Blog

سینیٹ قائمہ کمیٹی نے سوشل میڈیا پلیٹ فارمز کی جانب سے پاکستانی اداروں سے تعاون نہ کرنے کا نوٹس لے لیا، وزارت داخلہ اور پی ٹی اے سے فوری بریفنگ طلب کرتے ہوئے کل اجلاس بھی بلالیا۔

وزیر دفاع خواجہ آصف کی ایکس پر اسرائیل مخالف پوسٹ کا معاملہ بھی ایجنڈے میں شامل ہے،اجلاس میں سیکریٹری داخلہ اور چیئرمین پی ٹی اے حکمت عملی پر بریفنگ دیں گے، خواجہ آصف کی پوسٹ ایکس سے ہٹائے جانے پر بھی قائمہ کمیٹی کو بریفنگ دی جائے گی۔

دوسری جانب سینیٹ کی قائمہ کمیٹی میں ایف بی آر کی کارکردگی پر سوالات اٹھ گئے، سینیٹ کی قائمہ کمیٹی کابینہ سیکرٹریٹ کے اجلاس میں سینیٹر عبدالقادر نے کہا افسران کو بھاری تنخواہیں اسمگلنگ روکنے اور ٹیکس زیادہ اکٹھا کرنے کیلئے دی گئیں مگر پھر بھی ٹارگٹ پورا نہیں ہورہا۔انہوں نے کہا کہ مشرق وسطیٰ جنگ سے پہلے ایف بی آر کا ٹیکس جمع کرنے کا ٹارگٹ 500 ارب روپے کم تھا اب تو پہلے سے کہیں زیادہ ہوگیا ہوگا۔ سینیٹر عبدالقادر کا کہنا ہے کہ افسران کو بھاری تنخواہ ضرور دیں مگر وہ ٹارگٹ بھی تو پورا کریں۔

صدر مملکت آصف علی زرداری کی ہانگژو جن جیانگ گروپ کے سی ای او وانگ جیان سے ملاقات ہوئی ہے

صدر مملکت آصف زرداری نے چینی کمپنی کو پاکستان میں توانائی، صنعت اور زراعت میں سرمایہ کاری بڑھانے کی دعوت کی، ملاقات میں متبادل توانائی، واٹر ٹریٹمنٹ اور الیکٹرک وہیکل بیٹری سسٹم میں چینی سرمایہ کاری کی ضرورت پر زور دیا گیا،ہانگژو جن جیانگ گروپ کو پاکستان میں اپنے قدم جمانے اور کاروبار کو وسعت دینے کی ترغیب دی گئی، صدر مملکت آصف علی زرداری کا کہنا تھا کہ پاکستان مختلف شعبوں، بالخصوص جدید ٹیکنالوجی میں غیر ملکی سرمایہ کاری کی بھرپور حوصلہ افزائی کر رہا ہے،پاک چین شراکت داری سے پائیدار ترقی اور صنعتی استحکام ممکن ہو گا،حکومتِ غیر ملکی سرمایہ کاروں کو ہر ممکن سہولیات فراہم کرے گی،

پاکستان کے قدیم اور منفرد ثقافتی ورثے کو عالمی سطح پر متعارف کروانے اور اسے محفوظ بنانے کی حکومتی کاوشیں ایک اہم سنگِ میل عبور کر گئی ہیں۔ خیبرپختونخوا کی خوبصورت وادیِ کیلاش کو باضابطہ طور پر یونیسکو کے عالمی ثقافتی ورثے کی فہرست میں شامل کر لیا گیا ہے، جسے ملک کے لیے ایک بڑی سفارتی اور ثقافتی کامیابی قرار دیا جا رہا ہے۔

یہ فیصلہ اس حقیقت کا اعتراف ہے کہ وادیِ کیلاش نہ صرف ایک منفرد تہذیبی شناخت رکھتی ہے بلکہ یہ ایک ایسے قدیم اور نسبتاً محفوظ معاشرے کی نمائندگی بھی کرتی ہے جس نے وقت کے ساتھ اپنی روایات، رسومات اور ثقافتی ورثے کو برقرار رکھا ہوا ہے۔وادیِ کیلاش خیبرپختونخوا میں کوہِ ہندوکش کے دامن میں واقع ہے، جہاں بمبوریت، رمبور اور بریر جیسی حسین وادیوں میں کیلاش قبیلے کے لوگ آباد ہیں۔ یہ خطہ اپنی الگ زبان، مذہبی رسومات، تہواروں اور طرزِ زندگی کی وجہ سے دنیا بھر میں منفرد حیثیت رکھتا ہے۔یونیسکو کی جانب سے اس خطے کو عالمی ثقافتی ورثہ قرار دیے جانے کے بعد پاکستان کے ثقافتی تنوع اور مذہبی ہم آہنگی کو عالمی سطح پر مثبت انداز میں اجاگر کرنے میں مدد ملے گی۔ ماہرین کے مطابق یہ فیصلہ نہ صرف پاکستان کی سیاحت کو فروغ دے گا بلکہ مقامی ثقافت کے تحفظ اور عالمی سطح پر اس کی شناخت مضبوط بنانے میں بھی اہم کردار ادا کرے گا۔

یونیسکو کی جانب سے اس اعتراف کو پاکستان میں ثقافتی رواداری، مذہبی ہم آہنگی اور تاریخی ورثے کے تحفظ کی عالمی توثیق قرار دیا جا رہا ہے، جو ملک کی سافٹ پاور میں اضافہ کرے گا۔ماہرین کا کہنا ہے کہ اس فیصلے سے وادیِ کیلاش کی قدیم تہذیب کو عالمی تحفظ حاصل ہوگا اور آنے والی نسلوں کے لیے اس منفرد ثقافتی ورثے کو محفوظ رکھنے کی راہیں مزید مضبوط ہوں گی۔