Author: ممتاز حیدر

بالی ووڈ کے معروف پروڈیوسر بونی کپور کی بیٹی اور اداکار ارجن کپور کی بہن انشولا کپور رشتۂ ازدواج میں منسلک ہوگئیں۔

بھارتی میڈیا رپورٹس کے مطابق انشولا کپور نے اپنے دیرینہ دوست روہن ٹھاکر سے ایک نجی تقریب میں شادی کی، جس میں خاندان کے قریبی افراد اور دوستوں نے شرکت کی۔انشولا کپور نے اپنی شادی کی خوشخبری سوشل میڈیا پلیٹ فارم انسٹاگرام پر خوبصورت تصاویر شیئر کرکے مداحوں کے ساتھ شیئر کی۔ تصاویر میں دونوں کو شادی کی مختلف رسومات ادا کرتے دیکھا جا سکتا ہے، جبکہ ایک تصویر میں انشولا کی سوتیلی بہنیں، جھانوی کپور اور خوشی کپور بھی موجود ہیں۔انشولا نے تصاویر کے ساتھ ایک جذباتی کیپشن بھی تحریر کیا، جس میں انہوں نے 6 جولائی کو اپنی شادی کی تاریخ کا ذکر کرتے ہوئے اپنے شوہر روہن ٹھاکر کے لیے محبت بھرے جذبات کا اظہار کیا۔

بھارتی میڈیا کے مطابق شادی کی تقریب انتہائی سادگی اور نجی انداز میں منعقد کی گئی، جس میں صرف قریبی عزیزوں اور دوستوں کو مدعو کیا گیا تھا۔واضح رہے کہ انشولا کپور اور روہن ٹھاکر کی منگنی جولائی 2025 میں ہوئی تھی، جس کے بعد اب دونوں نے اپنی نئی زندگی کا آغاز کر دیا ہے۔

پاکستانی شوبز انڈسٹری کی معروف اداکارہ زارا نور عباس نے انکشاف کیا ہے کہ انڈسٹری میں کئی ایسی خواتین موجود ہیں جو کبھی ان کی قریبی دوست تھیں، مگر مشکل وقت میں انہوں نے توقع کے مطابق ساتھ نہیں دیا۔

ایک حالیہ پوڈکاسٹ میں گفتگو کرتے ہوئے زارا نور عباس نے شوبز انڈسٹری میں قائم ہونے والی دوستیوں، مشکل حالات اور ذاتی تجربات پر کھل کر اظہارِ خیال کیا۔ انہوں نے بتایا کہ زندگی کے کٹھن دور میں انہیں بعض ساتھی فنکاروں اور دوستوں کی جانب سے وہ تعاون نہیں ملا جس کی انہیں امید تھی۔اداکارہ نے کہا کہ ان کے مشکل وقت میں سب سے زیادہ حوصلہ افزائی اور حمایت خاندان کی خواتین نے کی، جو مضبوط کردار کی حامل ہیں۔ ان کے بقول، خاندان نے ہر مرحلے پر ان کا ساتھ دیا اور انہیں یہ احساس دلایا کہ اپنی ذات، ذہنی سکون اور جذبات کو اہمیت دینا انتہائی ضروری ہے۔

زارا نور عباس نے افسوس کا اظہار کرتے ہوئے کہا کہ شوبز انڈسٹری سے تعلق رکھنے والی بعض خواتین، جو کبھی ان کی اچھی دوست تھیں، مشکل وقت میں ان کے ساتھ کھڑی نہیں ہوئیں، تاہم انہیں اس بات کا اطمینان ہے کہ انہوں نے ایسے افراد کو اپنی زندگی سے دور کر دیا جو ضرورت کے وقت ان کا سہارا نہ بن سکے۔اداکارہ کا کہنا تھا کہ زندگی کے تلخ تجربات انسان کو یہ سکھاتے ہیں کہ حقیقی رشتوں کی پہچان مشکل حالات میں ہی ہوتی ہے، اور یہی تجربات انسان کو خود کو ترجیح دینے اور اپنی ذہنی و جذباتی صحت کا خیال رکھنے کا شعور بھی دیتے ہیں۔

بالی ووڈ کے معروف اداکار وویک اوبرائے نے انکشاف کیا ہے کہ اپنے کیریئر کے سب سے مشکل دور میں اداکار اکشے کمار نے نہ صرف ان کی حوصلہ افزائی کی بلکہ انہیں فلم انڈسٹری میں تنہا ہونے سے بھی بچایا۔

ایک حالیہ انٹرویو میں وویک اوبرائے نے بتایا کہ ہدایت کار رام گوپال ورما کی فلم "کمپنی” سے شہرت حاصل کرنے کے بعد 2000ء کی دہائی میں سلمان خان کے ساتھ ہونے والے عوامی تنازع نے ان کے کیریئر کو شدید متاثر کیا۔انہوں نے کہا کہ اس تنازع کے بعد انہیں مسلسل کام سے محروم رکھا گیا، کئی فلمی منصوبوں سے الگ کر دیا گیا اور متعدد مواقع ہاتھ سے نکل گئے، جس کے باعث وہ شدید ذہنی دباؤ اور مایوسی کا شکار ہو گئے تھے۔وویک اوبرائے کے مطابق اسی مشکل وقت میں اکشے کمار نے خود ان سے رابطہ کیا۔ انہوں نے بتایا کہ جب انہوں نے اکشے کمار کو اپنی افسردگی کے بارے میں بتایا تو وہ تقریباً آدھے گھنٹے کے اندر ان کے گھر پہنچ گئے اور کافی دیر تک ان کے حالات اور مشکلات پر گفتگو کرتے رہے۔

اداکار کے مطابق اکشے کمار نے انہیں تسلی دیتے ہوئے کہا کہ وہ شاید ان کے تمام مسائل حل نہ کر سکیں، تاہم ان کی مثبت سوچ بحال کرنے اور انہیں دوبارہ آگے بڑھنے کا حوصلہ ضرور دے سکتے ہیں۔وویک اوبرائے نے مزید بتایا کہ اکشے کمار نے انہیں اسٹیج شوز کے مواقع بھی پیش کیے۔ ان کا کہنا تھا کہ اپنی مصروفیات کی وجہ سے وہ کئی شوز میں شرکت نہیں کر پا رہے تھے، اس لیے انہوں نے یہ مواقع وویک اوبرائے کو دینے کی پیشکش کی تاکہ وہ دوبارہ اپنے کیریئر کا آغاز کر سکیں۔وویک اوبرائے نے کہا کہ اکشے کمار کی اس غیر مشروط حمایت نے انہیں نہ صرف دوبارہ کام کرنے کا اعتماد دیا بلکہ فلم انڈسٹری میں تنہائی کے احساس سے بھی نکالنے میں اہم کردار ادا کیا۔اداکار نے اکشے کمار کا شکریہ ادا کرتے ہوئے کہا کہ مشکل وقت میں کی جانے والی یہ مدد وہ زندگی بھر فراموش نہیں کر سکیں گے۔

پاکستان کے معروف اداکار اور ہدایت کار یاسر نواز نے والدین اور بچوں کے درمیان تعلقات پر اظہارِ خیال کرتے ہوئے کہا ہے کہ والد کا اپنے بچوں کے ساتھ دوستانہ اور خوشگوار تعلق ہونا چاہیے، تاہم اس کے ساتھ والد کا رعب اور احترام بھی برقرار رہنا ضروری ہے۔

اداکارہ اور میزبان ندا یاسر نے اپنے حالیہ پروگرام میں اس منفرد موضوع پر گفتگو کے لیے اپنے شوہر یاسر نواز اور بیٹے بالاج کو مدعو کیا، جہاں خاندان نے والدین اور بچوں کے تعلقات، تربیت اور گھریلو ماحول سے متعلق مختلف پہلوؤں پر تبادلۂ خیال کیا۔گفتگو کے دوران یاسر نواز نے کہا کہ بعض والدین اپنے بچوں کے ساتھ غیر ضروری سختی اختیار کرتے ہیں، جس سے گھر کا ماحول خوفزدہ ہو جاتا ہے۔ انہوں نے ایک ذاتی واقعہ بیان کرتے ہوئے کہا کہ ان کے ایک کزن گھر میں انتہائی سخت مزاج ہیں اور ایک مرتبہ جب وہ ان کے گھر گئے تو اہلِ خانہ ان کی آمد سے پہلے ہی خوفزدہ تھے اور کہہ رہے تھے کہ "ابو آ رہے ہیں”، جیسے کوئی بہت سخت شخصیت آنے والی ہو۔انہوں نے کہا کہ والد کو اپنے بچوں کے ساتھ دوستانہ رویہ اپنانا چاہیے تاکہ بچے اپنی بات بلا جھجھک والدین سے شیئر کر سکیں، تاہم ساتھ ہی والد کا ایسا مقام بھی ہونا چاہیے کہ بچے ان کا احترام کریں اور یہ احساس رکھیں کہ ضرورت پڑنے پر والد ناراض بھی ہو سکتے ہیں اور سختی بھی کر سکتے ہیں۔

یاسر نواز نے اپنے والد کو یاد کرتے ہوئے بتایا کہ ان کے والد ان کے بہترین دوست بھی تھے، لیکن اس کے باوجود وہ ہمیشہ ان کا احترام کرتے تھے اور ان سے ایک فطری خوف بھی محسوس کرتے تھے۔ ان کے مطابق والدین کو زیادہ تر وقت بچوں کے دوست بن کر رہنا چاہیے، مگر تربیت کے لیے مناسب حد تک رعب بھی ضروری ہے۔

اس موقع پر ندا یاسر نے اپنی بیٹی صلہ کا ذکر کرتے ہوئے کہا کہ چونکہ گھر میں ان کی ایک ہی بیٹی ہے، اس لیے اس کی خواہشات نسبتاً آسانی سے پوری ہو جاتی ہیں۔ انہوں نے مسکراتے ہوئے کہا کہ صلہ اکثر اس بات کا فائدہ بھی اٹھا لیتی ہے، جبکہ ان کے دونوں بیٹوں کو اپنی خواہشات منوانے کے لیے زیادہ کوشش کرنا پڑتی ہے۔