سوالات کئے ہیں اور پوچھا ہے کہ یہ ملک کس طرح سے ٹھیک ہو سکتا ہے. جو بھی حکومت آتی ہے وہ پچھلی کو تباہی کا ذمہ دار ٹھہراتی ہے. علی ظفر نے کہا کہ ہمیںایک ہی بار بتا دیں کہ یہ ملک کیسے اور کب ٹھیک ہو گا کوئی پلان یا حکمت عملی ہی بتا دیں . ہر کوئی باتیں ہی کرتا ہے اور اپنے سے پہلے والی حکومتوں پر تنقید کے نشتر چلاتا ہے. علی ظفر نے کہا کہ ہمیں اتنا تو بتا دیں کہ ملک کتنے برسوں میں ٹھیک ہو گا . علی ظفر کی اس پوسٹپر بہت سارے سوشل میڈیا صارفین نے کمنٹس کئے ، کسی نے علی ظفر کے سوالات کو سراہا اور کسی نے کہا کہ علی ظفر تو پی ٹی
آئی کے سپورٹر ہیں لہذا ان کے منہ سے ایسی باتیں یا ملک کے لئے فکر کی باتیں اچھی نہیں لگتیں. یاد رہے کہ اس وقت جو ملک کی صورتحال ہے اس پر ہر کوئی پریشان دکھائی دیتا ہے اور ہر کوئی چاہتا ہے کہ ملک کے حالات ٹھیک ہوںمہنگائی کنٹرول ہو لوگوں کا جینا آسان ہوجائے. پچھلے پانچ برسوں سے عوام نے سکھ کا سانس نہیں لیا مہنگائی نے ان کی کمر توڑ کر رکھ دی ہے.
ارشد شریف کی والدہ سے تحریک انصاف نے زبردستی پٹیشن دائر کروائی ، اہم انکشافات سامنے آ گئے-
باغی ٹی وی : ذرائع کے مطابق ارشد شریف کی والدہ سے سپریم کورٹ میں پٹیشن تحریک انصاف کے کچھ لوگوں نے زبردستی دائر کروائی جس کا مقصد ارشد شریف کی والدہ کو استعمال کر کے تحریک انصاف کو سیاسی فائدہ پہنچانا تھا-
ذرائع کے مطابق تحریک انصاف کے لانگ مارچ کے مکمل طور پہ ناکام ہونے کے بعد ارشد شریف کا معاملہ تحریک انصاف اس لیئے اٹھا رہی ہے تاکہ اسٹیبلشمنٹ پر دباؤ ڈالا جا سکے
مصدقہ ذرائع کے مطابق کینیا کی حکومت سے وصول ہونے والے ارشد شریف کے فون سے ایسے ثبوت ملے ہیں جن سے تحریک انصاف کے کچھ لوگوں خصوصی زلفی بخاری کے بارے میں کرپشن کے الزامات ثابت ہو رہے ہیں۔
عمران خان کی ایک آڈیو لیک آنے والی ہے جس میں وہ ایک سینیئر پارٹی ممبر کو لانگ مارچ کی ناکامی کے بعد ارشد شریف کے معاملہ پہ "کھیلنے” کی ہدایات جاری کر رہا ہے-
ذرائع کے مطابق جن تین لوگوں کا ارشد شریف کے قتل میں ہاتھ نظر آ رہا ہے وہ ایک میڈیا گروپ کے مالک اور عمران خان کے کافی قریب ہیں۔