Blog

‎متحدہ عرب امارات نے فجیرہ بندرگاہ سے تیل کی برآمدات دوگنا کرنے کے لیے بڑے منصوبے پر کام تیز کر دیا ہے، جس کا مقصد آبنائے ہرمز پر انحصار کم کرنا اور عالمی توانائی سپلائی کو مزید محفوظ بنانا ہے۔
‎غیر ملکی میڈیا رپورٹس کے مطابق یو اے ای حکومت نے ابوظبی سے فجیرہ تک نئی آئل پائپ لائن منصوبے کی تعمیر میں تیزی لانے کا اعلان کیا ہے، جبکہ اس منصوبے کو 2027 تک مکمل کرنے کا ہدف مقرر کیا گیا ہے۔
‎رپورٹس کے مطابق ولی عہد شیخ خالد بن محمد بن زاید نے متعلقہ حکام کو ہدایت دی ہے کہ پائپ لائن منصوبے کو جلد از جلد مکمل کیا جائے تاکہ خطے میں بڑھتی کشیدگی کے باوجود تیل کی ترسیل متاثر نہ ہو۔
‎حکام کے مطابق نئی پائپ لائن آبنائے ہرمز کو بائی پاس کرنے میں مدد دے گی، جو اس وقت عالمی سطح پر سب سے حساس بحری گزرگاہوں میں شمار کی جاتی ہے۔
‎ابوظبی حکام کا کہنا ہے کہ موجودہ فجیرہ پائپ لائن یومیہ 18 لاکھ بیرل خام تیل سپلائی کرنے کی صلاحیت رکھتی ہے، تاہم نئی توسیع کے بعد اماراتی تیل کی برآمدی گنجائش میں نمایاں اضافہ ہو جائے گا۔
‎توانائی ماہرین کے مطابق یو اے ای کا یہ منصوبہ ایسے وقت سامنے آیا ہے جب آبنائے ہرمز کے حوالے سے عالمی خدشات بڑھ رہے ہیں اور خلیجی خطے میں ایران، امریکا اور دیگر طاقتوں کے درمیان کشیدگی مسلسل برقرار ہے۔
‎تجزیہ کاروں کا کہنا ہے کہ فجیرہ بندرگاہ اور متبادل پائپ لائن نیٹ ورک امارات کو عالمی تیل منڈی میں زیادہ محفوظ اور مستحکم پوزیشن فراہم کر سکتے ہیں۔

‎امریکی صدر ڈونلڈ ٹرمپ نے ایران، امریکا اور اسرائیل کے درمیان جاری کشیدگی کی کوریج پر امریکی میڈیا کو شدید تنقید کا نشانہ بناتے ہوئے اسے “ملک کا غدار” قرار دے دیا ہے۔
‎صدر ٹرمپ نے اپنے سوشل میڈیا پلیٹ فارم “ٹروتھ سوشل” پر جاری بیان میں کہا کہ بعض امریکی میڈیا ادارے ایسی رپورٹس نشر کر رہے ہیں جن میں تہران کو عسکری لحاظ سے واشنگٹن سے برتر ظاہر کیا جا رہا ہے، جو ان کے بقول صحافت نہیں بلکہ دشمن کی مدد کے مترادف ہے۔
‎ٹرمپ نے کہا کہ ایسی خبریں ایران کو “جھوٹی امید” دے رہی ہیں، حالانکہ ان کے مطابق ایران کو کسی بھی قسم کی امید نہیں ہونی چاہیے۔
‎امریکی صدر نے میڈیا پر سخت الفاظ استعمال کرتے ہوئے کہا کہ “یہ امریکی میڈیا بزدل ہیں جو اپنے ہی ملک کے خلاف کھڑے ہیں۔”
‎انہوں نے مزید کہا کہ صرف “ہارے ہوئے، ناشکرے اور احمق لوگ” امریکا کے خلاف دلائل دے سکتے ہیں۔
‎ٹرمپ کے اس بیان کے بعد امریکی سیاسی اور صحافتی حلقوں میں نئی بحث چھڑ گئی ہے۔ سیاسی تجزیہ کاروں کے مطابق ٹرمپ ماضی میں بھی میڈیا کو “فیک نیوز” اور “عوام کا دشمن” قرار دیتے رہے ہیں، تاہم حالیہ بیان کو غیر معمولی طور پر سخت قرار دیا جا رہا ہے۔
‎ماہرین کا کہنا ہے کہ ایران اور اسرائیل کے درمیان بڑھتی کشیدگی اور امریکا کے ممکنہ کردار پر امریکی میڈیا مسلسل مختلف زاویوں سے رپورٹنگ کر رہا ہے، جس پر وائٹ ہاؤس اور ٹرمپ حامی حلقے ناراضی کا اظہار کرتے رہے ہیں۔
‎دوسری جانب صحافتی تنظیموں اور ناقدین کا کہنا ہے کہ آزاد میڈیا کسی بھی جمہوریت کا بنیادی ستون ہوتا ہے اور جنگی صورتحال میں مختلف آراء اور حقائق سامنے لانا صحافت کی ذمہ داری ہے۔

‎روس اور یوکرین کے درمیان تین روزہ جنگ بندی ختم ہوتے ہی دونوں ممالک نے ایک دوسرے پر شدید حملے شروع کر دیے، جس کے نتیجے میں اب تک مجموعی طور پر 27 افراد ہلاک ہو چکے ہیں۔
‎یوکرینی فضائیہ کے مطابق روس نے یوکرین پر 675 ڈرونز اور 56 میزائل داغے، جن میں زیادہ تر حملوں کا مرکز دارالحکومت کیف تھا۔ حکام کے مطابق کیف پر ہونے والے بڑے میزائل اور ڈرون حملے میں 24 افراد جان کی بازی ہار گئے جبکہ 47 زخمی ہوئے۔
‎رپورٹس کے مطابق حملوں کے بعد کیف کے مختلف علاقوں میں آگ بھڑک اٹھی، عمارتوں کو نقصان پہنچا اور شہریوں میں خوف و ہراس پھیل گیا۔ امدادی ٹیمیں ملبہ ہٹانے اور زخمیوں کو اسپتال منتقل کرنے میں مصروف رہیں۔
‎دوسری جانب روسی وزارت دفاع نے دعویٰ کیا ہے کہ اس نے گزشتہ رات یوکرین کے 355 ڈرونز مار گرائے۔ روس کے مطابق یوکرینی حملوں میں روسی شہر ریازان کو بھی نشانہ بنایا گیا جہاں 3 افراد ہلاک جبکہ 12 زخمی ہوئے۔
‎روسی حکام کا کہنا ہے کہ فضائی دفاعی نظام نے متعدد حملوں کو ناکام بنایا، تاہم بعض ڈرونز شہری علاقوں تک پہنچنے میں کامیاب رہے۔
‎واضح رہے کہ تین روزہ جنگ بندی کے خاتمے کے بعد دونوں ممالک کے درمیان کشیدگی دوبارہ شدت اختیار کر چکی ہے اور فضائی حملوں کا سلسلہ مسلسل جاری ہے۔
‎عالمی مبصرین کے مطابق حالیہ حملوں نے ایک بار پھر یہ خدشات بڑھا دیے ہیں کہ جنگ مزید خطرناک مرحلے میں داخل ہو سکتی ہے۔ ماہرین کا کہنا ہے کہ روس اور یوکرین کے درمیان بڑھتی عسکری کارروائیاں نہ صرف خطے بلکہ عالمی سلامتی کے لیے بھی تشویش کا باعث ہیں۔

بھارت کو سفارتی محاذ پر ایک اور مشکل صورتحال کا سامنا کرنا پڑا جب نئی دہلی میں ہونے والا برکس وزرائے خارجہ اجلاس مشترکہ اعلامیے کے بغیر ہی اختتام پذیر ہوگیا۔

بھارتی میڈیا کے مطابق مشرقِ وسطیٰ کی صورتحال پر رکن ممالک کے درمیان اختلافات برقرار رہے جس کے باعث اتفاقِ رائے نہ ہوسکا۔برکس اجلاس کے میزبان کے طور پر بھارت رکن ممالک کو مشترکہ اعلامیے پر متفق کرنے میں ناکام رہا، جس کے بعد اجلاس کے اختتام پر مجبوراً صدارتی یا چیئر اسٹیٹمنٹ جاری کی گئی۔
چیئر اسٹیٹمنٹ میں کہا گیا کہ مشرقِ وسطیٰ کی موجودہ صورتحال، خصوصاً غزہ جنگ کے معاملے پر بعض برکس ممالک کے درمیان اختلافِ رائے موجود تھا۔ تاہم برکس وزرائے خارجہ نے غزہ میں جنگ بندی برقرار رکھنے اور بلا رکاوٹ انسانی امداد کی فراہمی پر زور دیا۔اعلامیے میں غزہ میں فوری، مستقل اور غیر مشروط جنگ بندی کا مطالبہ بھی کیا گیا، جبکہ شہری آبادی کے تحفظ اور انسانی بحران کے خاتمے کی ضرورت پر زور دیا گیا۔

چیئر اسٹیٹمنٹ کے مطابق برکس ممالک نے یک طرفہ جبر پر مبنی اقدامات اور اقوامِ متحدہ کی سلامتی کونسل کی منظوری کے بغیر عائد کی جانے والی پابندیوں کی مذمت کی۔برکس وزرائے خارجہ نے بحیرۂ احمر اور باب المندب میں جہاز رانی کی آزادی اور محفوظ تجارتی راستوں کی اہمیت پر بھی زور دیا۔اس کے علاوہ رکن ممالک نے عالمی تجارتی تنظیم کے قواعد کے خلاف یک طرفہ ٹیرف اور غیر ٹیرف اقدامات پر شدید تشویش کا اظہار کرتے ہوئے عالمی تجارت میں منصفانہ اور متوازن نظام کی حمایت کی۔

امریکی صدر ڈونلڈ ٹرمپ کا کہنا ہے کہ ایران 20 سال کیلئے جوہری پروگرام معطل کرے، ہم ڈیل کیلئے تیار ہیں۔

امریکی صدر ڈونلڈ ٹرمپ نے چین سے روانگی کے بعد طیارے میں میڈیا سے گفتگو کرتے ہوئے کہا کہ تائیوان کیلئے ہتھیاروں کی منظوری نہیں دی، مجھے نہیں لگتا تائیوان کے معاملے پر کوئی جنگ ہوگی۔ان کا کہنا ہے کہ ایران 20 سال کیلئے جوہری پروگرام معطل کرے، ہم ڈیل کیلئے تیار ہیں، چینی کمپنیوں پر ایرانی تیل کی خریداری پر پابندیاں ہٹانے کا فیصلہ چند دن میں ہوگا، جنگ بندی کا فیصلہ دوسرے ممالک کی درخواست پر کیا۔ٹرمپ نے کہا کہ چین ہم سے اربوں ڈالر کا سویا بین خریدے گا، آبنائے ہرمز کے ذریعے ایران یومیہ 500 ملین ڈالر کا کاروبار کرتا تھا، ناکہ بندی کے ذریعے ہم نے ایران کی تجارت روک دی۔امریکی صدر ڈونلڈ ٹرمپ نے وزیراعظم پاکستان شہباز شریف اور فیلڈ مارشل عاصم منیر کی ایک بار پھر تعریف کی۔

ایرانی وزیرِ خارجہ عباس عراقچی نے کہا ہے کہ جنگ کا آغاز نہیں کیا اپنا دفاع کیا، ہم جنگ بندی برقرار رکھنے کی کوشش کر رہے ہیں۔

نئی دہلی میں پریس کانفرنس کرتے ہوئے عباس عراقچی نے کہا کہ آبنائے ہرمز میں رکاوٹوں کا ذمے دار ایران نہیں، ایران کے خلاف جنگ میں ملوث ممالک کے علاوہ آبنائے ہرمز سب کے لیے کھلا ہے، آبنائے ہرمز سے گزرنے کے لیے ہمیں اعتماد میں لینا ہو گا،ایران کبھی ایٹمی ہتھیار نہیں بنانا چاہتا، ہمارا ایٹمی پروگرام پُرامن مقاصد کے لیے ہے، ایران کے مسئلے کا حل بات چیت کے سوا کچھ اور نہیں ہے، ایران مذاکرات چاہتا ہے لیکن امریکا پر بھروسہ نہیں ہے،ایران کسی بھی دباؤ اور کارروائی کے خلاف بھرپور مزاحمت کرے گا، 40 دن کی جنگ کے بعد امریکا کو ایران پر جارحیت سے کوئی مقصد حاصل نہ ہوا تو پھر امریکا نے مذاکرات کی بات کی، ہمیں امریکا پر بالکل بھی بھروسہ نہیں ہے، ہمارے پاس امریکا پر اعتبار کرنے کا کوئی جواز نہیں ہے،ایران کے کسی معاملے کا عسکری حل نہیں ہے، ایران سالوں سے ایران امریکا کی ظالمانہ پابندیوں کا سامنا کر رہا ہے۔

ایرانی وزیر خارجہ کا مزید کہنا تھا کہ ایرانی صرف عزت کی زبان سمجھتے ہیں، جو عسکری کارروائی سے حاصل نہیں ہو سکا وہ مذاکرات سے بھی حاصل نہیں ہو سکتا، امریکا کے ساتھ کسی بھی ڈیل سے پہلے تمام چیزیں واضح ہونی چاہئیں، موجودہ مذاکرات میں بھروسے کا فقدان ہے لیکن مجھے امید ہے کہ حکمت اور سفارتکاری کامیاب ہوں گے۔