آزاد کشمیر سے متعلق فیک خبر پر حکومتِ پاکستان کا بی بی سی اردو سے باضابطہ احتجاج

اسلام آباد: وزارتِ اطلاعات و نشریات پاکستان نے آزاد جموں و کشمیر سے متعلق شائع ہونے والی ایک رپورٹ پر بی بی سی اردو کے سامنے باضابطہ احتجاج اور رسمی شکایت درج کروا دی ہے۔
وزارتِ اطلاعات کے مطابق متعلقہ رپورٹ میں غیر مصدقہ اور غیر تصدیق شدہ الزامات کو بنیاد بنایا گیا، جبکہ سرکاری مؤقف، دستیاب حقائق اور ریکارڈ پر موجود بیانات کو نظر انداز کیا گیا، جس پر شدید تحفظات کا اظہار کیا گیا ہے۔
وزارت نے اپنے احتجاج میں مؤقف اختیار کیا کہ صحافتی ذمہ داری کا تقاضا ہے کہ کسی بھی حساس معاملے پر خبر شائع کرنے سے قبل تمام متعلقہ حقائق کی تصدیق کی جائے اور تمام فریقوں کا مؤقف شامل کیا جائے۔

وزارتِ اطلاعات کا کہنا ہے کہ یہ پہلا موقع نہیں جب اس نوعیت کی رپورٹنگ سامنے آئی ہو، بلکہ غیر تصدیق شدہ دعوؤں کی اشاعت ایک مسلسل رجحان بنتی جا رہی ہے، جسے روکنے کے لیے مؤثر اصلاحی اقدامات کی ضرورت ہے۔
حکومتِ پاکستان نے بی بی سی اردو سے مطالبہ کیا ہے کہ وہ صحافتی اصولوں کی پاسداری کرتے ہوئے حقائق پر مبنی اور متوازن رپورٹنگ کو یقینی بنائے تاکہ عوام کو درست اور مصدقہ معلومات فراہم کی جا سکیں۔