خیبر پختونخوا کے ضلع کرک میں قانون نافذ کرنے والے اداروں نے مشترکہ انٹیلی جنس بیسڈ آپریشن کے دوران چار دہشت گردوں کو ہلاک کر دیا۔
پولیس کے مطابق خٹک ڈیم کے قریب کرک اور کوہاٹ پولیس نے خفیہ اطلاعات کی بنیاد پر مشترکہ کارروائی کی۔ آپریشن کے دوران دہشت گردوں نے پولیس پر فائرنگ کی، جس کے جواب میں سیکیورٹی اہلکاروں نے مؤثر کارروائی کرتے ہوئے چار دہشت گردوں کو ہلاک کر دیا۔پولیس حکام کا کہنا ہے کہ ہلاک ہونے والے دہشت گرد کالعدم زاہد گروپ سے تعلق رکھتے تھے اور ماضی میں متعدد پولیس افسران کی شہادت سمیت دہشت گردی کی مختلف کارروائیوں میں مطلوب تھے۔حکام کے مطابق علاقے میں سرچ آپریشن جاری ہے تاکہ ممکنہ طور پر فرار ہونے والے دیگر دہشت گردوں کو بھی گرفتار یا ہلاک کیا جا سکے۔ سیکیورٹی کے پیش نظر علاقے کو گھیرے میں لے کر شواہد اکٹھے کیے جا رہے ہیں۔
پولیس نے اس کارروائی کو دہشت گردی کے خلاف اہم کامیابی قرار دیتے ہوئے کہا ہے کہ خیبر پختونخوا میں امن و امان کی بحالی کے لیے انٹیلی جنس بیسڈ آپریشنز کا سلسلہ جاری رہے گا اور دہشت گرد عناصر کے خلاف بلاامتیاز کارروائیاں کی جائیں گی۔