امریکی حکام نے دعویٰ کیا ہے کہ ایران کے ساتھ تکنیکی سطح کے مذاکرات جاری ہیں۔
غیر ملکی میڈیا کے مطابق امریکی حکام کا کہنا ہے کہ امریکا ایران کے ساتھ مسائل کے حل کے لیے پرعزم ہے۔
پاکستان اور قطر بطور ثالث ایران اور امریکا کو دوبارہ مذاکرات کی میز پر لانے کے لیے کوششیں کر رہے ہیں،یہ پیش رفت ایسے وقت میں سامنے آئی ہے جب امریکا اور ایران کے درمیان دوبارہ کشیدگی شروع ہوگئی ہے۔امریکی فوج کی جانب سے گزشتہ 2 روز سے ایران پر حملے کیے گئے،ایران نے بھی جوابی کارروائی کرتے ہوئے خطے میں امریکی فوجی اڈوں کو نشانہ بنایا۔
دوسری جانب روس نے ایران اور امریکا کے درمیان بڑھتی ہوئی کشیدگی کے منصفانہ اور سفارتی حل پر زور دیتے ہوئے کہا ہے کہ کسی بھی ممکنہ معاہدے میں تمام متعلقہ فریقوں کے مفادات کا خیال رکھا جانا چاہیے۔روسی وزیر خارجہ سرگئی لاوروف نے اپنے بیان میں کہا کہ کسی بھی معاہدے میں صرف امریکا اور ایران ہی نہیں بلکہ خطے کے پڑوسی ممالک اور دیگر متعلقہ فریقوں کے مفادات کو بھی شامل کیا جانا ضروری ہے۔ ان کا کہنا تھا کہ موجودہ کشیدگی سے متعدد ممالک اور عالمی معیشت متاثر ہو رہی ہے، جبکہ آبنائے ہرمز اور خلیج فارس کی صورتحال پر روس اور ایران کا مؤقف ایک جیسا ہے۔ انہوں نے اس بات پر زور دیا کہ تنازع کا پرامن حل تلاش کرنا وقت کی اہم ضرورت ہے۔