Author: Aqsa Younas Rana


بین الاقوامی مارکیٹ میں خام تیل کی قیمتوں میں 4 فیصد کمی دیکھنے میں آئی، جس کے بعد برینٹ خام تیل 67 ڈالر فی بیرل اور امریکی خام تیل 63 ڈالر فی بیرل پر آگیا۔
ماہرین کے مطابق امریکہ اور یورپ میں مہنگائی کو کنٹرول کرنے کے لیے اپنائی گئی سخت مالیاتی پالیسیوں نے صنعتی پیداوار سست کر دی ہے، جس سے تیل کی طلب کم ہو گئی۔ اس کے علاوہ، اوپیک پلس کی پیداوار سے متعلق غیر واضح حکمت عملی نے سرمایہ کاروں میں عدم یقینی کی کیفیت پیدا کر دی ہے۔
‎اس مندی کے ترقی پذیر ممالک پر دوہرے اثرات مرتب ہو سکتے ہیں۔ ایک جانب پیٹرولیم مصنوعات کے درآمدی بل میں کمی سے معیشت کو عارضی ریلیف ملے گا، تو دوسری جانب توانائی کے شعبے میں طویل مدتی سرمایہ کاری رک جانے کا خطرہ ہے۔ ماہرین کا کہنا ہے کہ اگر عالمی معاشی دباؤ برقرار رہا تو اجناس کی قیمتوں میں مزید کمی کا امکان ہے، جو مارکیٹ کے استحکام کے لیے بڑا چیلنج ہوگا۔


امریکا کی ریاست شمالی کیرولینا میں بم سائیکلون کے باعث موسم شدید سرد ہو گیا اور 100 کلومیٹر فی گھنٹہ کی رفتار سے چلنے والی طوفانی ہواؤں نے تباہی مچا دی۔ اس طوفان نے خلیج میکسیکو سے نیو انگلینڈ تک وسیع علاقے متاثر کیے ہیں، جبکہ مشرقی امریکا میں تقریباً 15 کروڑ افراد کو سردی سے متعلق انتباہ جاری کیا گیا ہے۔
نارتھ کیرولینا میں طوفان کے دوران دو افراد ہلاک ہو گئے اور ایک لاکھ پچاس ہزار سے زائد صارفین بجلی سے محروم ہیں۔ شہر شارلٹ اور گردونواح میں تقریباً ایک فٹ (30 سینٹی میٹر) برف پڑی، جو شہر کے بڑے برفانی واقعات میں شمار کی جا رہی ہے۔
‎امریکی میڈیا کے مطابق طوفان سے 13 سے 15 بلین ڈالر سے زائد کے مالی نقصان کا خدشہ ہے۔ سڑکوں پر بلیک آئس کے خطرے کی وجہ سے شہریوں کو غیر ضروری سفر سے اجتناب کی ہدایات دی گئی ہیں۔
‎ماہرین موسمیات کے مطابق بم سائیکلون ایک طاقتور اور تیز رفتار موسمی نظام ہے، جس سے شدید سردی، تیز ہوائیں اور بھاری برفباری ہوتی ہے۔ جنوبی فلوریڈا میں 1989 کے بعد سرد ترین درجہ حرارت ریکارڈ کیا گیا، جبکہ میامی میں 2010 کے بعد سرد ترین صبح دیکھی گئی۔
‎شدید موسم کے باعث فضائی سفر بھی متاثر ہوا، ہفتے کو 2800 اور اتوار کو 1800 پروازیں منسوخ کی گئیں، جن میں بڑی تعداد شارلٹ ڈگلس انٹرنیشنل ایئرپورٹ کی تھی۔ حکام نے شہریوں کو محتاط رہنے اور سرد موسم میں محفوظ رہنے کی ہدایات جاری کی ہیں۔

بھارتی وزیراعظم نریندر مودی نے امریکی صدر ڈونلڈ ٹرمپ سے ٹیلی فونک گفتگو کے بعد امریکہ اور بھارت کے درمیان طے پانے والے تجارتی معاہدے کا خیرمقدم کیا ہے اور بھارتی مصنوعات پر امریکی ٹیرف میں کمی پر صدر ٹرمپ کا شکریہ ادا کیا ہے، تاہم انہوں نے روسی تیل کی خریداری روکنے یا کسی مخصوص مالی وعدے کا براہِ راست ذکر نہیں کیا۔
وزیراعظم مودی نے سماجی رابطے کی ویب سائٹ ایکس (سابقہ ٹوئٹر) پر جاری بیان میں کہا کہ صدر ٹرمپ سے بات کر کے خوشی ہوئی اور بھارتی مصنوعات پر ٹیرف کو کم کر کے 18 فیصد کرنے کے اعلان نے انہیں مسرور کیا۔ انہوں نے اس فیصلے کو بھارت کے لیے مثبت پیش رفت قرار دیتے ہوئے کہا کہ 1.4 ارب بھارتی عوام کی جانب سے صدر ٹرمپ کے شکر گزار ہیں۔
‎نریندر مودی کا کہنا تھا کہ جب دنیا کی دو بڑی معیشتیں اور سب سے بڑی جمہوری طاقتیں مل کر کام کرتی ہیں تو اس کے فوائد براہِ راست عوام تک پہنچتے ہیں اور باہمی تعاون کے نئے اور وسیع مواقع پیدا ہوتے ہیں۔ انہوں نے صدر ٹرمپ کی قیادت کو عالمی امن، استحکام اور خوشحالی کے لیے اہم قرار دیتے ہوئے کہا کہ بھارت عالمی سطح پر امن کی کوششوں میں امریکہ کے ساتھ کھڑا ہے۔
‎وزیراعظم مودی نے مزید کہا کہ وہ صدر ٹرمپ کے ساتھ قریبی تعاون کے خواہاں ہیں تاکہ امریکہ اور بھارت کے درمیان شراکت داری کو نئی بلندیوں تک لے جایا جا سکے اور دونوں ممالک کے عوام کو اس کے ثمرات حاصل ہوں۔

سعودی عرب کی وزارتِ حج و عمرہ نے غیر معیاری خدمات فراہم کرنے پر 1,800 غیر ملکی ٹریول ایجنسیز کے معاہدے معطل کر دیے ہیں۔ یہ ایجنسیز عمرہ شعبے میں کام کرنے والی تقریباً 5,800 ایجنسیوں کا نمایاں حصہ ہیں۔
وزارت کے مطابق یہ اقدام باقاعدہ جائزے کے بعد کیا گیا، جس میں متعدد ایجنسیوں کی کارکردگی میں سنگین خامیوں کا مشاہدہ ہوا۔ ترجمان غسان النعیمی نے بتایا کہ متاثرہ ایجنسیوں کو 10 دن کی مہلت دی گئی ہے تاکہ وہ نشاندہی شدہ خامیوں کو دور کر سکیں۔
‎معطلی کا اطلاق فی الحال صرف نئے عمرہ ویزوں کے اجرا پر ہوگا، جبکہ موجودہ ویزے متاثر نہیں ہوں گے۔