واشنگٹن: امریکہ کی سیکنڈ لیڈی اوشا وینس نے اپنے میٹرنٹی لباس پر تبصرہ کرنے والے امریکی اخبار نیویارک ٹائمز کو سوشل میڈیا پر طنزیہ انداز میں جواب دیتے ہوئے اپنے صرف 8.75 ڈالر مالیت کے لباس کی رسید بھی شیئر کر دی۔
اوشا وینس، جو امریکی نائب صدر جے ڈی وینس کے ساتھ اپنے چوتھے بچے کی منتظر ہیں، حال ہی میں اس وقت خبروں کی زینت بن گئیں جب نیویارک ٹائمز میں شائع ہونے والے ایک مضمون میں ان کے حاملہ ہونے اور ان کے لباس کے سیاسی پہلوؤں پر تبصرہ کیا گیا۔رپورٹ میں فیشن نقاد وینیسا فریڈمین نے لکھا کہ اوشا وینس نے اپنے پوڈکاسٹ "Storytime with the Second Lady” میں ایک ایسا مرجانی رنگ کا اسٹریچ ایبل لباس پہنا تھا جو ان کے حاملہ ہونے کو نمایاں کرتا تھا۔ مضمون میں یہ بھی کہا گیا کہ ٹرمپ انتظامیہ سے وابستہ نمایاں خواتین کی بیک وقت حمل کی خبریں اور ان کا عوامی انداز ایک خاص سیاسی پیغام کی عکاسی کرتا ہے۔
اس پر ردعمل دیتے ہوئے اوشا وینس نے سوشل میڈیا پلیٹ فارم ایکس پر لکھا کہ اب جبکہ ان کے 8.75 ڈالر کے اولڈ نیوی کے میٹرنٹی لباس کی بھی سیاسی اہمیت دریافت کر لی گئی ہے، وہ بے صبری سے اس دن کی منتظر ہیں جب نیویارک ٹائمز ان کی ایلاسٹک کمر والی پتلون اور کمپریشن جرابوں پر بھی تجزیہ کرے گا۔انہوں نے اپنی پوسٹ کے ساتھ اولڈ نیوی کی ویب سائٹ کا اسکرین شاٹ بھی شیئر کیا جس میں لباس کی قیمت واضح طور پر 8.75 ڈالر درج تھی۔ اوشا وینس نے مزید کہا کہ اس دوران لوگ ان کے سادہ حمل کے ملبوسات سے لطف اندوز ہوں اور اپنے بچوں کے ساتھ ان کے پوڈکاسٹ میں کہانیاں بھی سنیں۔
سوشل میڈیا پر ان کی پوسٹ کو صارفین کی جانب سے بھرپور پذیرائی ملی۔ متعدد افراد نے ان کے سادہ طرزِ زندگی اور مزاحیہ جواب کو سراہتے ہوئے انہیں بہترین رول ماڈل قرار دیا، جبکہ بعض نے کہا کہ انہوں نے معمولی قیمت کے لباس کو بھی پُروقار انداز میں پیش کیا۔
واضح رہے کہ اوشا وینس امریکی تاریخ میں تقریباً ڈیڑھ صدی بعد پہلی ایسی سیکنڈ لیڈی ہیں جو نائب صدر کی اہلیہ ہونے کے دوران حاملہ ہیں۔ اس سے قبل 1870ء میں نائب صدر شوئلر کولفیکس کی اہلیہ ایلن کولفیکس حمل کے دوران سیکنڈ لیڈی رہی تھیں۔