Author: ممتاز حیدر

بہار: بھارتی ریاست بہار کے ضلع ویشالی میں شادی کی ایک تقریب اس وقت میدانِ جنگ میں تبدیل ہوگئی جب دولہے کے ایک جملے پر دلہن نے نکاح سے انکار کردیا، جس کے بعد دونوں خاندانوں کے درمیان شدید جھڑپ شروع ہوگئی۔

بھارتی میڈیا رپورٹس کے مطابق شادی کی تقریب ایک بینکوئٹ ہال میں جاری تھی جہاں بارات کا استقبال کیا گیا، مہمانوں نے کھانا کھایا اور جے مالا کی رسم بھی خوش اسلوبی سے مکمل ہوئی۔ تاہم خوشی کا ماحول اس وقت کشیدہ ہوگیا جب بارات کے دو نوجوان مبینہ طور پر دلہن کے کمرے میں داخل ہوگئے،لڑکی والوں نے اس پر سخت اعتراض کرتے ہوئے دونوں افراد کو باہر نکال دیا، جس پر تلخ کلامی شروع ہوگئی۔ دیکھتے ہی دیکھتے معاملہ ہاتھا پائی میں بدل گیا اور دونوں فریق آمنے سامنے آگئے،عینی شاہدین کے مطابق ہال میں کرسیاں چلیں، لاٹھیاں برسیں اور شدید افراتفری پھیل گئی، جبکہ کئی افراد زخمی ہوئے۔ ہال کے باہر کھڑی گاڑیوں کو بھی نقصان پہنچنے کی اطلاعات ہیں۔

رپورٹ کے مطابق اسی دوران دولہا غصے میں آگیا اور اس نے دلہن کو دھمکی آمیز انداز میں کہا کہ "شادی کے بعد ٹھیک کردیں گے”۔ یہ جملہ سن کر دلہن نے فوری طور پر شادی سے انکار کردیا،اہل خانہ نے معاملہ سنبھالنے اور دلہن کو منانے کی کوشش کی، تاہم وہ اپنے فیصلے پر قائم رہی۔ بعد ازاں پولیس موقع پر پہنچ گئی اور حالات پر قابو پایا،پولیس نے دونوں خاندانوں کو تھانے منتقل کیا جہاں رات گئے تک مذاکرات جاری رہے، لیکن کشیدگی بڑھنے کے باعث شادی دوبارہ شروع نہ ہوسکی۔ آخرکار دونوں فریقوں نے باہمی رضامندی سے شادی منسوخ کرنے پر اتفاق کرلیا۔

مودی سرکار نے بھارتی معیشت اور انتظامی مشینری کو نقصان پہنچانے کے بعد عالمی سطح پر بھی اپنی نااہلی اور ناکامی کا اظہار کر دیا ہے۔

رائٹرز کے مطابق بھارتی حکومت نے کوپ 33 کی میزبانی کی اپنی پیشکش واپس لے لی ہے جو 2028 میں منعقد ہونا تھی،انڈیا ٹوڈے کے مطابق یہ فیصلہ ایک واضح یوٹرن قرار دیا جا رہا ہے، کیونکہ وزیراعظم نریندر مودی نے 2023 میں دبئی میں ہونے والی کانفرنس کے دوران 2028 کی کانفرنس کی میزبانی کی پیشکش کی تھی،بھارتی جریدے کے مطابق یہ اقدام صرف ایک بین الاقوامی ایونٹ کی منسوخی تک محدود نہیں بلکہ عالمی سطح پر بھارت کی ساکھ کے لیے بھی ایک بڑا دھچکا ہے،رپورٹ میں مزید کہا گیا ہے کہ بھارت پہلے ہی 2035 کے لیے اپنے قومی ماحولیاتی اہداف جمع کرانے کی دو ڈیڈ لائنز کو نظر انداز کر چکا ہے، جو اس کی ماحولیاتی سنجیدگی پر سوالیہ نشان ہے۔

عالمی ماہرین کے مطابق کانفرنس کی میزبانی سے دستبرداری موسمیاتی تبدیلی سے نمٹنے کے اقدامات اور گلوبل ساؤتھ کے نمائندہ ہونے کے بھارتی دعوؤں پر سنگین سوالات کھڑے کر رہی ہے،ماہرین کا کہنا ہے کہ بھارت کا یہ فیصلہ اس بات کی نشاندہی کرتا ہے کہ وہ اپنی ماحولیاتی ذمہ داریوں اور عملی اقدامات کے درمیان موجود تضاد پر بحث سے بچنا چاہتا ہے،واضح رہے کہ دہلی فضائی آلودگی کے باعث دنیا کے آلودہ ترین شہروں میں سرفہرست ہے اور اس کی آلودگی پورے خطے کے ماحول پر بھی منفی اثرات مرتب کر رہی ہے۔

برطانوی میری ٹائم ایجنسی کا دعویٰ ہے کہ آبنائے ہرمز میں آئل ٹینکر پر فائرنگ کی گئی ہے۔

برطانوی میری ٹائم ایجنسی کا کہنا ہے کہ آبنائے ہرمز میں آئل ٹینکر پر فائرنگ کی گئی، آئی آر جی سی کی کشتیوں سے آئل ٹینکر پر فائرنگ کی گئی۔میری ٹائم ایجنسی نے مزید کہا کہ فائرنگ کے واقعے میں آئل ٹینکر اور اس کا عملہ محفوظ رہا۔ بین الاقوامی خبر رساں ادارے کے مطابق کم از کم دو تجارتی جہازوں نے آبنائے ہرمز سے گزرنے کی کوشش کی، جس دوران فائرنگ کے واقعات رپورٹ ہوئے۔اطلاعات کے مطابق ایران نے اس اہم بحری راستے کو مختصر وقت کے لیے دوبارہ کھولنے کے بعد ایک بار پھر بند کر دیا ہے۔ تہران نے الزام عائد کیا ہے کہ امریکہ نے جنگ بندی معاہدے کے تحت اپنی ذمہ داریاں پوری نہیں کیں، جس کے باعث راستے پر دوبارہ پابندیاں نافذ کی گئی ہیں۔

برطانیہ کی یو کے میری ٹائم ٹریڈ آپریشنز نے بھی تصدیق کی ہے کہ آبنائے ہرمز کے قریب، عمان کے شمال مشرقی علاقے میں ایک واقعہ پیش آیا ہے۔ تنظیم کے مطابق ایک ٹینکر کے کپتان نے رپورٹ کیا کہ ایرانی پاسدارانِ انقلاب کی گن بوٹس نے ان کے جہاز کا تعاقب کیا اور فائرنگ کی۔تاہم حکام کے مطابق مذکورہ ٹینکر اور اس کا عملہ محفوظ ہے اور کسی جانی نقصان کی اطلاع نہیں ملی۔

اس سے قبل جب بحری راستہ عارضی طور پر کھولا گیا تھا تو کئی جہاز دوبارہ شپنگ لین میں داخل ہوئے تھے، جسے جنگ شروع ہونے کے بعد جہازوں کی پہلی بڑی نقل و حرکت قرار دیا گیا تھا۔ لیکن تازہ کشیدگی کے بعد یہ قافلہ منتشر ہو گیا ہے۔

جہازوں کی نقل و حرکت پر نظر رکھنے والے پلیٹ فارم کے مطابق حالیہ اعداد و شمار سے ظاہر ہوتا ہے کہ علاقے میں موجود بحری قافلہ منتشر ہو چکا ہے اور متعدد جہاز رک گئے یا واپس مڑ گئے ہیں۔دوسری جانب تجارتی جہازوں کو ایرانی بحریہ کی جانب سے ریڈیو پیغامات بھی موصول ہوئے ہیں جن میں کہا گیا ہے کہ آبنائے ہرمز دوبارہ بند کر دی گئی ہے اور کسی بھی جہاز کو گزرنے کی اجازت نہیں دی جائے گی۔ماہرین کے مطابق آبنائے ہرمز عالمی تیل تجارت کی شہ رگ ہے، اور یہاں کسی بھی قسم کی کشیدگی سے عالمی منڈیوں میں تیل کی قیمتوں، سپلائی چین اور علاقائی سلامتی پر گہرے اثرات مرتب ہو سکتے ہیں۔

ایرانی سپریم لیڈر مجتبیٰ خامنہ ای کا کہنا ہے کہ پہلوی خاندان کی باقیات اور امریکا کی سازش کو ناکام بنا کر ایرانی فوج نے تاریخ رقم کی۔

ایرانی سپریم لیڈر مجتبیٰ خامنہ ای نے سوشل میڈیا پر بیان میں کہا کہ کچھ طاقتیں ایران کو تقسیم کرنا چاہتی ہیں، ایران کی نیوی دشمنوں کو نئی اور تلخ شکستیں دینے کیلئے تیار ہے۔سپریم لیڈر نے ایرانی فوج کے قیام کے دن پر مبارکباد پیش کی اور کہا کہ فوج قوم کے بیٹے کی مانند ہے جو عوام کے گھروں سے جنم لیتی ہے۔

واضح رہے کہ ایرانی سپریم لیڈر مجتبیٰ خامنہ ای ابھی تک سامنے نہیں آئے تا ہم انکے پیغامات ایکس پر دیئے جا رہے ہیں،ایران امریکا مذاکرات اسلام آباد میں اگلے ہفتے متوقع ہیں،

دوسری جانب ترجمان ایرانی وزارت خارجہ اسماعیل بقائی نے کہا ہے کہ جن نکات پر امریکی حکام اور میڈیا بات کررہے ہیں ان کی تصدیق نہیں ہوسکتی، افزودہ یورینیم کو کسی صورت کہیں منتقل نہیں کیا جائے گا۔ان کا کہنا ہے کہ ہماری طرف سے کبھی افزودہ یورینیم منتقلی کی تجویز پیش نہیں کی گئی، جس طرح ایرانی سرزمین ہمارے لیے اہم ہے یہ معاملہ بھی اتنا ہی اہم ہے، ایران آبنائے ہرمز کے حوالے سے ضروری اقدامات کرے گا۔