Blog

ایران کی پاسداران انقلاب نے متحدہ عرب امارات پر حملوں کا اعتراف کرلیا۔

پاسداران انقلاب کا کہنا ہے کہ یو اے ای ایران پر حالیہ حملوں میں ملوث ہے، متحدہ عرب امارات پر کارروائی جوابی ردعمل تھا۔پاسداران نے یہ بھی کہا کہ مزید حملے ہوئے تو ایران اہم تنصیبات کو نشانہ بنائے گا۔

علاوہ ازیں متحدہ عرب امارات کا کہنا ہے کہ ایرانی حملے ملکی سلامتی کیلئے براہ راست خطرہ اور سنگین کشیدگی کی نشانی ہیں، اپنی خودمختاری اور سلامتی کا تحفظ ہر قیمت پر یقینی بنائیں گے، کوئی نرمی نہیں برتی جائے گی۔ترجمان اماراتی وزارت خارجہ نے ایرانی حملوں پر رد عمل جاری کردیا، بیان میں کہا ہے کہ ایران کی جانب سے شہری مقامات اور تنصیبات کو نشانہ بنایا گیا، جو بین الاقوامی قانون اور اقوام متحدہ کے چارٹر کے خلاف ورزی ہے۔ان کا کہنا ہے کہ متحدہ عرب امارات ایرانی حملوں کا بھرپور جواب دینے کا مکمل حق محفوظ رکھتا ہے۔

دوسری جانب مشرق وسطیٰ میں کشیدگی ایک بار پھر بڑھنے لگی، آبنائے ہرمز پر امریکا کا پروجیکٹ فریڈم جاری ہے، ایرانی سویلین کشتیوں کو نشانہ بنا ڈالا، 5 شہری شہید ہوگئے۔ایرانی فوج نے بھی امریکی جہاز پر میزائل داغ دیے تاہم امریکی سینٹرل کمانڈ نے تردید کردی۔ کہا امریکی بحری جہاز پر کوئی حملہ نہیں ہوا۔پاسداران انقلاب نے بحری جہازوں کی محفوظ نقل و حرکت کیلئے آبنائے ہرمز کا نیا نقشہ جاری کردیا۔ صدر ٹرمپ نے ایک بار پھر ایران کو صفحۂ ہستی سے مٹانے کی دھمکی دے دی۔ خبردار کیا کہ ایران نے امریکی جہازوں پر حملہ کیا تو اس کا نام ونشان مٹادیں گے۔وال اسٹریٹ جرنل کے مطابق امریکی صدر چند دن میں ایران کیخلاف فوجی کارروائی کی منظوری دے سکتے ہیں۔

آبنائے ہرمز میں حالیہ حملوں کے بعد امریکا اور ایران کے درمیان بیانات اور جوابی دعوؤں کا سلسلہ تیز ہو گیا ہے، جس سے خطے میں کشیدگی مزید بڑھ گئی ہے۔

ایرانی سرکاری خبر رساں ادارے فارس نیوز ایجنسی نے مقامی ذرائع کے حوالے سے دعویٰ کیا ہے کہ ایرانی فوج نے ایک امریکی جنگی جہاز کو دو میزائلوں سے نشانہ بنایا، جب اس نے آبنائے ہرمز میں داخل نہ ہونے کی وارننگ کو نظر انداز کیا۔ رپورٹ کے مطابق واقعے کے بعد مذکورہ جہاز ایرانی بندرگاہ جاسک کے قریب سے واپس مڑ گیا۔

دوسری جانب امریکی فوج کے مرکزی کمانڈ، امریکی سینٹرل کمانڈ نے ان دعوؤں کو مسترد کرتے ہوئے کہا ہے کہ اس کے کسی بحری جہاز کو نشانہ نہیں بنایا گیا۔ بیان میں کہا گیا کہ امریکی گائیڈڈ میزائل ڈسٹرائرز اب بھی خلیج میں معمول کے مطابق سرگرم ہیں۔امریکی صدر ڈونلڈ ٹرمپ نے بھی ایرانی مؤقف کی تردید کرتے ہوئے کہا کہ دو امریکی پرچم بردار تجارتی جہاز کامیابی سے آبنائے ہرمز سے گزرے۔ ان کا مزید کہنا تھا کہ امریکی فوج نے سات چھوٹی کشتیوں کو نشانہ بنایا، جب ایران نے ایسے جہازوں پر فائرنگ کی جو جنگ سے متعلق نہیں تھے، جن میں جنوبی کوریا کا ایک جہاز بھی شامل تھا۔

ادھر تہران کا کہنا ہے کہ امریکی کارروائی میں ایران کی جانب جانے والی دو سویلین کشتیوں کو نشانہ بنایا گیا، جس کے نتیجے میں پانچ افراد ہلاک ہوئے۔دریں اثنا، جنوبی کوریا نے تصدیق کی ہے کہ اس کے پرچم بردار جہاز میں لگنے والی آگ پر قابو پا لیا گیا ہے اور جہاز میں سوار تمام 24 افراد محفوظ ہیں۔ حکام کے مطابق واقعے کی اصل وجہ کا تعین جہاز کے معائنے کے بعد کیا جائے گا۔

ادھر امریکی صدر ڈونلڈ ٹرمپ نے آبنائے ہرمز سے جہازوں کی محفوظ گزرگاہ کے لیے "پروجیکٹ فریڈم” کے نام سے ایک نیا منصوبہ بھی شروع کرنے کا اعلان کیا ہے۔ اس آپریشن میں 100 سے زائد زمینی اور بحری طیارے، بشمول ایف-16 لڑاکا طیارے، حصہ لے رہے ہیں۔امریکی سینٹرل کمانڈ کے مطابق یہ آپریشن دفاعی نوعیت کا ہے جس کا مقصد امریکی افواج اور تجارتی جہازوں کا تحفظ یقینی بنانا ہے۔دوسری جانب ایران نے اس منصوبے کو تنقید کا نشانہ بناتے ہوئے اسے "پروجیکٹ ڈیڈلاک” قرار دیا ہے اور مؤقف اختیار کیا ہے کہ آبنائے ہرمز میں جاری کشیدگی کا کوئی فوجی حل ممکن نہیں بلکہ یہ ایک سیاسی مسئلہ ہے۔

آبنائے ہرمز دنیا کی اہم ترین بحری گزرگاہوں میں شمار ہوتی ہے، جہاں کسی بھی قسم کی کشیدگی عالمی تجارت اور تیل کی ترسیل پر گہرے اثرات مرتب کر سکتی ہے۔ امریکا اور ایران کے درمیان بڑھتی ہوئی بیان بازی نے عالمی برادری کو تشویش میں مبتلا کر دیا ہے اور صورتحال پر گہری نظر رکھی جا رہی ہے۔

ایرانی وزیر خارجہ عباس عراقچی کا کہنا ہے کہ پاکستان کی کوششوں سے مذاکرات میں پیشرفت ہورہی ہے۔

انہوں نے کہا کہ کسی بھی سیاسی بحران کا فوجی حل نہیں ہوتا، امریکا کسی کے کہنے پر دوبارہ جنگ کے دلدل میں نہ پھنسے۔عباس عراقچی نے یو اے ای کو بھی تنبیہ کی کہ متحدہ عرب امارات بھی محتاط رہے، پروجیکٹ فریڈم دراصل پروجیکٹ ڈیڈلاک ہے۔

دوسری جانب ایران کے چیف مذاکرات کار اور پارلیمنٹ کے اسپیکر باقر قالیباف کا کہنا ہے امریکا اور اس کے اتحادیوں نے جنگ بندی کی خلاف ورزی کی ہے، امریکا اوراتحادیوں نےجہاز رانی اور توانائی کی ترسیل کی سلامتی خطرے میں ڈال دی ہے۔باقر قالیفاب کا کہنا تھا آبنائے ہرمز سے متعلق ایک نئی حکمتِ عملی اب مضبوط ہوتی جا رہی ہے۔

علاوہ ازی ایرانی فوج کے کمانڈر ان چیف میجر جنرل امیر حاتمی نے خبردار کیا ہے کہ امریکی ائیرکرافٹ کیرِیئر کی آبنائے ہُرمُز کی طرف بڑھنے کی کسی بھی کوشش کا بھرپور طاقت سے جواب دیا جائے گا۔ ایک بیان میں کمانڈر ان چیف میجر جنرل امیر حاتمی نے کہا کہ ایران نے دشمن سے نمٹنے کے لیے کروز میزائل اور لڑاکا ڈرون تعینات کردیے ہیں۔ ان کا کہنا تھا کہ امریکی ائیرکرافٹ کیریئر سمجھتا ہے کہ وہ خفیہ رہ سکنے والے ریڈار کی مدد سے آبنائے ہُرمُز تک پہنچ جائے گا۔ لیکن انہیں پتہ ہونا چاہیے کہ ایران کا جواب "فائر” ہوگا۔ ایرانی فوج کے کمانڈر ان چیف میجر جنرل امیر حاتمی نے کہا کہ ایرانی فوج خلیج فارس پر نظر رکھے ہوئے ہے۔ ایرانی سمندروں کے ایک ایک انچ کا دفاع کیا جائے گا۔

متحدہ عرب امارات کی اہم تجارتی گزرگاہ فجیرہ بندرگاہ کے خلاف مبینہ طور پر ایک بڑے سائبر حملے کا انکشاف سامنے آیا ہے، جس میں ہیکرز کی جانب سے لاکھوں خفیہ دستاویزات چوری کیے جانے کا دعویٰ کیا گیا ہے۔

ایرانی میڈیا رپورٹس کے مطابق "حنظلہ” نامی ہیکر گروپ نے فجیرہ بندرگاہ کو نشانہ بناتے ہوئے ایک منظم سائبر آپریشن کیا۔ دعوے کے مطابق اس کارروائی کے دوران شپنگ، مالیاتی معاملات اور بنیادی ڈھانچے سے متعلق 4 لاکھ 30 ہزار سے زائد حساس دستاویزات حاصل کی گئیں۔رپورٹس میں مزید کہا گیا ہے کہ حاصل کردہ خفیہ معلومات کو فجیرہ بندرگاہ پر ممکنہ ٹارگٹڈ حملوں میں معاونت کے لیے استعمال کیا جا سکتا ہے، جس سے خطے میں سکیورٹی خدشات میں اضافہ ہو گیا ہے۔ہیکر گروپ "حنظلہ” نے اپنے بیان میں دعویٰ کیا ہے کہ متحدہ عرب امارات، امریکا اور اسرائیل کے درمیان جاری تعاون ان کی نگرانی میں ہے اور اس کے "سنگین نتائج” برآمد ہو سکتے ہیں۔

تاہم اس حوالے سے متحدہ عرب امارات کی جانب سے تاحال کوئی باضابطہ تصدیق یا ردعمل سامنے نہیں آیا۔ ماہرین کے مطابق اگر یہ دعوے درست ثابت ہوتے ہیں تو یہ خلیجی خطے میں سائبر سکیورٹی کے حوالے سے ایک اہم پیش رفت ثابت ہو سکتی ہے، جس کے اثرات عالمی تجارت پر بھی مرتب ہونے کا خدشہ ہے۔