بھارت میں ایندھن بحران شدت اختیار کر گیا

نئی دہلی: مشرق وسطیٰ میں جاری کشیدہ صورتحال کے اثرات بھارت تک پہنچ گئے ہیں، جہاں ایندھن کی فراہمی متاثر ہونے کے باعث ڈیزل کے بحران نے شدت اختیار کر لی ہے۔

میڈیا رپورٹس کے مطابق عالمی سطح پر خام تیل کی سپلائی میں رکاوٹوں کے باعث بھارت کی سرکاری آئل کمپنیاں بڑھتی ہوئی طلب پوری کرنے میں مشکلات کا سامنا کر رہی ہیں۔ اس صورتحال کے پیش نظر حکومت نے ایندھن کی دستیابی برقرار رکھنے کے لیے ہنگامی اقدامات نافذ کر دیے ہیں۔رپورٹس کے مطابق حکومت نے پیٹرول پمپ مالکان کو ہدایت جاری کی ہے کہ کسی ایک گاڑی یا صارف کو روزانہ 200 لیٹر سے زائد ڈیزل فروخت نہ کیا جائے۔ اس کے علاوہ تجارتی صارفین کو عام ریٹیل پیٹرول پمپس سے ایندھن خریدنے سے بھی روک دیا گیا ہے۔حکام کا کہنا ہے کہ ڈیزل کی طلب میں غیر معمولی اضافے اور سپلائی میں کمی کے باعث یہ اقدامات ناگزیر ہو گئے ہیں تاکہ ملک بھر میں ایندھن کی دستیابی کو یقینی بنایا جا سکے اور ذخیرہ اندوزی کی حوصلہ شکنی ہو۔

توانائی کے ماہرین نے خبردار کیا ہے کہ اگر مشرق وسطیٰ میں کشیدگی مزید بڑھی تو بھارت سمیت دیگر ایشیائی ممالک کو بھی ایندھن کی قلت اور قیمتوں میں اضافے کا سامنا کرنا پڑ سکتا ہے۔بھارتی حکام نے واضح کیا ہے کہ موجودہ پابندیاں عارضی نوعیت کی ہیں اور حالات معمول پر آنے کے بعد ان پر نظرثانی کی جائے گی۔