Author: ممتاز حیدر

پیپلزپارٹی نے بجٹ اجلاس سے بائیکاٹ کا اعلان کر دیا

پیپلز پارٹی نے مسلم لیگ ن پر گلگت بلتستان کے الیکشن چوری کرنے کا الزام لگا دیا، چیئرمین پیپلز پارٹی کہتے ہیں کہ یہ نہیں ہوسکتا مسلم لیگ ہمارا مینڈیٹ چوری کرے میں اور ایوان میں بیٹھ کر تالیاں بجاؤں،پیپلز پارٹی نے وفاقی بجٹ اجلاس سے علامتی بائیکاٹ کا فیصلہ کر لیا، پیپلز پارٹی کی جانب سے مرکزی قیادت شرکت نہیں کرے گی، اجلاس میں پیپلز پارٹی کے نوید قمر شریک ہوں گے،چیئرمین پیپلز پارٹی بلاول زرداری سمیت دیگر مرکزی قیادت بجٹ سیشن میں شریک نہیں ہو گی

قبل ازیں ذرائع کے مطابق اجلاس میں بجٹ سیشن کے دوران قومی اسمبلی میں کورم کی صورتحال پر غور کیا گیا۔پیپلز پارٹی نے مؤقف اختیار کیا ہے کہ بجٹ اجلاس کے دوران کورم پورا کرنا پاکستان مسلم لیگ (ن) کی ذمہ داری ہے۔ذرائع کے مطابق پیپلز پارٹی ارکان کا کہنا ہے کہ حکومت بجٹ پیش کر رہی ہے تو اسے اپنے ارکان کی حاضری یقینی بنانی چاہیے۔پارٹی ارکان نے کہا کہ کورم پورا کرنا اپوزیشن کا نہیں بلکہ حکومتی جماعت کا کام ہے۔ذرائع کے مطابق اجلاس میں یہ بھی کہا گیا کہ مسلم لیگ (ن) اکثر کورم پورا کرنے میں ناکام رہتی ہے، اس لیے اسے اپنے اراکین کو پابند بنانے کی ضرورت ہے۔

آئندہ مالی سال 2026-27 کا وفاقی بجٹ آج قومی اسمبلی میں پیش کیا جائے گا، جس کا مجموعی حجم 17 ہزار 500 ارب سے 18 ہزار ارب روپے کے درمیان ہونے کا تخمینہ لگایا گیا ہے۔ بجٹ اجلاس سہ پہر 3 بجے پارلیمنٹ ہاؤس میں منعقد ہوگا جبکہ بجٹ دستاویزات کی کاپیاں پارلیمنٹ ہاؤس پہنچا دی گئی ہیں۔

بجٹ دستاویزات کے مطابق سرکاری ملازمین کی تنخواہوں میں 10 فیصد اور پنشن میں 7 فیصد اضافے کی تجویز دی گئی ہے۔ ذرائع کے مطابق بجٹ کی حتمی منظوری پیش کیے جانے سے قبل وفاقی کابینہ سے لی جائے گی۔دستاویزات میں آئندہ مالی سال کے لیے ایک ہزار ارب روپے کا ترقیاتی بجٹ تجویز کیا گیا ہے، جس میں وفاقی وزارتوں اور ڈویژنز کے لیے 682 ارب 48 کروڑ روپے سے زائد مختص کرنے کی سفارش کی گئی ہے۔ترقیاتی منصوبوں کے لیے نیشنل ہائی وے اتھارٹی (این ایچ اے) کو 224 ارب 51 کروڑ روپے دینے کی تجویز ہے، جبکہ آبی وسائل ڈویژن کے لیے 103 ارب 80 کروڑ روپے مختص کیے گئے ہیں۔ اسی طرح پاور ڈویژن، این ٹی ڈی سی اور پیپکو کے منصوبوں کے لیے 88 ارب روپے رکھنے کی سفارش کی گئی ہے۔

حکومت کا کہنا ہے کہ ترقیاتی فنڈز بنیادی ڈھانچے، توانائی اور آبی وسائل کے شعبوں میں جاری اور نئے منصوبوں کی تکمیل پر خرچ کیے جائیں گے، جبکہ بجٹ تقریر کے دوران مزید مالی اور اقتصادی اقدامات کا اعلان بھی متوقع ہے۔

آئندہ مالی سال 2026-27 کا وفاقی بجٹ آج قومی اسمبلی میں پیش کیا جا رہا ہے، جس کا مجموعی حجم ساڑھے 17 ہزار سے 18 ہزار ارب روپے کے درمیان متوقع ہے۔ حکومت کی جانب سے بجٹ خسارے کا تخمینہ 5.3 سے 5.4 ٹریلین روپے لگایا گیا ہے، جبکہ پیٹرولیم سرچارج کی مد میں 1727 ارب روپے وصول کرنے کا منصوبہ بھی بجٹ کا اہم حصہ ہوگا۔

سیاسی محاذ پر پاکستان تحریک انصاف (پی ٹی آئی) اور اس کے اتحادیوں نے بجٹ اجلاس کا بائیکاٹ نہ کرنے کا فیصلہ کیا ہے، تاہم پارلیمنٹ کے اندر اور باہر احتجاج جاری رکھنے کا اعلان کیا گیا ہے۔ دوسری جانب اسلام آباد میں پاک سیکریٹریٹ کے سرکاری ملازمین بجٹ پیش ہونے سے قبل ہی شاہراہ دستور پر سراپا احتجاج ہیں اور انہوں نے تنخواہوں میں 100 فیصد اضافے سمیت 13 نکاتی چارٹر آف ڈیمانڈ حکومت کے سامنے پیش کر دیا ہے۔

وفاقی بجٹ 2026-27 کی پیشی کے موقع پر سرکاری ملازمین نے اپنے مطالبات کے حق میں پارلیمنٹ ہاؤس کے سامنے احتجاج شروع کر دیا ہے۔ مختلف صوبوں سے ملازمین کی آمد کا سلسلہ جاری ہے جبکہ مظاہرین پارلیمنٹ ہاؤس تک مارچ کے لیے پاک سیکریٹریٹ چوک میں جمع ہونا شروع ہو گئے ہیں۔ملازمین کی نمائندہ تنظیم "اگیگا” کے چیف آرگنائزر رحمان باجوہ کے مطابق صوبوں سے آنے والے ملازمین کی شرکت کے بعد پارلیمنٹ ہاؤس کی جانب مارچ شروع کیا جائے گا۔ انہوں نے کہا کہ مطالبات کی منظوری تک پارلیمنٹ ہاؤس کے سامنے احتجاج جاری رکھا جائے گا۔سرکاری ملازمین گزشتہ دو روز سے وزارتِ خزانہ کے سامنے بھی احتجاج کرتے رہے ہیں اور مطالبہ کر رہے ہیں کہ وفاقی بجٹ 2026-27 میں ان کے مسائل اور مطالبات کو شامل کیا جائے۔

مظاہرین نے 10 مارچ 2025 کے معاہدے کی تمام شقوں پر فوری عملدرآمد کا مطالبہ کرتے ہوئے کہا ہے کہ تمام ایڈہاک ریلیف الاؤنسز بنیادی تنخواہ میں ضم کرکے پے اسکیل 2026 متعارف کرایا جائے۔ ملازمین کا مطالبہ ہے کہ تنخواہوں میں سو فیصد ایڈہاک ریلیف الاؤنس 2026 شامل کیا جائے جبکہ 50 ہزار روپے سے کم تنخواہ لینے والے ملازمین کی تنخواہوں میں 50 فیصد اضافہ کیا جائے۔سرکاری ملازمین نے کنوینس، میڈیکل اور ہاؤس رینٹ الاؤنسز میں 200 فیصد اضافے، پینشن اصلاحات واپس لینے اور موجودہ پینشن نظام برقرار رکھنے کا بھی مطالبہ کیا ہے۔ اس کے علاوہ تنخواہوں میں تفاوت کم کرنے کے لیے مزید 30 فیصد ڈسپیریٹی ریڈکشن الاؤنس دینے کا مطالبہ بھی کیا گیا ہے۔مظاہرین کا کہنا ہے کہ اساتذہ اور محققین کے لیے 25 فیصد ٹیکس سلیب ختم کی جائے اور پہلے سے کٹی ہوئی رقم واپس کی جائے۔ انہوں نے ڈیلی ویجز اور کنٹریکٹ ملازمین کی مستقلی، دورانِ ملازمت وفات پانے والے ملازمین کے بچوں کی بھرتیوں کی بحالی اور نجکاری کی فہرست میں شامل اداروں کے لیے مشترکہ کمیٹیاں تشکیل دینے کا بھی مطالبہ کیا۔

ذرائع کے مطابق وفاقی بجٹ تجاویز پر حکومت اور آئی ایم ایف کے درمیان مذاکرات کا آخری مرحلہ جاری ہے۔ اطلاعات ہیں کہ آئی ایم ایف نے تنخواہ دار طبقے کو ریلیف دینے کی منظوری دے دی ہے، جبکہ وزیراعظم شہباز شریف آج وفاقی کابینہ کے اجلاس میں اس حوالے سے مراعات کی منظوری دیں گے۔ تنخواہ دار طبقے کو کم از کم 10 فیصد یا اس سے زائد ریلیف ملنے کا امکان ظاہر کیا جا رہا ہے۔مجوزہ بجٹ میں مہنگائی کی شرح کا ہدف 8.2 فیصد مقرر کرنے کی تجویز ہے، جبکہ ٹیکس وصولیوں کا ہدف 15 ہزار 267 ارب روپے رکھا گیا ہے۔ تاہم رواں مالی سال کے دوران حکومت بیشتر معاشی اہداف حاصل کرنے میں ناکام رہی اور اقتصادی ترقی کا مقررہ ہدف بھی پورا نہ ہو سکا۔

بجٹ تجاویز کے تحت تنخواہ دار طبقے اور دستاویزی کاروبار کے لیے خصوصی اقدامات متوقع ہیں، جبکہ زراعت اور ہاؤسنگ سیکٹر کو مراعات دینے کی بھی تجویز زیر غور ہے۔ ذرائع کا کہنا ہے کہ ہاؤسنگ فنانس کے لیے 10 سال تک سنگل ڈیجٹ شرح سود کی سہولت متعارف کرائی جا سکتی ہے تاکہ تعمیراتی شعبے کو فروغ دیا جا سکے۔علاوہ ازیں بیوٹی انڈسٹری کو بھی ریلیف دیے جانے کا امکان ہے۔ مجوزہ اقدامات کے تحت میک اپ مصنوعات، سرخی پاؤڈر، مسکارا اور شیمپو سمیت متعدد اشیا سستی ہو سکتی ہیں۔ ریٹیلرز کے لیے نئے ٹیکس ماڈل کے تحت فیس لیس ڈیجیٹل ٹیکس نظام متعارف کرانے کی تجویز بھی بجٹ کا حصہ ہے، جس کا مقصد ٹیکس نظام کو مزید شفاف اور مؤثر بنانا ہے۔

بجٹ سے قبل حکومت اور ایم کیو ایم پاکستان کے درمیان اہم پیش رفت سامنے آئی ہے، جہاں ایم کیو ایم کے وفد نے اپنے مطالبات کی منظوری کے لیے وزیرِ اعظم شہباز شریف سے ملاقات کی۔ ملاقات میں بجٹ تجاویز، بلدیاتی حکومتوں سے متعلق مجوزہ آئینی ترمیمی بل اور سندھ میں گورنر کے عہدے سمیت اہم سیاسی امور پر تبادلہ خیال کیا گیا۔

ذرائع کے مطابق وزیرِ اعظم نے کراچی کے لیے 20 ارب روپے اور حیدرآباد کے لیے 5 ارب روپے کے خصوصی ترقیاتی پیکیج کی منظوری پر آمادگی ظاہر کی۔ اس کے علاوہ ایم کیو ایم کے مجوزہ آئینی ترمیمی بل کے حوالے سے بھی حکومت نے تعاون کی یقین دہانی کروائی اور کہا کہ اس معاملے پر پاکستان پیپلز پارٹی سے مشاورت کی جائے گی۔ملاقات کے دوران وزیرِ اعظم شہباز شریف نے کہا کہ پاکستان مسلم لیگ (ن) ایم کیو ایم کے مجوزہ آئینی ترمیمی بل کی حمایت کرتی ہے اور اس حوالے سے مثبت پیش رفت کے لیے کردار ادا کرے گی۔

ذرائع کے مطابق ایم کیو ایم وفد نے سندھ میں گورنر شپ کے معاملے پر بھی اپنا مؤقف پیش کرتے ہوئے کہا کہ گورنر سندھ کا عہدہ ان کا حق ہے۔ تاہم حکومتی نمائندوں نے جواب دیا کہ فی الحال گورنر سندھ سے متعلق معاملات طے ہو چکے ہیں، البتہ مستقبل میں اس معاملے پر غور کیا جا سکتا ہے۔ملاقات میں ایم کیو ایم کے وفد کی قیادت خالد مقبول صدیقی نے کی، جبکہ وفد میں فاروق ستار، مصطفیٰ کمال، امین الحق اور جاوید حنیف شامل تھے۔ وزیرِ اعظم کے ہمراہ اسحاق ڈار، رانا ثناء اللہ، احسن اقبال، اعظم نذیر تارڑ، عطاء تارڑ اور توقیر شاہ بھی موجود تھے۔

سیاسی مبصرین کے مطابق بجٹ سے قبل ہونے والی یہ ملاقات حکومتی اتحادیوں کو ساتھ رکھنے اور اہم آئینی و ترقیاتی معاملات پر اتفاقِ رائے پیدا کرنے کی کوششوں کا حصہ ہے۔