Author: ممتاز حیدر

ایران اور امریکا کے درمیان جاری کشیدگی مزید شدت اختیار کر گئی ہے۔ امریکی سینٹرل کمانڈ (سینٹکام) نے اعلان کیا کہ اس نے ایران کے خلاف "طاقتور حملوں” کا آغاز کیا ہے۔ امریکی بیان کے مطابق یہ کارروائیاں آبنائے ہرمز میں تجارتی جہازوں پر ایران کے مبینہ حملوں کے جواب میں کی جا رہی ہیں۔ سینٹکام کا کہنا ہے کہ حملوں میں ایران کے فضائی دفاعی نظام، ساحلی سرویلنس سسٹم، زمین سے فضا میں مار کرنے والے میزائل، اینٹی شپ کروز میزائل اور ڈرون تنصیبات کو نشانہ بنایا گیا۔

ایرانی میڈیا کے مطابق بندرعباس، قشم جزیرے اور جنوبی ساحلی شہر سرک میں متعدد دھماکے سنے گئے۔ بندرعباس میں ایک فشنگ جیٹی پر حملے کے نتیجے میں ماہی گیروں کی کئی کشتیوں میں آگ لگ گئی، جبکہ سرک کے کمرشل پورٹ پر میزائل کے ٹکڑے گرنے سے متعدد افراد زخمی ہونے کی اطلاعات ہیں۔

ایران کے پاسدارانِ انقلاب نے جنوبی ایران میں امریکی ایم کیو-9 (MQ-9) ڈرون مار گرانے کا دعویٰ کیا ہے، جبکہ بحرین اور کویت میں ممکنہ فضائی حملوں کے خدشے کے باعث ہائی الرٹ نافذ کر دیا گیا ہے۔ دوسری جانب امریکی افواج نے ایران کے جنوبی علاقوں میں نئی فضائی کارروائیوں کی تصدیق کی ہے، جس کے بعد خطے میں جنگ کے پھیلنے کے خدشات بڑھ گئے ہیں۔پاسدارانِ انقلاب کے ترجمان حسین محبی نے ایرانی خبر رساں ادارے تسنیم سے گفتگو کرتے ہوئے دعویٰ کیا کہ ایران کے فضائی دفاعی نظام نے صوبہ بوشہر کے شہر خورموج کی فضائی حدود میں پرواز کرنے والے امریکی ایم کیو-9 ڈرون کو کامیابی سے نشانہ بنایا۔ ایرانی حکام کے مطابق ڈرون ایرانی فضائی حدود کی نگرانی کر رہا تھا، تاہم امریکا کی جانب سے اس دعوے پر فوری طور پر کوئی ردعمل سامنے نہیں آیا۔

ادھر کویت کی مسلح افواج نے ملک بھر میں شہریوں کو الرٹ رہنے کی ہدایت جاری کرتے ہوئے کہا ہے کہ فضائی دفاعی نظام آنے والے میزائلوں اور ڈرونز کو مؤثر انداز میں تباہ کر رہا ہے۔ فوج کے مطابق مختلف علاقوں میں سنائی دینے والے دھماکوں کی آوازیں فضائی دفاعی کارروائیوں کا نتیجہ ہیں، اس لیے عوام خوفزدہ ہونے کے بجائے سرکاری حفاظتی ہدایات پر عمل کریں۔

بحرین میں بھی ممکنہ فضائی حملے کے خطرے کے پیش نظر سائرن بجا دیے گئے ہیں۔ بحرینی وزارت دفاع نے شہریوں کو محفوظ مقامات پر منتقل ہونے اور غیر ضروری نقل و حرکت سے گریز کرنے کی ہدایت جاری کی ہے۔ حکام کا کہنا ہے کہ خطے میں سکیورٹی صورتحال پر مسلسل نظر رکھی جا رہی ہے۔

اس سے قبل ایران نے امریکی حملوں کا "تباہ کن جواب” دینے کا اعلان کرتے ہوئے کہا تھا کہ امریکا نے جنوبی ایران میں 80 سے زائد اہداف کو نشانہ بنایا، جن میں فضائی دفاعی نظام، ساحلی نگرانی کے مراکز، اینٹی شپ کروز میزائل تنصیبات، ڈرون لانچنگ سائٹس اور پاسدارانِ انقلاب کی بحری تنصیبات شامل ہیں۔پاسدارانِ انقلاب اور ایرانی مشترکہ فوجی کمان نے اپنے الگ الگ بیانات میں کہا کہ امریکا نے کھلی جارحیت کا مظاہرہ کیا ہے اور ایران اس کا بھرپور جواب دے گا۔ ایرانی فوجی قیادت نے واضح کیا کہ آبنائے ہرمز کے انتظام میں کسی بھی امریکی مداخلت کو قبول نہیں کیا جائے گا اور تجارتی جہازوں اور تیل بردار ٹینکروں کی آمدورفت سے متعلق فیصلے ایران کی پالیسی کے مطابق ہوں گے۔

اسی دوران ایران نے قطر سے منسلک ایل این جی ٹینکر پر حملے کے الزامات کو سختی سے مسترد کرتے ہوئے انہیں بے بنیاد قرار دیا ہے۔ ایرانی وزارت خارجہ کے ترجمان اسماعیل بقائی نے کہا کہ تہران آبنائے ہرمز میں محفوظ بحری آمدورفت کو یقینی بنانے کے لیے اپنی ذمہ داریاں پوری کر رہا ہے اور کسی تجارتی جہاز کو نشانہ بنانے کی پالیسی نہیں رکھتا۔

ادھر برطانوی میری ٹائم ٹریڈ آپریشنز ایجنسی نے تصدیق کی ہے کہ آبنائے ہرمز سے گزرنے والے ایک آئل ٹینکر کو نامعلوم پروجیکٹائل سے نشانہ بنایا گیا، تاہم واقعے میں کوئی جانی نقصان یا تیل کے اخراج کی اطلاع نہیں ملی۔

امریکا نے ایران کے تیل بیچنے پر پھر پابندی لگا دی۔

غیر ملکی میڈیا کے مطابق امریکا نے آبنائے ہرمز میں کمرشل جہازوں کو نشانہ بنانے پر ایران کو مورد الزام ٹھہرایا اور تیل بیچنے پر پھر پابندی لگا دی ہے،امریکا ایران مفاہمتی یادداشت کے بعد امریکا نے 21 اگست تک ایران کو تیل بیچنے کی اجازت دی تھی تاہم اب امریکی محکمہ خزانہ نے نئی پاپندی لگا کر اس مدت کو 17جولائی تک محدود کر دیا ۔

امریکی فیصلے پر ردعمل دیتے ہوئے ایران نے امریکی پابندیاں مفاہمتی یادداشت کی خلاف ورزی قراردے دی،ایران کی وزارت خارجہ نےکہا کہ اپنے مفادات اور قومی سلامتی کے تحفظ کیلئے ایران امریکی اقدام کا مناسب جواب دے گا۔ امریکا نے مفاہمتی یادداشت کی خلاف ورزی کی ہے اور اس صورتحال کا ذمہ دار امریکا ہے ،یاد رہے کہ گزشتہ ماہ امریکا نے ایران کو خام تیل اور پیٹروکیمیکل مصنوعات کی ترسیل کی اجازت دی تھی۔

واشنگٹن: جدید دور میں بانجھ پن کا مسئلہ دنیا بھر میں تیزی سے بڑھ رہا ہے، خصوصاً مردوں میں اس کی شرح تشویشناک حد تک بڑھنے لگی ہے۔ اب امریکا میں ہونے والی ایک نئی طبی تحقیق نے اس اضافے کی ایک اہم ممکنہ وجہ فضائی آلودگی کو قرار دیا ہے۔

امریکا کی میساچوسٹس یونیورسٹی کے محققین کی تحقیق کے مطابق فضائی آلودگی مردوں کے ان جینز کو متاثر کرتی ہے جو صحت مند اسپرم بنانے میں بنیادی کردار ادا کرتے ہیں۔ تحقیق میں بتایا گیا کہ آلودہ فضا کے باعث ڈی این اے میں کیمیائی تبدیلیاں رونما ہوتی ہیں، جو جینز کے افعال کو بند کر دیتی ہیں اور نتیجتاً اسپرم بننے کا عمل متاثر ہوتا ہے۔محققین کا کہنا ہے کہ اس دریافت سے واضح اشارہ ملتا ہے کہ فضائی آلودگی صرف پھیپھڑوں یا دل ہی نہیں بلکہ مردوں کی تولیدی صحت کے لیے بھی ایک سنگین خطرہ بن سکتی ہے۔ ان کے مطابق مزید تحقیقات کے ذریعے یہ جاننے کی کوشش کی جا رہی ہے کہ آلودگی کس حد تک بانجھ پن کے خطرے میں اضافہ کرتی ہے۔تحقیق میں 2 ہزار سے زائد مردوں کو شامل کیا گیا، جن کی چھ ماہ تک تولیدی صحت اور ڈی این اے میں ہونے والی تبدیلیوں کا جائزہ لیا گیا۔ نتائج سے معلوم ہوا کہ اوزون، نائٹروجن ڈائی آکسائیڈ، سلفر ڈائی آکسائیڈ اور فضائی آلودگی کے ننھے ذرات ڈی این اے میں 39 اہم تبدیلیاں پیدا کرتے ہیں، جو بانجھ پن کے امکانات میں اضافہ کر سکتی ہیں۔تحقیق کے نتائج طبی جریدے ہیومین ری پروڈکشن میں شائع ہوئے ہیں۔

اس سے قبل برٹش میڈیکل جرنل میں ستمبر 2024 میں شائع ہونے والی ایک تحقیق میں بھی بتایا گیا تھا کہ فضائی آلودگی کے باریک ذرات کی طویل مدت تک زد میں رہنے سے 30 سے 45 سال کی عمر کے مردوں میں بانجھ پن کا خطرہ 24 فیصد تک بڑھ سکتا ہے۔اس تحقیق میں 5 لاکھ 26 ہزار سے زائد مردوں اور 3 لاکھ 77 ہزار خواتین کے اعداد و شمار کا تجزیہ کیا گیا تھا۔ نتائج کے مطابق فضائی آلودگی مردوں کی تولیدی صحت پر نمایاں منفی اثرات مرتب کرتی ہے، جبکہ خواتین میں فضائی آلودگی کے بجائے ٹریفک کا شور زیادہ مؤثر عنصر ثابت ہوا۔محققین نے بتایا کہ اگرچہ موجودہ نتائج اہم ہیں، تاہم یہ ایک مشاہداتی تحقیق ہے، اس لیے فضائی آلودگی اور بانجھ پن کے درمیان براہِ راست تعلق کی مکمل تصدیق کے لیے مزید سائنسی تحقیق کی ضرورت ہے۔

دوسری جانب عالمی ادارۂ صحت کی اپریل 2023 کی رپورٹ کے مطابق دنیا بھر میں تقریباً 17.5 فیصد بالغ افراد اپنی زندگی میں کسی نہ کسی مرحلے پر بانجھ پن کا سامنا کرتے ہیں۔ رپورٹ کے مطابق یہ مسئلہ امیر، متوسط اور غریب تمام ممالک میں یکساں طور پر موجود ہے، جو اسے عالمی سطح پر ایک اہم طبی چیلنج بناتا ہے۔