’سگریٹ سے جلایا، تھپڑ بھی مارا‘سابق بوائے فرینڈ بارے اداکارہ کا انکشاف

بھارتی ٹی وی کی معروف اداکارہ نیتی ٹیلر نے اپنی ذاتی زندگی سے متعلق ایک نہایت تکلیف دہ انکشاف کرتے ہوئے بتایا ہے کہ ماضی میں وہ ایک ایسے پُرتشدد اور زہریلے تعلق کا حصہ رہیں جہاں انہیں جسمانی اور ذہنی تشدد کا سامنا کرنا پڑا۔

نیتی ٹیلر نے ایمیزون پرائم پر نشر ہونے والے ریئلٹی شو "الائنس” میں گفتگو کرتے ہوئے بتایا کہ ان کے سابق بوائے فرینڈ کا رویہ انتہائی جارحانہ تھا اور اس نے کئی مواقع پر ان پر تشدد کیا۔اداکارہ کے مطابق ایک موقع پر سابق بوائے فرینڈ نے غصے میں آکر جلتی ہوئی سگریٹ سے ان کی رانوں کو داغ دیا، جس کے نشانات آج بھی ان کے جسم پر موجود ہیں۔ انہوں نے شو کے دوران یہ نشانات دیگر شرکاء کو بھی دکھائے، جس پر وہاں موجود افراد حیران رہ گئے۔نیتی ٹیلر نے مزید بتایا کہ یہ تشدد صرف سگریٹ سے جلانے تک محدود نہیں تھا بلکہ ایک موقع پر ان کے سابق بوائے فرینڈ نے انہیں تھپڑ بھی مارا تھا۔

اداکارہ نے واقعہ یاد کرتے ہوئے کہا، "ایک رات اس کی سالگرہ پر حالات بہت خراب ہو گئے تھے۔ اس نے مجھے تھپڑ مارا، جس کے بعد میں نے صرف اتنا کہا، ‘الوداع، پھر ملیں گے۔’ اس وقت میری عمر کم تھی اور میں لوگوں کی اصل شخصیت کو صحیح طرح سمجھ نہیں پاتی تھی۔”انہوں نے کہا کہ وقت گزرنے کے بعد انہیں احساس ہوا کہ وہ ایک انتہائی زہریلے اور پُرتشدد تعلق میں تھیں، جہاں محبت کے نام پر انہیں مسلسل اذیت کا سامنا کرنا پڑا۔نیتی ٹیلر کے اس انکشاف کے بعد سوشل میڈیا پر مداحوں نے ان کی ہمت کو سراہا ہے۔ کئی صارفین کا کہنا ہے کہ اداکارہ نے اپنے تجربے کو عوام کے سامنے لا کر گھریلو تشدد اور بدسلوکی پر مبنی تعلقات جیسے اہم مسئلے پر کھل کر بات کی، جس سے متاثرہ افراد کو حوصلہ مل سکتا ہے۔

نیتی ٹیلر بھارتی ٹیلی ویژن کی معروف اداکارہ ہیں، جنہوں نے "کیسی یہ یاریاں” میں نندنی کے کردار سے شہرت حاصل کی، جبکہ وہ "عشق باز” اور "غلام” سمیت متعدد مقبول ڈراموں میں بھی اپنی اداکاری کے جوہر دکھا چکی ہیں۔