قطر سے پاکستان کے لیے ایل این جی کی ترسیل کا سلسلہ جاری ہے اور ایک اور اہم پیش رفت میں پاکستان کے لیے بھیجا گیا تیسرا ایل این جی کارگو جہاز ایرانی خصوصی اجازت کے بعد حساس سمندری راستے آبنائے ہرمز میں داخل ہو گیا ہے۔
شپنگ ذرائع کے مطابق گزشتہ 15 روز کے دوران ایران کی جانب سے پاکستان کے لیے تین ایل این جی جہازوں کو گزرنے کی اجازت دی جا چکی ہے، جو خطے میں توانائی کی ترسیل کے جاری عمل کی عکاسی کرتا ہے۔
ذرائع نے بتایا کہ مذکورہ ایل این جی جہاز اس وقت جزیرہ ہنگم کے قریب سے آگے بڑھ رہا ہے، اور اس میں قطر کے بڑے گیس حب راس لفان ٹرمینل سے مائع قدرتی گیس لدی گئی ہے۔یہ کارگو پاکستان میں انگرو ایل این جی ٹرمینل کے ذریعے اتارا جائے گا، جو ملک میں ایل این جی کی درآمد اور ری گیسیفکیشن کا ایک اہم مرکز ہے۔ذرائع کے مطابق اس سے قبل ایک اور ایل این جی جہاز الخریطیات سے کراچی پہنچ چکا ہے، جبکہ ایل این جی کا پہلا جہاز 30 اپریل کو پورٹ قاسم پر لنگر انداز ہوا تھا۔
دوسری جانب ایران نے واضح کیا ہے کہ آبنائے ہرمز میں امریکی قراردادوں یا دباؤ کی حمایت کرنے والے ممالک کو سنگین نتائج کا سامنا کرنا پڑ سکتا ہے، جسے خطے میں توانائی اور تجارتی بحری راستوں کے تناظر میں ایک اہم سیاسی بیان قرار دیا جا رہا ہے۔پاکستان کے لیے ایل این جی کی مسلسل ترسیل کو توانائی بحران میں کمی اور گیس کی ضروریات پوری کرنے کے حوالے سے اہم پیش رفت قرار دیا جا رہا ہے۔