ممبئی: بالی ووڈ اداکارہ ایشا دیول نے شوہر بھرت تختانی سے طلاق کے تقریباً دو سال بعد اپنی ذاتی زندگی سے متعلق کھل کر گفتگو کرتے ہوئے کہا ہے کہ علیحدگی کے بعد اگر کسی چیز کی کمی شدت سے محسوس ہوتی ہے تو وہ محبت اور رومانس ہے، تاہم اس کے باوجود ان کا محبت پر یقین آج بھی پہلے کی طرح مضبوط ہے۔
ایشا دیول نے ایک حالیہ انٹرویو میں بتایا کہ 2024 میں 12 سالہ ازدواجی زندگی کے خاتمے کے باوجود ان کے اور سابق شوہر بھرت تختانی کے درمیان خوشگوار تعلقات برقرار ہیں۔ دونوں اپنی دو بیٹیوں کی مشترکہ پرورش کر رہے ہیں اور بچوں کی بھلائی کو ہمیشہ اولین ترجیح دیتے ہیں۔اداکارہ نے کہا کہ وہ فطری طور پر ایک رومانوی شخصیت کی مالک ہیں، اس لیے زندگی میں محبت اور رومانس کی کمی ضرور محسوس کرتی ہیں، لیکن کسی رشتے کے ختم ہونے سے ان کا محبت، اعتماد اور تعلقات پر یقین کبھی متزلزل نہیں ہوا۔
اپنی ماضی کی زندگی کا ذکر کرتے ہوئے ایشا دیول نے انکشاف کیا کہ شادی سے پہلے بھی ان کے بوائے فرینڈز رہے اور مختلف مواقع پر بریک اپس کا سامنا بھی کرنا پڑا، مگر ان تجربات نے بھی محبت پر ان کے اعتماد کو کمزور نہیں کیا۔ ان کے بقول، "میرے پہلے بھی بوائے فرینڈز تھے، پہلے بھی بریک اپ ہوئے، لیکن ان میں سے کوئی بھی چیز محبت پر میرے یقین کو ہلا نہیں سکی۔”انہوں نے مزید کہا کہ وہ اپنے والدین، معروف اداکار دھرمندر اور ہیما مالنی، کی مضبوط محبت کو دیکھتے ہوئے بڑی ہوئی ہیں، اسی لیے ان کا ماننا ہے کہ حقیقی محبت ہمیشہ موجود رہتی ہے۔
طلاق سے متعلق گفتگو کرتے ہوئے ایشا دیول نے کہا کہ یہ ان کی نجی زندگی کا انتہائی ذاتی معاملہ تھا اور وہ کبھی بھی اپنی ذاتی زندگی کو عوامی بحث کا موضوع نہیں بنانا چاہتی تھیں۔ ان کے مطابق چونکہ اس معاملے میں ان کی بیٹیاں بھی شامل تھیں، اس لیے ہر فیصلہ نہایت سوچ سمجھ کر کیا گیا۔
واضح رہے کہ ایشا دیول اور بھارت تختانی نے 2012 میں شادی کی تھی، تاہم تقریباً 12 برس بعد دونوں نے باہمی رضامندی سے علیحدگی اختیار کر لی۔ ان کی طلاق اس وقت بالی ووڈ کی نمایاں خبروں میں شامل رہی، تاہم دونوں نے ہمیشہ باوقار انداز میں اپنی نجی زندگی کو میڈیا کی توجہ سے دور رکھنے کی کوشش کی۔
