فیفا ورلڈ کپ 2026 کے پہلے کوارٹر فائنل میں فرانس نے مراکش کو صفر کے مقابلے میں 2 گول سے شکست دے کر سیمی فائنل میں جگہ بنا لی، تاہم میچ کے بعد برطانیہ کے دارالحکومت لندن میں جشن کے دوران صورتحال کشیدہ ہوگئی جہاں شائقین اور پولیس کے درمیان جھڑپیں ہوئیں، ایک پولیس اہلکار زخمی جبکہ متعدد افراد کو گرفتار کر لیا گیا۔
برطانوی پولیس کے مطابق لندن کی ایجویئر روڈ پر سینکڑوں افراد فرانس کی فتح کا جشن منانے کے لیے جمع ہوئے، تاہم ہجوم نے سڑک بلاک کر دی جس سے ٹریفک معطل ہوگئی۔ بعد ازاں بعض شرکاء کی جانب سے پولیس پر شیشے کی بوتلیں پھینکی گئیں اور آتش بازی بھی کی گئی، جس کے باعث حالات مزید خراب ہوگئے۔میٹروپولیٹن پولیس کے بیان کے مطابق ہنگامہ آرائی کے دوران ایک پولیس اہلکار کے سر پر شیشے کی بوتل لگی، جس کے باعث اسے اسپتال منتقل کرنا پڑا۔ واقعے میں چار افراد کو پرتشدد ہنگامہ آرائی کے الزام میں گرفتار کیا گیا جبکہ اضافی پولیس نفری تعینات کرکے صورتحال پر قابو پایا گیا۔ پولیس کا کہنا ہے کہ علاقے میں سی سی ٹی وی اور سوشل میڈیا پر گردش کرنے والی ویڈیوز کا جائزہ لیا جا رہا ہے تاکہ تمام ذمہ دار افراد کو قانون کے کٹہرے میں لایا جا سکے۔
ادھر میدان میں فرانس نے شاندار کھیل کا مظاہرہ کرتے ہوئے مراکش کو 2-0 سے شکست دی۔ فرانس کی جانب سے کپتان کائلیان ایمباپے نے پہلا جبکہ عثمان ڈیمبیلے نے دوسرا گول اسکور کیا۔ اگرچہ ایمباپے پہلے ہاف میں پنالٹی پر گول کرنے میں ناکام رہے، تاہم بعد میں نہ صرف گول کیا بلکہ دوسرے گول کی بنیاد بھی فراہم کی۔
ایمباپے نے اس میچ کے ساتھ ایک اور تاریخی اعزاز اپنے نام کر لیا۔ کھیلوں کے اعداد و شمار فراہم کرنے والے ادارے کے مطابق وہ گزشتہ 56 برسوں میں ایک ہی ورلڈ کپ میں 10 سے زائد گولز یا گول اسسٹ میں حصہ لینے والے پہلے فٹبالر بن گئے ہیں۔ اس کے علاوہ وہ ورلڈ کپ کی تاریخ میں آٹھ مختلف میچز میں فیصلہ کن گول کرنے والے پہلے کھلاڑی بھی بن گئے ہیں۔