اسلام آباد: ورلڈ بینک نے پاکستان میں بجلی کے ترسیلی نظام کو مضبوط بنانے کے لیے 37 کروڑ 59 لاکھ ڈالر کی مالی معاونت کی منظوری دے دی ہے۔ اس منصوبے کا مقصد ملک کے بجلی کے ترسیلی نیٹ ورک کو جدید خطوط پر استوار کرنا، بریک ڈاؤن میں کمی لانا اور توانائی کی فراہمی کو زیادہ مؤثر بنانا ہے۔
ورلڈ بینک کی جانب سے جاری اعلامیے کے مطابق اس مالی معاونت کے ذریعے قومی گرڈ کے بنیادی ڈھانچے کو بہتر بنایا جائے گا تاکہ بجلی کی ترسیل میں حائل تکنیکی رکاوٹیں دور ہوں اور نظام کی استعداد میں اضافہ کیا جا سکے۔ منصوبے کے تحت جدید آلات کی تنصیب، اہم سب اسٹیشنز کی اپ گریڈیشن اور بجلی کے بہاؤ کو بہتر بنانے کے اقدامات کیے جائیں گے۔ورلڈ بینک کے کنٹری ڈائریکٹر کا کہنا ہے کہ پاکستان کو درپیش توانائی کے مسائل براہ راست ملکی معاشی استحکام سے جڑے ہوئے ہیں۔ ان کے مطابق کمزور ترسیلی نظام کی وجہ سے کروڑوں پاکستانی متاثر ہو رہے ہیں، جبکہ بجلی پیدا کرنے کی موجودہ صلاحیت سے مکمل فائدہ نہ اٹھائے جانے کے باعث عوام کو لوڈشیڈنگ اور مہنگی بجلی کا سامنا کرنا پڑتا ہے۔اعلامیے میں کہا گیا ہے کہ منصوبے کی تکمیل سے گھریلو صارفین، کاروباری اداروں اور صنعتی شعبے تک زیادہ مقدار میں ماحول دوست اور قابلِ اعتماد بجلی کی فراہمی ممکن ہو سکے گی۔ اس کے علاوہ ترسیلی نظام میں بہتری کے باعث بجلی کی مجموعی لاگت میں کمی آئے گی اور قومی گرڈ میں قابلِ تجدید توانائی کے مزید انضمام کی راہ بھی ہموار ہوگی۔
ورلڈ بینک کے مطابق یہ منصوبہ پاکستان کے توانائی کے شعبے میں اصلاحات، بجلی کی ترسیل کی استعداد بڑھانے اور پائیدار اقتصادی ترقی کے اہداف کے حصول میں اہم کردار ادا کرے گا، جس سے نہ صرف بجلی کی فراہمی میں استحکام آئے گا بلکہ صارفین کو بہتر اور زیادہ قابلِ اعتماد توانائی کی سہولت بھی میسر ہوگی۔