بھارت کی ریاست تامل ناڈو میں ایک افسوسناک حادثے میں بندروں کو پھل کھلانے کے دوران خوفزدہ ہو کر توازن کھو دینے والی نئی نویلی دلہن گہری کھائی میں گر کر جان کی بازی ہار گئی۔
بھارتی میڈیا رپورٹس کے مطابق جاں بحق ہونے والی خاتون کی شناخت 24 سالہ انیتا کے نام سے ہوئی ہے، جس کی شادی گزشتہ ماہ ہی 29 سالہ سریش سے ہوئی تھی۔ سریش بیرون ملک ملازمت کرتا ہے اور حال ہی میں وطن واپس آیا تھا۔رپورٹس کے مطابق شادی کے بعد جوڑا مقامی مندر میں مذہبی رسومات کی ادائیگی کے لیے گیا، جہاں پوجا مکمل کرنے کے بعد دونوں قریبی پہاڑی کی چوٹی پر موجود بندروں کو پھل کھلانے لگے۔اسی دوران اچانک بڑی تعداد میں بندر ان کے قریب جمع ہوگئے، جس سے انیتا شدید خوفزدہ ہوگئی۔ گھبراہٹ کے باعث اس کا توازن بگڑ گیا اور وہ پہاڑی سے نیچے گہری کھائی میں جا گری۔مقامی افراد نے فوری طور پر امدادی کارروائی شروع کی، تاہم خاتون کو بچایا نہ جا سکا۔ میڈیا رپورٹس کے مطابق انیتا موقع پر ہی دم توڑ گئی۔