اٹک: کروڈ آئل کی سپلائی معطل ہونے کے باعث اٹک ریفائنری نے اپنا مرکزی پیداواری یونٹ بند کر دیا ہے، جس کے نتیجے میں پیٹرولیم مصنوعات کی پیداوار اور ترسیل بری طرح متاثر ہو گئی ہے۔ کمپنی حکام کے مطابق جب تک سپلائی کا نظام بہتر نہیں ہوتا، پلانٹ بند ہی رہے گا۔
ریفائنری انتظامیہ کا کہنا ہے کہ کروڈ آئل کی مسلسل کمی کے باعث پیداوار برقرار رکھنا ممکن نہیں رہا، جس پر مجبوراً مین یونٹ بند کرنے کا فیصلہ کیا گیا۔ اس یونٹ کی یومیہ پیداواری صلاحیت 32 ہزار 400 بیرل تھی، جو ملک میں ایندھن کی فراہمی میں اہم کردار ادا کرتی تھی۔
حکام کے مطابق ریفائنری میں تیار شدہ پیٹرول اور ڈیزل کی ترسیل بھی متاثر ہو رہی ہے۔ سپلائی چین میں رکاوٹوں کے باعث تیار مصنوعات کا اسٹاک بڑھتا جا رہا ہے، جس سے ذخیرہ کرنے کی گنجائش پر بھی دباؤ بڑھ گیا ہے۔ اس صورتحال نے نہ صرف آپریشنل نظام کو متاثر کیا بلکہ مالی نقصانات کا خدشہ بھی پیدا کر دیا ہے۔
اٹک ریفائنری نے متعلقہ حکام کو ارسال کیے گئے خط میں صورتحال کی سنگینی سے آگاہ کرتے ہوئے کہا ہے کہ فوری اقدامات نہ کیے گئے تو مسائل مزید بڑھ سکتے ہیں۔ کمپنی نے اپنے شیئر ہولڈرز کو بھی اس پیش رفت سے مطلع کر دیا ہے تاکہ کاروباری اثرات کے حوالے سے شفافیت برقرار رکھی جا سکے۔
کروڈ آئل بحران، اٹک ریفائنری کا مین یونٹ بند
