Blog

‎چین نے ایران اور امریکا کے درمیان جنگ بندی میں توسیع پر ردعمل دیتے ہوئے سفارتی کوششوں کی حمایت کا اظہار کیا ہے اور خطے میں امن کے قیام کو ترجیح دینے پر زور دیا ہے۔ بین الاقوامی خبر رساں اداروں کے مطابق چینی وزارت خارجہ کے ترجمان نے اپنے بیان میں کہا کہ موجودہ علاقائی صورتحال انتہائی نازک مرحلے میں داخل ہو چکی ہے، جہاں جنگ اور امن کے درمیان توازن برقرار رکھنا نہایت ضروری ہے۔
‎ترجمان کا کہنا تھا کہ چین تمام فریقین کی جانب سے مذاکرات اور سفارت کاری کے ذریعے تنازعات کے حل کی حمایت کرتا ہے۔ انہوں نے اس بات پر بھی زور دیا کہ کسی بھی قسم کی جارحیت کو دوبارہ شروع ہونے سے روکنا سب سے اہم ترجیح ہونی چاہیے، کیونکہ اس سے نہ صرف خطے بلکہ عالمی سطح پر بھی عدم استحکام پیدا ہو سکتا ہے۔
‎یاد رہے کہ امریکی صدر ڈونلڈ ٹرمپ کی جانب سے حالیہ اعلان میں کہا گیا تھا کہ ایران کے ساتھ جاری جنگ بندی کو غیر معینہ مدت تک بڑھایا جا رہا ہے تاکہ امن مذاکرات کے لیے مزید وقت فراہم کیا جا سکے۔ اس فیصلے کو عالمی سطح پر مختلف ردعمل کا سامنا ہے۔
‎دوسری جانب ایران نے اس پیش رفت پر محتاط ردعمل دیتے ہوئے واضح کیا ہے کہ امریکا نے جنگ بندی میں توسیع کا اعلان یکطرفہ طور پر کیا ہے۔ تہران نے امریکی شرائط کو مسترد کرتے ہوئے کہا ہے کہ مذاکرات برابری کی بنیاد پر ہونے چاہئیں اور کسی بھی دباؤ کو قبول نہیں کیا جائے گا۔
‎مزید برآں ایران نے اقوام متحدہ سے بحیرہ عمان میں امریکی کارروائی کی مذمت کا مطالبہ بھی کیا ہے، جس سے خطے میں کشیدگی مزید بڑھنے کا خدشہ ظاہر کیا جا رہا ہے۔ ماہرین کے مطابق اگرچہ جنگ بندی میں توسیع ایک مثبت پیش رفت ہے، تاہم پائیدار امن کے لیے دونوں ممالک کے درمیان سنجیدہ اور نتیجہ خیز مذاکرات ناگزیر ہیں۔

‎امریکا اور ایران کے درمیان بڑھتی ہوئی کشیدگی کے اثرات صرف مشرق وسطیٰ تک محدود نہیں رہے بلکہ اس کے گہرے اثرات بھارت جیسے بڑے ملک پر بھی پڑ رہے ہیں۔ اقوام متحدہ کے اندازوں کے مطابق اس تنازع کے نتیجے میں بھارت میں مزید 25 لاکھ افراد غربت کی لکیر سے نیچے جا سکتے ہیں، جو پہلے ہی معاشی دباؤ کا شکار ہیں۔
‎الجزیرہ کی رپورٹ میں بتایا گیا ہے کہ عالمی سطح پر توانائی کی قیمتوں میں اضافے نے بھارت کی معیشت کو بری طرح متاثر کیا ہے۔ خاص طور پر تیل اور گیس کی قیمتوں میں دوگنا اضافہ دیکھنے میں آیا ہے، جس کے باعث نہ صرف ٹرانسپورٹ بلکہ روزمرہ استعمال کی اشیاء بھی مہنگی ہو گئی ہیں۔ بھارت، جو توانائی کے لیے بڑی حد تک درآمدات پر انحصار کرتا ہے، اس صورتحال سے زیادہ متاثر ہوا ہے۔
‎رپورٹ کے مطابق گیس کی شدید قلت کے باعث کئی صنعتی یونٹس اور فیکٹریاں بند ہونے کے قریب پہنچ چکی ہیں یا جزوی طور پر کام کر رہی ہیں۔ اس کے نتیجے میں بیروزگاری میں اضافہ ہوا ہے اور ہزاروں مزدوروں کو روزگار کے مواقع سے محروم ہونا پڑا ہے۔ صنعتی شعبے میں پیدا ہونے والی اس صورتحال نے مجموعی معیشت پر دباؤ مزید بڑھا دیا ہے۔
‎مہنگائی کی بڑھتی ہوئی شرح نے عام آدمی کی زندگی کو مشکل بنا دیا ہے۔ اشیائے خوردونوش کی قیمتوں میں غیر معمولی اضافہ ہوا ہے جس کے باعث متوسط اور نچلے طبقے کے لیے بنیادی ضروریات پوری کرنا بھی چیلنج بن گیا ہے۔ کئی شہروں میں عوام نے مہنگائی اور بیروزگاری کے خلاف احتجاج بھی شروع کر دیے ہیں۔

ایران کی پاسداران انقلاب گارڈز نے سخت لہجے میں خبردار کیا ہے کہ اگر موجودہ کشیدگی دوبارہ جنگ کی صورت اختیار کرتی ہے تو دشمن کو بھرپور اور تباہ کن جواب دیا جائے گا۔ ایرانی خبر رساں ادارے کے مطابق پاسداران انقلاب نے واضح کیا ہے کہ وہ ہر قسم کی ممکنہ جارحیت کا مقابلہ کرنے کے لیے مکمل طور پر تیار ہیں۔
‎بیان میں کہا گیا کہ اگر لڑائی دوبارہ شروع ہوئی تو دشمن کے باقی ماندہ عسکری اور اسٹریٹیجک اثاثوں کو نشانہ بنایا جائے گا اور اسے شدید نقصان اٹھانا پڑے گا۔ ایرانی حکام کے مطابق ان کی دفاعی صلاحیتیں مکمل طور پر فعال ہیں اور کسی بھی ہنگامی صورتحال سے نمٹنے کے لیے اقدامات پہلے ہی کیے جا چکے ہیں۔
‎پاسداران انقلاب کا کہنا ہے کہ موجودہ جنگ بندی کو “نام نہاد” قرار دیتے ہوئے اس دوران دشمن کی سرگرمیوں پر مسلسل نظر رکھنا ضروری ہے۔ ان کے مطابق کسی بھی غیر معمولی حرکت یا خلاف ورزی کا فوری اور مؤثر جواب دیا جائے گا۔
‎ماہرین کے مطابق یہ بیان ایک ایسے وقت میں سامنے آیا ہے جب خطے میں ایران اور امریکا کے درمیان کشیدگی بدستور برقرار ہے، جبکہ آبنائے ہرمز اور بحیرہ عمان میں حالیہ واقعات نے صورتحال کو مزید حساس بنا دیا ہے۔
‎تجزیہ کاروں کا کہنا ہے کہ اس طرح کے بیانات خطے میں تناؤ کو بڑھا سکتے ہیں، تاہم یہ بھی حقیقت ہے کہ دونوں فریقین بیک وقت سفارتی راستے بھی کھلے رکھنا چاہتے ہیں تاکہ کسی بڑے تصادم سے بچا جا سکے۔

امریکی صدر ڈونلڈ ٹرمپ کی جانب سے جنگ بندی میں توسیع کے اعلان کے چند گھنٹوں بعد ہی خطے کی صورتحال ایک بار پھر پیچیدہ ہوتی دکھائی دے رہی ہے، جہاں ایران نے بظاہر آبنائے ہرمز پر اپنی سرگرمیاں بڑھا دی ہیں۔ یہ پیش رفت امن مذاکرات کے لیے ایک بڑی رکاوٹ بن سکتی ہے اور جنگ بندی کے مستقبل پر سوالات کھڑے کر رہی ہے۔
‎اطلاعات کے مطابق ایران کی پاسداران انقلاب کی گن بوٹس نے آبنائے ہرمز سے گزرنے کی کوشش کرنے والے کچھ تجارتی جہازوں کو روک لیا۔ اگرچہ اس دوران کسی جانی یا بڑے مالی نقصان کی اطلاع سامنے نہیں آئی، تاہم اس اقدام نے عالمی سطح پر تشویش کو بڑھا دیا ہے، خاص طور پر اس لیے کہ یہ ایک انتہائی حساس آبی گزرگاہ ہے جہاں سے عالمی تیل کی بڑی مقدار گزرتی ہے۔
‎ماہرین کے مطابق اس صورتحال سے نہ صرف جنگ بندی پر دباؤ بڑھے گا بلکہ یہ خطرہ بھی بڑھ گیا ہے کہ جاری ڈیڈلاک کے دوران کسی بھی وقت تنازع دوبارہ شدت اختیار کر سکتا ہے۔ آبنائے ہرمز کی اہمیت کے پیش نظر اس طرح کے اقدامات عالمی تجارت اور توانائی کی سپلائی کو متاثر کر سکتے ہیں۔
‎دوسری جانب صدر ٹرمپ نے اپنے حالیہ بیان میں آبنائے ہرمز کی ممکنہ بندش کو ایران کے لیے خود نقصان دہ قرار دیا ہے۔ ان کا کہنا تھا کہ اس سے تہران کو معاشی طور پر نقصان اٹھانا پڑے گا، تاہم زمینی حقائق یہ ظاہر کرتے ہیں کہ ایران اس معاملے کو سیاسی دباؤ بڑھانے کے لیے استعمال کر رہا ہے۔
‎تجزیہ کاروں کا کہنا ہے کہ ایران کی جانب سے اس طرح کی حکمت عملی کا مقصد امریکا کو مذاکرات کی میز پر لانا اور اپنے مطالبات منوانا ہو سکتا ہے۔ تاہم اس کے نتیجے میں خطے میں کشیدگی بڑھنے اور کسی بھی وقت حالات بگڑنے کا خدشہ بھی موجود ہے۔

آبنائے ہرمز میں کشیدگی: ایرانی اقدام پر بھارتی جہاز کی ضبطی کا دعویٰ، سوشل میڈیا پر نئی بحث چھڑ گئی

آبنائے ہرمز میں جاری کشیدگی کے دوران ایک نئی پیش رفت سامنے آئی ہے، ایران نے دو جہازوں کو تحویل میں لیا ہے جن میں سے ایک بھارتی ہے،

بھارتی معروف تجزیہ کار اشوک سوین کی جانب سے سوشل میڈیا پلیٹ فارم ایکس (سابقہ ٹوئٹر) پر جاری بیان میں کہا گیا ہے کہ ایران اس سے قبل بھی دو بھارتی جہازوں پر فائرنگ کر چکا ہے جبکہ آج ایک اور بھارتی جہاز کو آبنائے ہرمز میں ضبط کر لیا گیا ہے۔بیان میں مزید دعویٰ کیا گیا کہ ایران پاکستانی اور بنگلہ دیشی جہازوں کو آبنائے ہرمز سے گزرنے کی اجازت دے رہا ہے، تاہم بھارتی جہازوں کو روکا جا رہا ہے۔ اس صورتحال کو بھارت کی خارجہ پالیسی سے جوڑتے ہوئے کہا گیا کہ "بھارت، وزیر اعظم نریندر مودی کی اسرائیلی قیادت سے قربت کی قیمت ادا کر رہا ہے”۔

واضح رہے کہ آبنائے ہرمز عالمی تجارت کے لیے نہایت اہم گزرگاہ ہے، جہاں حالیہ دنوں میں کشیدگی اور بحری سلامتی کے واقعات میں اضافہ دیکھا گیا ہے، جس پر عالمی برادری تشویش کا اظہار کر رہی ہے۔

آبنائے ہرمز ایک بار پھر عالمی کشیدگی کا مرکز بن گیا ہے، جہاں ایران کی جانب سے تیسرا بحری جہاز نشانہ بنائے جانے کی اطلاعات سامنے آئی ہیں۔

ایرانی سرکاری خبر رساں اداروں نور نیوز، فارس اور مہر کے مطابق “یوفوریا” نامی جہاز کو نشانہ بنایا گیا، جو اس وقت ایرانی ساحل کے قریب پھنس چکا ہے۔ تاہم اس واقعے کی مزید تفصیلات فوری طور پر جاری نہیں کی گئیں۔
اس سے قبل ایرانی میڈیا نے دعویٰ کیا تھا کہ دو دیگر جہازوں کو آبنائے ہرمز میں تحویل میں لے لیا گیا ہے، تاہم یہ واضح نہیں کہ وہ مکمل طور پر ایران کے کنٹرول میں ہیں یا نہیں۔بین الاقوامی میڈیا رپورٹس کے مطابق یہ جہاز MSC Francesca اور Epaminondas ہیں، جنہیں ایک گن بوٹ کی جانب سے فائرنگ کا نشانہ بنایا گیا۔

بحری سکیورٹی ادارے نے بھی تصدیق کی کہ دونوں جہازوں پر فائرنگ کی گئی۔ماہرین کے مطابق MSC Francesca دنیا کی بڑی شپنگ کمپنی MSC کے زیرِ انتظام ہے، جبکہ Epaminondas یونانی کمپنی Kalmar Maritime کی ملکیت ہے۔اطلاعات کے مطابق دونوں جہاز خلیجِ عمان کی جانب جا رہے تھے جب ان پر حملہ کیا گیا۔میرین ٹریفک ڈیٹا کے مطابق جہازوں نے آبنائے ہرمز عبور کرتے وقت اپنے ٹریکنگ سسٹمز بند کر دیے تھے، جو حملوں کے وقت دوبارہ فعال ہوئے۔

آبنائے ہرمز پہلے ہی ایران اور امریکہ کے درمیان جاری کشیدگی کا اہم مرکز بن چکا ہے۔جنگ کے دوران ایران نے اس اہم گزرگاہ کو بند کر دیا تھا، جس سے عالمی معیشت متاثر ہوئی اور تیل کی قیمتوں میں نمایاں اضافہ دیکھنے میں آیا۔ادھر امریکہ بھی اس علاقے میں ناکہ بندی کیے ہوئے ہے، جس سے صورتحال مزید پیچیدہ ہو گئی ہے۔گزشتہ ہفتے کے آخر میں امریکہ نے ایک ایرانی جہاز کو تحویل میں لیا تھا، جس کے بعد تہران نے جوابی کارروائی کی دھمکی دی تھی۔پینٹاگون کے مطابق امریکی افواج نے بحرِ ہند میں ایران سے منسلک ایک اور جہاز پر بھی کارروائی کی۔تازہ واقعات کے بعد آبنائے ہرمز میں صورتحال نہایت حساس ہو چکی ہے، اور ماہرین خبردار کر رہے ہیں کہ اگر کشیدگی میں مزید اضافہ ہوا تو اس کے اثرات نہ صرف خطے بلکہ عالمی تجارت اور توانائی کی منڈیوں پر بھی پڑ سکتے ہیں۔