Baaghi TV

Blog

  • مون سون کی پیشگی تیاری مکمل کی جائے، وزیراعظم کی اجلاس میں خصوصی ہدایت

    مون سون کی پیشگی تیاری مکمل کی جائے، وزیراعظم کی اجلاس میں خصوصی ہدایت

    وزیراعظم محمد شہباز شریف کی زیر صدارت مون سون سیزن کی پیشگی تیاریوں اور ممکنہ ہنگامی صورتحال سے نمٹنے کے حوالے سے اعلیٰ سطح کا جائزہ اجلاس منعقد ہوا، جس میں ملک بھر میں موسمیاتی خطرات سے نمٹنے کے لیے جامع حکمت عملی پر غور کیا گیا۔

    اجلاس سے خطاب کرتے ہوئے وزیراعظم شہباز شریف نے کہا کہ پاکستان موسمیاتی تبدیلیوں کے مضر اثرات سے شدید متاثر ہونے والے ممالک میں شامل ہے، اس لیے موسمی تغیرات سے درپیش خطرات کا مؤثر مقابلہ کرنے کے لیے وفاق اور صوبوں کے درمیان مکمل ہم آہنگی اور جامع تعاون ناگزیر ہے۔وزیراعظم نے ہدایت کی کہ وزیر موسمیاتی تبدیلی اور چیئرمین نیشنل ڈیزاسٹر مینجمنٹ اتھارٹی (این ڈی ایم اے) تمام صوبوں، آزاد کشمیر اور گلگت بلتستان کا ہنگامی دورہ کریں اور مون سون سے قبل تمام پیشگی انتظامات کو ہر صورت مکمل بنایا جائے۔انہوں نے اعلان کیا کہ وزیر منصوبہ بندی و ترقی کی نگرانی میں ایک ایمرجنسی رسپانس کمیٹی قائم کی جائے گی، جس میں نیشنل ڈیزاسٹر مینجمنٹ اتھارٹی اور متعلقہ وفاقی وزارتوں کے نمائندے شامل ہوں گے۔ یہ کمیٹی صوبائی اداروں کے ساتھ عملی تعاون کو یقینی بنائے گی اور ہر ہفتے اپنی پیش رفت کا جائزہ لے گی۔

    وزیراعظم نے وزیر خزانہ کو ہدایت کی کہ مون سون کے دوران ممکنہ قدرتی آفات سے نمٹنے کے لیے ہنگامی فنڈ کی تشکیل کی پیشگی تیاری مکمل کی جائے، جبکہ غیر ملکی مالی معاونت سے جاری منصوبوں کو متعلقہ اداروں کی استعداد کار میں اضافے کے لیے مؤثر انداز میں استعمال کیا جائے۔اجلاس کو بتایا گیا کہ حکومت نے بجٹ میں آبی منصوبوں کی جلد تکمیل کے لیے 330 ارب روپے کی اضافی رقم مختص کی ہے تاکہ سیلابی خطرات میں کمی اور پانی کے بہتر انتظام کو یقینی بنایا جا سکے۔وزیراعظم نے زور دیا کہ مون سون کے دوران ممکنہ سیلابی صورتحال سے بچاؤ کے لیے تمام اقدامات ایک جامع روڈ میپ کے تحت کیے جائیں، جبکہ تمام صوبے دریاؤں کی گزرگاہوں، سیلابی راستوں میں تجاوزات اور دیگر رکاوٹوں کا بروقت اور مؤثر حل یقینی بنائیں۔ انہوں نے ہدایت کی کہ تمام متعلقہ ادارے اپنی مکمل ادارہ جاتی اور تکنیکی صلاحیتیں عوام کے تحفظ اور سہولت کے لیے بروئے کار لائیں۔

    اس موقع پر چیئرمین این ڈی ایم اے نے وزیراعظم کو مون سون کی پیشگی تیاریوں، ممکنہ سیلابی صورتحال اور موسمیاتی تغیرات سے متعلق تفصیلی بریفنگ دی۔ بریفنگ میں بتایا گیا کہ دنیا بھر میں رواں سال شدید گرمی کی لہروں اور غیر معمولی موسمیاتی تبدیلیوں کے واضح امکانات موجود ہیں، جبکہ پاکستان میں بھی جولائی کے دوران شدید گرمی اور معمول سے زیادہ بارشوں کی پیش گوئی کی گئی ہے۔چیئرمین این ڈی ایم اے نے اجلاس کو آگاہ کیا کہ مجوزہ مون سون حکمت عملی کے تحت تمام ضروری انتظامات تیزی سے مکمل کیے جا رہے ہیں تاکہ کسی بھی ہنگامی صورتحال میں بروقت اور مؤثر ردعمل یقینی بنایا جا سکے۔

  • نواز شریف کا ٹیوشن سینٹر سانحہ میں 14 بچوں کی موت پردلی رنج کا اظہار

    نواز شریف کا ٹیوشن سینٹر سانحہ میں 14 بچوں کی موت پردلی رنج کا اظہار

    سابق وزیراعظم و صدر پاکستان مسلم لیگ ن نواز شریف نے لاہور میں ٹیوشن سینٹر کی چھت گرنے سے 14 معصوم بچوں کے جاں بحق ہونے پر دلی رنج کا اظہار کیا ہے۔

    ایکس پر جاری بیان میں نواز شریف نے کہا کہ یہ ننھے پھول قوم کا مستقبل تھے، دکھ کی اس گھڑی میں میری ہمدردیاں سوگوار خاندانوں کے ساتھ ہیں،مریم نواز شریف نے مجھے بتایا ہےکہ وہ مصمم ارادے کےساتھ اس افسوسناک واقعے کی شفاف اور غیر جانبدارانہ انکوائری کروا کر مجرمان کو قرار واقعی سزا دلوائیں گی،اور اس بات کو یقینی بنایا جائےگا کہ اس سانحے کے ذمہ داروں کو مثالی سزا ملے، اللہ تعالیٰ بچوں کو جوارِ رحمت میں جگہ، زخمیوں کو کامل شفا اور لواحقین کو صبرِ جمیل عطا فرمائے۔ آمین

    واضح رہے گزشتہ روز لاہور کے علاقے کاہنہ میں ٹیوشن سنٹر کی چھت گرنے سے 14 بچے جاں بحق اور متعدد زخمی ہوئے تھے،وزیراعلیٰ پنجاب مریم نواز نے واقعے کا نوٹس لیتے ہوئے فوری طور پر ابتدائی رپورٹ طلب کر لی تھی۔

  • سابق وزیراعظم آزاد کشمیر سردار تنویر الیاس پیپلز پارٹی سےمستعفی

    سابق وزیراعظم آزاد کشمیر سردار تنویر الیاس پیپلز پارٹی سےمستعفی

    مظفرآباد: سابق وزیراعظم آزاد کشمیر سردار تنویر الیاس نے پاکستان پیپلز پارٹی کی بنیادی رکنیت سے استعفیٰ دے دیا ہے۔ انہوں نے تصدیق کی ہے کہ اپنا استعفیٰ پارٹی چیئرمین بلاول بھٹو زرداری کو ارسال کر دیا ہے۔

    ذرائع کے مطابق سردار تنویر الیاس نے آئندہ آزاد کشمیر انتخابات کے لیے پارٹی ٹکٹوں کی تقسیم پر اختلافات کے باعث پیپلز پارٹی سے علیحدگی کا فیصلہ کیا۔ اطلاعات ہیں کہ انہیں مطلوبہ حلقوں سے پارٹی ٹکٹ جاری نہ کیے جانے پر تحفظات تھے، جس کے بعد انہوں نے پارٹی کی بنیادی رکنیت چھوڑنے کا فیصلہ کیا۔ذرائع کا کہنا ہے کہ سردار تنویر الیاس کے استعفے کے بعد آزاد کشمیر کی سیاسی صورتحال میں مزید تبدیلیوں کا امکان ہے، جبکہ وہ جلد اپنے آئندہ سیاسی لائحہ عمل کا بھی اعلان کر سکتے ہیں

  • روس کا اسٹارلنک کے مقابلے میں ’راسویٹ‘ سیٹلائٹ نیٹ ورک کی توسیع کا منصوبہ

    روس کا اسٹارلنک کے مقابلے میں ’راسویٹ‘ سیٹلائٹ نیٹ ورک کی توسیع کا منصوبہ

    ایلون مسک کے سیٹلائٹ اسپیس ایکس (SpaceX) کے اسٹارلنک کا مقابلہ کرنے کے لیے روس نے ’راسویت‘ (Rassvet) کے نام سے اپنا سیٹلائٹ انٹرنیٹ نیٹ ورک تیار کرنے کا منصوبہ بنایا ہے۔ اس منصوبے کو نجی کمپنی ‘بیورو 1440’ (Bureau 1440) اور روسی خلائی ایجنسی کی مدد سے تیزی سے آگے بڑھایا جا رہا ہے، منصوبے کا مقصد ملک کی ڈیجیٹل خودمختاری کو مضبوط بنانا اور دور دراز علاقوں تک تیز رفتار انٹرنیٹ کی فراہمی یقینی بنانا ہے۔

    روسی صدر ولادیمیر پیوٹن کا کہنا ہے کہ راسویٹ بعض شعبوں میں اسٹارلنک سے بھی بہتر کارکردگی دکھا سکتا ہے یہ منصوبہ نجی روسی خلائی کمپنی بیورو 1440 تیار کر رہی ہے، جس نے 2023 میں آزمائشی سیٹلائٹس بھیجے تھے جبکہ رواں سال تجارتی بنیادوں پر سیٹلائٹس کی تنصیب کا عمل شروع کر دیا گیا ہے۔

    روسی حکومت کے مطابق 2026 کے اختتام تک 156 راسویٹ سیٹلائٹس مدار میں موجود ہوں گے، جبکہ 2035 تک ان کی تعداد بڑھا کر قریباً 900 کرنے کا ہدف مقرر کیا گیا ہے، اس منصوبے پر مجموعی طور پر قریباً 7 ارب ڈالر لاگت آنے کا تخمینہ ہے،راسویٹ سیٹلائٹس قریباً 800 کلومیٹر کی بلندی پر مدار میں کام کریں گے اور 5جی ٹیکنالوجی، لیزر کمیونیکیشن اور ایک گیگا بٹ فی سیکنڈ تک ڈیٹا کی رفتار فراہم کرنے کی صلاحیت رکھتے ہیں۔

    روسی حکام کے مطابق یہ نظام آرکٹک، سائبیریا اور دیگر دور افتادہ علاقوں میں انٹرنیٹ اور مواصلاتی خدما ت بہتر بنانے میں مدد دے گا، راسویٹ نیٹ ورک شہری استعمال کے ساتھ ساتھ ڈرونز کے سیٹلائٹ کنٹرول، فوجی مواصلات اور اہم سرکاری انفراسٹرکچر کے لیے بھی اہم کردار ادا کرے گا۔ روس کا مؤقف ہے کہ یہ منصوبہ مغربی سیٹلائٹ نیٹ ورکس پر انحصار کم کرنے اور ملک کی ڈیجیٹل خودمختاری کو مزید مستحکم بنانے کی حکمت عملی کا حصہ ہے-

  • عدنان صدیقی کی وجہ سے میں نےسیٹ چھوڑ کر چلا گیا تھا،کاظم پاشا

    عدنان صدیقی کی وجہ سے میں نےسیٹ چھوڑ کر چلا گیا تھا،کاظم پاشا

    پاکستان کے سابق پروڈیوسر کاظم پاشا نے پروڈکشن چھوڑنے کیوجہ سینئر اداکار عدنان صدیقی کو قرار دیا-

    اپنے ایک حالیہ انٹرویو میں انہوں نے بتایا کہ ماضی میں، میں نے اداکار عدنان صدیقی کے ساتھ ایک پروجیکٹ پر کام کیا تھا، تاہم اس دوران مجھے مشکلات کا سامنا کرنا پڑا کہ میں سیٹ چھوڑ کر چلا گیا تھا،عدنان صدیقی کی بعض درخواستوں اور مطالبات کی وجہ سے میں اس تجربے سے نالاں رہا اور بالآخر میں نے اس پروجیکٹ سے علیحدگی اختیار کر لی۔

    کاظم پاشا سے میزبان کی جانب سے اداکار عدنان صدیقی سے متعلق سوال کیا گیا جس کے جواب میں کاظم پاشا نے کہا کہ عدنان صدیقی نے ایک سیریل میں مجھے تنگ کیا اور اس کے بعد میں نے پروڈکشن چھوڑ دی تھی اس کی وجہ یہ ہی تھی کہ عدنان نے مجھے کہا کہ شوٹنگ پر میرے ساتھ میرا منیجر، 3 بیٹیاں اور ان کی نینی ( بچوں کی دیکھ بھال کرنے والی خاتون) بھی جائیں گی، اس طرح یہ 5 ٹکٹ کا خرچہ ہوگیا، مجھے ٹیم نے کہا کہ کیا ہمیں یہ لاش بناکر بھیجے گا جس پر میں نے کہا کہ آرٹسٹ ہے اور اسے ہیرو کے طور پر کاسٹ کیا گیا ہے۔

    کاظم پاشا نے بتایا کہ اسی طرح اعجاز اسلم کے بنگلے میں شوٹنگ تھی وہاں بھی عدنان نے مجھے تنگ کیا جس پر میں سیٹ چھوڑ کر چلا گیا، وہ کہتے تھے مجھے بھوک لگ رہی ہے جب تک فلاں جگہ سے کھانا نہیں آئے گا میں کام نہیں کروں گا، فلاں چیز چاہیے اگر نہیں آئی تو میں آج شوٹنگ نہیں کراؤں گا، کل ہوگی شوٹنگ،لیکن اس سب کے باوجود عدنان کو میری بیٹیوں سے بہت لگاؤ ہے اور میرے ساتھ بھی بدتمیزی کبھی نہیں کی۔

    کاظم پاشا کا انٹرویو وائرل ہونے کے بعد اس پر عدنان صدیقی نے کہا کہ کاظم صاحب وہ تنگ کرنا نہیں تھا وہ میری شرارتیں تھیں، خیر پھر بھی میں بہت شرمندہ ہوں اپنی حرکتوں پر، آپ سے معافی کی درخواست ہے، مجھے معاف کردیجئے آئندہ کبھی ایسے نہیں ہوگا۔

  • سپریم کورٹ کا 71 سال بعد بہنوں اور والدہ کو جائیداد میں حصہ دینے کا حکم

    سپریم کورٹ کا 71 سال بعد بہنوں اور والدہ کو جائیداد میں حصہ دینے کا حکم

    سپریم کورٹ کا خواتین کے وراثتی حقوق سے متعلق تحریری فیصلہ جاری کر دیا گیا

    جسٹس شاہد بلال حسن نے 13 صفحات پر مشتمل فیصلہ تحریر کیا ہے،سپریم کورٹ نے 71 سال بعد بہنوں اور والدہ کو جائیداد میں حصہ دینے کا حکم دے دیا،سپریم کورٹ نے ہائی کورٹ اور ٹرائل کورٹ کے فیصلے کالعدم قرار دے دیے،فیصلے میں کہا گیاکہ خواتین کے وراثتی حقوق کا تحفظ صرف ریاست کی ذمہ داری نہیں، سول سوسائٹی، علما، ریونیو حکام اور قانونی ماہرین ان حقوق سے انحراف کو روکیں، وراثت خواتین کا شرعی و قانونی حق ہے، خواتین کو وراثت سے محروم رکھنا غیر آئینی اور غیر اسلامی ہے، جعلی ہبہ، فراڈ اور خاندانی دباؤ سے خواتین کے وراثتی حقوق ختم نہیں ہوسکتے، 1955 میں والد کے انتقال کے بعد دو بھائیوں نے وراثتی جائیداد اپنے نام منتقل کرائی، زبانی ہبہ کو بنیاد بنا کر والدہ اور بہنوں کو جائیداد سے محروم کیا گیا،ٹرائل کورٹ نے ہبہ کے ثبوت کا درست جائزہ نہیں لیا، ہائی کورٹ کے مطابق زبانی ہبہ کو دہائیوں تک چیلنج نہیں کیا گیا، ہبہ ثابت کرنا فائدہ اٹھانے والوں کی ذمہ داری تھی،ریکارڈ کے مطابق کئی برس تک والدہ اور بہنوں کو آمدن میں حصہ ملتا رہا، سپریم کورٹ کا واضح مؤقف کہ خواتین کو وراثتی حق سے محروم رکھنا قابل قبول نہیں.

  • نامناسب انداز میں تصاویر اور ویڈیوز بنانے پر نیہا دھوپیا بھی پاپارازی پر برس پڑیں

    نامناسب انداز میں تصاویر اور ویڈیوز بنانے پر نیہا دھوپیا بھی پاپارازی پر برس پڑیں

    بھارتی اداکارہ نیہا دھوپیا نے پاپارازی کی جانب سے نامناسب انداز میں تصاویر اور ویڈیوز بنانے پر سخت ناراضگی کا اظہار کیا ہے-

    ممبئی میں ایک ایوارڈ تقریب کے دوران نیہا دھوپیا براہِ راست فوٹوگرافروں کے پاس گئیں اور کہا کہ بدتمیزی سے بیک شاٹ کون لیتا ہے؟ یہ مت کیا کریں، نہ میرے ساتھ اور نہ ہی کسی اور کے ساتھ، ہم یہ بات بار بار کہہ کر تھک گئے ہیں، ہم باہر آتے ہیں اور آپ لوگ اس طرح کی ویڈیوز بناتے ہیں،اداکارہ سوناکشی سنہا نے بھی نیہا کی حمایت کرتے ہوئے وائرل ویڈیو کے کمنٹس میں لکھا ویل ڈن نیہا۔

    نیہا کا یہ ردِعمل ان کی حالیہ ایک وائرل ویڈیو کے بعد سامنے آیا، جس میں انہیں ٹریک پر دوڑتے ہوئے فلمایا گیا تھا-

    چند روز قبل سوناکشی سنہا بھی ممبئی کے ایک ریسٹورنٹ کے باہر پاپارازی کے رویے سے نالاں دکھائی دی تھیں، وہ اپنے شوہر ظہیر اقبال اور والد کے ہمراہ موجود تھیں، جہاں انہوں نے ہاتھ جوڑ کر کہا تھا کہ بس، گائز شکریہ، گڈ نائٹ! تاہم اس کے باوجود کیمرے ان کا تعاقب کرتے رہے۔

    یہ پہلا موقع نہیں کہ کسی بھارتی اداکار نے پاپارازی کی جانب سے نجی زندگی میں مداخلت یا نامناسب زاویوں سے تصاویر لینے پر اعتراض کیا ہو، اس سے قبل سلمان خان، جھانوی کپور، پلک تیواری اور زرین خان بھی اس معاملے پر اپنی ناراضگی کا اظہار کر چکے ہیں۔

  • قصور: محکمہ اوقاف میں مبینہ میگا کرپشن کیس، سابق افسر کے خلاف مزید کارروائی کا امکان

    قصور: محکمہ اوقاف میں مبینہ میگا کرپشن کیس، سابق افسر کے خلاف مزید کارروائی کا امکان

    قصور: محکمہ اوقاف و مذہبی امور پنجاب نے حضرت داتا گنج بخشؒ کے عرس فنڈز میں مبینہ مالی بے ضابطگیوں کے معاملے پر سابق افسر حافظ جاوید شوکت سمیت تین افسران کے خلاف نئی محکمانہ انکوائری شروع کر دی ہے۔

    ذرائع کے مطابق انکوائری میں عرس فنڈز کے استعمال اور مالی معاملات کا تفصیلی جائزہ لیا جا رہا ہے، جبکہ متعلقہ افسران کے کردار کا بھی تعین کیا جائے گا۔ذرائع کا کہنا ہے کہ حافظ جاوید شوکت اس سے قبل بھی دو مختلف محکمانہ انکوائریوں میں سروس سے برطرف کیے جا چکے ہیں۔ ایک کیس میں ان پر 21 لاکھ روپے جبکہ دوسرے کیس میں 43 لاکھ روپے کی ریکوری بھی عائد کی گئی تھی۔ اسی معاملے میں دیگر متعلقہ افسران کو بھی مختلف محکمانہ سزائیں دی جا چکی ہیں۔ذرائع کے مطابق حافظ جاوید شوکت کے خلاف مزید کیسز بھی سامنے آ رہے ہیں، جن پر محکمانہ کارروائی جاری ہے۔ تاہم موجودہ انکوائری میں عائد الزامات کا حتمی فیصلہ انکوائری رپورٹ مکمل ہونے اور متعلقہ قانونی و محکمانہ کارروائی کے بعد کیا جائے گا۔

    محکمہ اوقاف کی جانب سے تاحال نئی انکوائری کے نتائج یا الزامات سے متعلق کوئی حتمی مؤقف جاری نہیں کیا گیا، جبکہ انکوائری مکمل ہونے کے بعد مزید کارروائی کا فیصلہ کیا جائے گا۔

    رپورٹ، غنی محمود قصوری

  • وینزویلا سے واپس آنے والی بھارتی ملاح کی لاش سے تمام اندرونی اعضاء غائب ہونے کا انکشاف

    وینزویلا سے واپس آنے والی بھارتی ملاح کی لاش سے تمام اندرونی اعضاء غائب ہونے کا انکشاف

    33 سالہ بھارتی ملاح راکیش چوہان کی وینزویلا میں پراسرار موت کے بعد ملک واپس بھیجی گئی لاش سے دماغ، دل، پھیپھڑوں سمیت تمام اہم اندرونی اعضا غائب ہونے کا ا نکشا ف سامنے آیا ہے-

    بھارتی میڈیا کے مطابق ملاح راکیش چوہان کے جسم سے متعدد اعضاء کے غائب ہونے کے انکشاف کے بعد اس کے اہلِ خانہ اور بھارتی ملاحوں کی تنظیم نے مکمل تحقیقات کا مطالبہ کیا ہے بھارتی ملاحوں کی فیڈریشن کے مطابق لاش کسی پوسٹ مارٹم رپورٹ یا وینزویلا کے حکام کی تفصیلات کے بغیر بھارت بھیجی گئی ہےسرکاری حکم پر ملاح کا بھارت میں دوبارہ پوسٹ مارٹم کیا گیا جس میں معلوم ہوا کہ لاش سے دماغ، دل، دونوں پھیپھڑے، جگر، گردے، معدہ، آنتیں، تلی اور دیگر تمام اہم اعضاء غائب ہیں جبکہ موت کی وجہ بھی معلوم نہیں ہو سکی۔

    ملاح کے اہلِ خانہ کا کہنا ہے کہ راکیش چوہان 2025 میں ایک تجارتی جہاز پر ملازمت کے لیے وینزویلا گیا تھا، کمپنی نے پہلے بتایا کہ وہ جہاز پر گر کر زخمی ہوا ہے جبکہ بعد میں اس کی موت کی اطلاع دے دی گئی، لاش ایک ہفتے میں واپس بھیجنے کا وعدہ کیا گیا تھا لیکن تقریباً 1 ماہ بعد لاش بھارت بھیجی گئی۔

    ملاحوں کی تنظیم نے الزام لگایا ہے کہ معاملے میں شفافیت کا فقدان ہے اور وینزویلا کے حکام نے نہ تو پوسٹ مارٹم رپورٹ فراہم کی اور نہ ہی موت کی وجوہات سے متعلق کوئی وضاحت دی ہے تنظیم نے بھارتی حکومت سے مکمل تحقیقات، ذمہ داروں کے تعین اور متاثرہ خاندان کو انصاف اور معاوضہ فراہم کرنے کا مطالبہ بھی کیا ہے۔

  • افغانستان میں دہشت گردوں کے ٹھکانوں کیخلاف کارروائی سے متعلق بھارتی بیان مسترد

    افغانستان میں دہشت گردوں کے ٹھکانوں کیخلاف کارروائی سے متعلق بھارتی بیان مسترد

    پاکستان نے افغانستان میں دہشت گردوں کے ٹھکانوں کیخلاف کارروائی سے متعلق بھارتی بیان مسترد کردیا۔

    ترجمان دفتر خارجہ نے کہا کہ بھارتی وزارت خارجہ کا بیان بے بنیاد اور حقائق کے منافی ہے، دہشت گردوں کے ٹھکانوں کیخلاف جائز کارروائیوں پر بھارتی بیان مسترد کرتے ہیں۔ترجمان کا کہنا ہے کہ بھارت خطے میں عدم استحکام اور ہمسایہ ممالک میں مداخلت کی تاریخ رکھتا ہے، بھارت مقبوضہ کشمیر میں عوام کے حق خودارادیت کو مسلسل دبا رہا ہے، بھارت افغان سرزمین سے پاکستان مخالف دہشتگرد گروہوں کی سرپرستی میں ملوث ہے۔پاکستان اپنے شہریوں کے تحفظ و سلامتی کیلئے اقدامات جاری رکھے گا۔دہشتگردوں کے ٹھکانوں کیخلاف کارروائیوں پر بھارتی بیان مسترد کرتے ہیں، خطے میں مداخلت اور افغان سرزمین سے پاکستان مخالف دہشت گردوں کی سرپرستی خود بھارت کا پرانا وطیرہ ہے۔