Author: ممتاز حیدر

بھارت کے نام نہاد مین اسٹریم میڈیا، جسے "گودی میڈیا” کہا جاتا ہے، ایک بار پھر شدید تنقید کی زد میں آ گیا ہے۔ اس بار تنقید بھارتی صحافتی اور عوامی حلقوں کی جانب سے سامنے آئی ہے، جہاں متعدد اینکرز، تجزیہ کاروں اور سوشل میڈیا صارفین نے بھارتی میڈیا پر جھوٹ، تعصب، نفرت انگیزی اور حکومت نواز بیانیے کو بے نقاب کیا ہے

سوشل میڈیا پر وائرل ہونے والی ایک ویڈیو میں ایک بھارتی اینکر نے کھل کر کہا کہ ملک کو جتنا نقصان گودی میڈیا نے پہنچایا ہے، اتنا شاید کسی دشمن نے بھی نہیں پہنچایا۔ اینکر کے مطابق بھارت کا اصل دشمن پاکستان نہیں بلکہ وہ میڈیا ہے جو مسلسل جھوٹ، اشتعال انگیزی اور من گھڑت خبروں کے ذریعے ملک کی عالمی ساکھ کو نقصان پہنچا رہا ہے۔انہوں نے کہا کہ "آپریشن سندور” کے دوران بھارتی میڈیا نے غیر ذمہ دارانہ رپورٹنگ کی، جھوٹی خبریں چلائیں، کراچی پر فرضی حملوں کی خبریں نشر کیں، یہاں تک کہ پاکستان کے وزیراعظم شہباز شریف کی گرفتاری جیسے بے بنیاد دعوے بھی کیے گئے۔ ان کا کہنا تھا کہ اس قسم کی رپورٹنگ نہ صرف صحافت کے اصولوں کے منافی ہے بلکہ اس سے بھارت کی سنجیدہ ریاستی شبیہ بھی متاثر ہوتی ہے۔اینکر نے مزید کہا کہ ایران سے متعلق حالیہ کشیدگی کے دوران بھی بھارتی میڈیا نے انتہائی غیر ذمہ دارانہ رویہ اختیار کیا۔ ان کے مطابق یوٹیوب پلیٹ فارمز سے لے کر ٹی وی چینلز تک نفرت اور زہر آلود بیانیہ پھیلایا جا رہا ہے۔ ایران کے خلاف تضحیک آمیز گفتگو اور جنگی ماحول پیدا کرنے کی کوششیں کی جا رہی ہیں، جس پر بھارتی عوام کے ایک طبقے نے بھی ناراضی کا اظہار کیا ہے۔ویڈیو میں اینکر نے مشرق وسطیٰ کی صورتحال کا حوالہ دیتے ہوئے کہا کہ پوری دنیا اسرائیلی کارروائیوں پر تشویش کا اظہار کر رہی ہے، حتیٰ کہ اسرائیل کے کئی قریبی اتحادی بھی کھل کر اس کے ساتھ کھڑے نظر نہیں آ رہے، مگر بھارتی میڈیا میں ایسے تبصرے سننے کو مل رہے ہیں جن میں کہا جا رہا ہے کہ اسرائیل بھارت کا بھائی ہے اور مزید بمباری ہونی چاہیے۔ ان کے مطابق عورتوں، بچوں اور عام شہریوں کی ہلاکت پر دنیا بھر میں مذمت ہو رہی ہے، لیکن بھارتی میڈیا میں بعض آوازیں اسے جشن کے انداز میں پیش کر رہی ہیں۔ اگر بھارتی میڈیا ہندی زبان میں بھی بولتا ہے تو دنیا اس کا مفہوم سمجھ لیتی ہے، اور یہی وجہ ہے کہ عالمی سطح پر بھارت کی شبیہ متاثر ہو رہی ہے۔ صحافت کا مقصد سچ دکھانا ہوتا ہے، نہ کہ جنگی جنون اور نفرت کو ہوا دینا۔

ایک خاتون اینکر نے بھی ویڈیو پیغام میں کہا کہ بھارتی سرکاری و گودی میڈیا بھارت کو دنیا بھر میں شرمندہ کر رہا ہے۔ ان کا کہنا تھا کہ امریکی صدر ڈونلڈ ٹرمپ کی جانب سے بھارتی وزیراعظم مودی کے بارے میں دیے گئے بیانات پوری دنیا نے سنے، مگر بھارتی میڈیا نے ان معاملات کو بھی سنجیدگی سے پیش کرنے کے بجائے سیاسی رنگ دینے کی کوشش کی۔آپریشن سندور کے دوران ٹرمپ نے متعدد بار بھارت کا ذکر کیااور جہاز گرنے کا بتایا

بھارتی میڈیا درحقیقت آزاد صحافت کے بجائے حکومتی بیانیے کو آگے بڑھانے، اپوزیشن کو دبانے، ہمسایہ ممالک کے خلاف اشتعال پیدا کرنے اور داخلی مسائل سے توجہ ہٹانے کے لیے استعمال ہو رہا ہے۔ اگر گودی میڈیا سچائی، توازن اور ذمہ داری کے راستے پر واپس نہ آیا تو بھارت کی عالمی ساکھ مزید متاثر ہو سکتی ہے۔

امریکا کے سابق سفیر اور سینئر ڈیموکریٹ رہنما راحم ایمانوئل نے امریکی صدر ڈونلڈ ٹرمپ کی خارجہ پالیسی پر بات کرتے ہوئے کہا ہے کہ واشنگٹن نے برسوں کی محنت سے قائم ہونے والے بھارت کے ساتھ تعلقات کو نقصان پہنچایا۔

سوشل میڈیا پلیٹ فارم ایکس پر صحافی ششانک مٹو کی جانب سے شیئر کیے گئے بیان میں رحم ایمانوئل کے حوالے سے کہا گیا کہ چار امریکی صدور نے بھارت کو امریکا کے قریب لانے کے لیے برسوں کام کیا، مگر ٹرمپ انتظامیہ کے دور میں یہ تعلقات شدید دھچکے کا شکار ہوئے،ٹرمپ دور میں اب بھارت کو مکمل مسترد کر دیا گیا ہے،ہم نے پاکستان کو بھارت کے مقابلے میں چن لیا ہے،

ماہرین کے مطابق یہ بیان ایسے وقت میں سامنے آیا ہے جب پاکستان امریکا اور ایران کے مابین جنگ بندی کروا رہا ہے،خود کو ایشیا کا ٹھیکیدار سمجھنے والا بھارت اب کہیں بھی نظر نہیں آ رہا، پاکستان کی کامیاب سفارتکاری کی وجہ سے دنیا کی نظریں پاکستان پر ہیں، نائب امریکی صدر نے پاکستان کا دورہ کیا اب امریکی صدر ڈونلڈ ٹرمپ کے بقول وہ بھی اسلام آباد کا دورہ کر سکتے ہیں

نیویارک: اقوام متحدہ میں پاکستان کے مستقل مندوب عاصم افتخار احمد نے کہا ہے کہ مشرق وسطیٰ کی موجودہ صورت حال پر پاکستان اپنا مؤقف سلامتی کونسل اور دیگر بین الاقوامی فورمز پر متعدد بار واضح کر چکا ہے۔ انہوں نے زور دیا کہ یہ تنازع کبھی رونما نہیں ہونا چاہیے تھا۔

اپنے بیان میں مستقل مندوب نے کہا کہ جاری کشیدگی نے نہ صرف خطے بلکہ دنیا کے دیگر حصوں پر بھی گہرے اثرات مرتب کیے ہیں۔ ان کا کہنا تھا کہ پاکستان نے ابتدا ہی سے کشیدگی میں کمی، جنگ بندی اور سفارتی ذرائع کو ترجیح دی ہے۔عاصم افتخار احمد نے کہا کہ موجودہ بحران کا پُرامن اور دیرپا حل صرف مذاکرات اور سفارتی عمل کے ذریعے ہی ممکن ہے۔ انہوں نے عالمی برادری پر زور دیا کہ وہ جنگ کے بجائے مکالمے، تحمل اور سیاسی راستہ اختیار کرے۔پاکستانی مندوب نے واضح کیا کہ پاکستان خطے کے تمام ممالک کی خودمختاری، علاقائی سالمیت اور سیاسی آزادی کی مکمل حمایت کرتا ہے۔ ان کا کہنا تھا کہ کسی بھی ملک کی سرحدی سلامتی اور خودمختاری کا احترام عالمی امن کے لیے ناگزیر ہے۔انہوں نے مزید کہا کہ پاکستان توانائی کی عالمی ترسیل کے لیے آبنائے ہرمز میں معمول کی سرگرمیوں کی بحالی چاہتا ہے تاکہ عالمی معیشت پر منفی اثرات سے بچا جا سکے۔

ایرانی صدر مسعود پزشکیان نے جنگ روکنے میں پاکستان کے مؤثر اور ذمہ دارانہ کردار کو قابل ستائش قرار دیا۔

ایرانی صدر نے کہا کہ ان کا ملک امن، استحکام اور خطے میں برادرانہ تعلقات کا خواہاں ہے، انہوں نے واضح کیاکہ ایرانی عوام کا وعدے توڑے جانے کی وجہ سے امریکا پر اعتماد نہیں اور زور دیا کہ عالمی قوانین اور اصولوں کے تحت ایرانی قوم کے حقوق برقرار رہنے چاہیں۔صدر پزشکیان کا کہنا تھا کہ امریکا اس تنازعے میں فاتح بن کر نہیں ابھرے گا، تنازعے سے خطے کے ممالک اور دنیا سنگین نقصانات اٹھائے گی،صیہونی رجیم اپنے عزائم کے تعاقب میں ہے، انہوں نے امید ظاہر کی کہ اسلامی امہ کا اتحاد صیہونی رجیم کے عزائم پورے ہونے سے روکے گا۔صدر پزشکیان نے اس بات پر بھی زور دیا کہ خطے کی سکیورٹی خطے کے ممالک کو یقینی بنانا چاہیے۔

اسرائیل اور لبنان کے درمیان جنگ بندی کے بعد ایرانی دارالحکومت تہران میں حزب اللّٰہ کے حق میں بڑے عوامی اجتماع کا انعقاد کیا گیا، جہاں ہزاروں افراد نے شرکت کرتے ہوئے اسرائیل مخالف نعرے لگائے۔

غیرملکی میڈیا رپورٹس کے مطابق پاسدارانِ انقلاب ایران کی قدس فورس کے کمانڈر بریگیڈیئر جنرل اسماعیل قانی نے اپنے بیان میں کہا کہ معزز لبنانی عوام اور خطے کے باشعور لوگ جانتے ہیں کہ فیصلہ کن جنگ کی حقیقی فاتح حزب اللّٰہ ہے۔انہوں نے مزید کہا کہ اگر جنگ بندی برقرار رہتی ہے تو یہ لبنان کی مزاحمتی قوت کے عزم، قربانیوں اور ایران کی مسلسل حمایت کا نتیجہ ہے۔اس موقع پر تہران کے مرکزی علاقے میں ہزاروں شہری جمع ہوئے، جہاں شرکاء نے حزب اللّٰہ کے حق میں اور اسرائیل کے خلاف بھرپور نعرے بازی کی۔تجزیہ کاروں کے مطابق جنگ بندی کے بعد خطے میں سیاسی سرگرمیوں میں تیزی دیکھی جا رہی ہے، جبکہ ایران کی جانب سے حزب اللّٰہ کی کھلی حمایت ایک بار پھر عالمی توجہ کا مرکز بن گئی ہے۔

جاپان نے مستقبل کی توانائی ضروریات پوری کرنے کے لیے ایک حیران کن خلائی منصوبہ پیش کیا ہے، جس کے تحت چاند کے گرد بڑے پیمانے پر شمسی پینلز کی ایک وسیع انگوٹھی تعمیر کی جائے گی تاکہ وہاں سے بجلی پیدا کرکے زمین تک پہنچائی جا سکے۔

اس منصوبے کو “لونر سولر رنگ” یا “چاندی شمسی حلقہ” قرار دیا جا رہا ہے۔ تجویز کے مطابق چاند کے خطِ استوا کے گرد ہزاروں شمسی پینلز نصب کیے جائیں گے، جہاں سورج کی روشنی تقریباً مسلسل دستیاب رہتی ہے۔ ماہرین کا کہنا ہے کہ اس مقام پر توانائی کی پیداوار دن رات اور موسم کی پابندیوں سے آزاد ہو گی، جو زمین پر موجود سولر سسٹمز کے مقابلے میں کہیں زیادہ مؤثر ثابت ہو سکتی ہے۔انجینئرز کے مطابق چاند کا ماحول شمسی توانائی کے لیے نہایت موزوں ہے کیونکہ وہاں فضا موجود نہیں، جس کے باعث بادلوں، دھند یا فضائی رکاوٹوں کا سامنا نہیں کرنا پڑے گا۔ اس طرح سورج کی روشنی براہِ راست شمسی پینلز تک پہنچے گی اور زیادہ بجلی پیدا ہو سکے گی۔منصوبے کے تحت چاند پر پیدا ہونے والی توانائی کو مائیکرو ویوز یا لیزر شعاعوں میں تبدیل کرکے زمین پر موجود خصوصی ریسیونگ اسٹیشنز تک بھیجا جائے گا۔ وہاں اس توانائی کو دوبارہ بجلی میں تبدیل کر کے گھروں، صنعتوں اور دیگر شعبوں میں استعمال کیا جا سکے گا۔

ماہرین کا کہنا ہے کہ اگر یہ منصوبہ کامیاب ہو جاتا ہے تو دنیا کو ایک مستقل، ماحول دوست اور قابلِ تجدید توانائی کا ایسا ذریعہ مل سکتا ہے جو عالمی سطح پر بجلی کی ضروریات پوری کرنے میں مدد دے گا اور تیل، گیس و کوئلے جیسے ایندھن پر انحصار کم کرے گا۔تاہم ماہرین نے اس بات کا بھی اعتراف کیا ہے کہ منصوبہ ابھی ابتدائی تصوراتی مرحلے میں ہے اور اس کے سامنے کئی بڑے چیلنجز موجود ہیں۔ ان میں تعمیراتی سامان کو خلا میں پہنچانا، چاند کی سطح پر وسیع انفراسٹرکچر تعمیر کرنا، روبوٹک نظام تیار کرنا اور ہزاروں کلومیٹر دور زمین تک توانائی کی محفوظ ترسیل شامل ہے۔خلائی سائنس دانوں کا کہنا ہے کہ اس منصوبے کی تکمیل کے لیے عالمی تعاون، جدید ٹیکنالوجی، مصنوعی ذہانت، خودکار مشینری اور اربوں ڈالر کی سرمایہ کاری درکار ہو گی۔

لونر سولر رنگ منصوبہ اس بات کی نشاندہی کرتا ہے کہ دنیا اب توانائی کے نئے ذرائع تلاش کرنے کے لیے خلا کی طرف دیکھ رہی ہے۔ اگرچہ اس منصوبے کو عملی شکل اختیار کرنے میں کئی دہائیاں لگ سکتی ہیں، لیکن یہ تصور مستقبل میں زمین کے توانائی نظام کو مکمل طور پر بدلنے کی صلاحیت رکھتا ہے۔