Blog

بھارت کو سفارتی محاذ پر ایک اور مشکل صورتحال کا سامنا کرنا پڑا جب نئی دہلی میں ہونے والا برکس وزرائے خارجہ اجلاس مشترکہ اعلامیے کے بغیر ہی اختتام پذیر ہوگیا۔

بھارتی میڈیا کے مطابق مشرقِ وسطیٰ کی صورتحال پر رکن ممالک کے درمیان اختلافات برقرار رہے جس کے باعث اتفاقِ رائے نہ ہوسکا۔برکس اجلاس کے میزبان کے طور پر بھارت رکن ممالک کو مشترکہ اعلامیے پر متفق کرنے میں ناکام رہا، جس کے بعد اجلاس کے اختتام پر مجبوراً صدارتی یا چیئر اسٹیٹمنٹ جاری کی گئی۔
چیئر اسٹیٹمنٹ میں کہا گیا کہ مشرقِ وسطیٰ کی موجودہ صورتحال، خصوصاً غزہ جنگ کے معاملے پر بعض برکس ممالک کے درمیان اختلافِ رائے موجود تھا۔ تاہم برکس وزرائے خارجہ نے غزہ میں جنگ بندی برقرار رکھنے اور بلا رکاوٹ انسانی امداد کی فراہمی پر زور دیا۔اعلامیے میں غزہ میں فوری، مستقل اور غیر مشروط جنگ بندی کا مطالبہ بھی کیا گیا، جبکہ شہری آبادی کے تحفظ اور انسانی بحران کے خاتمے کی ضرورت پر زور دیا گیا۔

چیئر اسٹیٹمنٹ کے مطابق برکس ممالک نے یک طرفہ جبر پر مبنی اقدامات اور اقوامِ متحدہ کی سلامتی کونسل کی منظوری کے بغیر عائد کی جانے والی پابندیوں کی مذمت کی۔برکس وزرائے خارجہ نے بحیرۂ احمر اور باب المندب میں جہاز رانی کی آزادی اور محفوظ تجارتی راستوں کی اہمیت پر بھی زور دیا۔اس کے علاوہ رکن ممالک نے عالمی تجارتی تنظیم کے قواعد کے خلاف یک طرفہ ٹیرف اور غیر ٹیرف اقدامات پر شدید تشویش کا اظہار کرتے ہوئے عالمی تجارت میں منصفانہ اور متوازن نظام کی حمایت کی۔

امریکی صدر ڈونلڈ ٹرمپ کا کہنا ہے کہ ایران 20 سال کیلئے جوہری پروگرام معطل کرے، ہم ڈیل کیلئے تیار ہیں۔

امریکی صدر ڈونلڈ ٹرمپ نے چین سے روانگی کے بعد طیارے میں میڈیا سے گفتگو کرتے ہوئے کہا کہ تائیوان کیلئے ہتھیاروں کی منظوری نہیں دی، مجھے نہیں لگتا تائیوان کے معاملے پر کوئی جنگ ہوگی۔ان کا کہنا ہے کہ ایران 20 سال کیلئے جوہری پروگرام معطل کرے، ہم ڈیل کیلئے تیار ہیں، چینی کمپنیوں پر ایرانی تیل کی خریداری پر پابندیاں ہٹانے کا فیصلہ چند دن میں ہوگا، جنگ بندی کا فیصلہ دوسرے ممالک کی درخواست پر کیا۔ٹرمپ نے کہا کہ چین ہم سے اربوں ڈالر کا سویا بین خریدے گا، آبنائے ہرمز کے ذریعے ایران یومیہ 500 ملین ڈالر کا کاروبار کرتا تھا، ناکہ بندی کے ذریعے ہم نے ایران کی تجارت روک دی۔امریکی صدر ڈونلڈ ٹرمپ نے وزیراعظم پاکستان شہباز شریف اور فیلڈ مارشل عاصم منیر کی ایک بار پھر تعریف کی۔

ایرانی وزیرِ خارجہ عباس عراقچی نے کہا ہے کہ جنگ کا آغاز نہیں کیا اپنا دفاع کیا، ہم جنگ بندی برقرار رکھنے کی کوشش کر رہے ہیں۔

نئی دہلی میں پریس کانفرنس کرتے ہوئے عباس عراقچی نے کہا کہ آبنائے ہرمز میں رکاوٹوں کا ذمے دار ایران نہیں، ایران کے خلاف جنگ میں ملوث ممالک کے علاوہ آبنائے ہرمز سب کے لیے کھلا ہے، آبنائے ہرمز سے گزرنے کے لیے ہمیں اعتماد میں لینا ہو گا،ایران کبھی ایٹمی ہتھیار نہیں بنانا چاہتا، ہمارا ایٹمی پروگرام پُرامن مقاصد کے لیے ہے، ایران کے مسئلے کا حل بات چیت کے سوا کچھ اور نہیں ہے، ایران مذاکرات چاہتا ہے لیکن امریکا پر بھروسہ نہیں ہے،ایران کسی بھی دباؤ اور کارروائی کے خلاف بھرپور مزاحمت کرے گا، 40 دن کی جنگ کے بعد امریکا کو ایران پر جارحیت سے کوئی مقصد حاصل نہ ہوا تو پھر امریکا نے مذاکرات کی بات کی، ہمیں امریکا پر بالکل بھی بھروسہ نہیں ہے، ہمارے پاس امریکا پر اعتبار کرنے کا کوئی جواز نہیں ہے،ایران کے کسی معاملے کا عسکری حل نہیں ہے، ایران سالوں سے ایران امریکا کی ظالمانہ پابندیوں کا سامنا کر رہا ہے۔

ایرانی وزیر خارجہ کا مزید کہنا تھا کہ ایرانی صرف عزت کی زبان سمجھتے ہیں، جو عسکری کارروائی سے حاصل نہیں ہو سکا وہ مذاکرات سے بھی حاصل نہیں ہو سکتا، امریکا کے ساتھ کسی بھی ڈیل سے پہلے تمام چیزیں واضح ہونی چاہئیں، موجودہ مذاکرات میں بھروسے کا فقدان ہے لیکن مجھے امید ہے کہ حکمت اور سفارتکاری کامیاب ہوں گے۔

بھارت اور متحدہ عرب امارات (یو اے ای) کے درمیان دفاع، توانائی اور سرمایہ کاری کے اہم معاہدوں پر دستخط ہوئے ہیں۔

ان معاہدوں پر دستخط بھارتی وزیراعظم نریندر مودی کے دورہ یو اے ای کے دوران ہوئے،اس دورے کے دوران بھارت اور یو اے ای کے درمیان دفاع، توانائی اور سرمایہ کاری کےاہم معاہدوں پر دستخط ہوئے،بھارتی حکومت کی جانب سے جاری بیان میں بتایا گیا کہ بھارت اور یو اے ای نے اسٹرٹیجک دفاعی تعاون اورتیل ذخائر سے متعلق معاہدے کیے،بھارت اور یو اے ای کے درمیان مائع پیٹرولیم گیس کی فراہمی پربھی اتفاق کیا گیا، بھارتی انفرا اسٹرکچر،آربی ایل بینک اورسمن کیپیٹل میں یو اے ای کی جانب سے 5 ارب ڈالر کی سرمایہ کاری کی جائے گی۔

بھارت کی ریاست منی پور میں عیسائی تنظیم کے صدر سمیت تین مذہبی رہنماؤں کو فائرنگ کر کے قتل کر دیا گیا، جبکہ حملے میں متعدد افراد زخمی بھی ہوئے۔

بھارتی میڈیا رپورٹس کے مطابق مسلح افراد نے گھات لگا کر عیسائی رہنماؤں کی گاڑی کو نشانہ بنایا۔ حملے کے نتیجے میں عیسائی تنظیم کے صدر سمیت تین اہم مذہبی شخصیات جان کی بازی ہار گئیں۔ زخمیوں کو قریبی اسپتال منتقل کر دیا گیا ہے جہاں بعض کی حالت تشویشناک بتائی جا رہی ہے۔واقعے کے بعد ریاست بھر میں شدید غم و غصہ پایا جا رہا ہے۔ عیسائی رہنماؤں پر قاتلانہ حملے کے خلاف مقامی تنظیموں اور شہریوں نے احتجاجی مظاہرے کیے جبکہ کئی علاقوں میں شٹر ڈاؤن ہڑتال بھی کی گئی۔ احتجاج کے باعث کاروباری مراکز، سرکاری دفاتر اور تعلیمی ادارے بند رہے۔

واضح رہے کہ چند روز قبل بھی منی پور میں علیحدگی پسندوں نے آسام رائفلرز کے ایک کیمپ پر قبضہ کر لیا تھا، جس کی ویڈیوز سوشل میڈیا پر وائرل ہوئی تھیں۔ اس تازہ واقعے کے بعد ریاست میں امن و امان کی صورتحال مزید کشیدہ ہونے کا خدشہ ظاہر کیا جا رہا ہے۔