نئی دہلی: بھارتی ٹیلی ویژن اور فلم انڈسٹری میں کاسٹنگ کاؤچ سے متعلق ایک اور چونکا دینے والا انکشاف سامنے آیا ہے۔ معروف اداکارہ پرینیتا بور ٹھاکر نے اپنے کیریئر کے ابتدائی دنوں میں پیش آنے والے تلخ تجربے کو بیان کرتے ہوئے کہا ہے کہ صرف 21 برس کی عمر میں انہیں فلم میں کام دینے کے بدلے نامناسب مطالبات کا سامنا کرنا پڑا۔
بھارتی میڈیا سے گفتگو کرتے ہوئے پرینیتا بور ٹھاکر نے بتایا کہ جب وہ اپنے شوبز کیریئر کا آغاز کر رہی تھیں تو ایک معروف ہدایت کار نے فلم کا معاہدہ کرنے کے بہانے انہیں ملاقات کے لیے بلایا۔ اداکارہ کے مطابق یہ ملاقات ان کے لیے ایک خوفناک تجربہ ثابت ہوئی، کیونکہ انہیں فلم میں کردار دینے کے بدلے جسمانی تعلقات قائم کرنے کا مطالبہ کیا گیا۔پرینیتا نے کہا کہ اس غیر متوقع مطالبے نے انہیں شدید صدمے سے دوچار کر دیا اور انہوں نے فوراً اس منصوبے سے علیحدگی اختیار کرتے ہوئے معاہدہ منسوخ کر دیا۔ ان کے مطابق یہ واقعہ ان کی زندگی کا ایسا سبق بن گیا جس نے انہیں مستقبل میں ہر فیصلہ زیادہ احتیاط سے کرنے پر مجبور کیا۔
اداکارہ نے بتایا کہ اس واقعے کے بارے میں جب انہوں نے اپنے والد کو آگاہ کیا تو وہ شدید غصے میں آ گئے تھے۔ تاہم والدین کی حمایت نے انہیں حوصلہ دیا اور انہوں نے اپنے اصولوں پر سمجھوتہ کیے بغیر شوبز میں جدوجہد جاری رکھنے کا فیصلہ کیا۔پرینیتا بور ٹھاکر کا کہنا تھا کہ فلم انڈسٹری میں مشکلات ضرور موجود ہیں، لیکن کسی بھی فنکار کو اپنی مرضی کے خلاف کسی چیز پر مجبور نہیں کیا جا سکتا۔ ان کے مطابق فنکاروں کے لیے سب سے اہم چیز اپنی حدود کا تعین کرنا اور ہر نامناسب مطالبے پر واضح طور پر "نہ” کہنا ہے۔انہوں نے کہا کہ کیریئر کے آغاز میں بہت سے نئے فنکار مستقبل کے خوف کی وجہ سے دباؤ کا شکار ہو جاتے ہیں، جس سے بعض افراد ناجائز فائدہ اٹھانے کی کوشش کرتے ہیں۔ تاہم اگر کوئی فنکار اپنے ٹیلنٹ پر اعتماد رکھے اور اپنے اصولوں پر قائم رہے تو کامیابی حاصل کی جا سکتی ہے۔
اداکارہ کے مطابق آج وہ اپنے لیے واضح حدود مقرر کر چکی ہیں، جس کے باعث اب کوئی بھی ان سے اس نوعیت کی نامناسب بات کرنے کی جرات نہیں کرتا۔ انہوں نے نوجوان فنکاروں کو مشورہ دیا کہ وہ کسی بھی پیشہ ورانہ موقع کے لیے اپنی عزتِ نفس اور اصولوں پر کبھی سمجھوتہ نہ کریں۔
