Blog

ایران کی جیل میں قید نوبل امن انعام یافتہ انسانی حقوق کی سرگرم کارکن نرگس محمدی کو صحت میں “تباہ کن بگاڑ” کے بعد شمال مغربی ایران کے ایک اسپتال منتقل کر دیا گیا ہے۔

نرگس محمدی کے فاؤنڈیشن کے مطابق انہیں حال ہی میں دو مرتبہ مکمل بے ہوشی اور شدید دل کے دورے جیسے بحران کا سامنا کرنا پڑا، جس کے بعد ان کی حالت انتہائی نازک ہو گئی۔اطلاعات کے مطابق انسانی حقوق کی یہ وکیل اس وقت سات سال قید کی سزا کاٹ رہی ہیں۔ انہیں دسمبر میں مشرقی ایرانی شہر مشہد سے گرفتار کیا گیا تھا۔ اس سے قبل وہ 13 سالہ سزا کے دوران 2023 میں نوبل امن انعام حاصل کر چکی ہیں، اور بعد میں طبی وجوہات کی بنا پر 2024 کے آخر میں عارضی طور پر رہا کیا گیا تھا۔ان کے وکلاء کے مطابق مارچ کے آخر میں جیل کے اندر انہیں بے ہوش پایا گیا، اور شبہ ظاہر کیا گیا کہ انہیں دل کا دورہ پڑا تھا۔ بعد ازاں ملاقات میں ان کی حالت کمزور، چہرہ زرد اور وزن میں کمی دیکھی گئی جبکہ چلنے کے لیے بھی انہیں مدد درکار تھی۔

ان کے اہل خانہ کئی ہفتوں سے ایرانی حکام سے مطالبہ کر رہے تھے کہ انہیں بہتر طبی سہولیات فراہم کی جائیں، تاہم اب اسپتال منتقل کرنا “آخری لمحے کی کوشش” قرار دیا جا رہا ہے، جس کے بارے میں خدشہ ظاہر کیا گیا ہے کہ یہ ان کی جان بچانے کے لیے بھی تاخیر سے ہو سکتا ہے۔

امریکی صدر ڈونلڈ ٹرمپ نے فلوریڈا کی ایک بڑی ریٹائرمنٹ کمیونٹی میں خطاب کرتے ہوئے ایران کے ساتھ جاری کشیدگی پر سخت مؤقف اختیار کیا ہے۔ ٹرمپ کا کہنا تھا کہ امریکہ ایران کے ساتھ تصادم سے جلدی پیچھے نہیں ہٹے گا، کیونکہ ایسا کرنے سے “چند سال بعد وہی مسئلہ دوبارہ پیدا ہو سکتا ہے”۔

اپنے خطاب کے دوران ٹرمپ نے امریکی معیشت اور اپنی انتظامیہ کی جانب سے بزرگ شہریوں کے لیے اقدامات پر بات کی، تاہم وہ حسبِ معمول موضوع سے ہٹ کر ایران کی صورتحال پر بھی گفتگو کرنے لگے۔ انہوں نے واضح کیا کہ امریکہ کسی ایسے فیصلے کا خطرہ نہیں لے گا جس سے مستقبل میں دوبارہ بحران جنم لے۔

ادھر امریکہ میں سیاسی صورتحال بھی کشیدہ دکھائی دے رہی ہے۔ حالیہ ہفتے میں اوسط پٹرول کی قیمتیں گزشتہ چار سال کی بلند ترین سطح پر پہنچ گئیں جبکہ ٹرمپ کی مقبولیت کی شرح بھی کم ترین سطح پر آ گئی ہے۔دوسری جانب اسٹریٹجک آبی گزرگاہ آبنائے ہرمز میں امریکی بحری سرگرمیوں کے باعث کشیدگی برقرار ہے۔ رپورٹوں کے مطابق اس صورتحال نے ایران کو مالی طور پر بھی نقصان پہنچایا ہے، اور بعض اندازوں کے مطابق اسے اربوں ڈالر کا نقصان ہو چکا ہے۔

خطاب میں یہ بھی ذکر کیا گیا کہ یہ ٹرمپ کی وائٹ ہاؤس سے باہر پہلی عوامی مصروفیت تھی، جو گزشتہ ہفتے مبینہ طور پر ہونے والے ایک ناکام حملے کے بعد ہوئی۔ رپورٹس کے مطابق ایک مسلح شخص نے وائٹ ہاؤس میں داخل ہونے کی کوشش کی تھی جس کا مقصد صدر اور دیگر حکومتی شخصیات کو نشانہ بنانا بتایا گیا۔

برطانوی جوڑا کریگ اور لنڈسے فورمین ایران میں قید کے دوران اپنی جان کے خطرے میں مبتلا ہیں، کیونکہ جیل میں قیدیوں کی سزائے موت پر عمل درآمد، پرتشدد جھڑپوں اور غیر محفوظ حالات میں مسلسل اضافہ ہو رہا ہے۔

یہ دونوں 53 سالہ برطانوی شہری جنوری 2025 میں اس وقت گرفتار ہوئے جب وہ یورپ سے آسٹریلیا تک موٹر سائیکل کے ذریعے دنیا کے سفر پر تھے۔ ایرانی حکام نے ان پر برطانیہ اور اسرائیل کے لیے جاسوسی کا الزام عائد کیا تھا، جسے دونوں نے سختی سے مسترد کیا ہے۔فروری میں انہیں 10 سال قید کی سزا سنائی گئی اور اس وقت سے وہ تہران کی بدنام زمانہ جیل میں قید ہیں، جہاں ماضی میں بھی انسانی حقوق کی خلاف ورزیوں اور سخت حالات کے الزامات سامنے آتے رہے ہیں۔قیدیوں کے مطابق جیل میں حالات نہایت خراب ہیں۔ صفائی کی شدید کمی، خوراک کی قلت اور طبی سہولیات تک محدود رسائی نے صورتحال کو مزید سنگین بنا دیا ہے۔ رپورٹ کے مطابق کئی قیدیوں کو مہینوں تک بنیادی علاج بھی فراہم نہیں کیا جاتا۔

کریگ نے بتایا کہ ان کے کئی ساتھی قیدیوں کو دورانِ قید سزائے موت دی گئی، اور ایک مخصوص طریقہ کار کے تحت قیدیوں کو پہلے خاندانی ملاقات کے بہانے لے جایا جاتا ہے اور بعد میں ان کی سزائے موت پر عمل کیا جاتا ہے۔رپورٹس کے مطابق جیل ماضی میں فضائی حملوں کی زد میں بھی رہی ہے، جس کے بعد صورتحال مزید غیر محفوظ ہو گئی۔ قیدیوں نے بتایا کہ جیل جنگی زون کے قریب ہونے کی وجہ سے وہ مسلسل خوف اور دباؤ میں رہتے ہیں۔لنڈسے فورمین نے اپنے ڈائری نوٹس میں لکھا کہ انہیں احساس ہو رہا ہے کہ وہ طویل عرصے تک قید رہ سکتے ہیں، جبکہ قیدیوں نے برطانوی حکومت سے فوری اور واضح سفارتی اقدامات کا مطالبہ کیا ہے۔

ان کے اہل خانہ کا کہنا ہے کہ برطانوی حکومت کی طرف سے نجی سفارتکاری کافی نہیں، بلکہ ایران پر کھلا اور مسلسل دباؤ ضروری ہے تاکہ ان کی رہائی ممکن بنائی جا سکے۔برطانوی دفتر خارجہ نے اس کیس کو “انتہائی افسوسناک اور ناقابلِ قبول” قرار دیتے ہوئے کہا ہے کہ وہ دونوں شہریوں کی رہائی کے لیے سفارتی کوششیں جاری رکھے ہوئے ہے۔موجودہ حالات میں برطانوی جوڑے نے خدشہ ظاہر کیا ہے کہ جیل میں جاری پرتشدد واقعات اور سیاسی کشیدگی ان کی زندگی کے لیے سنگین خطرہ بن چکی ہے، جبکہ ان کے اہل خانہ مسلسل ان کی فوری رہائی کا مطالبہ کر رہے ہیں۔

برطانیہ میں ایک سابق کنزرویٹو کونسلر فلپ ینگ (49) نے عدالت میں بچوں کی فحش تصاویر بنانے کا جرم قبول کر لیا ہے۔ اس سے قبل وہ اپنی اہلیہ کے خلاف ایک دہائی سے زائد عرصے (2010 سے 2024) تک جنسی تشدد اور دیگر سنگین جرائم سے متعلق 48 الزامات بھی تسلیم کر چکا ہے۔

فلپ ینگ، جو 2007 سے 2010 تک برطانوی شہر سوِنڈن کی مقامی کونسل میں کنزرویٹو پارٹی کے کونسلر رہے، پر اپنی سابقہ اہلیہ جوآنے ینگ (48) کے ساتھ زیادتی، جنسی تشدد، اور نشہ آور دوا دے کر جنسی عمل پر مجبور کرنے جیسے سنگین الزامات عائد کیے گئے تھے۔ متاثرہ خاتون نے اپنی شناخت ظاہر کرنے کا قانونی حق بھی ترک کر دیا ہے۔مزید الزامات میں بچوں کی فحش تصاویر بنانا (3 الزامات)،ممنوعہ مواد رکھنا (1 الزام)،انتہائی فحش مواد اپنے پاس رکھنا (4 الزامات)ویوئر ازم کے 14 الزامات،ریپ کے 11 الزامات،نشہ آور دوا دینے کے 11 الزامات،جنسی حملے اور دیگر جرائم کے متعدد الزامات شامل ہیں،

یہ کیس عدالت میں زیر سماعت ہے، جہاں ملزم نے ویڈیو لنک کے ذریعے پیش ہو کر تمام 56 الزامات میں جرم قبول کر لیا۔ جج پال ڈگڈیل نے کہا ہے کہ ملزم کے اعتراف کے بعد اب اس کا باقاعدہ ٹرائل نہیں ہوگا۔
اس کیس میں مزید پانچ مرد بھی ملوث ہیں جن پر متاثرہ خاتون کے خلاف جنسی جرائم کے الزامات ہیں۔ ان میں سے ایک ڈین ہیملٹن (47) پہلے ہی کچھ الزامات قبول کر چکا ہے جبکہ باقی ملزمان مقدمے کا سامنا کر رہے ہیں، جو آئندہ اکتوبر میں ہائی کورٹ میں پیش کیا جائے گا۔

ایرانی وزیرخاجہ عباس عراقچی نے کہا ہے کہ سفارتکاری کا راستہ کھلا رکھنےکو تیار ہیں لیکن امریکا کو دھمکی آمیز لہجہ رویہ بدلنا ہوگا۔

ایران کے وزیر خارجہ عباس عراقچی نے سعودی عرب، قطر، ترکیے، مصر، عراق اور آذر بائیجان کے وزرائے خارجہ سے ٹیلیفون پر رابطے کیے اور انہیں امریکا اور اسرائیل کے ساتھ جنگ کے خاتمے کے لیے ایران کے اقدامات سے آگاہ کیا، ایران سفارت کاری کا راستہ کھلا رکھنے کو تیار ہے لیکن شرط یہ ہے کہ امریکا کو دھمکی آمیز لہجہ اور توسیع پسندانہ رویہ بدلنا ہوگا۔

ادھر ایرانی وزارت خارجہ کا کہنا ہے امریکا سے مذاکرات میں پاکستان ہی باضابطہ ثالث ہے، مذاکرات کے انعقاد کا فیصلہ ہوا تو باضابطہ طور پر بتایا جائے گا۔