Author: Aqsa Younas Rana


ایرانی حکومت کے ترجمان کے مطابق 28 فروری سے جاری حملوں کے دوران ملک بھر میں ہزاروں عمارتیں تباہ ہو چکی ہیں جن میں بڑی تعداد رہائشی عمارتوں کی ہے۔
ترجمان کے مطابق مجموعی طور پر تباہ ہونے والی 43 ہزار عمارتوں میں سے تقریباً 36 ہزار 500 اقامتی یونٹس شامل ہیں۔ حکام کا کہنا ہے کہ صرف تہران میں امریکا اور اسرائیل کے حملوں کے دوران تقریباً 10 ہزار عمارتوں کو نشانہ بنایا گیا۔
‎ایرانی حکومتی ترجمان کے مطابق ان حملوں میں 43 ایمرجنسی طبی مراکز، وہاں موجود 32 ایمبولینسیں اور 120 اسکول بھی متاثر ہوئے ہیں۔
‎بیان میں کہا گیا ہے کہ حملوں کے نتیجے میں 223 خواتین ہلاک ہو چکی ہیں جبکہ جاں بحق ہونے والے اساتذہ اور طلبہ کی تعداد 206 تک پہنچ گئی ہے۔
ایرانی حکام کے مطابق شہری انفراسٹرکچر کو پہنچنے والے نقصانات کا جائزہ لیا جا رہا ہے جبکہ متاثرہ علاقوں میں امدادی سرگرمیاں جاری ہیں۔


برطانوی اخبار کی رپورٹ کے مطابق برطانیہ کے وزیرِ اعظم سر کیئر اسٹارمر مشرقِ وسطیٰ میں ہزاروں انٹرسیپٹر ڈرون بھیجنے کے منصوبے پر غور کر رہے ہیں۔
رپورٹ میں بتایا گیا ہے کہ برطانوی فوجی حکام اس بات کا جائزہ لے رہے ہیں کہ آکٹوپس نامی انٹرسیپٹر اینٹی ڈرون سسٹم کو ایران کے خلاف دفاعی کارروائیوں میں استعمال کیا جا سکتا ہے یا نہیں۔
‎یہ جدید انٹرسیپٹر ڈرون برطانیہ میں تیار کیا جاتا ہے اور اسے دشمن کے ڈرونز کو فضا میں ہی تباہ کرنے کے لیے ڈیزائن کیا گیا ہے۔
‎رپورٹ کے مطابق یہی نظام اس سے قبل یوکرین کو بھی فراہم کیا جا چکا ہے جہاں اسے روس کے خلاف دفاعی مقاصد کے لیے استعمال کیا جا رہا ہے۔
‎ماہرین کے مطابق اگر یہ منصوبہ منظور ہو جاتا ہے تو مشرقِ وسطیٰ میں جاری کشیدگی کے تناظر میں خطے کی دفاعی صورتحال پر اس کے نمایاں اثرات پڑ سکتے ہیں۔


عراق نے خبردار کیا ہے کہ بغداد ایئرپورٹ کے قریب ہونے والے ڈرون حملے اس جیل کی سلامتی کے لیے خطرہ بن سکتے ہیں جہاں شام سے منتقل کیے گئے داعش کے ہزاروں جنگجو قید ہیں۔
عراقی حکام کے مطابق فروری میں امریکا نے شام سے تقریباً 5700 داعش قیدیوں کو عراق منتقل کیا تھا۔ یہ قیدی اس وقت بغداد کے الکرخ سنٹرل جیل میں رکھے گئے ہیں جو ماضی میں امریکی فوج کے حراستی مرکز کیمپ کراپر کے نام سے جانا جاتا تھا اور بغداد انٹرنیشنل ایئرپورٹ کے کمپلیکس کا حصہ ہے۔
‎عراقی وزارت انصاف کے ترجمان احمد لعیبی نے بیان میں کہا کہ بغداد ایئرپورٹ اور اس کے اطراف کے علاقوں پر مسلسل حملے ہو رہے ہیں جس سے سیکیورٹی خدشات بڑھ گئے ہیں۔
‎انہوں نے بتایا کہ بعض ڈرون حملے جیل کے انتہائی قریب ہوئے جس کے باعث اس مقام کی حفاظت کے حوالے سے تشویش پیدا ہو گئی ہے جہاں انتہائی خطرناک دہشت گرد قید ہیں۔
‎ترجمان کے مطابق ہفتے کے روز ہونے والے حملے شدت کے اعتبار سے زیادہ سنگین تھے اور ان میں سے بعض حملے جیل کے بہت قریب گرے۔

ایران پر حملوں کے خلاف امریکا اور اسرائیل میں جنگ مخالف مظاہرے سامنے آئے ہیں جہاں شہریوں نے فوجی کارروائیوں کے خلاف احتجاج کیا۔
‎واشنگٹن میں مظاہرین نے ایک ایرانی اسکول میں بچوں کی ہلاکت کی شدید مذمت کرتے ہوئے وائٹ ہاؤس کے باہر احتجاج کیا۔ مظاہرین نے علامتی طور پر اسکول بیگز زمین پر رکھے اور جاں بحق ہونے والے بچوں کی یاد میں پھول بھی رکھے۔
‎مظاہرین کا کہنا تھا کہ جنگ کے نتیجے میں عام شہری، خصوصاً بچے، سب سے زیادہ متاثر ہو رہے ہیں اور فوری طور پر حملے بند کیے جانے چاہئیں۔
‎دوسری جانب اسرائیل میں بھی جنگ مخالف مظاہرے ہوئے جہاں شہری سڑکوں پر نکل آئے اور حکومت سے ایران پر حملے فوری طور پر روکنے کا مطالبہ کیا۔
‎مظاہرین نے خطے میں بڑھتی کشیدگی پر تشویش کا اظہار کرتے ہوئے کہا کہ مزید فوجی کارروائیاں صورتحال کو مزید خراب کر سکتی ہیں۔


امریکی میڈیا کے مطابق امریکی صدر ڈونلڈ ٹرمپ نے جی سیون ممالک کے رہنماؤں کے ساتھ ایک ورچوئل اجلاس میں ایران سے جاری جنگ کی صورتحال پر گفتگو کی۔
اجلاس میں شریک تین عہدیداروں نے امریکی میڈیا کو بتایا کہ صدر ٹرمپ نے جی سیون رہنماؤں کو بریفنگ دیتے ہوئے کہا کہ ایران ہتھیار ڈالنے کے قریب پہنچ چکا ہے۔ ٹرمپ کے مطابق ایران میں اس وقت کوئی ایسا اعلیٰ عہدیدار باقی نہیں رہا جو باضابطہ طور پر ہتھیار ڈالنے کا اعلان کر سکے۔
‎عہدیداروں کے مطابق ٹرمپ نے اجلاس میں یہ بھی کہا کہ آبنائے ہرمز کی صورتحال بہتر ہو رہی ہے اور تجارتی جہازوں کو دوبارہ اپنے آپریشنز شروع کر دینے چاہئیں۔
‎صدر ٹرمپ کا کہنا تھا کہ موجودہ کارروائیوں کو مکمل کرنا ضروری ہے تاکہ آئندہ پانچ سال کے اندر ایران کے ساتھ دوبارہ جنگ کی نوبت نہ آئے۔ تاہم انہوں نے جنگ کے خاتمے کے حوالے سے اپنے مقاصد یا کسی واضح ٹائم لائن کے بارے میں تفصیل فراہم نہیں کی۔
‎امریکی میڈیا کے مطابق جی سیون کے دیگر رہنماؤں نے صدر ٹرمپ پر زور دیا کہ ایران کے ساتھ جاری جنگ کو جلد ختم کیا جائے اور آبنائے ہرمز کو جلد از جلد محفوظ بنایا جائے تاکہ عالمی تجارت متاثر نہ ہو۔


امریکی صدر ڈونلڈ ٹرمپ نے کہا ہے کہ اگر ضرورت پیش آئی تو امریکا آبنائے ہرمز سے گزرنے والے جہازوں کو سکیورٹی فراہم کرے گا اور ایران کے خلاف مزید سخت فوجی کارروائی بھی کی جا سکتی ہے۔
فوکس نیوز کو دیے گئے ایک انٹرویو میں صدر ٹرمپ نے کہا کہ امریکا خطے کی صورتحال پر مسلسل نظر رکھے ہوئے ہے اور عالمی تجارت کے لیے اہم گزرگاہ آبنائے ہرمز میں جہازوں کی حفاظت کو یقینی بنانے کے لیے اقدامات کیے جا سکتے ہیں۔
‎ان کا کہنا تھا کہ اگر حالات کا تقاضا ہوا تو امریکا تیل بردار جہازوں کو آبنائے ہرمز سے محفوظ گزرنے میں مدد فراہم کرے گا تاکہ عالمی توانائی کی ترسیل متاثر نہ ہو۔
‎صدر ٹرمپ نے ایران کے حوالے سے بات کرتے ہوئے کہا کہ آئندہ ہفتے ایران پر مزید سخت حملے کیے جا سکتے ہیں اور امریکا اپنی حکمت عملی کے مطابق فیصلے کرے گا۔
‎انہوں نے کہا کہ امریکا خطے میں استحکام اور عالمی تجارتی راستوں کے تحفظ کو یقینی بنانے کے لیے ضروری اقدامات جاری رکھے گا۔


خبر رساں ایجنسی کے مطابق سلطنت عمان کے صوبے صحار میں دو ڈرون گرنے کے واقعات میں دو غیر ملکی افراد ہلاک جبکہ متعدد زخمی ہوگئے۔
‎رپورٹس کے مطابق ایک ڈرون عوہی کے صنعتی علاقے میں گرا جس کے نتیجے میں دو افراد جان کی بازی ہار گئے اور کئی افراد زخمی ہو گئے۔ زخمیوں کو فوری طور پر قریبی اسپتال منتقل کیا گیا جہاں انہیں طبی امداد فراہم کی جا رہی ہے۔
‎خبر رساں ادارے کے مطابق دوسرا ڈرون صحار کے ایک میدانی علاقے میں گرا تاہم اس واقعے میں کسی قسم کا جانی نقصان نہیں ہوا۔
‎حکام کا کہنا ہے کہ واقعے کی تحقیقات شروع کر دی گئی ہیں اور سیکیورٹی ادارے صورتحال کا جائزہ لے رہے ہیں۔