Blog

واشنگٹن: امریکہ کی سیکنڈ لیڈی اوشا وینس نے اپنے میٹرنٹی لباس پر تبصرہ کرنے والے امریکی اخبار نیویارک ٹائمز کو سوشل میڈیا پر طنزیہ انداز میں جواب دیتے ہوئے اپنے صرف 8.75 ڈالر مالیت کے لباس کی رسید بھی شیئر کر دی۔

اوشا وینس، جو امریکی نائب صدر جے ڈی وینس کے ساتھ اپنے چوتھے بچے کی منتظر ہیں، حال ہی میں اس وقت خبروں کی زینت بن گئیں جب نیویارک ٹائمز میں شائع ہونے والے ایک مضمون میں ان کے حاملہ ہونے اور ان کے لباس کے سیاسی پہلوؤں پر تبصرہ کیا گیا۔رپورٹ میں فیشن نقاد وینیسا فریڈمین نے لکھا کہ اوشا وینس نے اپنے پوڈکاسٹ "Storytime with the Second Lady” میں ایک ایسا مرجانی رنگ کا اسٹریچ ایبل لباس پہنا تھا جو ان کے حاملہ ہونے کو نمایاں کرتا تھا۔ مضمون میں یہ بھی کہا گیا کہ ٹرمپ انتظامیہ سے وابستہ نمایاں خواتین کی بیک وقت حمل کی خبریں اور ان کا عوامی انداز ایک خاص سیاسی پیغام کی عکاسی کرتا ہے۔

اس پر ردعمل دیتے ہوئے اوشا وینس نے سوشل میڈیا پلیٹ فارم ایکس پر لکھا کہ اب جبکہ ان کے 8.75 ڈالر کے اولڈ نیوی کے میٹرنٹی لباس کی بھی سیاسی اہمیت دریافت کر لی گئی ہے، وہ بے صبری سے اس دن کی منتظر ہیں جب نیویارک ٹائمز ان کی ایلاسٹک کمر والی پتلون اور کمپریشن جرابوں پر بھی تجزیہ کرے گا۔انہوں نے اپنی پوسٹ کے ساتھ اولڈ نیوی کی ویب سائٹ کا اسکرین شاٹ بھی شیئر کیا جس میں لباس کی قیمت واضح طور پر 8.75 ڈالر درج تھی۔ اوشا وینس نے مزید کہا کہ اس دوران لوگ ان کے سادہ حمل کے ملبوسات سے لطف اندوز ہوں اور اپنے بچوں کے ساتھ ان کے پوڈکاسٹ میں کہانیاں بھی سنیں۔

سوشل میڈیا پر ان کی پوسٹ کو صارفین کی جانب سے بھرپور پذیرائی ملی۔ متعدد افراد نے ان کے سادہ طرزِ زندگی اور مزاحیہ جواب کو سراہتے ہوئے انہیں بہترین رول ماڈل قرار دیا، جبکہ بعض نے کہا کہ انہوں نے معمولی قیمت کے لباس کو بھی پُروقار انداز میں پیش کیا۔

واضح رہے کہ اوشا وینس امریکی تاریخ میں تقریباً ڈیڑھ صدی بعد پہلی ایسی سیکنڈ لیڈی ہیں جو نائب صدر کی اہلیہ ہونے کے دوران حاملہ ہیں۔ اس سے قبل 1870ء میں نائب صدر شوئلر کولفیکس کی اہلیہ ایلن کولفیکس حمل کے دوران سیکنڈ لیڈی رہی تھیں۔

نیویارک: طویل عرصے سے رشتے میں رہنے والے جوڑوں کے درمیان جنسی تعلقات میں کمی کی ایک اہم مگر نظر انداز کی جانے والی وجہ سامنے آئی ہے۔ ماہرین کے مطابق شریکِ حیات کی جانب سے قربت کی خواہش ظاہر کرنے کا نامناسب انداز نہ صرف جنسی زندگی بلکہ باہمی تعلقات کو بھی متاثر کر سکتا ہے۔

لائسنس یافتہ تھراپسٹ وینیسا مارن کا کہنا ہے کہ "جنسی تعلقات کی ابتدا کا طریقہ ایک ایسا غیر مرئی مسئلہ ہے جس پر جوڑے کھل کر بات نہیں کرتے، بلکہ آہستہ آہستہ ایک دوسرے سے دور ہوتے چلے جاتے ہیں۔”ان کے مطابق تقریباً 83 فیصد جوڑے یا تو قربت کی ابتدا سے گریز کرتے ہیں، اسے غیر مؤثر انداز میں کرتے ہیں، یا اس حوالے سے بار بار دل آزاری محسوس کرتے ہیں۔ماہر کا کہنا ہے کہ اس مسئلے کی بنیادی وجہ مسترد کیے جانے کا خوف ہوتا ہے، جس کے باعث بعض افراد اپنی خواہش کو واضح انداز میں بیان کرنے کے بجائے مبہم اشاروں یا غیر سنجیدہ انداز کا سہارا لیتے ہیں۔ اس طرزِ عمل سے دوسرا شریکِ حیات خود کو غیر اہم یا صرف ایک ذمہ داری کا حصہ محسوس کر سکتا ہے۔

وینیسا مارن کے مطابق جنسی تعلقات کی کامیاب ابتدا کے لیے صرف جسمانی کشش کافی نہیں بلکہ کھلی گفتگو، باہمی اعتماد اور ایک دوسرے کی خواہشات کو سمجھنا بھی ضروری ہے۔انہوں نے کہا کہ فلموں اور ڈراموں میں دکھائے جانے والے اچانک اور بغیر گفتگو کے رومانوی مناظر حقیقت سے مختلف ہوتے ہیں، جبکہ حقیقی زندگی میں کامیاب تعلقات کے لیے واضح اظہار، احترام اور رضامندی بنیادی اہمیت رکھتے ہیں۔ماہر نے مشورہ دیا کہ جوڑے دن بھر چھوٹے چھوٹے محبت بھرے اشاروں، مثبت پیغامات، تعریف اور ایک دوسرے کے ساتھ وقت گزارنے کے ذریعے جذباتی قربت برقرار رکھیں تاکہ رومانوی تعلق قدرتی انداز میں فروغ پا سکے۔ان کا کہنا تھا کہ ہر شخص محبت اور قربت کے اظہار کا اپنا انداز رکھتا ہے، اس لیے ضروری ہے کہ شریکِ حیات سے کھل کر پوچھا جائے کہ وہ کس انداز میں محبت اور قربت کے اظہار کو زیادہ پسند کرتا یا کرتی ہے۔

وینیسا مارن کے مطابق اگر جوڑے ایک دوسرے کی "نہ” کو احترام کے ساتھ قبول کرنا سیکھ لیں اور اپنی خواہشات واضح انداز میں بیان کریں تو نہ صرف جنسی تعلقات بہتر ہو سکتے ہیں بلکہ مجموعی ازدواجی زندگی بھی زیادہ مضبوط اور خوشگوار بن سکتی ہے۔

لندن: برطانیہ کے علاقے ڈیون میں ایک چھوٹا تربیتی طیارہ گر کر تباہ ہونے کے نتیجے میں خاتون پائلٹ ہلاک ہوگئیں۔

برطانوی پولیس کے مطابق جمعہ کی صبح ڈنکسویل ایئر فیلڈ کے قریب پیش آنے والے اس حادثے میں چالیس برس کی عمر کی ایک خاتون اکیلے طیارہ اڑا رہی تھیں کہ دورانِ پرواز طیارہ اچانک حادثے کا شکار ہو کر ایک فارم میں جا گرا۔اطلاع ملتے ہی پولیس، ریسکیو اور دیگر ہنگامی امدادی ادارے صبح تقریباً 10 بجے جائے حادثہ پر پہنچ گئے، تاہم خاتون پائلٹ موقع پر ہی دم توڑ چکی تھیں۔حکام کے مطابق فضائی حادثات کی تحقیقات کرنے والے ادارے ایئر ایکسیڈنٹس انویسٹی گیشن برانچ نے واقعے کی مکمل تحقیقات کے لیے اپنی ٹیم جائے حادثہ روانہ کر دی ہے۔

ڈیون اینڈ کارنوال پولیس کی سپرنٹنڈنٹ جو آرنڈیل نے کہا کہ پولیس تحقیقات میں اے اے آئی بی کے ساتھ مکمل تعاون کرے گی تاکہ حادثے کی وجوہات کا تفصیلی تعین کیا جا سکے۔پولیس نے بتایا کہ ہلاک ہونے والی خاتون کے اہل خانہ اور دوستوں کے ساتھ دلی ہمدردی کا اظہار کیا جا رہا ہے۔

واضح رہے کہ ڈنکسویل ایئر فیلڈ، جو ایکسیٹر شہر سے تقریباً 14 میل شمال مشرق میں واقع ہے، دوسری جنگ عظیم کے دوران امریکی بحریہ کا اڈہ رہا تھا۔ سطح سمندر سے تقریباً 255 میٹر (839 فٹ) بلند ہونے کی وجہ سے اسے برطانیہ کا بلند ترین لائسنس یافتہ ایئر فیلڈ بھی قرار دیا جاتا ہے۔

بنگلورو: کرناٹک حکومت نے شہریوں کی ڈیجیٹل پرائیویسی کے تحفظ اور آن لائن ہراسانی کی روک تھام کے لیے اہم فیصلہ کرتے ہوئے پولیس کو ہدایت جاری کی ہے کہ کسی بھی شخص کی ذاتی تصاویر یا ویڈیوز بغیر اجازت شیئر یا وائرل کرنے کے ہر معاملے میں لازمی طور پر ایف آئی آر درج کی جائے۔

ریاستی حکومت کی جانب سے جاری کردہ نئی ہدایات کے مطابق اگر کسی فرد نے اپنی تصویر یا ویڈیو ریکارڈ کروانے کی رضامندی دی ہو، تو اس کا ہرگز یہ مطلب نہیں کہ اسے سوشل میڈیا یا دیگر ذرائع سے عام کرنے کی بھی اجازت حاصل ہے۔ حکومت نے واضح کیا ہے کہ ذاتی مواد کو بغیر اجازت شیئر کرنا ایک الگ قابلِ تعزیر جرم تصور کیا جائے گا، چاہے وہ مواد متاثرہ شخص کی رضامندی سے ہی ریکارڈ کیا گیا ہو۔حکومت نے پولیس کو ہدایت دی ہے کہ ایسے مقدمات بھارتیہ نیائے سنہتا (بی این ایس) 2023 اور انفارمیشن ٹیکنالوجی ایکٹ 2000 کی متعلقہ دفعات، جن میں دفعہ 77 اور آئی ٹی ایکٹ کی دفعات 66E، 67 اور 67A شامل ہیں، کے تحت درج کیے جائیں۔

حکم نامے میں مزید کہا گیا ہے کہ اگر متاثرہ شخص نے ویڈیو یا تصویر بنانے کی اجازت دی تھی تو صرف اسی بنیاد پر پولیس شکایت درج کرنے یا ایف آئی آر کے اندراج سے انکار نہیں کر سکتی۔ اگر ذاتی تصاویر یا ویڈیوز کو بلیک میلنگ، بھتہ خوری، دھمکی یا جنسی استحصال کے لیے استعمال کیا جائے تو تفتیشی افسران کو مجرمانہ دھمکی اور جبراً وصولی سے متعلق اضافی دفعات بھی شامل کرنے کی ہدایت کی گئی ہے۔حکومت نے یہ بھی واضح کیا ہے کہ اگر وقوعہ کے دائرۂ اختیار کے بارے میں فوری طور پر وضاحت نہ ہو تو متعلقہ پولیس اسٹیشن زیرو ایف آئی آر درج کرے گا اور بعد ازاں مقدمہ متعلقہ تھانے کو منتقل کیا جائے گا۔

نئی گائیڈ لائنز کے تحت پولیس کو ڈیجیٹل شواہد محفوظ رکھنے، قابلِ اعتراض مواد کو انٹرنیٹ سے ہٹانے یا بلاک کرانے اور اس سلسلے میں سائبر کرائم یونٹ سے مکمل تعاون کرنے کی ہدایت بھی دی گئی ہے۔حکومت نے متاثرہ افراد کے ساتھ باوقار اور حساس رویہ اختیار کرنے، ان کی شناخت مکمل طور پر خفیہ رکھنے اور کسی بھی قسم کی "وکٹم بلیمنگ” سے گریز کرنے پر زور دیا ہے۔ خواتین متاثرین کی شکایات، جہاں ممکن ہو، خاتون پولیس افسر کے ذریعے درج کرنے کی بھی ہدایت جاری کی گئی ہے۔حکام نے خبردار کیا ہے کہ اگر کوئی پولیس افسر اس غلط فہمی کی بنیاد پر ایف آئی آر درج کرنے سے انکار کرتا ہے کہ ریکارڈنگ کی رضامندی ہی مواد کو شیئر کرنے کی اجازت بھی ہے، تو اسے سنگین غفلت تصور کرتے ہوئے متعلقہ افسر کے خلاف محکمانہ کارروائی عمل میں لائی جائے گی۔