Author: ممتاز حیدر

وزیرِ اعظم شہباز شریف نے ایک بار پھر اپوزیشن کو قومی معاملات پر مل بیٹھنے کی دعوت دیتے ہوئے کہا ہے کہ میثاقِ معیشت اور میثاقِ جمہوریت وقت کی اہم ضرورت ہیں، کیونکہ پاکستان کی ترقی اور استحکام سب کی مشترکہ ذمہ داری ہے۔

قومی اسمبلی کے اجلاس سے خطاب کرتے ہوئے وزیرِ اعظم شہباز شریف نے کہا کہ انہوں نے متعدد بار اپوزیشن کو مذاکرات کی پیشکش کی ہے اور آج بھی یہی کہتے ہیں کہ تمام سیاسی جماعتیں ملکی مفاد میں ایک میز پر بیٹھیں۔ ان کا کہنا تھا کہ سیاست، نظریات اور خیالات الگ ہو سکتے ہیں، لیکن پاکستان کی بقا اور خوشحالی سب سے مقدم ہے، کیونکہ ’’پاکستان ہے تو ہم ہیں‘‘۔وزیرِ اعظم نے کہا کہ قومی اسمبلی ایک گھر کی مانند ہے اور انہوں نے اپوزیشن لیڈر محمود خان اچکزئی کی تقریر کو غور سے سنا۔ انہوں نے زور دیا کہ سیاسی اختلافات اپنی جگہ، لیکن قومی مفاد کے معاملات پر اتحاد اور یکجہتی کا مظاہرہ کرنا ہوگا۔

شہباز شریف نے سیکیورٹی فورسز اور قانون نافذ کرنے والے اداروں کی قربانیوں کو خراجِ تحسین پیش کرتے ہوئے کہا کہ تین روز قبل 22 جوانوں نے وطن کے دفاع میں جامِ شہادت نوش کیا۔ انہوں نے کہا کہ افسران اور جوان دن رات دہشت گردوں کے خلاف برسرِ پیکار ہیں اور اپنی جانوں کا نذرانہ دے کر لاکھوں خاندانوں کو محفوظ بنا رہے ہیں، اس لیے پوری قوم کو ان قربانیوں کا احترام کرنا چاہیے۔وزیرِ اعظم نے کہا کہ صوبوں کے وسائل پر صوبوں کا حق تسلیم شدہ حقیقت ہے اور اس معاملے پر کسی قسم کا اختلاف نہیں۔ انہوں نے کہا کہ ریکوڈک منصوبے کا معاہدہ بلوچستان کی سیاسی و سماجی قیادت سے مشاورت کے بعد طے پایا اور اس میں بلوچستان کے عوام کے مفادات کو مکمل طور پر مدنظر رکھا گیا ہے۔

وزیراعظم شہباز شریف نے یاد دلایا کہ 2010ء کے این ایف سی ایوارڈ میں بلوچستان کے حصے میں سو فیصد اضافہ کیا گیا تھا۔ ان کا کہنا تھا کہ یہ کوئی احسان نہیں بلکہ وفاق کی آئینی اور قومی ذمہ داری تھی، تاہم یہ حقیقت یاد رکھنی چاہیے کہ بلوچستان کے حقوق اور وسائل کے تحفظ کے لیے عملی اقدامات کیے گئے ہیں، بلوچستان پاکستان کا ایک خوبصورت اور اہم صوبہ ہے جہاں بہادر اور غیور عوام آباد ہیں۔ انہوں نے بتایا کہ بلوچستان کی ترقی کے لیے دیگر صوبوں خصوصاً پنجاب اور سندھ نے بھی اپنا کردار ادا کیا ہے۔ صوبے میں کسانوں کو 75 ارب روپے کی لاگت سے سولر پینلز فراہم کیے گئے ہیں، جبکہ گوادر سے چمن تک جدید شاہراہ کی تعمیر جاری ہے جو ہائی وے کے بین الاقوامی معیار کے مطابق بنائی جا رہی ہے۔

شہباز شریف نے اس عزم کا اظہار کیا کہ وفاقی حکومت بلوچستان سمیت تمام صوبوں کی ترقی، خوشحالی اور مساوی حقوق کے تحفظ کے لیے اپنی کوششیں جاری رکھے گی تاکہ ملک کو معاشی استحکام اور قومی یکجہتی کی راہ پر گامزن کیا جا سکے۔

سیکیورٹی فورسز نے ایک اہم کارروائی کے دوران دہشت گردوں کو جدید ڈرون ٹیکنالوجی، الیکٹرانکس آلات اور دھماکہ خیز مواد کی فراہمی میں ملوث ایک اہم سپلائی چین کے کردار کو گرفتار کر لیا ہے۔

ابتدائی تحقیقات کے مطابق گرفتار ملزم کالعدم تحریک طالبان پاکستان (ٹی ٹی پی) سے وابستہ عناصر کے لیے جدید ٹیکنالوجی اور الیکٹرانک سامان کے حصول میں سرگرم تھا۔سیکیورٹی ذرائع کے مطابق گرفتار دہشت گرد کا رابطہ طلال عرف زید بلوچ سے تھا، جو مطلوب دہشت گرد طاہر کا بھائی اور خود بھی ٹی ٹی پی کا فعال رکن ہے۔ ذرائع کا کہنا ہے کہ طلال اس وقت افغانستان میں مقیم ہے اور اس نے گرفتار ملزم کو تنظیم کے لیے جدید ڈرونز، موبائل فون بیٹریاں، الیکٹرانک چپس، انورٹرز اور دیگر حساس آلات کی خریداری اور فراہمی کی ذمہ داری سونپ رکھی تھی۔تحقیقات میں انکشاف ہوا ہے کہ ملزم طلال کی ہدایات پر ڈرون موٹرز، فریم، پروپیلرز، بیٹریاں اور دیسی ساختہ بم (آئی ای ڈی) تیار کرنے کے لیے استعمال ہونے والے مائیکرو کنٹرولر بورڈز، نٹ بولٹ، کلپ وائر، ہیٹ شرنک وائر اور دیگر الیکٹرانک اشیاء خریدتا تھا۔ اس کے علاوہ ملزم جدید ڈرونز اور مخصوص موبائل فونز کی خریداری میں بھی ملوث تھا۔ذرائع کے مطابق ملزم کراچی کی مختلف الیکٹرانکس مارکیٹوں، جن میں صدر، بولٹن مارکیٹ اور رنچھوڑ لائن شامل ہیں، سے سامان حاصل کرتا تھا جبکہ بعض اشیاء آن لائن پلیٹ فارمز کے ذریعے بھی منگوائی جاتی تھیں۔

سیکیورٹی اداروں کا کہنا ہے کہ ملزم کے اعترافات اور دستیاب شواہد سے ثابت ہوا ہے کہ حاصل کیا جانے والا سامان آئی ای ڈی دھماکوں، خودکش جیکٹس اور بالخصوص ڈرون حملوں میں استعمال ہونے والی جدید ٹیکنالوجی کی فراہمی کے لیے استعمال کیا جاتا تھا۔کارروائی کے دوران ملزم کے قبضے سے تقریباً 2 کلو گرام بارودی مواد، ایک ڈرون بمعہ بیٹری اور ایک ریموٹ کنٹرول بھی برآمد کیا گیا ہے۔ برآمد شدہ سامان کو فرانزک تجزیے کے لیے متعلقہ اداروں کے حوالے کر دیا گیا ہے۔سیکیورٹی حکام کے مطابق گرفتار دہشت گرد سے حاصل ہونے والی معلومات کی بنیاد پر مزید کارروائیاں جاری ہیں اور اس نیٹ ورک سے وابستہ دیگر افراد کی گرفتاری کے لیے چھاپے مارے جا رہے ہیں۔

ادھر قانون نافذ کرنے والے اداروں نے شہریوں سے اپیل کی ہے کہ وہ اپنے علاقوں میں کسی بھی مشکوک سرگرمی، غیر معمولی الیکٹرانکس سامان کی خرید و فروخت یا مشتبہ افراد کی موجودگی کی فوری اطلاع متعلقہ اداروں کو دیں تاکہ دہشت گردی کے ممکنہ خطرات کا بروقت تدارک کیا جا سکے۔

دہشت گردی کو جڑ سے ختم کرنے کا مشن، سیکیورٹی فورسز کی شمالی وزیرستان میں بڑی کارروائیاں،میران شاہ میں 21 دہشت گردوں کو انجام تک پہنچایا گیا، ہلاک ہونے والوں میں 4 خارجی کمانڈر بھی شامل ہیں۔

آئی ایس پی آر کے مطابق آپریشن میں خارجیوں کے متعدد ٹھکانوں کو نشانہ بنایا گیا، ضلع شمالی وزیرستان کے علاقے میران شاہ اور ملحقہ علاقوں میں کارروائیاں کی گئیں۔ترجمان کے مطابق شمالی وزیرستان میں خارجیوں کے نیٹ ورک کیلئے بڑا دھچکا، مارے گئے خارجی کمانڈرز تخریب کاری کی متعدد وارداتوں میں ملوث تھے۔سکیورٹی فورسز کی جانب سے انٹیلی جنس بنیادوں پر جاری آپریشنز کے تسلسل میں خیبر پختونخوا کے ضلع شمالی وزیرستان کے علاقے میران شاہ اور اس کے گرد و نواح میں خوارج کے متعدد ٹھکانوں کو نشانہ بنایا گیا۔شدید فائرنگ کے تبادلے کے بعد گزشتہ بہتر گھنٹوں کے دوران بھارتی سرپرستی میں سرگرم فتنہ الخوارج سے تعلق رکھنے والے مزید 21 خوارج ہلاک کر دیے گئے، جن میں چار اہم خوارجی سرغنہ بھی شامل ہیں۔ ہلاک ہونے والوں میں خوارجی خالد رضا عرف سالار، خوارجی مفتون، خوارجی موسیٰ اور خوارجی عمران عرف ایان شامل ہیں۔

آئی ایس پی آر کے مطابق ان کارروائیوں کے نتیجے میں علاقے میں سرگرم خوارج کے نیٹ ورک کو بڑا دھچکا پہنچا ہے۔ ہلاک ہونے والے خوارجی سرغنہ سکیورٹی فورسز کے اہلکاروں اور بے گناہ شہریوں کے قتل سمیت متعدد دہشت گرد کارروائیوں میں مطلوب تھے۔ ان انتہائی مہارت اور درستگی کے ساتھ کی گئی کارروائیوں میں اب تک مجموعی طور پر 48 خوارج ہلاک کیے جا چکے ہیں۔ہلاک کیے گئے بھارتی سرپرستی یافتہ خوارج کے قبضے سے اسلحہ اور گولہ بارود بھی برآمد کیا گیا ہے۔ یہ عناصر متعدد دہشت گرد سرگرمیوں اور معصوم شہریوں کے قتل میں ملوث رہے تھے۔آئی ایس پی آر کے مطابق علاقے میں چھپے ہوئے باقی ماندہ خوارج کے خاتمے کے لیے کلیئرنس اور سرچ آپریشنز جاری رہیں گے۔ وفاقی ایپکس کمیٹی کے منظور کردہ نیشنل ایکشن پلان کے تحت ’’عزمِ استحکام‘‘ وژن کے مطابق سکیورٹی فورسز اور قانون نافذ کرنے والے اداروں کی دہشت گردی کے خلاف بلاامتیاز مہم پوری قوت کے ساتھ جاری رہے گی تاکہ ملک سے بیرونی سرپرستی اور معاونت سے چلنے والی دہشت گردی کا مکمل خاتمہ کیا جا سکے۔