سان ڈیاگو: امریکا کی ریاست کیلیفورنیا کے شہر سان ڈیاگو میں گزشتہ ہفتے مقبول ساحل کے قریب سمندر سے ملنے والی خاتون کی لاش کی شناخت معروف والی بال کھلاڑی اور سرفنگ کی شوقین سمر نیش کے طور پر کر لی گئی ہے۔ حکام کے مطابق ان کی عمر 34 سال تھی جبکہ موت کی وجوہات جاننے کے لیے تحقیقات جاری ہیں۔
سان ڈیاگو کاؤنٹی میڈیکل ایگزامینر کے مطابق 18 جون کو اوشن بیچ پیئر کے قریب سمندر میں ایک خاتون کو پانی پر تیرتے ہوئے دیکھا گیا، جس کے بعد لائف گارڈز نے انہیں باہر نکالا، تاہم وہ موقع پر ہی دم توڑ چکی تھیں۔ حکام نے بتایا کہ موت کی نوعیت اور اصل وجہ کا تعین تاحال نہیں ہو سکا۔سمر نیش نے سان ڈیاگو اسٹیٹ یونیورسٹی اور فلوریڈا انٹرنیشنل یونیورسٹی کی جانب سے والی بال کھیلی اور بعد ازاں کوچنگ کے شعبے سے وابستہ ہو گئیں۔ انہوں نے امریکا کی معروف جامعات فلوریڈا اسٹیٹ اور اسٹینفورڈ یونیورسٹی کے والی بال پروگرامز میں بھی کوچنگ کی ذمہ داریاں انجام دیں۔ اطلاعات کے مطابق وہ آخری بار 2022-23 کے سیزن میں اسٹینفورڈ سے منسلک تھیں۔
سمر نیش کی والدہ نے ایک مقامی اشاعت سے گفتگو میں بتایا کہ ان کی بیٹی نہ صرف ایک باصلاحیت ایتھلیٹ تھیں بلکہ سرفنگ کا بھی بے حد شوق رکھتی تھیں اور سان ڈیاگو کے مختلف ساحلوں پر باقاعدگی سے سرفنگ کرتی تھیں۔سان ڈیاگو اسٹیٹ یونیورسٹی کی سابق ہیڈ کوچ ڈیئٹرے کولنز نے انسٹاگرام پر اپنے تعزیتی پیغام میں کہا کہ سمر نیش ایک غیر معمولی کھلاڑی تھیں، تاہم ان کی اصل پہچان ان کی شفیق طبیعت، مہربان دل اور دوسروں کی مدد کرنے والا جذبہ تھا۔ انہوں نے کہا کہ سمر کی وفات والی بال برادری کے لیے ناقابلِ تلافی نقصان ہے۔
واضح رہے کہ سدرن کیلیفورنیا میں رواں ماہ حکام نے بلند سمندری لہروں اور خطرناک سرف کے حوالے سے متعدد انتباہات بھی جاری کیے تھے، تاہم اس مرحلے پر یہ واضح نہیں کہ سمر نیش کی موت کا ان حالات سے کوئی تعلق تھا یا نہیں۔ حکام کا کہنا ہے کہ تحقیقات مکمل ہونے کے بعد مزید تفصیلات جاری کی جائیں گی۔