Blog

بل گیٹس جو دنیا کے معروف ارب پتی اور مخیر شخصیت ہیں، جون میں امریکی کانگریس کے سامنے پیش ہو کر بدنام زمانہ مجرم جیفری ایپسٹین سے اپنے روابط کے حوالے سے گواہی دیں گے۔ قانون سازوں نے اس بات کی تصدیق کر دی ہے۔

یہ گواہی امریکی ایوانِ نمائندگان کی اوور سائٹ کمیٹی کے اس بڑے تحقیقاتی عمل کا حصہ ہے جس میں ایپسٹین کے جرائم اور اس کے اثر و رسوخ کا جائزہ لیا جا رہا ہے۔ گیٹس ان نمایاں شخصیات میں شامل ہیں جنہوں نے رضاکارانہ طور پر کمیٹی کے سامنے پیش ہونے پر آمادگی ظاہر کی ہے۔ سماعت 10 جون کو متوقع ہے۔گیٹس کے ترجمان کے مطابق، وہ کمیٹی کے تمام سوالات کے جواب دینے اور تحقیقات میں تعاون کے لیے تیار ہیں۔ واضح رہے کہ ایپسٹین کے کسی بھی متاثرہ فرد نے گیٹس پر کسی قسم کی بدعنوانی کا الزام عائد نہیں کیا، اور نہ ہی تحقیقاتی دستاویزات میں ان کا ذکر کسی مجرمانہ سرگرمی کا ثبوت سمجھا جا رہا ہے۔

امریکی محکمہ انصاف کی جانب سے رواں سال جاری کیے گئے 30 لاکھ سے زائد صفحات پر مشتمل دستاویزات میں گیٹس اور ایپسٹین کے درمیان رابطوں کی تفصیلات بھی شامل تھیں۔ تاہم، ابھی مزید لاکھوں دستاویزات منظر عام پر آنا باقی ہیں۔ یہ انکشافات اس قانون کے تحت سامنے آئے جس پر امریکی صدر ڈونلڈ ٹرمپ نے گزشتہ نومبر میں دستخط کیے تھے، جس کے تحت ایپسٹین سے متعلق تمام مواد کو جاری کرنا لازمی قرار دیا گیا۔

اس سے قبل ایک انٹرویو میں گیٹس نے کہا تھا، “میں نے اس کے ساتھ جتنا وقت گزارا، اس پر مجھے افسوس ہے اور میں اس پر معذرت خواہ ہوں۔”

عودی عرب کے دارالحکومت ریاض میں قائم ملک کی واحد سرکاری شراب کی دکان ان دنوں شدید قلت کا شکار ہے، جہاں بیئر اور وائن سے لے کر ٹیکلا تک متعدد مصنوعات دستیاب نہیں رہیں۔

صارفین کے مطابق خطے میں ایران سے متعلق جنگی صورتحال کے باعث سپلائی چین متاثر ہوئی ہے، جس سے درآمدی اشیا کی ترسیل میں تاخیر ہو رہی ہے۔یہ دکان ریاض کے سفارتی علاقے میں واقع ہے اور بغیر کسی نام یا نمایاں سائن بورڈ کے خاموشی سے اپنی خدمات انجام دے رہی ہے۔ اس دکان کا قیام 2024 میں عمل میں لایا گیا تھا، جس کا بنیادی مقصد غیر مسلم سفارت کاروں کو محدود اور کنٹرولڈ ماحول میں شراب فراہم کرنا تھا۔ بعد ازاں 2025 میں اس سہولت کو وسعت دیتے ہوئے امیر غیر مسلم غیر ملکیوں تک بھی رسائی دی گئی۔

تاہم سعودی عرب میں شراب پر پابندی کا قانون بدستور نافذ ہے، جو 1952 سے ملک میں لاگو ہے۔ اس کے باوجود حالیہ برسوں میں مملکت نے اپنی معیشت کو متنوع بنانے اور غیر ملکی سرمایہ کاروں و ماہرین کو راغب کرنے کے لیے بعض سماجی و اقتصادی اصلاحات متعارف کروائی ہیں، جن میں محدود پیمانے پر شراب کی دستیابی بھی شامل ہے۔خبر رساں ادارے رائٹرز کے مطابق، حالیہ دنوں میں اس دکان کا دورہ کرنے والے کم از کم پانچ افراد نے بتایا کہ دکان کی شیلف زیادہ تر خالی ہیں اور صرف مہنگے یا کم معروف برانڈز ہی دستیاب ہیں۔ صارفین کا کہنا ہے کہ پہلے جہاں مختلف عالمی برانڈز باآسانی دستیاب تھے، اب وہاں انتخاب نہ ہونے کے برابر رہ گیا ہے۔ماہرین کے مطابق اگر خطے میں کشیدگی برقرار رہی تو نہ صرف اس دکان بلکہ دیگر درآمدی اشیا کی فراہمی بھی متاثر ہو سکتی ہے، جس کے وسیع معاشی اثرات مرتب ہونے کا خدشہ ہے

امریکی شہر لاس اینجلس کے پوش علاقے ہالی ووڈ ہلز میں قائم ایک انتہائی خفیہ اور مہنگے نجی کلب کی سرگرمیوں نے ایک بار پھر توجہ حاصل کر لی ہے، جہاں ایک صحافی کی شرکت نے نہ صرف اس کی ذاتی سوچ کو بدل دیا بلکہ اس قسم کی تقریبات کے بارے میں نئی بحث بھی چھیڑ دی ہے۔

یہ کلب، جو 2013 میں بیورلی ہلز میں قائم کیا گیا تھا، ایک نجی ممبرشپ پر مبنی ادارہ ہے جہاں مخصوص افراد کو ہی شرکت کی اجازت دی جاتی ہے۔ یہاں ہونے والی تقریبات میں ماسکریڈ (نقاب پوش) پارٹیاں، پُرتعیش ڈنرز اور خصوصی سوشل ایونٹس شامل ہوتے ہیں، جن کا مقصد شرکاء کو ایک مختلف اور آزاد ماحول فراہم کرنا بتایا جاتا ہے۔کلب میں داخلے کے لیے نہ صرف بھاری سالانہ فیس ادا کرنی پڑتی ہے بلکہ ایک سخت جانچ پڑتال کے عمل سے بھی گزرنا ہوتا ہے۔ ممبرشپ فیس ہزاروں ڈالرز سے لے کر ایک لاکھ ڈالر سے زیادہ تک ہو سکتی ہے۔ تقریب میں شریک افراد کے موبائل فون دروازے پر ہی جمع کرا لیے جاتے ہیں تاکہ مکمل رازداری برقرار رکھی جا سکے۔

صحافی کے مطابق تقریب ایک پُرتعیش حویلی میں منعقد ہوئی جہاں داخل ہوتے ہی ایک منفرد ماحول محسوس ہوا۔ ہلکی روشنی، موسیقی اور آرٹسٹک انداز میں ترتیب دی گئی سرگرمیوں نے اسے ایک عام پارٹی سے مختلف بنا دیا۔ مہمان مختلف عمر کے افراد پر مشتمل تھے اور سب کو مکمل آزادی دی گئی تھی کہ وہ اپنی حدود کے مطابق شرکت کریں۔اس کلب کی سب سے نمایاں خصوصیت اس کے سخت اصول ہیں، جن میں باہمی رضامندی کو بنیادی حیثیت حاصل ہے۔ کسی بھی قسم کے جسمانی یا ذاتی تعامل سے پہلے واضح اجازت ضروری ہوتی ہے، جس سے شرکاء خود کو محفوظ محسوس کرتے ہیں۔

صحافی کا کہنا تھا کہ ابتدا میں یہ تجربہ عجیب اور مشکل محسوس ہوا، مگر وقت گزرنے کے ساتھ اس نے خود کو زیادہ پُراعتماد اور کھلا ہوا محسوس کیا۔ اس کے مطابق اس ماحول نے نہ صرف اس کے اپنے جذبات کو سمجھنے میں مدد دی بلکہ اس کے اپنے شریکِ حیات کے ساتھ تعلق میں بھی ایک نئی گہرائی پیدا کی۔

کلب کی تخلیقی ڈائریکٹر کے مطابق اس قسم کی تقریبات کا مقصد صرف تفریح نہیں بلکہ انسان کو اپنی ذات کو بہتر طور پر سمجھنے کا موقع فراہم کرنا ہے۔ ان کے مطابق بہت سے لوگ اپنی خواہشات اور احساسات کو قبول نہیں کرتے، جس کی وجہ سے ذہنی دباؤ اور عدم اطمینان پیدا ہوتا ہے۔اگرچہ اس طرح کے کلبز کو کچھ حلقوں میں آزادی اور خود اظہار کا ذریعہ سمجھا جاتا ہے، تاہم ناقدین اسے اخلاقی حدود سے تجاوز قرار دیتے ہیں۔ ماہرین کا کہنا ہے کہ ایسے رجحانات پر معاشرتی اور نفسیاتی اثرات کا سنجیدگی سے جائزہ لینا ضروری ہے۔

امریکا کے سابق صدر جو بائیڈن کے صاحبزادے ہنٹر بائیڈن ایک نئے عدالتی تنازع میں گھِر گئے ہیں، جہاں ان پر اپنی بیٹی کی ماں کو دی جانے والی بچوں کی مالی امداد (چائلڈ سپورٹ) میں اضافہ کرنے کا دباؤ بڑھتا جا رہا ہے۔

آرکنساس کی ایک جج نے جمعرات کے روز ہنٹر بائیڈن کو حکم دیا ہے کہ وہ اپنے ٹیکس ریکارڈز اور دیگر مالی دستاویزات عدالت میں پیش کریں اور حلف کے تحت وکلا کے سوالات کے جوابات بھی دیں۔ یہ کارروائی ان کی سابقہ پارٹنر لنڈن رابرٹس کی درخواست پر ہو رہی ہے، جن سے ان کی 7 سالہ بیٹی نیوی جون رابرٹس ہے۔لنڈن رابرٹس کا مؤقف ہے کہ ہنٹر بائیڈن کی مالی حالت اور طرزِ زندگی پہلے سے کہیں زیادہ بہتر ہو چکی ہے، اس لیے موجودہ 5 ہزار ڈالر ماہانہ چائلڈ سپورٹ ناکافی ہے۔رابرٹس کے وکیل کے مطابق ہنٹر بائیڈن کی زندگی میں اب مہنگے اور اعلیٰ درجے کے ریسٹورنٹس میں کھانے،سمندر کے نظارے والے پہاڑی علاقے میں رہائش،اور سفر و دیگر پرتعیش سرگرمیاں شامل ہیں،ان عوامل کو بنیاد بنا کر مؤقف اختیار کیا گیا ہے کہ انہیں زیادہ مالی مدد دینی چاہیے۔

ہنٹر بائیڈن کے وکیل نے عدالت میں کہا کہ ان کے موکل پہلے ہی معاہدے کے مطابق رقم ادا کر رہے ہیں اور ان کی رہائش بھی پہلے جیسی ہی ہے، جو صرف ایک کرائے کا گھر ہے۔ ان کا کہنا تھا کہ صرف باہر کھانا کھانا یا سماجی سرگرمیاں بچوں کی سپورٹ بڑھانے کی قانونی بنیاد نہیں بن سکتیں۔عدالت نے فیصلہ دیا ہے کہ رابرٹس کی قانونی ٹیم ہنٹر بائیڈن کے مالی معاملات کا تفصیلی جائزہ لے سکتی ہے تاکہ یہ تعین کیا جا سکے کہ آیا ان کی آمدنی میں واقعی اضافہ ہوا ہے یا نہیں۔اسی کیس کے دوران جج نے ہنٹر بائیڈن کے خلاف توہینِ عدالت کی درخواست مسترد کر دی، جو ان کی پینٹنگز سے متعلق ایک الگ تنازع پر مبنی تھی۔

ہنٹر بائیڈن پہلے بھی قانونی مسائل کا سامنا کر چکے ہیں، جن میں ٹیکس اور اسلحہ سے متعلق مقدمات شامل رہے ہیں، تاہم بعد میں انہیں صدارتی معافی مل گئی تھی۔یہ کیس اب اس بات پر مرکوز ہے کہ آیا ہنٹر بائیڈن کی آمدنی اور طرزِ زندگی میں تبدیلی ان کی سابقہ چائلڈ سپورٹ ادائیگیوں میں اضافے کی قانونی بنیاد فراہم کرتی ہے یا نہیں۔ عدالت آئندہ سماعتوں میں ان کے مالی ریکارڈز کا تفصیلی جائزہ لے گی۔

ماہرینِ صحت کے مطابق انسانی جسم میں موجود ایک اہم ہارمون آکسیٹوسن (Oxytocin) نہ صرف جذباتی وابستگی اور محبت کے احساس کو بڑھاتا ہے بلکہ ذہنی دباؤ کم کرنے، سکون پیدا کرنے اور مجموعی جسمانی صحت کو بہتر بنانے میں بھی اہم کردار ادا کرتا ہے۔ اسی وجہ سے اسے اکثر “محبت کا ہارمون” بھی کہا جاتا ہے۔

تحقیقات سے معلوم ہوا ہے کہ جب انسان محفوظ، پرسکون اور جُڑا ہوا محسوس کرتا ہے تو جسم میں آکسیٹوسن کی سطح بڑھ جاتی ہے، جس سے دل کی دھڑکن معمول پر آتی ہے، ذہنی تناؤ کم ہوتا ہے اور جسم میں مثبت توانائی پیدا ہوتی ہے۔ ماہرین کا کہنا ہے کہ روزمرہ زندگی میں کچھ آسان طریقے اپنا کر اس ہارمون کے اخراج کو قدرتی طور پر بڑھایا جا سکتا ہے۔ماہرین ایک ایسی سادہ لیکن مؤثر خود نگہداشت مشق تجویز کرتے ہیں جو جسم اور ذہن دونوں کے لیے فائدہ مند ہے۔

سب سے پہلے ایک پرسکون اور آرام دہ جگہ منتخب کریں جہاں آپ خود کو مکمل طور پر ریلیکس محسوس کریں۔ اس جگہ پر بیٹھیں یا لیٹ جائیں اور ذہن کو پرسکون کرنے کی کوشش کریں۔ اس مشق کا مقصد خود کو ذہنی طور پر محفوظ اور آرام دہ محسوس کرانا ہے۔اپنی دونوں ہتھیلیوں کو آپس میں آہستہ آہستہ رگڑیں تاکہ وہ گرم ہو جائیں۔ ماہرین کے مطابق گرم لمس جسم میں آکسیٹوسن کے اخراج کو بڑھانے میں مدد دیتا ہے، جس سے سکون اور اطمینان کا احساس پیدا ہوتا ہے۔اب 5 سے 10 منٹ تک اپنے جسم کے مختلف حصوں کا ہلکے اور آہستہ انداز میں مساج کریں۔ اپنے کندھوں،سر ،گردن،پاؤں،اور خاص طور پر گردن کے اس حصے کا مساج کریں جہاں کھوپڑی اور گردن ملتی ہیں، جسے وَیگس نرو کا علاقہ بھی کہا جاتا ہے۔ یہ اعصابی نظام سے جڑا ہوا ایک اہم حصہ ہے جو جسم کے آرام اور تناؤ میں کمی میں کردار ادا کرتا ہے۔مساج کرتے وقت ہر حرکت کو آہستہ، نرم اور شعوری رکھیں۔ اس دوران اپنی سانسوں پر توجہ دینا بھی فائدہ مند ہوتا ہے۔

ماہرین کے مطابق اس طرح کی سادہ خود مساج مشقیں نہ صرف آکسیٹوسن کی سطح بڑھاتی ہیں بلکہ یہ اضطراب ، ذہنی دباؤ اور تھکن کو بھی کم کرنے میں مددگار ثابت ہو سکتی ہیں۔ روزانہ چند منٹ خود کے لیے نکالنا ذہنی توازن اور جذباتی صحت کو بہتر بنانے کا ایک آسان طریقہ ہے۔آج کے تیز رفتار اور دباؤ والے دور میں ایسی قدرتی مشقیں انسان کو اپنے جسم اور ذہن کے ساتھ دوبارہ جوڑنے میں مدد دیتی ہیں۔ آکسیٹوسن جیسے ہارمون کو فعال کر کے ہم نہ صرف بہتر محسوس کر سکتے ہیں بلکہ ایک زیادہ پرسکون اور صحت مند زندگی بھی گزار سکتے ہیں۔