Blog

‎ٹوکیو: جاپان کے شمالی ساحل کے قریب جمعرات کی صبح رش کے اوقات میں 7.2 شدت کا طاقتور زلزلہ آیا، جس سے شمال مشرقی جاپان کے درجنوں شہروں میں جھٹکے محسوس کیے گئے، تاہم جاپانی محکمہ موسمیات نے سونامی کے کسی خطرے کی تردید کرتے ہوئے کہا ہے کہ کسی بڑے جانی نقصان کی اطلاع نہیں ملی۔
‎زلزلے کے جھٹکے دارالحکومت ٹوکیو میں بھی ہلکی شدت سے محسوس کیے گئے، جس کے باعث شہریوں میں کچھ دیر کے لیے خوف و ہراس پھیل گیا۔ محکمہ موسمیات کے مطابق زلزلے کا مرکز ایواتے پریفیکچر کے مشرقی ساحل کے قریب سمندر میں تھا اور اس کی گہرائی تقریباً 50 کلومیٹر ریکارڈ کی گئی۔
‎جاپانی محکمہ موسمیات نے ابتدائی طور پر زلزلے کی شدت 6.9 بتائی تھی، تاہم بعد ازاں اسے بڑھا کر 7.2 کر دیا گیا، جبکہ امریکی جیولوجیکل سروے نے اس کی شدت 6.9 ریکارڈ کی۔
‎مقامی حکام کے مطابق زلزلے کے نتیجے میں کسی بڑے نقصان یا شدید زخمی ہونے کی اطلاع موصول نہیں ہوئی۔ ہاشی کامی قصبے کی ایک اسکول پرنسپل نے بتایا کہ وہ ڈیوٹی پر جا رہی تھیں جب ان کی گاڑی اچانک زور سے ہلنے لگی۔ اسکول میں موجود تمام بچے محفوظ رہے، تاہم کئی بچے خوف کے باعث رونے لگے۔
‎یاد رہے کہ یہ وہی علاقہ ہے جہاں گزشتہ چند ماہ کے دوران کئی طاقتور زلزلے آ چکے ہیں۔ دسمبر میں بھی اسی خطے میں آنے والے شدید زلزلے کے بعد ایک ہفتے کے لیے ممکنہ بڑے زلزلے کا انتباہ جاری کیا گیا تھا۔

‎واشنگٹن: دنیا بھر میں 50 سال سے کم عمر افراد میں آنتوں کے کینسر سمیت مختلف اقسام کے کینسر کے کیسز میں تیزی سے اضافہ ہو رہا ہے، جبکہ ایک نئی تحقیق میں اس رجحان کی ایک اہم ممکنہ وجہ سامنے آئی ہے۔
‎امریکا کی واشنگٹن یونیورسٹی اسکول آف میڈیسن کی تحقیق کے مطابق 1980 اور 1990 کی دہائی میں پیدا ہونے والے افراد کی حیاتیاتی عمر (Biological Age) پہلے کی نسلوں کے مقابلے میں زیادہ تیزی سے بڑھ رہی ہے، جس کے نتیجے میں کم عمری میں کینسر سمیت مختلف بیماریوں کا خطرہ بھی بڑھ جاتا ہے۔
‎محققین نے 1965 سے 1969 اور 1990 سے 1999 کے درمیان پیدا ہونے والے افراد کا موازنہ کیا تو معلوم ہوا کہ نئی نسل میں حیاتیاتی عمر حقیقی عمر کے مقابلے میں زیادہ تیزی سے بڑھ رہی ہے، جبکہ یہ فرق مردوں میں خواتین کے مقابلے میں زیادہ نمایاں پایا گیا۔
‎تحقیق کے مطابق حیاتیاتی عمر اور اصل عمر کے درمیان جتنا زیادہ فرق ہوگا، اتنا ہی پھیپھڑوں، نظامِ ہاضمہ اور بالخصوص آنتوں کے کینسر کا خطرہ بڑھ جاتا ہے۔ اعداد و شمار سے ظاہر ہوا کہ 1990 سے 2019 کے دوران 50 سال سے کم عمر افراد میں کینسر کے کیسز میں 24 فیصد اضافہ ریکارڈ کیا گیا، جبکہ آنتوں کا کینسر نوجوانوں میں تیزی سے بڑھنے والی بیماریوں میں شامل ہے۔
‎ماہرین کا کہنا ہے کہ قبل از وقت بلوغت، موٹاپا، ذیابیطس، فالج کے بڑھتے کیسز اور غیر صحت مند طرزِ زندگی حیاتیاتی عمر میں اضافے کی ممکنہ وجوہات ہیں، جو کینسر کے خطرے میں بھی اضافہ کر سکتے ہیں۔
‎تحقیق میں یہ بھی سامنے آیا کہ اگر مدافعتی نظام یا جسم میں چربی کے ٹشوز کی حیاتیاتی عمر زیادہ ہو جائے تو آنتوں کے کینسر کا خطرہ مزید بڑھ سکتا ہے۔
‎محققین نے واضح کیا کہ نوجوانوں میں کینسر کے بڑھتے ہوئے کیسز کی حتمی وجہ ابھی سامنے نہیں آئی، تاہم ایسی تحقیقات اس مسئلے کو بہتر انداز میں سمجھنے میں مدد دے رہی ہیں۔ انہوں نے کہا کہ مستقبل میں ماحول، طرزِ زندگی اور دیگر عوامل کے اثرات پر مزید تحقیق کی جائے گی تاکہ اس بیماری کی روک تھام کے مؤثر طریقے تلاش کیے جا سکیں۔

‎یورپ اس وقت شدید گرمی کی غیر معمولی لہر کی زد میں ہے، جہاں کئی ممالک میں ریکارڈ توڑ درجہ حرارت نے معمولاتِ زندگی متاثر کر دیے ہیں۔ اسپین میں صرف چار روز کے دوران گرمی سے متعلق مختلف واقعات میں 200 سے زائد افراد جان کی بازی ہار چکے ہیں، جبکہ کئی علاقوں میں درجہ حرارت 42 ڈگری سینٹی گریڈ تک پہنچ گیا ہے۔
‎برطانیہ میں محکمہ موسمیات نے ملک کے بیشتر حصوں کے لیے شدید گرمی کی ریڈ وارننگ میں کل رات تک توسیع کر دی ہے۔ ماہرین کے مطابق درجہ حرارت 40 ڈگری سینٹی گریڈ تک پہنچنے کا امکان ہے، جو ملک کے لیے غیر معمولی صورتحال سمجھی جا رہی ہے۔
‎برطانوی علاقے سرے میں جون کے مہینے کی گرمی کا 50 سالہ ریکارڈ ٹوٹ گیا، جہاں درجہ حرارت 35.7 ڈگری سینٹی گریڈ ریکارڈ کیا گیا، جبکہ 1976 میں جون کے دوران 35.6 ڈگری سینٹی گریڈ کا ریکارڈ قائم ہوا تھا۔
‎ادھر فرانس بھی شدید ہیٹ ویو سے متاثر ہے، جہاں گرمی کے باعث ہلاکتوں کی تعداد 50 ہو گئی ہے۔ کئی علاقوں میں درجہ حرارت 44 ڈگری سینٹی گریڈ سے تجاوز کر گیا، جبکہ دارالحکومت پیرس میں بھی پارہ 40 ڈگری تک پہنچ گیا، جو گزشتہ کئی دہائیوں کی بلند ترین سطحوں میں شمار کیا جا رہا ہے۔
‎اٹلی میں بھی صورتحال تشویشناک ہے، جہاں حکومت نے 16 بڑے شہروں میں شدید گرمی کا ریڈ الرٹ جاری کرتے ہوئے شہریوں کو غیر ضروری طور پر گھروں سے باہر نہ نکلنے اور احتیاطی تدابیر اختیار کرنے کی ہدایت کی ہے۔
‎ماہرین صحت نے خبردار کیا ہے کہ بزرگ افراد، بچے اور دائمی بیماریوں میں مبتلا شہری شدید گرمی سے زیادہ متاثر ہو سکتے ہیں، اس لیے پانی کا زیادہ استعمال، دھوپ سے بچاؤ اور احتیاطی تدابیر اختیار کرنا انتہائی ضروری ہے۔

‎عالمی منڈی میں سونے کی قیمتوں میں مسلسل دوسرے روز بھی کمی ریکارڈ کی گئی، جس کے بعد قیمتیں گزشتہ سات ماہ سے زائد عرصے کی کم ترین سطح کے قریب پہنچ گئی ہیں۔ ماہرین کے مطابق مضبوط امریکی ڈالر اور شرح سود میں اضافے کے خدشات کے باعث سرمایہ کاروں کی سونے میں دلچسپی کم ہو رہی ہے۔
‎بین الاقوامی مارکیٹ میں اسپاٹ گولڈ کی قیمت 0.4 فیصد کمی کے بعد 3,985.89 ڈالر فی اونس تک آگئی، جبکہ اگست ڈلیوری کے لیے امریکی گولڈ فیوچرز بھی 0.2 فیصد کمی کے ساتھ 4,001.60 ڈالر فی اونس پر ٹریڈ ہوئے۔ بدھ کے روز سونا پہلی بار نومبر 2025 کے بعد 4 ہزار ڈالر فی اونس کی اہم نفسیاتی سطح سے نیچے آ گیا تھا۔
‎دیگر قیمتی دھاتوں میں بھی ملا جلا رجحان دیکھا گیا۔ چاندی کی قیمت 0.2 فیصد کمی کے ساتھ 57.33 ڈالر فی اونس، پلاٹینم 1,575.85 ڈالر فی اونس جبکہ پیلیڈیم 0.3 فیصد اضافے کے بعد 1,170.25 ڈالر فی اونس تک پہنچ گیا۔
‎عالمی منڈی میں قیمتوں میں کمی کے اثرات پاکستان میں بھی نمایاں ہونے لگے ہیں۔ آل پاکستان صرافہ ایسوسی ایشن کے مطابق حالیہ کاروباری روز کے دوران 24 قیراط فی تولہ سونا 10 ہزار 400 روپے سستا ہو کر 4 لاکھ 32 ہزار 236 روپے پر آ گیا، جبکہ 10 گرام سونے کی قیمت 9 ہزار 360 روپے کمی کے بعد 3 لاکھ 68 ہزار 985 روپے ہو گئی۔
‎مارکیٹ ماہرین کا کہنا ہے کہ اگر عالمی سطح پر سونے کی قیمتوں میں یہی رجحان برقرار رہا تو آئندہ دنوں میں پاکستان میں بھی سونے کی قیمتوں میں مزید کمی دیکھنے کو مل سکتی ہے۔

‎تہران: ایرانی صدر مسعود پزشکیان نے یومِ عاشور کے موقع پر اپنے خصوصی پیغام میں حضرت امام حسینؓ اور شہدائے کربلا کو خراجِ عقیدت پیش کرتے ہوئے کہا ہے کہ امام حسینؓ نے پوری انسانیت کو ظلم، اقتدار کی ہوس اور مفاد پرستی کے سامنے سر نہ جھکانے کا لازوال درس دیا۔
‎سماجی رابطے کی ویب سائٹ ایکس پر جاری اپنے پیغام میں ایرانی صدر نے کہا کہ حضرت امام حسینؓ کی عظیم قربانی یہ پیغام دیتی ہے کہ جان تو قربان کی جا سکتی ہے، لیکن آزادی، غیرتِ نفس اور حق کا سودا نہیں کیا جا سکتا۔
‎انہوں نے کہا کہ انسان تنہا رہ سکتا ہے، مگر سچ کا دامن نہیں چھوڑ سکتا۔ ان کا کہنا تھا کہ کربلا کا پیغام صرف ایک تاریخی واقعہ نہیں بلکہ ہر دور کے انسان کے لیے حق، انصاف اور استقامت کی علامت ہے۔
‎مسعود پزشکیان نے اپنے پیغام میں اس عزم کا اظہار بھی کیا کہ نہ ہم ظلم کریں گے، نہ ظلم برداشت کریں گے اور نہ ہی ظلم کے سامنے خاموشی اختیار کریں گے۔

میکسیکو سٹی: فیفا ورلڈ کپ میں میکسیکو کی شاندار فتح کا جشن اس وقت افسوسناک حادثے میں تبدیل ہو گیا جب ایک تیز رفتار گاڑی جشن منانے والے شائقین کے ہجوم میں جا گھسی، جس کے نتیجے میں 17 افراد زخمی ہو گئے۔
‎غیر ملکی خبر رساں ادارے کے مطابق میکسیکو نے گروپ مرحلے کے اپنے آخری میچ میں چیک ریپبلک کو 3-0 سے شکست دی، جس کے بعد ملک کے مختلف شہروں میں شائقین سڑکوں پر نکل آئے اور فتح کا جشن منانے لگے۔
‎حکام کے مطابق ابتدائی تحقیقات سے معلوم ہوا ہے کہ ایک مقام پر لوگوں کے ایک گروپ نے گاڑی کو گھیر لیا تھا، تاہم نامعلوم وجوہات کی بنا پر ڈرائیور نے اچانک گاڑی ہجوم کی طرف بڑھا دی، جس سے متعدد افراد زخمی ہو گئے۔
‎ریسکیو حکام نے زخمی ہونے والے تمام 17 افراد کو فوری طبی امداد کے لیے اسپتال منتقل کیا، جبکہ زخمیوں میں گاڑی کا ڈرائیور بھی شامل ہے۔ پولیس نے ڈرائیور کو حراست میں لے کر واقعے کی تحقیقات شروع کر دی ہیں تاکہ حادثے کی اصل وجہ معلوم کی جا سکے۔
‎کابو سان لوکاس کے قائم مقام میئر نے متاثرہ افراد اور ان کے اہل خانہ سے اظہارِ ہمدردی کرتے ہوئے کہا کہ انتظامیہ شفاف تحقیقات یقینی بنائے گی اور عوام کو پیش رفت سے مسلسل آگاہ رکھا جائے گا۔
‎واضح رہے کہ کابو سان لوکاس میکسیکو کا معروف سیاحتی شہر ہے، جہاں ہر سال لاکھوں ملکی اور غیر ملکی سیاح آتے ہیں۔ واقعے کے بعد علاقے میں سیکیورٹی مزید سخت کر دی گئی ہے۔

‎نیویارک: دنیا کے امیر ترین شخص اور ٹیکنالوجی کی دنیا کی معروف شخصیت ایلون مسک اپنی کھرب پتی (ٹریلین ایئر) حیثیت سے محروم ہو گئے ہیں۔ اسپیس ایکس اور ٹیسلا کے حصص میں نمایاں کمی کے باعث ان کی مجموعی دولت میں بڑا نقصان ریکارڈ کیا گیا ہے۔
‎غیر ملکی میڈیا رپورٹس کے مطابق صرف دو ہفتے قبل اسپیس ایکس کے حصص کی کامیاب لسٹنگ کے بعد ایلون مسک دنیا کے پہلے کھرب پتی بن گئے تھے، تاہم مارکیٹ میں حالیہ گراوٹ نے ان کی دولت کو نمایاں طور پر متاثر کیا ہے۔
‎بلوم برگ بلینیئرز انڈیکس کے مطابق ایلون مسک کی مجموعی دولت 1.11 ٹریلین ڈالر سے کم ہو کر 957 ارب ڈالر رہ گئی ہے، جس کے بعد وہ کھرب پتی شخصیات کی فہرست سے باہر ہو گئے ہیں۔
‎رپورٹس کے مطابق اسپیس ایکس اور ٹیسلا کے شیئرز میں تیزی سے آنے والی کمی کے ساتھ دیگر بڑی ٹیکنالوجی کمپنیوں کے حصص بھی دباؤ کا شکار رہے، جس نے سرمایہ کاروں کے اعتماد کو متاثر کیا۔
‎ماہرین کے مطابق مصنوعی ذہانت سے وابستہ منصوبوں کے طویل مدتی منافع کے حوالے سے بڑھتے ہوئے خدشات اور سرمایہ کاری کے اخراجات میں اضافے نے ٹیکنالوجی سیکٹر میں فروخت کا رجحان بڑھایا، جس کے اثرات ایلون مسک کی دولت پر بھی پڑے۔
‎اگرچہ ایلون مسک کی دولت میں نمایاں کمی آئی ہے، تاہم وہ اب بھی دنیا کے امیر ترین شخص ہیں اور ان کی مجموعی دولت اپنے قریب ترین حریفوں سے کہیں زیادہ ہے۔