Author: ممتاز حیدر

بھارت کے گریٹر نوئیڈا ویسٹ کی لا ریزیڈینشیا سوسائٹی میں الوؤں کے ایک جوڑے نے رہائشیوں کو خوف زدہ کر دیا، جہاں سوسائٹی کے مکینوں نے 5 سے 6 افراد پر حملے کا دعویٰ کیا ہے۔

رہائشیوں کے مطابق گزشتہ کچھ عرصے سے الوؤں کا یہ جوڑا سوسائٹی کی سڑکوں، درختوں اور اسٹریٹ لائٹس کے قریب موجود رہتا ہے اور رات کے وقت وہاں سے گزرنے والے افراد پر اچانک اوپر سے جھپٹ پڑتا ہے۔مکینوں کا کہنا ہے کہ بعض افراد کو ان واقعات کے دوران سر اور جسم پر خراشیں بھی آئی ہیں، جس کے باعث سوسائٹی میں خوف و ہراس پایا جاتا ہے۔ متعدد افراد نے رات کے وقت اکیلے آمدورفت سے گریز شروع کر دیا ہے، جبکہ بچوں، بزرگوں اور رات گئے ڈیوٹی سے واپس آنے والے افراد کی سلامتی کے حوالے سے بھی تشویش بڑھ گئی ہے۔رہائشیوں نے معاملے کی شکایت محکمہ جنگلات کے حکام سے کرتے ہوئے ضلعی جنگلات افسر (ڈی ایف او) سے فوری مداخلت کی اپیل کی ہے۔ ان کا مطالبہ ہے کہ الوؤں کے جوڑے کو کسی قسم کا نقصان پہنچائے بغیر محفوظ طریقے سے ریسکیو کرکے مناسب قدرتی ماحول میں منتقل کیا جائے۔

مکینوں کا کہنا ہے کہ وہ پرندوں کو مارنے یا نقصان پہنچانے کے حق میں نہیں، تاہم مسلسل حملوں کے باعث انسانی جانوں کے تحفظ کے لیے محکمہ جنگلات کی فوری کارروائی ضروری ہے۔رہائشیوں نے لوگوں کو بھی مشورہ دیا ہے کہ رات کے وقت درختوں اور اسٹریٹ لائٹس کے قریب سے گزرتے ہوئے احتیاط برتیں اور الوؤں کو چھیڑنے یا ان کے قریب جانے سے گریز کریں۔

ایرانی صدر مسعود پزشکیان نے کہا ہے کہ اگر امریکا ناکہ بندی اور جارحیت ختم کردے تو ایران آبنائے ہرمز کھول دے گا۔ ان کا کہنا ہے کہ امریکا کو ناکہ بندی اور پابندیاں ختم کرنی چاہئیں۔

بھارتی ٹی وی کو انٹرویو دیتے ہوئے مسعود پزشکیان نے کہا کہ امریکا جنگ کے ذریعے اپنے اہداف حاصل کرنے میں ناکام رہا تو اس نے ناکہ بندی کا راستہ اختیار کیا۔ایرانی صدر کا کہنا تھا کہ سمندری راستہ ایسا نہیں جس پر ایران کی زندگی کا مکمل انحصار ہو، امریکا ناکہ بندی کے ذریعے بھی اپنے مقاصد حاصل کرنے میں کامیاب نہیں ہوگا۔
مسعود پزشکیان نے بتایا کہ پیر کے روز مسقط میں ایران اور عرب ممالک کے وزرائے خارجہ کا اجلاس ہوگا، جس میں ان ممالک کی موجودگی میں آبنائے ہرمز میں مشترکہ راستے سے متعلق عمان اور ایران کے معاہدے پر دستخط کیے جائیں گے۔انہوں نے کہا کہ معاہدے کے بارے میں بین الاقوامی میری ٹائم آرگنائزیشن کو بھی آگاہ کیا جائے گا۔ایرانی صدر کے مطابق اجلاس میں وہی ممالک شریک ہوں گے جن کی سرزمین سے ایران پر حملہ کیا گیا تھا۔

شمالی لندن سے تعلق رکھنے والے 52 سالہ شخص ڈیرن کونوے نے آن لائن فورم کے ارکان کو نشہ آور ادویات کے زیر اثر یا سوئی ہوئی خواتین کو جنسی زیادتی کا نشانہ بنانے پر اکسانے کے مقدمے میں جرم قبول کرلیا۔

برطانوی میٹروپولیٹن پولیس کے مطابق پولیس نے اکتوبر 2025 میں ایسے آن لائن فورم کا سراغ لگایا تھا، جس کے بعد نیشنل کرائم ایجنسی (NCA) کی قیادت میں تحقیقات کے لیے قومی سطح پر رابطہ گروپ تشکیل دیا گیا۔تحقیقات کے دوران پولیس نے اینفیلڈ سے تعلق رکھنے والے ڈیرن کونوے کو فورم کے ارکان میں شامل پایا۔ 30 جولائی کو پولیس نے اس کے گھر پر چھاپہ مار کر ڈیجیٹل آلات قبضے میں لیے اور اسے گرفتار کرلیا۔پولیس کے مطابق ضبط کیے گئے آلات سے ملنے والے پیغامات سے معلوم ہوا کہ کونوے فورم کے دیگر ارکان کو نشہ آور ادویات کے زیر اثر یا سوئی ہوئی خواتین کے ساتھ جنسی زیادتی کرنے پر اکساتا تھا اور بعد ازاں مبینہ طور پر حملوں کی تصاویر چیٹ میں شیئر کرنے کی حوصلہ افزائی کرتا تھا۔میٹروپولیٹن پولیس کے مطابق کونوے نے چیٹ روم کے ذریعے 10 سے زائد مرتبہ سوئی ہوئی خواتین کو دیکھا۔میٹ پولیس کمانڈر اینڈی ڈے نے کہا کہ کونوے کے اقدامات انتہائی چونکا دینے والے تھے، کیونکہ اس نے بے ہوش، سوئی ہوئی یا مدہوش خواتین کے خلاف جنسی جرائم کی ترغیب دے کر انہیں اپنے ہی گھروں میں سنگین نقصان کے خطرے سے دوچار کیا اور یہ سب مبینہ طور پر اپنی جنسی تسکین کے لیے کیا۔

کونوے نے جمعہ کو لندن کی وُڈ گرین کراؤن کورٹ میں پیش ہوکر جرم قبول کیا۔ اس نے جرم میں معاونت یا دوسروں کو جرم پر اکسانے کے 9 الزامات کے علاوہ جاسوسی (Voyeurism) اور انتہائی فحش تصویر رکھنے کے ایک ایک الزام میں بھی اعترافِ جرم کیا۔عدالت میں کونوے نے سرمئی رنگ کا ٹریک سوٹ پہن رکھا تھا اور نام کی تصدیق اور اعترافِ جرم کے علاوہ کوئی بات نہیں کی۔

برطانوی حکام کے مطابق یہ کیس ایسے آن لائن فورمز کے بڑھتے ہوئے رجحان کی نشاندہی کرتا ہے جہاں مجرمان ایک دوسرے کو نشہ آور اشیا استعمال کرکے بے ہوش متاثرین کو جنسی زیادتی کا نشانہ بنانے، حملوں کو منظم کرنے اور ان کی تصاویر یا معلومات شیئر کرنے کی ترغیب دیتے ہیں۔ریپ کرائسز انگلینڈ اینڈ ویلز کی چیف ایگزیکٹو سیارا برگ مین نے آن لائن فورمز پر منظم اور نشہ آور ادویات کے ذریعے جنسی زیادتی کے واقعات کے پیمانے کو انتہائی تشویشناک قرار دیا۔ ان کا کہنا تھا کہ یہ واقعات خواتین کے خلاف تشدد اور انہیں محض جنسی شے سمجھنے والی سوچ سے جڑے ہوئے ہیں۔

فرانس میں جیزیل پیلی کوٹ کیس کے بعد بھی یورپ بھر میں ایسے متعدد واقعات سامنے آئے ہیں۔ پیلی کوٹ کے سابق شوہر کو اپنی بے ہوش بیوی کے ساتھ زیادتی کے لیے درجنوں اجنبی افراد کو اکسانے کے جرم میں 20 سال قید کی سزا سنائی گئی تھی۔برطانوی نیشنل کرائم ایجنسی کے مطابق ایسے کئی واقعات میں متاثرہ خواتین کو اس وقت تک معلوم نہیں ہوتا کہ ان کے ساتھ جنسی زیادتی ہوئی ہے جب تک پولیس ان سے رابطہ نہیں کرتی۔کونوے کے اعترافِ جرم کے بعد پولیس ضبط کیے گئے آلات سے ملنے والی ویڈیوز میں نظر آنے والے دیگر افراد اور ممکنہ متاثرین کی شناخت کے لیے تحقیقات جاری رکھے ہوئے ہے۔ میٹروپولیٹن پولیس کے مطابق متاثرین میں سے متعدد کے برطانیہ میں ہونے کا امکان ہے، تاہم کچھ متاثرین بیرون ملک بھی مقیم ہوسکتی ہیں۔

چیف پراسیکیوٹر ٹریسی ایسٹن نے کونوے کے اقدامات کو خواتین کے خلاف ان کے اپنے گھروں میں کیے جانے والے انتہائی گھناؤنے جرائم قرار دیتے ہوئے کہا کہ منظم اور نشہ آور ادویات کے ذریعے جنسی زیادتی ناقابل قبول ہے اور حکام ملزمان کو انصاف کے کٹہرے میں لانے کے لیے پولیس کے ساتھ مل کر کام کر رہے ہیں۔انہوں نے امید ظاہر کی کہ کونوے کے اعترافِ جرم سے ان افراد کو حوصلہ ملے گا جو سمجھتے ہیں کہ وہ بھی اسی نوعیت کے جنسی استحصال کا شکار ہوئے ہیں اور وہ سامنے آکر حکام کو آگاہ کریں گے۔

امریکی صدر ڈونلڈ ٹرمپ دو روزہ دورے پر آئرلینڈ پہنچ گئے، جہاں ان کے استقبال اور دورے کے دوران سیکیورٹی کے لیے ملک کی تاریخ کے بڑے پولیس آپریشنز میں سے ایک شروع کردیا گیا ہے۔

ڈونلڈ ٹرمپ کا ڈبلن ایئرپورٹ پہنچنے پر آئرلینڈ کے نائب وزیراعظم سائمن ہیرس نے استقبال کیا۔ امریکی صدر دارالحکومت ڈبلن کے علاوہ کاؤنٹی کلیئر میں اپنے گالف ریزورٹ ڈون بیگ کا بھی دورہ کریں گے، جہاں آئرش اوپن گالف ٹورنامنٹ جاری ہے۔آئرش وزیراعظم مائیکل مارٹن نے امریکی صدر کے دورے کا خیرمقدم کرتے ہوئے کہا کہ وہ ڈونلڈ ٹرمپ سے باہمی دلچسپی کے مختلف امور پر بات چیت اور آئرلینڈ اور امریکا کے درمیان مضبوط اقتصادی، ثقافتی اور عوامی روابط کو مزید مستحکم کرنے کے خواہاں ہیں۔

دورے کے دوران امریکی سفیر کی آئرلینڈ میں رہائش گاہ ڈیرفیلڈ میں ڈونلڈ ٹرمپ مختلف تقریبات میں شرکت کریں گے۔ وہ آئرلینڈ کی صدر کیتھرین کونولی سے ان کی سرکاری رہائش گاہ پر ملاقات کریں گے، جس کے بعد آئرش وزیراعظم سے فارم لی اسٹیٹ میں ملاقات متوقع ہے۔رپورٹ کے مطابق کیتھرین کونولی ماضی میں ڈونلڈ ٹرمپ کی طویل عرصے سے ناقد رہی ہیں اور ان کے خلاف ہونے والے احتجاج میں بھی شرکت کرچکی ہیں۔دوسری جانب ٹرمپ کے دورے کے خلاف ڈبلن، ڈون بیگ اور شینن ایئرپورٹ پر احتجاج کی کالز بھی دی گئی ہیں۔ آئرش پولیس کے کمشنر جسٹن کیلی نے کہا ہے کہ پرامن احتجاج کی ہر ممکن اجازت دی جائے گی تاہم امن و امان میں خلل ڈالنے یا امریکی صدر کی اہم نقل و حرکت متاثر کرنے کی کوششوں کے خلاف زیرو ٹالرنس پالیسی اختیار کی جائے گی۔پولیس حکام کے مطابق ڈونلڈ ٹرمپ کے دورے کے دوران ڈبلن ایئرپورٹ، شہر کے مختلف علاقوں، کاؤنٹی کلیئر اور شینن ایئرپورٹ کے اطراف اہم سڑکیں بند اور ٹریفک میں نمایاں خلل کا امکان ہے۔

رپورٹ کے مطابق رواں ہفتے ہونے والے ایک سروے میں 70 فیصد آئرش شہریوں نے امریکی صدر کے دورہ آئرلینڈ کی مخالفت کی تھی۔ تاہم ڈونلڈ ٹرمپ کے بیٹے ایرک ٹرمپ نے اس رائے کو ناقابل یقین قرار دیتے ہوئے کہا کہ امریکا میں مقیم آئرش نژاد افراد ان کے والد اور ان کے کام کو بہت پسند کرتے ہیں۔کاؤنٹی کلیئر کے بعض رہائشیوں نے سیاسی اختلافات کے باوجود ڈون بیگ کی مقامی معیشت میں ٹرمپ کی سرمایہ کاری کی اہمیت کو تسلیم کیا ہے۔